بھارت کی جی -20کی صدارت سے متعلق مختلف پہلوؤں پرتبادلہ ٔخیال کرنے کی غرض سے 5دسمبر کو ایک کل جماعتی میٹنگ کا انعقاد کیاگیا۔ وزیراعظم جناب نریندرمودی کی صدارت میں منعقد ہوئی اس میٹنگ میں بھارت کے سبھی علاقوں اورخطوں کی سیاسی پارٹیوں کے رہنماؤں نے سرگرمی سے شرکت کی ۔
وزیراعظم نے کہاکہ بھارت کی جی -20کی صدارت پورے ملک سے تعلق رکھتی ہے اوریہ پوری دنیا کے سامنے بھارت کی قوت کو اجاگرکرنے کاایک منفرد موقع ہے ۔ وزیراعظم جناب نریندرمودی نے اس بات کو بھی نمایاں کیا کہ آج دنیا بھر میں بھارت کے تئیں زبردست تجسس اورکشش پائی جاتی ہے ، جس کی بدولت بھارت کی جی -20کی صدارت کے لئے امکانات میں مزید اضافہ ہوتاہے ۔
وزیراعطم نے مل کرکام کرنے یعنی ٹیم ورک کی اہمیت پرزوردیااور جی -20کی مختلف تقریبات کے انعقاد میں سبھی رہنماؤں کا تعاون طلب کیا۔ انھوں نے اس بات کو اجاگرکیا کہ جی -20کی صدارت کی بدولت بھارت کے روایتی بڑے شہروں سے ہٹ کربھارت کے مختلف حصوں کو دنیا کے سامنے پیش کرنے کا موقع ملے گاْ اوراس طرح ہمارے ملک کے ہرحصے کی انفرادیت کو دنیا کے سامنے پیش کیاجاسکے گا۔
وزیراعظم نے بھارت کی جی -20کی صدارت کے دوران،بڑی تعداد میں بھارت کادورہ کرنے والے سیاحوں کے امکانات کو اجاگرکرتے ہوئے اس بات کونمایاں کیا کہ جن جن مقامات پرجی -20 کی میٹنگوں کاانعقاد کیاجائے گا، وہاں کی مقامی معیشتوں کو فروغ دینے اور سیاحت میں اضافے کا امکان پیداہوگا۔
وزیراعظم جناب نریندرمودی کے اظہارخیال کرنے سے پہلے ، مختلف سیاسی پارٹیوں کے لیڈروں نے بھارت کی جی -20 کی صدارت کے بارے میں اپنی بیش قیمتی آراء کااظہارکیا ۔ ان لیڈروں میں جناب جے پی نڈا ، جناب ملّیکاارجن کھڑگے ، محترمہ ممتا بنرجی ، جناب نوین پٹنائک ، جناب اروند کیجریوال ، جناب وائی ایس جگن موہن ریڈی ، جناب سیتارام یچوری ، جناب چندرابابونائیڈو، جناب ایم کے اسٹالن ، جناب کے پلانی سوامی ، جناب پشوپتی ناتھ پارس ، جناب ایکناتھ شنڈے ، جناب کے ایم قادرمحی الدین شامل ہیں ۔
اس میٹنگ سے وزیرداخلہ جناب امت شاہ اوروزیرخزانہ محترمہ سیتارمن نے بھی مختصر خطاب کیا۔ اس کے علاوہ بھارت کی جی -20 سے متعلق ترجیحات کا احاطہ کرنے والے پہلوؤں کے بارے میں ایک تفصیلی پریزینٹیشن بھی کیاگیا۔
اس میٹنگ میں شرکت کرنے والوں میں دیگر کے علاوہ مرکز ی وزراء جناب راجناتھ سنگھ ، جناب امت شاہ ،محترمہ نرملا سیتارمن ، ڈاکٹرایس جے شنکر ، جناب پیوش گوئل ، جناب پرہلاد جوشی ، جناب بھوپیندر یادواورسابق وزیراعظم جناب ایچ ڈی دیوی گوڑابھی شامل تھے ۔
