نئی دہلی،16؍جنوری؍وزیراعظم نریندر مودی کَل، 17؍جنوری 2019 سے گجرات کا 3روزہ دورہ کریں گے۔اپنے اِس دورے کے دوران وہ گاندھی نگر، احمد آباد اور ہزیرہ کا دورہ کریں گے۔
کَل اپنی پہلی مصروفیت میں وزیراعظم نریندر مودی گاندھی نگر میں مہاتما مندر نمائش اور کنونشن سنٹر میں درخشاں گجرات عالمی تجارتی شو کا افتتاح کریں گے۔ یہاں ایک ہی جگہ 25سے زیادہ صنعتی اور تجارتی سیکٹروں کی نمائش کی جائے گی۔
شام کووزیراعظم احمد آباد میں سردار ولبھ بھائی پٹیل انسٹی ٹیوٹ آف میڈیکل سائنسز اینڈ ریسرچ کا افتتاح کریں گے۔یہ احمد آباد میونسپل کارپوریشن کےذریعے تعمیر کردہ جدیدترین سُپر اسپیشلٹی سرکاری اسپتال ہے، جو ایمبولینس سمیت تمام جدید سہولیات سے لیس ہے۔ 78میٹر اونچی یہ عمارت حقیقی طور پر صلاحیت اور معیار کی عکاس ہے۔
ڈیجیٹل انڈیا کے جذبے کے ساتھ یہ اسپتال مکمل طور پر کاغذ سے پاک ہوگا۔یہ اسپتال عام آدمی کو خدمات فراہم کرے گا اور آیوشمان بھارت کے ویژن میں مدد گار ہوگا۔
وزیراعظم اسپتال میں سہولیات کا معائنہ کریں گے اور ایک اجتما ع سے خطاب کریں گے۔ بعد میں شام میں وزیراعظم کے ہاتھوں احمد آباد شاپنگ فیسٹیول 2019 کا افتتاح کیا جائے گا۔ یہ فیسٹیول درخشاں کے ساتھ ساتھ منعقد کیاجا رہا ہے۔ وزیراعظم درخشاں گجرات احمد آباد شاپنگ فیسٹیول کے میسکاٹ کی بھی نقاب کشائی کریں گے۔ احمد آباد شاپنگ فیسٹیول 2019 بھارت میں اپنی نوعیت کاپہلا فیسٹیول ہے۔ یہ فیسٹیول شہر کی صنعتوں کو اپنی مصنوعات کی نمائش کرنے کا موقع فراہم کرے گا۔
وزیراعظم اس موقع پر ایک عوامی اجتماع سے بھی خطاب کریں گے۔
اگلے دن 18؍جنوری 2019 کو وزیراعظم گاندھی نگر میں مہاتما مندر نمائش و کنونشن سنٹر میں درخشاں گجرات کانفرنس کے 9ویں ایڈیشن کا افتتاح کریں گے۔درخشاں گجرات کانفرنس کا نظریہ 2003 میں وزیراعظم نریندر مودی نے پیش کیاتھا اور اُس وقت وہ گجرات کے وزیراعلیٰ تھے۔ اس کا مقصد گجرات کو ایک ترجیحی سرمایہ کاری کا مقام بنانا تھا۔ یہ کانفرنس عالمی سماجی-اقتصادی ترقی کے ایجنڈوں پر غوروخوض کرنے، ان میں ساجھیداری اور مؤثر ساجھیداری کو فروغ دینے کے لئے ایک پلیٹ فارم فراہم کرتی ہے۔
19؍جنوری 2019 کووزیراعظم ہزیرہ گَن فیکٹری کے قیام کے موقع پر ہزیرہ کا دورہ کریں گے۔ ہزیرہ سے وزیراعظم دادر ناگر حویلی میں سِلواسہ جائیں گے۔ وہ کئی ترقیاتی پروجیکٹوں کا افتتاح کریں گےاور سنگِ بنیاد رکھیں گے۔ اپنے دورے کے آخری مرحلے میں وزیراعظم 19؍جنوری کو ممبئی جائیں گے۔ وہاں وہ بھارتی سنیما کے قومی میوزیم کی نئی عمارت کا افتتاح کریں گے۔
