টাইমছ নাউ সন্মিলনত ভাষণ প্ৰদান কৰি প্ৰধানমন্ত্ৰী মোদীয়ে কয় যে চৰকাৰে কৰদাতাসকল হাৰাশাস্তিৰ সন্মুখীন হোৱাটো নিবিচাৰে৷ তেওঁ কয় যে পূৰ্বে ভাৰতৰ দমনশীল প্ৰক্ৰিয়াচালিত কৰ ব্যৱস্থা এতিয়া নাগৰিক অনুকূল হিচাপে বিবেচিত হৈছে৷
প্ৰধানমন্ত্ৰীয়ে জিএছটি, এইবাৰৰ বাজেটত সন্নিৱিষ্ট কৰা বৈকল্পিক আয়কৰ শ্লেব আৰু ঔদ্যোগিক কৰৰ হ্ৰাসৰ দৰে সংশোধনীমূলক ব্যৱস্থাসমূহৰ বিষয়ে আলোকপাত কৰে৷ তেওঁ কয় যে চৰকাৰে পূৰ্বৰ গড় জিএছটি হাৰ ১৪.৪%ৰ পৰা ১১.৮%লৈ হ্ৰাস কৰিছে৷ প্ৰধানমন্ত্ৰীয়ে বৈষম্যতা তথা হাৰাশাস্তি নোহোৱা কৰিবলৈ আয়কৰ মূল্যায়নৰ মানৱ হস্তক্ষেপবিহীন প্ৰক্ৰিয়াকৰণৰ ক্ষেত্ৰত চৰকাৰৰ প্ৰয়াসসমূহৰ বিষয়েও উল্লেখ কৰে৷
প্ৰধানমন্ত্ৰী মোদীয়ে কৰ আদায়ৰ প্ৰযোজনীয়তা তথা ই আন্তঃগাঁথনি বিকাশ লগতে প্ৰাথমিক সা-সুবিধাসমূহৰ বিকাশত কিদৰে অৱদান আগবঢ়াব পাৰে সেই বিষয়ে উল্লেখ কৰে৷ দেশৰ বিকাশৰ বাবে জনসাধাৰণক কৰ আদায় দিবলৈ আহ্বান জনাই প্ৰধানমন্ত্ৰী মোদীয়ে কয়, ‘‘তিনি কোটিত কৈও অধিক লোকে ব্যৱসায়িক কাৰণত অথবা পৰ্যটক হিচাপে বিদেশলৈ যাত্ৰা কৰে৷ বহু লোকে যান-বাহন ক্ৰয় কৰিছে৷ কিন্তু পৰিস্থিতি এনেকুৱা হৈছে যে ১৩০ কোটি জনতাৰ কেৱল ১.৫ কোটিয়েহে কৰ আদায় দিছে৷’’ তেওঁ ইয়াকো কয়, ‘‘এয়া অবিশ্বাস্য যদিও দেশৰ কেৱল ২,২০০ পেছাদাৰী লোকেহে তেওঁলোকৰ বাৰ্ষিক আয় ১ কোটি টকা বুলি ঘোষণা কৰিছে!’’
