પ્રધાનમંત્રી શ્રી નરેન્દ્ર મોદીએ આજે નવી દિલ્હીમાં 7, લોક કલ્યાણ માર્ગ પર પ્રધાનમંત્રી મુદ્રા યોજનાના 10 વર્ષ પૂર્ણ થવાના પ્રસંગે મુદ્રા યોજનાના લાભાર્થીઓ સાથે વાર્તાલાપ કર્યો હતો. તેમણે ઉપસ્થિત તમામ લોકોનો હૃદયપૂર્વક આભાર માન્યો હતો અને મહેમાનોનું સ્વાગત કરવાના સાંસ્કૃતિક મહત્વ અને તેમની હાજરીથી ઘરમાં આવતી પવિત્રતા પર ભાર મૂક્યો હતો. તેમણે સહભાગીઓને તેમના અનુભવો જણાવવા આમંત્રણ આપ્યું હતું. શ્રી મોદીએ પાલતુ પ્રાણીઓ, દવાઓ અને સેવાઓનો પુરવઠો પૂરો પાડનાર ઉદ્યમી સાથે વાતચીત કરતાં પડકારજનક સમયમાં કોઈની ક્ષમતામાં વિશ્વાસ ધરાવતાં લોકો પ્રત્યે કૃતજ્ઞતા વ્યક્ત કરવાનાં મહત્ત્વ પર ભાર મૂક્યો હતો. તેમણે લાભાર્થીને લોનને મંજૂરી આપનારા બેંક અધિકારીઓને આમંત્રિત કરવા અને લોનને કારણે થયેલી પ્રગતિ દર્શાવવા જણાવ્યું હતું. શ્રી મોદીએ ભારપૂર્વક જણાવ્યું હતું કે, આ પ્રકારનાં પગલાંથી તેમનાં વિશ્વાસને સ્વીકારવાની સાથે-સાથે મોટાં સ્વપ્નો જોવાની હિંમત કરનારી વ્યક્તિઓને ટેકો આપવાનાં તેમનાં નિર્ણયમાં આત્મવિશ્વાસ પણ વધશે. તેમણે વધુમાં નોંધ્યું હતું કે, તેમના સમર્થનના પરિણામો દર્શાવવાથી નિ:શંકપણે તેઓ વિકાસ અને સફળતાને પ્રોત્સાહન આપવામાં તેમના યોગદાન પર ગર્વ અનુભવે છે.
કેરળનાં એક ઉદ્યોગસાહસિક શ્રી ગોપી કૃષ્ણ સાથે વાત કરતાં પ્રધાનમંત્રીએ પ્રધાનમંત્રી મુદ્રા યોજનાની પરિવર્તનકારી અસર પર પ્રકાશ પાડ્યો હતો, જેણે તેમને સફળ ઉદ્યોગસાહસિક બનવા સક્ષમ બનાવ્યાં હતાં, જેમાં તેમણે રોજગારીની તકો ઊભી કરવાની સાથે-સાથે ઘરો અને ઓફિસો માટે પુનઃપ્રાપ્ય ઊર્જાનાં સમાધાનો પર ધ્યાન કેન્દ્રિત કર્યું હતું. પ્રધાનમંત્રીએ મુદ્રા લોન વિશેની જાણકારી મળતાં દુબઈમાં પોતાની કંપનીમાંથી રાજીનામું આપવાનો નિર્ણય લીધા પછી લાભાર્થીઓની સફરની નોંધ લીધી હતી. તેમણે નોંધ્યું હતું કે, પ્રધાનમંત્રી સૂર્ય ઘર પહેલ હેઠળ સૌર સ્થાપનો બે દિવસની અંદર પૂર્ણ થઈ ગયા હતા. તેમણે પ્રધાનમંત્રી સૂર્ય ઘર પહેલના લાભાર્થીઓની પ્રતિક્રિયાઓ વિશે પણ સાંભળ્યું હતું અને નોંધ્યું હતું કે, કેરળમાં ભારે વરસાદ અને ગીચ વૃક્ષોના આવરણ જેવા પડકારો છતાં હવે ઘરોમાં નિઃશુલ્ક વીજળીનો આનંદ મળે છે. શ્રી કૃષ્ણએ નોંધ્યું હતું કે વીજળીનું બિલ, જે અગાઉ ₹૩,૦૦૦ આસપાસ હતું તે હવે ઘટીને ₹240-₹250 થઈ ગયું છે, જ્યારે તેમની માસિક આવક ₹2.5 લાખ કે તેથી વધુ થઈ ગઈ છે.
પ્રધાનમંત્રીએ છત્તીસગઢના રાયપુરથી હાઉસ ઑફ પુચકાના સ્થાપક અને મહિલા ઉદ્યોગસાહસિક સાથે વાતચીત કરી હતી, જેમણે કાફેના સફળ વ્યવસાયની સ્થાપના માટે ઘરે બેઠાં રસોઈ બનાવવા સુધીની તેમની પ્રેરક સફર અંગે જણાવ્યું હતું. તેમણે જણાવ્યું હતું કે નફાના માર્જિન અને ફૂડ કોસ્ટ મેનેજમેન્ટના સંશોધનએ આ ઉદ્યોગસાહસિક સફળતામાં નિર્ણાયક ભૂમિકા ભજવી હતી. તેમણે વધુમાં ઉમેર્યું હતું કે, યુવાનોના મનમાં ભય છે, તેમણે જણાવ્યું હતું કે, ઘણા લોકો જોખમ લેવાને બદલે નોકરીમાં સ્થાયી થવાનું પસંદ કરે છે. તેના જવાબમાં પ્રધાનમંત્રીએ જોખમ લેવાની ક્ષમતાનાં મહત્ત્વ પર ભાર મૂક્યો હતો અને જણાવ્યું હતું કે, 23 વર્ષની ઉંમરે હાઉસ ઑફ પુચકાનાં સ્થાપકે જોખમ લેવાની તેમની ક્ષમતાનો અને પોતાનાં વ્યવસાયનાં નિર્માણ માટે પોતાનાં સમયનો અસરકારક રીતે ઉપયોગ કર્યો હતો. લાભાર્થીએ રાયપુરના મિત્રો, કોર્પોરેટ જગત અને વિદ્યાર્થીઓ વચ્ચેની ચર્ચા પર ટિપ્પણી કરી હતી અને ઉદ્યોગસાહસિકતા વિશે તેમની જિજ્ઞાસા અને પ્રશ્નોની નોંધ લીધી હતી. તેમણે વધુમાં સરકારી યોજનાઓ અંગે યુવાનોમાં જાગૃતિના અભાવ પર પ્રકાશ પાડ્યો હતો. જે કોલેટરલની આવશ્યકતા વિના ભંડોળ પૂરું પાડે છે. તેમણે મુદ્રા લોન અને પીએમઇજીપી લોન જેવી યોજનાઓ સંભવિતતા ધરાવતા લોકો માટે નોંધપાત્ર તકો પૂરી પાડવા બદલ આભાર વ્યક્ત કર્યો હતો તથા યુવાનોને આ યોજનાઓ પર સંશોધન કરવા અને સાહસિક પગલાં લેવા માટે પ્રોત્સાહિત કર્યા હતા અને જણાવ્યું હતું કે, વૃદ્ધિ અને સફળતા મેળવવા ઇચ્છુક લોકો માટે કોઈ બંધન નથી.
અન્ય લાભાર્થી, બારામુલ્લા, કાશ્મીરના બેક માય કેકના માલિક શ્રી મુદાસિર નક્શબંદીએ નોકરી શોધનારથી નોકરી આપનાર બનવા સુધીની પોતાની સફર શેર કરતા કહ્યું કે તેમણે બારામુલ્લાના દૂરના વિસ્તારોમાંથી 42 લોકોને સ્થિર રોજગાર પૂરો પાડ્યો છે. મુદ્રા લોન મેળવતા પહેલા પ્રધાનમંત્રીએ તેમની કમાણી વિશે પૂછ્યું, જેના જવાબમાં મુદાસિરએ કહ્યું કે તેઓ હજારોમાં કમાતા હતા, પરંતુ તેમની ઉદ્યોગસાહસિક યાત્રાએ હવે તેમને લાખો અને કરોડો કમાવી દીધા છે. પ્રધાનમંત્રીએ મુદાસિરના વ્યવસાયિક સંચાલનમાં UPIના વ્યાપક ઉપયોગનો સ્વીકાર કર્યો. તેમણે મુદાસિરના અવલોકનની નોંધ લીધી કે 90% વ્યવહારો UPI દ્વારા થાય છે, જેનાથી ફક્ત 10% રોકડ હાથમાં રહે છે.
ત્યારબાદ પ્રધાનમંત્રીએ શ્રી સુરેશની પ્રેરણાદાયી સફર સાંભળી, જેઓ વાપીમાં નોકરીથી સેલવાસમાં સફળ ઉદ્યોગસાહસિક બન્યા. સુરેશે કહ્યું કે 2022માં, તેમને સમજાયું કે માત્ર નોકરી પૂરતી નથી અને તેમણે પોતાનો વ્યવસાય શરૂ કરવાનું નક્કી કર્યું. તેમણે કહ્યું કે મારી સફળતા પછી હવે મારા કેટલાક મિત્રો પોતાનું સાહસ શરૂ કરવા માટે મુદ્રા લોન માટે અરજી કરવાનું વિચારી રહ્યા છે. પ્રધાનમંત્રીએ ભાર મૂક્યો કે આવી સફળતાની વાર્તાઓનો પ્રભાવ અન્ય લોકોને ઉદ્યોગસાહસિકતા તરફ હિંમતભેર પગલાં ભરવા માટે પ્રેરણા આપે છે.
રાયબરેલીની એક મહિલા ઉદ્યોગસાહસિકે તેમના નેતૃત્વ હેઠળ MSMEને આપવામાં આવેલા સાથસહકાર બદલ આભાર વ્યક્ત કર્યો હતો. તેમણે લાઇસન્સ અને ભંડોળ મેળવવાની સરળતા પર ટિપ્પણી કરી, જે અગાઉ પડકારજનક હતી, અને વિકસિત ભારતના નિર્માણમાં ફાળો આપવાનું વચન આપ્યું હતું. પ્રધાનમંત્રીએ તેમની ભાવનાત્મક જુબાનીને સ્વીકારી હતી અને માસિક ટર્નઓવર રૂ. 2.5 થી રૂ. 3 લાખના ટર્નઓવર સાથે બેકરી વ્યવસાય ચલાવવામાં તેમની સફળતાની નોંધ લીધી હતી, જેણે સાતથી આઠ વ્યક્તિઓને રોજગારી પૂરી પાડી હતી.
મધ્યપ્રદેશના ભોપાલથી શ્રી લવકુશ મહેરાએ 2021માં ₹5 લાખની પ્રારંભિક લોન લઈને ફાર્માસ્યુટિકલ બિઝનેસ શરૂ કર્યો હતો. શરૂઆતની આશંકાઓ છતાં, તેમણે તેમની લોન વધારીને ₹9.5 લાખ કરી અને ₹50 લાખથી વધુનું ટર્નઓવર હાંસલ કર્યું, જે પહેલા જ વર્ષે 12 લાખ રૂપિયા હતું. પ્રધાનમંત્રીએ ભારપૂર્વક જણાવ્યું હતું કે, મુદ્રા યોજના કોઈ ચોક્કસ જૂથ પૂરતી મર્યાદિત નથી, પણ તેનો ઉદ્દેશ યુવાનોને તેમના પોતાના પગ પર ઊભા રહેવા સક્ષમ બનાવવાનો છે. તેમણે લવકુશની તાજેતરની સિદ્ધિઓ પર ટિપ્પણી કરી, જેમાં ₹34 લાખનું ઘર ખરીદવું અને મહિને ₹1.5 લાખથી વધુની કમાણીનો સમાવેશ થાય છે, જે તેની અગાઉની નોકરીની સરખામણીએ ₹60,000થી ₹70,000ની કમાણી કરતા નોંધપાત્ર ઉછાળો છે. પ્રધાનમંત્રીએ તેમને અભિનંદન આપ્યાં હતાં અને સફળતા હાંસલ કરવામાં સખત મહેનતની ભૂમિકાનો સ્વીકાર કર્યો હતો. તેમણે લાભાર્થીઓને મુદ્રા લોન અને તેના લાભો વિશે લોકો સુધી વાત વધુ ફેલાવવાનો આગ્રહ કર્યો હતો.
ત્યારબાદ પ્રધાનમંત્રીએ ગુજરાતનાં ભાવનગરનાં એક યુવાન ઉદ્યોગસાહસિકની પ્રેરક સફર સાંભળી હતી, જેમણે 21 વર્ષની વયે આદિત્ય લેબની સ્થાપના કરી હતી. મેકટ્રોનિક્સના અંતિમ વર્ષના વિદ્યાર્થી, આ ઉદ્યોગ સાહસિકે કિશોર શ્રેણી હેઠળની રૂ. 2 લાખની મુદ્રા લોનનો સફળતાપૂર્વક ઉપયોગ કરીને થ્રીડી પ્રિન્ટિંગ, રિવર્સ એન્જિનિયરિંગ, રેપિડ પ્રોટોટાઇપિંગ અને રોબોટિક્સમાં બિઝનેસ શરૂ કર્યો હતો. પ્રધાનમંત્રીએ ઉદ્યોગ સાહસિકના સમર્પણની નોંધ લીધી, અઠવાડિયાના દિવસોમાં કોલેજ અને સપ્તાહના અંતે વ્યવસાયિક કામગીરીને સંતુલિત કરવી, પરિવારના ટેકા સાથે રિમોટલી કામ કરતી વખતે દર મહિને ₹30,000 થી ₹35,000ની કમાણી કરે છે.
મનાલીની એક મહિલા ઉદ્યોગસાહસિકે સફળ વ્યવસાય ચલાવવા માટે શાકભાજીના બજારમાં કામ કરવાની પોતાની વાત શેર કરી. તેમણે જણાવ્યું હતું કે, તેમણે વર્ષ 2015-16માં રૂ. 2.5 લાખની મુદ્રા લોનથી શરૂઆત કરી હતી, જે તેમણે અઢી વર્ષમાં ચૂકવી દીધી હતી. ત્યાર પછીની ₹5 લાખ, 10 લાખ અને ₹15 લાખની લોન લઈને તેમણે શાકભાજીની દુકાનથી રેશનની દુકાન સુધી પોતાનો ધંધો વિસ્તાર્યો અને વાર્ષિક ₹10થી 15 લાખની આવક મેળવી. પ્રધાનમંત્રીએ તેમનાં દ્રઢ નિશ્ચય અને દેશભરનાં ઉદ્યોગસાહસિકોને સશક્ત બનાવવામાં મુદ્રા યોજનાની સકારાત્મક અસરની પ્રશંસા કરી હતી.
પ્રધાનમંત્રીએ આંધ્રપ્રદેશની એક મહિલા ઉદ્યોગસાહસિકની પ્રેરણાદાયી સફર પણ સાંભળી હતી. જેઓ ગૃહિણીમાંથી જૂટની થેલીઓનો સફળ વ્યવસાય કરવા તરફ વળ્યાં હતાં. તેમણે નોંધ્યું હતું કે, વર્ષ 2019માં ગ્રામીણ સ્વરોજગાર તાલીમ સંસ્થામાં તાલીમ મેળવ્યા પછી તેમણે કોઈ પણ પ્રકારની જામીનગીરી વિના કેનેરા બેંક પાસેથી રૂ. 2 લાખની મુદ્રા લોન મેળવી હતી. પ્રધાનમંત્રીએ તેમની દ્રઢતા અને તેમની સંભવિતતામાં બેંકનાં વિશ્વાસની નોંધ લીધી હતી. તેમણે શણના ફેકલ્ટી મેમ્બર અને ઉદ્યોગસાહસિક તરીકેની તેમની બેવડી ભૂમિકાને સ્વીકારી હતી અને રોજગાર અને કૌશલ્ય વિકાસ દ્વારા ગ્રામીણ મહિલાઓને સશક્ત બનાવવાના તેમના પ્રયાસોની પ્રશંસા કરી હતી. પ્રધાનમંત્રીએ ઉદ્યોગસાહસિકતા અને સ્વનિર્ભરતાને પ્રોત્સાહન આપવામાં મુદ્રા યોજનાની પરિવર્તનશીલ અસર પર ટિપ્પણી કરી હતી.
પ્રધાનમંત્રીએ મુદ્રા યોજનાની નાગરિકો, ખાસ કરીને મહિલાઓના સશક્તિકરણ પર અને સમગ્ર ભારતમાં ઉદ્યોગ સાહસિકતાને પ્રોત્સાહન આપવા પર થયેલી પરિવર્તનશીલ અસર વિશે પ્રકાશ પાડ્યો હતો. તેમણે ભારપૂર્વક જણાવ્યું હતું કે, આ યોજનાએ કેવી રીતે હાંસિયામાં ધકેલાઇ ગયેલી અને આર્થિક રીતે વંચિત પૃષ્ઠભૂમિની વ્યક્તિઓને નાણાકીય સહાય પૂરી પાડી છે, જેથી તેઓ ગેરન્ટી કે વિસ્તૃત પેપરવર્કની જરૂર વિના પોતાનો વ્યવસાય શરૂ કરી શકે છે. શ્રી મોદીએ મુદ્રા યોજના દ્વારા લાવવામાં આવેલી મૌન ક્રાંતિ પર ટિપ્પણી કરી હતી અને ઉદ્યોગસાહસિકતા પ્રત્યે સામાજિક દ્રષ્ટિકોણમાં નોંધપાત્ર પરિવર્તનની નોંધ લીધી હતી. તેમણે ભારપૂર્વક જણાવ્યું હતું કે, આ યોજનાથી મહિલાઓને માત્ર નાણાકીય સહાય જ નહીં, પણ તેમનાં વ્યવસાયોમાં વૃદ્ધિ કરવા અને આગળ વધવાની તકોનું સર્જન કરીને મહિલાઓને સશક્ત બનાવવામાં આવી છે. તેમણે ધ્યાન દોર્યું હતું કે, આ યોજનાનો સૌથી વધુ લાભ મેળવનારી મહિલાઓમાં સામેલ છે, જે લોનની અરજીઓ, મંજૂરીઓ અને ઝડપી પુનઃચૂકવણીમાં મોખરે છે.
પ્રધાનમંત્રી શ્રી નરેન્દ્ર મોદીએ મુદ્રા લોનનાં જવાબદાર ઉપયોગ મારફતે વ્યક્તિઓમાં સ્થાપિત થતી શિસ્ત પર પ્રકાશ પાડ્યો હતો. તેમણે નોંધ્યું હતું કે, આ યોજના જીવન અને કારકિર્દીનું નિર્માણ કરવાની તક પ્રદાન કરે છે, ત્યારે ભંડોળનાં દુરુપયોગ કે બિનઉત્પાદક પ્રયાસોને નિરુત્સાહિત કરે છે. પ્રધાનમંત્રીએ ધ્યાન દોર્યું હતું કે મુદ્રા યોજના હેઠળ ભારતના નાગરિકોને ગેરંટીની જરૂરિયાત વિના જ રૂ. 33 લાખ કરોડનું વિતરણ કરવામાં આવ્યું છે. તેમણે ભારપૂર્વક જણાવ્યું હતું કે, આ રકમ અભૂતપૂર્વ છે અને સામૂહિક રીતે ધનિક વ્યક્તિઓને આપવામાં આવતી કોઈપણ નાણાકીય સહાય કરતાં વધારે છે. તેમણે દેશના પ્રતિભાશાળી યુવાનોમાં વિશ્વાસ વ્યક્ત કર્યો હતો, જેમણે ભંડોળનો અસરકારક રીતે ઉપયોગ રોજગારીનું સર્જન કરવા અને અર્થતંત્રને વેગ આપવા માટે કર્યો છે.
શ્રી મોદીએ નોંધ્યું હતું કે, મુદ્રા યોજના મારફતે રોજગારીનું સર્જન આર્થિક વૃદ્ધિમાં નોંધપાત્ર પ્રદાન કરે છે. તેમણે નોંધ્યું હતું કે, સામાન્ય નાગરિકોની આવકમાં વધારો થયો છે, જેનાથી તેઓ તેમનાં જીવનધોરણમાં સુધારો કરી શકે છે અને તેમનાં બાળકો માટે શિક્ષણમાં રોકાણ કરી શકે છે. તેમણે આ યોજના દ્વારા લાવવામાં આવેલા સામાજિક લાભોને સ્વીકાર્યા હતા.
સરકારની કટિબદ્ધતા પર પ્રતિબિંબિત કરતાં પ્રધાનમંત્રીએ નોંધ્યું હતું કે, પરંપરાગત અભિગમોથી વિપરીત, તેમનું વહીવટીતંત્ર આ યોજનાનાં અમલીકરણનાં 10 વર્ષ પછી સક્રિયપણે પ્રતિસાદ મેળવી રહ્યું છે. તેમણે રાષ્ટ્રવ્યાપી લાભાર્થીઓ અને જૂથો સાથે પરામર્શ કરીને, સુધારણા માટેની તકોની ઓળખ કરીને અને વધુ સફળતા માટે જરૂરી સુધારાઓનો અમલ કરીને યોજનાની પ્રગતિની સમીક્ષા કરવાનાં મહત્ત્વ પર ભાર મૂક્યો હતો.
મુદ્રા લોનનો વ્યાપ વધારવા માટે સરકાર દ્વારા દર્શાવવામાં આવેલા નોંધપાત્ર વિશ્વાસને રેખાંકિત કરતા, જે શરૂઆતમાં રૂ. 50,000 થી રૂ. 5 લાખ સુધીની હતી, જે હવે રૂ. 20 લાખ સુધી પહોંચી ગઈ છે, શ્રી મોદીએ નોંધ્યું હતું કે આ વિસ્તરણ ભારતના નાગરિકોની ઉદ્યોગસાહસિકતાની ભાવના અને ક્ષમતાઓમાં મૂકવામાં આવેલા વિશ્વાસને પ્રતિબિંબિત કરે છે, જે યોજનાના સફળ અમલીકરણ દ્વારા મજબૂત થયું છે.
મુદ્રા યોજનાનો લાભ લેવા અને પોતાનું સાહસ શરૂ કરવા માટે અન્ય લોકોને પ્રોત્સાહિત કરવાના મહત્વ પર ભાર મૂકીને શ્રી મોદીએ વ્યક્તિઓને ઓછામાં ઓછા પાંચથી દસ અન્ય લોકોને પ્રેરિત કરવા અને ટેકો આપવા વિનંતી કરી હતી. જેનાથી તેમની વચ્ચે આત્મવિશ્વાસ અને આત્મનિર્ભરતા વધશે. તેમણે ભારપૂર્વક જણાવ્યું હતું કે, આ યોજના હેઠળ 52 કરોડ લોનનું વિતરણ કરવામાં આવ્યું છે, જે વૈશ્વિક સ્તરે અપ્રતિમ સિદ્ધિ છે.
ગુજરાતમાં તેમના કાર્યકાળને યાદ કરીને શ્રી મોદીએ "ગરીબ કલ્યાણ મેળા"નો ઉલ્લેખ કર્યો હતો. જેમાં પ્રેરક શેરી નાટકોએ લોકોને ગરીબીમાંથી બહાર નીકળવા માટે પ્રોત્સાહિત કર્યા હતા. તેમણે નાણાકીય સ્વતંત્રતા પ્રાપ્ત કર્યા પછી વ્યક્તિઓ દ્વારા તેમના સરકારી લાભોને સમર્પિત કરવા, તેમના પરિવર્તનને પ્રદર્શિત કરવા વિશે એક કથા શેર કરી હતી. તેમણે ગુજરાતના એક આદિવાસી જૂથની પ્રેરણાદાયી વાર્તા વર્ણવી હતી, જેણે થોડી લોન લઈને પરંપરાગત સંગીત રજૂ કરવાથી માંડીને એક વ્યાવસાયિક બેન્ડની રચના કરી હતી. આ પહેલથી તેમની નાણાકીય સ્થિતિમાં સુધારો થયો જ નહીં, પરંતુ નાના પ્રયત્નો કેવી રીતે નોંધપાત્ર ફેરફારો તરફ દોરી શકે છે તે પણ પ્રકાશિત કર્યું. તેમણે નોંધ્યું હતું કે, પરિવર્તનની આ પ્રકારની ગાથાઓ તેમને પ્રેરિત કરે છે અને રાષ્ટ્રનિર્માણમાં સામૂહિક પ્રયાસોની સંભવિતતાને પ્રતિબિંબિત કરે છે.
શ્રી મોદીએ લોકોની આકાંક્ષાઓ અને સંજોગોનો અભ્યાસ કરવા અને તેનું સમાધાન કરવાનાં સાધન સ્વરૂપે મુદ્રા યોજનામાં પોતાની માન્યતાનો પુનરોચ્ચાર કર્યો હતો. તેમણે યોજનાની સફળતામાં વિશ્વાસ વ્યક્ત કર્યો હતો અને લાભાર્થીઓને સમાજમાં પ્રદાન કરવાથી પ્રાપ્ત સંતોષ પર ભાર મૂકીને સમાજને પાછું આપવા વિનંતી કરી હતી.
આ વાતચીત દરમિયાન કેન્દ્રીય નાણાં રાજ્ય મંત્રી શ્રી પંકજ ચૌધરી પણ ઉપસ્થિત રહ્યા હતા.
