نئی دہلی،18/ستمبر۔ وزیر اعظم جناب نریندر مودی نے اپنے پارلیما ی حلقے بنارس میں تقریباً نوے منٹ گزارے، جس کے دوران انھوں نے اسکولی بچوں سے گفتگو بھی کی۔ وارانسی کے گاؤں نرور کے ایک پرائمری اسکول کے جوشیلے بچوں نے وزیر اعظم کی آمد پر انتہائی جوش و مسرت کے ساتھ ان کا خیرمقدم کیا۔ وزیراعظم نے بھی ان بچوں کو وشوکرما جینتی کی مبارک باد دی۔ انھوں نے کہا کہ مختلف پیشوں کی تعلیم و تربیت حاصل کرنا بہت اہم بات ہے۔
وزیر اعظم نے کہا کہ جہاں اسکولی بچے ہوں وہاں لازمی ہے کہ سوال و جواب تو ہوتے ہی ہیں۔ انھوں نے بچوں سے زور دے کر کہا کہ سوال پوچھنے میں کبھی ڈرنا نہیں چاہئے، کیونکہ یہی پڑھنے اور سیکھنے کی کنجی ہے۔ وزیراعظم نے غیر منفعت بخش رضاکار تنظیم، ’’روم ٹو ریڈ‘‘ کے امداد یافتہ بچوں کے ساتھ وقت گزارا۔ بعد ازاں وزیراعظم نے وارانسی کے ڈی ایل ڈبلیو میں غریب اور سماج کے حاشئے پر پڑے طبقات کے بچوں سے بھی گفتگو کی۔ قابل ذکر ہے کہ کاشی ودیا پیٹھ ان بچوں کی امداد و معاونت کررہا ہے۔
وزیراعظم نے بچوں سے زور دے کر کہا کہ انھیں انتہائی محنت کے ساتھ پڑھنا چاہئے، لیکن اس کے ساتھ ہی کھیل کود میں بھی حصہ لینا چاہئے۔ بعد ازاں شام میں وزیراعظم نے اپنے پارلیمانی حلقے وارانسی کی سڑکوں سے ایک کار میں گزرتے ہوئے شہر کے ترقیاتی کاموں کا جائزہ لیا۔ انھوں نے اس موقع پر کچھ منٹ کاشی وشوناتھ مندر میں ٹھہرکر پرارتھنا بھی کی۔ اس کے ساتھ ہی وزیراعظم نے مندواڈیہہ ریلوے اسٹیشن کا بھی اچانک جائزہ لیا۔
