نمسکار!
آپ سب کوآزادی کا امرت مہوتسو اورگجرات دیو کی بہت بہت مبارکباد۔
ہم سب اونٹاریو میں سرگرم سناتن مندر کلچرل سینٹر کے ذریعہ اد ا کئے جارہے کردار سے بخوبی واقف ہیں ، جو کینیڈا میں بھارت کی ثقافت اور بھارتی اقدار کو برقرار رکھنے میں ادا کررہا ہے۔میں نےاس کا کینیڈا کے اپنے دورے میں مشاہدہ کیا ہے کہ آپ اپنی ان کوششوں میں کتنے کامیاب رہے ہیں اور کس طرح آپ نے خوداپنا مثبت تاثر چھوڑا ہے۔ ہم کینیڈا میں 2015 کے اُس یادگار تجربے اور بھارت نژاد افرادکی محبت کو کبھی فراموش نہیں کرسکتے ۔ میں سناتن مندر کلچرل سینٹر اور اس اختراعی کوشش سے وابستہ سبھی لوگوں کو مبارکباد پیش کرتا ہوں ۔سناتن مندر میں سردار ولبھ بھائی پٹیل کا یہ مجسمہ ، نہ صرف ہماری ثقافتی اقدار کو مستحکم بنائے گا بلکہ یہ دونوں ملکوں کے درمیان خوشگوار تعلقات کی علامت بھی ہوگا۔
دوستو، دنیا میں، جہاں کہیں بھی کوئی ہندوستانی رہتا ہے ، چاہے وہ کتنی ہی نسلوں سے وہاں مقیم ہو ،اس کی بھارتیتا اور بھارت کے تئیں اس کی وفاداری میں ذرہ برابر بھی کمی نہیں آئی ہے۔جس کسی ملک میں بھی کوئی ہندوستانی رہتا ہے، وہ پوری لگن اور ایمانداری کے ساتھ اس ملک کی خدمت کرتا ہے اور وہ جمہوری اقدار اور فرائض کے تئیں ذمہ دار ی کا احساس ، جو کہ اس کے آباو اجداد بھارت سے لے کر آئے تھے، وہ اب بھی اس ہندوستانی کے دل کے کسی کونے میں زندہ ہیں اورہمیشہ زندہ رہیں گی۔
ایسا اس لئے ہے کہ بھارت ، ایک ملک ہونے کے ساتھ ساتھ ا یک عظیم روایت ،ایک نظریاتی مرکز اور ایک مقدس عہد پیمائی کی رسم ہے۔بھارت اس اعلیٰ سوچ کا مظہر ہے ، جو واسودیو کٹمبکم کی بات کرتی ہے۔ بھارت دیگر افراد کے نقصان کی قیمت پر خود اپنی فلاح وبہبود کے بارے میں نہیں سوچتا بلکہ بھارت پوری انسانیت اور پوری دنیا کی فلاح وبہبود کی خواہش کا اظہار کرتا ہے۔ یہی وجہ ہے کہ کینیڈا میں یا کسی بھی دیگر ملک میں جب ایک بھارتی ثقافت کووقف کوئی ابدی مندر تعمیر کیا جاتا ہے تو وہ اس ملک کی اقدار کو بھی مالامال کرتا ہے۔
اسی لئے اگر آپ کینیڈا میں بھارت کی آزادی کا امرت مہوتسو منارہے ہیں تو یہ جمہوریت کی مشترکہ میراث کا ایک جشن بھی ہے اور اس لئے میرا ماننا ہے کہ بھارت آزادی کا امرت مہوتسو کی اس تقریب سے کینیڈ ا کے عوام کو ، بھارت کو قریب سے دیکھنے اور سمجھنے کا ایک موقع بھی فراہم ہوگا۔
دوستو،
امرت مہوتسوسے وابستہ یہ تقریب ،سناتن مندر کلچرل سینٹر کی جائے وقوع اور سردار پٹیل کا مجسمہ ،یہ سبھی اپنے آپ میں ہندوستان کی ایک عظیم تصویر ہے۔ ہمارے مجاہدین آزادی نے جدوجہد آزادی میں کیا خواب دیکھا تھا ؟ انہوں نے ایک آزادملک کے لئے کس طرح جدوجہد کی ؟ ایک ہندوستان ، جو جدید ہو اور جو ترقی یافتہ ہو او ر اس کے ساتھ ایک ہندو ستان جو اپنے نظریات ، اپنی سوچ وفکر اور اپنے فلسفے کے توسط سے اپنی جڑوں سے منسلک ہو ! یہ وجہ ہے کہ سردار صاحب نے سو مناتھ مندر کو بحال کیا تاکہ ہندوستان کو اس کی ہزاروں سالہ میراث کی یاددہانی کرائی جاسکے ۔ جو آزادی کے بعد ایک نئے مقام پر کھڑی ہے۔ گجرات نے اس ثقافتی مہا یگیہ کا مشاہدہ کیا ہے۔ آج آزادی کا امرت مہوتسو میں، ہم اس جیسا ایک نیا ہندوستان تعمیر کرنے کا عہد کرتے ہیں۔ہم سردار صاحب کے اس خواب کو پورا کرنے کے عزم کا اعادہ کرتے ہیں۔اور یہ ‘‘مجسمہ اتحاد ’’ملک کے لئے ایک بڑی ترغیب ہے۔ ‘‘ مجسمہ اتحاد ’’ کی ایک علامت کے طور پر کینیڈا میں سردار پٹیل کا مجسمہ سناتن مندر کلچرل سینٹر میں نصب کیا جائے گا۔
دوستو!
آج کی یہ تقریب اس حقیقت کی ایک علامت ہے کہ ہندوستان کا امرت مہوتسو سنکلپ محض بھارت کی سرحدوں تک محدود نہیں ہے ۔ یہ عزائم دنیا بھر میں پھیل رہے ہیں اور پوری دنیا کو آپس میں جوڑ رہے ہیں ۔ آج جب ہم ‘‘ آتم نربھر بھارت ’’ مہم کو آؑگے لے جارہے ہیں ، ہم دنیا کی ترقی کے لئے نئے امکانات کاآغاز کرنے کی بھی بات کررہے ہیں۔ آج جب ہم یوگ کو مقبول عام بنانے کے لئے کوششیں کررہے ہیں ، ہم دنیا کے ہرشخص کے لئے ‘‘سروے سانتو نرامیئے’’ کی خواہشات کا بھی اظہار کررہے ہیں۔
آب وہوا کی تبدیلی اور دیر پاترقی جیسے موضوعات پر ہندوستان کی آواز پوری انسانیت کی بھی نمائندگی کررہی ہے۔اب وقت آگیا ہے کہ ہندوستان کی اس مہم کو آگے لے جایا جائے۔ہماری سخت محنت صرف ہمارے لئے نہیں ہے بلکہ تمام بنی نوع انسان کی فلاح و بہبود اور ہندوستان کی ترقی سے مربوط ہے اور ہمیں دنیا کو اس کا اعتراف کرانا ہوگا۔ آپ سبھی ہندوستانی افراد اور ہندوستان نژاد سبھی افراد کو اس سلسلے میں ایک زبردست کردار ادا کرنا ہوگا۔
امرت مہوتسو کی یہ تقریبات ،دنیاکےسامنے ہندوستان کی کوششوں اور ہندوستان کے نظریات کو پیش کرنے کا ایک ذریعہ ہونی چاہئے اور یہ ہماری ترجیح بھی ہونی چاہئے ۔میں پُر اعتماد ہو ں کہ اپنے ان نظریات کی پیروی کرکے ، ہم ایک نیا بھارت بھی تخلیق کریں گے اور ایک بہتر دنیا کے خواب کو بھی حقیقت کی شکل دیں گے ۔ یہ بات ذہن نشین کرتے ہوئے آپ سبھی کا بہت بہت شکریہ!
اعلان دستبرداری :یہ وزیراعظم کے کلمات کاتقریباََدرست ترجمہ ہے۔اصل کلمات ہندی میں پیش کئے گئے تھے۔
