അസമിൽ ബ്രഹ്മപുത്ര നദിക്കടിയിലൂടെ, ഓരോന്നിലും രണ്ടുവരി വീതമുള്ള ഇരട്ടക്കുഴൽ TBM റോഡ് തുരങ്കം നിർമിക്കുന്നതിനു കേന്ദ്രമന്ത്രിസഭയുടെ അംഗീകാരം; ഒരു കുഴലിൽ റെയിൽവേ അടിസ്ഥാനസൗകര്യങ്ങൾ ഉൾപ്പെടുത്താനും വ്യവസ്ഥ; പദ്ധതിയുടെ ആകെ ദൈർഘ്യം 33.7 കിലോമീറ്റർ

പ്രധാനമന്ത്രി ശ്രീ നരേന്ദ്ര മോദി അധ്യക്ഷനായ സാമ്പത്തിക കാര്യങ്ങൾക്കായുള്ള കേന്ദ്രമന്ത്രിസഭാസമിതി, അസമിലെ NH-15-ലുള്ള ഗോഹ്‌പുർമുതൽ 715-ാം സെക്ഷനിലെ നുമലിഗഢ് വരെ നാലുവരി പ്രവേശന നിയന്ത്രിത ഗ്രീൻഫീൽഡ് കണക്റ്റിവിറ്റി നിർമിക്കുന്നതിന് ഇന്നലെ അംഗീകാരം നൽകി. ബ്രഹ്മപുത്ര നദിക്കടിയിലൂടെയുള്ള 15.79 കിലോമീറ്റർ ദൈർഘ്യമുള്ള റോഡ്-റെയിൽ തുരങ്കം ഉൾപ്പെടെയുള്ള ഈ പദ്ധതി എൻജിനിയറിങ് പ്രൊക്യുർമെന്റ് കൺസ്ട്രക്ഷൻ (EPC) രീതിയിലാണ് നടപ്പാക്കുന്നത്. 18,662 കോടി രൂപയാണ് പദ്ധതിയുടെ ആകെ മൂലധനച്ചെലവ്.

നിലവിൽ, NH-715-ലെ നുമലിഗഢും NH-15-ലെ ഗോഹ്‌പുരും തമ്മിലുള്ള ദൂരം NH-52-ലെ സിൽഘാട്ടിന് സമീപമുള്ള കാലിയാഭംഭോറ റോഡ് പാലം വഴി 240 കിലോമീറ്ററാണ്. നുമലിഗഢ്, കാസിരംഗ ദേശീയോദ്യാനം, ബിശ്വനാഥ് ടൗൺ എന്നിവയിലൂടെ കടന്നുപോകുന്ന ഈ യാത്രയ്ക്ക് ഏകദേശം 6 മണിക്കൂർ സമയം എടുക്കും. ഈ വെല്ലുവിളികൾ പരിഹരിക്കുന്നതിനായി, ബ്രഹ്മപുത്ര നദിക്ക് അടിയിലൂടെയുള്ള റോഡ്-റെയിൽ തുരങ്കം ഉൾപ്പെടെ ഗോഹ്‌പുർ മുതൽ നുമലിഗഢ് വരെ നാലുവരി പ്രവേശന നിയന്ത്രിത ഗ്രീൻഫീൽഡ് കണക്റ്റിവിറ്റി വികസിപ്പിക്കാനാണു നിർദേശം. ഇന്ത്യയിലെ ആദ്യത്തെയും ലോകത്തിലെ രണ്ടാമത്തെയും വെള്ളത്തിനടിയിലൂടെയുള്ള റോഡ്-റെയിൽ തുരങ്കമായിരിക്കും ഇത്. അസം, അരുണാചൽ പ്രദേശ്, നാഗാലാൻഡ്, മറ്റ് വടക്കുകിഴക്കൻ സംസ്ഥാനങ്ങൾ എന്നിവയ്ക്ക് ഈ പദ്ധതി വലിയ പ്രയോജനം നൽകും. ഇത് ചരക്കുനീക്കത്തിന്റെ കാര്യക്ഷമത വർധിപ്പിക്കുകയും ലോജിസ്റ്റിക്സ് ചെലവു കുറയ്ക്കുകയും മേഖലയിലെ സാമൂഹ്യ-സാമ്പത്തിക വളർച്ചയ്ക്കു കരുത്തുപകരുകയും ചെയ്യും.

ഈ പദ്ധതിയുടെ വിന്യാസം രണ്ട് പ്രധാന ദേശീയ പാതകളെയും (NH-15, NH-715) രണ്ട് റെയിൽപ്പാതകളെയും തമ്മിൽ ബന്ധിപ്പിക്കുന്നു. ഗോഹ്‌പുർ ഭാഗത്ത് NFR രംഗിയ ഡിവിഷന് കീഴിലുള്ള രംഗിയ-മുകോങ്‌സെലെക് റെയിൽവേ സെക്ഷനും, നുമലിഗഢ് ഭാഗത്ത് ടിൻസുക്കിയ ഡിവിഷന് കീഴിലുള്ള ഫർകാറ്റിങ്-മരിയാനി ലൂപ്പ് ലൈൻ സെക്ഷനുമാണ് ഈ പദ്ധതിയുമായി കൂട്ടിയിണക്കപ്പെടുന്നത്. അസമിലുടനീളമുള്ള പ്രധാന സാമ്പത്തിക-സാമൂഹ്യ-ലോജിസ്റ്റിക്സ് കേന്ദ്രങ്ങളിലേക്ക് തടസ്സമില്ലാത്ത സമ്പർക്കസൗകര്യം ഈ പദ്ധതി ഉറപ്പാക്കുന്നു. കൂടാതെ, 11 സാമ്പത്തിക കേന്ദ്രങ്ങൾ, 3 സാമൂഹ്യകേന്ദ്രങ്ങൾ, 2 വിനോദസഞ്ചാര കേന്ദ്രങ്ങൾ, 8 ലോജിസ്റ്റിക്സ് കേന്ദ്രങ്ങൾ എന്നിവയെ തമ്മിൽ ബന്ധിപ്പിക്കുന്നതിലൂടെ ബഹുതല സംയോജനം ഇത് മെച്ചപ്പെടുത്തും. 4 പ്രധാന റെയിൽവേ സ്റ്റേഷനുകൾ, 2 വിമാനത്താവളങ്ങൾ, 2 ഉൾനാടൻ ജലപാതകൾ എന്നിവയിലേക്കുള്ള സമ്പർക്കസൗകര്യം വർധിപ്പിക്കുന്നതിലൂടെ മേഖലയിലെ ചരക്കുനീക്കവും യാത്രക്കാരുടെ സഞ്ചാരവും കൂടുതൽ വേഗത്തിലാക്കാൻ ഇത് സഹായിക്കും.

പദ്ധതി പൂർത്തിയാകുന്നതോടെ, തന്ത്രപരമായ നീക്കങ്ങളിലും മേഖലയിലെ സാമ്പത്തിക വളർച്ചയിലും ഇത് നിർണായക പങ്ക് വഹിക്കും. പ്രധാന സാമ്പത്തിക കേന്ദ്രങ്ങൾ തമ്മിലുള്ള ബന്ധം കൂടുതൽ മെച്ചപ്പെടുത്തുന്നതിനും വ്യാപാരത്തിനും വ്യവസായ വികസനത്തിനുമായി പുതിയ വഴികൾ തുറന്നുനൽകുന്നതിനും ഇത് സഹായിക്കും. കൂടാതെ, ഏകദേശം 80 ലക്ഷം പേർക്ക് നേരിട്ടും അല്ലാതെയും ഈ പദ്ധതിയിലൂടെ തൊഴിൽ ലഭിക്കും. ഇത് സമീപ പ്രദേശങ്ങളിൽ വളർച്ചയുടെയും വികസനത്തിന്റെയും ഐശ്വര്യത്തിന്റെയും പുതിയ വാതായനങ്ങൾ തുറക്കുകയും ചെയ്യും.

ഇടനാഴിയുടെ ഭൂപടം: