ଭାରତୀୟ ପ୍ରଶାସନିକ ସେବା 2016 ବ୍ୟାଚର ଅଧିକାରୀମାନେ ସହାୟକ ସଚିବ ଭାବେ ସେମାନଙ୍କ କାର୍ଯ୍ୟକାଳର ଅନ୍ତିମ ଅଧିବେଶନରେ ଆଜି ପ୍ରଧାନମନ୍ତ୍ରୀଙ୍କୁ ସାକ୍ଷାତ କରିବା ସହ ବିଭିନ୍ନ ଉପସ୍ଥାପନା କରିଛନ୍ତି ।
ଏହି ଅଧିମାରୀମାନଙ୍କ ପକ୍ଷରୁ ମୋଟ 8ଟି ଉପସ୍ଥାପନା କରାଯାଇଥିଲା । ବିଶେଷକରି କୃଷି କ୍ଷେତ୍ରରେ ଆୟକୁ ବୃଦ୍ଧି କରିବା, ମୃତ୍ତିକା ସ୍ୱାସ୍ଥ୍ୟ କାର୍ଡ, ଆପତ୍ତି ଅଭିଯୋଗର ସମାଧାନ, ନାଗରିକ-କୈନ୍ଦ୍ରିକ ସେବା, ଶକ୍ତି କ୍ଷେତ୍ରରେ ସଂସ୍କାର, ପର୍ଯ୍ୟଟନ ସୁବିଧାକରଣ, ଇ-ନିଲାମୀ ଏବଂ ସ୍ମାର୍ଟ ନଗର ବିକାଶ ସମାଧାନ ପନ୍ଥା ଏହା ମଧ୍ୟରେ ରହିଛି ।
ଏହି ଅବସରରେ ନିଜର ବକ୍ତବ୍ୟ ରଖି ପ୍ରଧାନମନ୍ତ୍ରୀ କହିଥିଲେ ଯେ, ସହାୟକ ସଚିବ ଭାବେ ନିଜ କ୍ୟାରିୟରର ପ୍ରାରମ୍ଭିକ ଜୀବନରେ ଏହିଭଳି କାର୍ଯ୍ୟକ୍ରମ ଉଭୟ କନିଷ୍ଠ ଓ ବରିଷ୍ଠ ଅଧିକାରୀମାନଙ୍କୁ ପରସ୍ପର ସହ ମିଶିବା ଓ ଭାବ ବିନିମୟ କରିବାର ସୁଯୋଗ ଦେଇଥାଏ । ଏହି କାର୍ଯ୍ୟକ୍ରମ ଅଧୀନରେ ବିଭିନ୍ନ ମନ୍ତ୍ରଣାଳୟ ସହ ସଂଲଗ୍ନ ହୋଇ ସେମାନେ ଶିଖିଥିବା କାର୍ଯ୍ୟ ଓ ଅନୁଭୂତି ପରବର୍ତ୍ତୀ ଜୀବନରେ କାର୍ଯ୍ୟରେ ଲଗାଇବାକୁ ପ୍ରଧାନମନ୍ତ୍ରୀ ସହାୟକ ସଚିବମାନଙ୍କୁ ଉତ୍ସାହିତ କରିଥିଲେ । ପ୍ରଧାନମନ୍ତ୍ରୀ କହିଥିଲେ ଯେ, ଜନସାଧାରଣ କଣ ଆଶା କରୁଛନ୍ତି ଏବଂ କଣ ସରକାରଙ୍କ ଠାରୁ ଚାହୁଞ୍ଚନ୍ତି ସେ ବିଷୟରେ ସେମାନେ ଅବଗତ ହେବାକୁ ପଡିବ । ଯେ କୌଣସି ପଦ ପଦବୀରେ ରହିଲେ ମଧ୍ୟ ସେମାନେ ନିଜର କାର୍ଯ୍ୟଧାରା ମାଧ୍ୟମରେ ଏହିସବୁ ଆଶା ଆକାଂକ୍ଷା ପୂରଣ ଲାଗି ଚେଷ୍ଟିତ ହେବା ଆବଶ୍ୟକ ।
ପ୍ରଧାନମନ୍ତ୍ରୀ ଏହି ଅଧିକାରୀମାନଙ୍କୁ ନିଜ ନିଜ ପରିବେଶରେ ରହୁଥିବା ଜନସାଧାରଣଙ୍କ ସହ ଅହରହ ଯୋଗାଯୋଗରେ ରହିବାକୁ ପରାମର୍ଶ ଦେଇଥିଲେ । ଜନସାଧାରଣଙ୍କ ସହ ସମ୍ପର୍କ ସ୍ଥାପନରେ ବିକାଶ ଘଟିଲେ ଅନେକ କାର୍ଯ୍ୟକ୍ରମ ଓ ପ୍ରୟାସରେ ସଫଳତା ହାସଲ ହୋଇଥାଏ ଯାହାକି ଏକ ପ୍ରମୁଖ ପ୍ରଶାସନିକ ଆବଶ୍ୟକତା ।
ପ୍ରଧାନମନ୍ତ୍ରୀ ଯୁବ ଅଧିକାରୀମାନଙ୍କ ଦ୍ଵାରା କରାଯାଇଥିବା ଉପସ୍ଥାପନାଗୁଡିକୁ ବେଶ ପସନ୍ଦ କରିଥିଲେ ।
