وزیر اعظم جناب نریندر مودی 30 نومبر کو صبح 11 بجے ویڈیو کانفرنسنگ کے ذریعے وِکست بھارت سنکلپ یاترا کے استفادہ کنندگان سے بات چیت کریں گے۔ وِکست بھارت سنکلپ یاترا ملک بھر میں شروع کی جا رہی ہے جس کا مقصد حکومت کی فلیگ شپ اسکیموں میں 100 فیصد عمل درآمد کے ہدف کو حاصل کرنا ہے تاکہ اس بات کو یقینی بنایا جا سکے کہ ان اسکیموں کے فائدے مقررہ وقت میں تمام مطلوبہ استفادہ کنندگان تک پہنچیں۔
وزیر اعظم کی یہ مسلسل کوشش رہی ہے کہ خواتین کی قیادت میں ترقی کو یقینی بنایا جائے۔ اس سمت میں ایک اور قدم اٹھاتے ہوئے وزیر اعظم پردھان منتری مہیلا کسان ڈرون کیندر کا آغاز کریں گے۔ یہ خواتین کے خود امدادی گروپس (ایس ایچ جیز) کو ڈرون فراہم کرے گا تاکہ اس ٹیکنالوجی کو ان کے ذریعہ معاش کی مدد کے لیے استعمال کیا جاسکے۔ اگلے تین سالوں کے دوران خواتین کے ایس ایچ جیز کو 15,000 ڈرون فراہم کیے جائیں گے۔ خواتین کو ڈرون اڑانے اور استعمال کرنے کی ضروری تربیت بھی فراہم کی جائے گی۔ اس اقدام سے زراعت میں ٹیکنالوجی کے استعمال کی حوصلہ افزائی ہوگی۔
صحت کی دیکھ بھال کو سستی اور آسانی سے قابل رسائی بنانا وزیر اعظم کے صحت مند ہندوستان کے وژن کا سنگ بنیاد رہا ہے۔ اس سمت میں ایک اہم اقدام جن اوشدھی کیندر کا قیام ہے تاکہ سستی قیمتوں پر ادویات دستیاب ہوسکیں۔ پروگرام کے دوران، وزیر اعظم ایمس، دیوگھر میں تاریخی 10,000 ویں جن اوشدھی کیندر کو وقف کریں گے۔ مزید برآں، وزیر اعظم ملک میں جن اوشدھی کیندروں کی تعداد کو 10,000 سے بڑھا کر 25,000 کرنے کے پروگرام کا بھی آغاز کریں گے۔
خواتین کے ایس ایچ جیز کو ڈرون فراہم کرنے اور جن اوشدھی کیندروں کی تعداد کو 10,000 سے بڑھا کر 25,000 کرنے کے ان دونوں اقدامات کا اعلان وزیر اعظم نے اس سال کے شروع میں یوم آزادی کی تقریر کے دوران کیا تھا۔ یہ پروگرام ان وعدوں کی تکمیل کی نشان دہی کرتا ہے۔
