ଟାଇମ୍ସ ନାଓ ସମ୍ମିଳନୀକୁ ସମ୍ବୋଧିତ କରି ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ ,ପ୍ରତ୍ୟେକ ସରକାର ଟିକସ ବ୍ୟବସ୍ଥାରେ ସୁଧାର ଆଣିବା ଲାଗି କୁଣ୍ଠାବୋଧ କରିଥାନ୍ତି । ଏହି କାରଣ ପାଇଁ ବହୁବର୍ଷ ଧରି ଏଥିରେ କୌଣସି ପରିବର୍ତ୍ତନ ହୋଇନଥିଲା । ବର୍ତ୍ତମାନ ଆମେ ଏକ ପ୍ରକ୍ରିୟା ଆଧାରିତ ଟିକସ ବ୍ୟବସ୍ଥାରୁ ନାଗରିକ କୈନ୍ଦ୍ରିକ ଟିକସ ବ୍ୟବସ୍ଥା ଦିଗରେ ଅଗ୍ରସର ହେଉଛୁ ।
ପ୍ରଧାନମନ୍ତ୍ରୀ ମୋଦୀ ଜିଏସଟି ଭଳି ସୁଧାର ,ଚଳିତବର୍ଷର ବଜେଟରେ ବିକଳ୍ପ ଆୟକର ସ୍ଲାବ ଆରମ୍ଭ କରିବା ଏବଂ କର୍ପୋରେଟ ଟିକସରେ ହ୍ରାସ ଭଳି ବିଭିନ୍ନ ବିଷୟରେ ଆଲୋକପାତ କରିଛନ୍ତି । ସେ କହିଛନ୍ତି ଯେ ସରକାର ହାରାହାରି ଜିଏସଟି ହାରକୁ ହ୍ରାସ କରି 14.4% ରୁ 11.8% କରିଦେଇଛନ୍ତି । ଟିକସ ଚୋରି ଏବଂ ସଚ୍ଚୋଟ ଟିକସଦାତାଙ୍କ ଉପରେ ଏହାର ଦ୍ୱିଗୁଣିତ କୁପ୍ରଭାବ ସମ୍ପର୍କରେ ଚିନ୍ତା କରିବା ଲାଗି ପ୍ରଧାନମନ୍ତ୍ରୀ ପ୍ରତ୍ୟେକ ଭାରତୀୟଙ୍କୁ ଅନୁରୋଧ କରିଥିଲେ । ସେ ସମସ୍ତ ନାଗରିକମାନଙ୍କୁ ଉତ୍ତରଦାୟୀ ନାଗରିକ ହେବା ଏବଂ ନିଜର ଟିକସ ପଇଠ କରିବା ଲାଗି ଆହ୍ୱାନ କରିଥିଲେ ।
ପ୍ରଧାନମନ୍ତ୍ରୀ ମୋଦୀ ଟିକସ ପୈଠର ମହତ୍ୱ ବିଷୟରେ ମଧ୍ୟ ଉଲ୍ଲେଖ କରିଥିଲେ ଏବଂ ଏହା କିଭଳି ମୌଳିକ ଢାଞ୍ଚାର ବିକାଶ ସହିତ ସମସ୍ତଙ୍କ ପାଇଁ ମୌଳିକ ସୁବିଧାକୁ ସୁନିଶ୍ଚିତ କରିବାରେ ସାହାଯ୍ୟ କରୁଛି । ଲୋକମାନଙ୍କୁ ଦେଶର ବିକାଶ ପାଇଁ ଟିକସ ପୈଠ କରିବା ପାଇଁ ଆଗ୍ରହ କରି ,ପ୍ରଧାନମନ୍ତ୍ରୀ ମୋଦୀ କହିଛନ୍ତି ,''3 କୋଟିରୁ ଅଧିକ ଲୋକେ ବ୍ୟବସାୟ ଅବା ପର୍ଯ୍ୟଟକ ଭାବେ ବିଦେଶ ଯାଇଛନ୍ତି । ଅନେକ ଲୋକେ କାର କ୍ରୟ କରିଛନ୍ତି । କିନ୍ତୁ ଦୁଃଖର କଥା ଏହା ଯେ ,ଦେଶର 130 କୋଟି ଜନସଂଖ୍ୟାରୁ କେବଳ 1.5 କୋଟି ଲୋକେ ଟିକସ ପୈଠ କରିଛନ୍ତି । ସେ କହିଛନ୍ତି ଯେ , ଅବିଶ୍ୱସନୀୟ କିନ୍ତୁ ସତ୍ୟ ,କେବଳ 2200 ପେଶାଦାର 1 କୋଟି ଟଙ୍କାର ଆୟ ଘୋଷଣା କରିଥିଲେ ।
