وزیر اعظم جناب نریندرمودی 19فروری 2021ء کو دن میں گیارہ بجے وشو بھارتی تقسیم اسناد کے جلسے سے خطاب کریں گے۔وہ یہ خطاب ویڈیو کانفرنسنگ کے ذریعے کریں گے۔مغربی بنگال کے گورنر اور وشوبھارتی کے ریکٹر جناب جگدیپ دھنکر ، مرکزی وزیر تعلیم ڈاکٹر رمیش پوکھریال‘نشنک’اور مرکزی وزیر مملکت برائے تعلیم جناب سنجے دھوترے بھی اس موقع پر موجود ہوں گے۔ اس تقریب کے دوران مجموعی طورپر 2535طالب علموں کو ڈگریوں سے نوازا جائے گا۔
وشو بھارتی کے بارے میں
وشو بھارتی کو 1921ء میں گرودیو رابندر ناتھ ٹیگور نے قائم کیا تھا۔یہ ملک کی قدیم ترین سینٹرل یونیورسٹی ہے۔مئی 1951ء میں وشو بھارتی کو ایک پارلیمانی ایکٹ کے ذریعے مرکزی یونیورسٹی اور ‘‘قومی اہمیت کا حامل ایک ادارہ’’قرار دیا گیا تھا۔اس یونیورسٹی نے ابتداء میں گرو دیو رابندر ناتھ ٹیگور کی بچوں کی تعلیم کی نفسیات کے مطابق تعلیم دینا شروع کیا تھا، مرحلہ وار اس یونیورسٹی نے جدید خطوط کی دیگر یونیورسٹیوں کی شکل اختیار کرلی۔ وزیر اعظم اس یونیورسٹی کے چانسلر بھی ہیں۔
