2025-26 മാർക്കറ്റിംഗ് സീസണിൽ നിശ്ചയിച്ച അസംസ്കൃത ചണത്തിന്റെ മിനിമം താങ്ങുവില (MSP) യ്ക്ക് പ്രധാനമന്ത്രി ശ്രീ നരേന്ദ്ര മോദിയുടെ അധ്യക്ഷതയിൽ ചേർന്ന സാമ്പത്തിക കാര്യ മന്ത്രിസഭാ സമിതി (CCEA) അംഗീകാരം നൽകി .
2025-26 സീസണിലെ അസംസ്കൃത ചണത്തിന്റെ (TD-3 ഗ്രേഡ്) കുറഞ്ഞ താങ്ങുവില ക്വിന്റലിന് 5,650/- രൂപയായി നിശ്ചയിച്ചു. ഇത് അഖിലേന്ത്യാ ശരാശരി ഉൽപാദന ചെലവിനേക്കാൾ 66.8 ശതമാനം വരുമാനം ഉറപ്പാക്കും. 2018-19 ലെ ബജറ്റിൽ സർക്കാർ പ്രഖ്യാപിച്ചതുപോലെ അഖിലേന്ത്യാ ശരാശരി ഉൽപാദന ചെലവിന്റെ 1.5 മടങ്ങെങ്കിലും കുറഞ്ഞ താങ്ങുവില നിശ്ചയിക്കുക എന്ന തത്വവുമായി യോജിച്ചതാണ് 2025-26 മാർക്കറ്റിംഗ് സീസണിലെ അസംസ്കൃത ചണത്തിന്റെ അംഗീകൃത എംഎസ്പി.
2024-25 ലെ മുൻ മാർക്കറ്റിംഗ് സീസണിനെ അപേക്ഷിച്ച് 2025-26 മാർക്കറ്റിംഗ് സീസണിലെ അസംസ്കൃത ചണത്തിന്റെ എംഎസ്പി ക്വിന്റലിന് 315 രൂപ വർദ്ധിപ്പിച്ചു. 2014-15 ൽ 2400 രൂപയിൽ നിന്ന് 2025-26 ൽ 5,650 രൂപയായി അസംസ്കൃത ചണത്തിന്റെ എംഎസ്പി കേന്ദ്ര ഗവണ്മെന്റ് ഉയർത്തിയപ്പോൾ, ക്വിന്റലിന് 3250 രൂപ (2.35 മടങ്ങ്) വർദ്ധനവാണ് രേഖപ്പെടുത്തിയത്.
2014-15 മുതൽ 2024-25 വരെയുള്ള കാലയളവിൽ ചണം കർഷകർക്ക് നൽകിയ എംഎസ്പി തുക 1300 കോടി രൂപയായിരുന്നെങ്കിൽ 2004-05 മുതൽ 2013-14 വരെയുള്ള കാലയളവിൽ 441 കോടി രൂപ മാത്രമായിരുന്നു എം എസ് പി ഇനത്തിൽ കർഷകർക്ക് നൽകിയത്.
രാജ്യത്തെ 40 ലക്ഷം കർഷക കുടുംബങ്ങളുടെ ഉപജീവനമാർഗം നേരിട്ടോ അല്ലാതെയോ ചണ വ്യവസായത്തെ ആശ്രയിച്ചിരിക്കുന്നു. ഏകദേശം 4 ലക്ഷം തൊഴിലാളികൾക്ക് ചണ മില്ലുകളിൽ നേരിട്ട് തൊഴിൽ ലഭിക്കുകയും ചണ വ്യാപാരം നടത്തുകയും ചെയ്യുന്നു. കഴിഞ്ഞ വർഷം 1,70,000 കർഷകരിൽ നിന്നാണ് ചണം സംഭരിച്ചത്. ചണ കർഷകരിൽ 82% പശ്ചിമ ബംഗാളിൽ നിന്നുള്ളവരും, ബാക്കിയുള്ളവരിൽ 9% വീതം അസമിലും ബീഹാറിലും നിന്നുള്ളവരാണ്.
താങ്ങുവില സംബന്ധിച്ച പ്രവർത്തനങ്ങൾ ഏറ്റെടുക്കുന്നതിനുള്ള കേന്ദ്ര ഗവണ്മെന്റ് നോഡൽ ഏജൻസിയായി ജൂട്ട് കോർപ്പറേഷൻ ഓഫ് ഇന്ത്യ (ജെസിഐ) തുടരുകയും, അത്തരം പ്രവർത്തനങ്ങളിൽ എന്തെങ്കിലും നഷ്ടം ഉണ്ടാവുകയാണെങ്കിൽ അത് കേന്ദ്ര ഗവണ്മെന്റ് പൂർണ്ണമായും തിരികെ നൽകുകയും ചെയ്യും.
