ନମସ୍କାର ।
କୋରିଆରେ ବସବାସ କରୁଥିବା ଭାରତୀୟ ଭାଇ ଓ ଭଉଣୀମାନେ, ପୁଣିଥରେ ଆପଣମାନଙ୍କୁ ନମସ୍କାର । ବହୁ ଆଡମ୍ବର ସହିତ ମୋତେ ସ୍ୱାଗତ କରୁଥିବାରୁ ମୁଁ ଆପଣମାନଙ୍କ ପ୍ରତି କୃତଜ୍ଞତା ଜଣାଉଛି ।
ମୋତେ କୁହାଯାଇଛି ଯେ ଆପଣ ଅନେକ ବେଳ ହେଲାଣି ଏଠାରେ ଅପେକ୍ଷା କରିଛନ୍ତି । ଯାହାହେଉ, ବାହାରେ ଥଣ୍ଡା ପରିବେଶ ଅଛି, ତେଣୁ ଭିତରେ ଭଲ ଲାଗୁଥିବ । ପ୍ରତ୍ୟେକ ଜିନିଷରେ ଆମକୁ ସକାରାତ୍ମକ ଭାବନା ରଖିବା ଦରକାର । ଆପଣମାନଙ୍କର ଏହି ଭଲପାଇବା ପାଇଁ ମୁଁ ଆପଣଙ୍କ ପାଖରେ ନତମସ୍ତକ ।
ବନ୍ଧୁଗଣ, ଏହା ମୋ ପାଇଁ ଦ୍ୱିତୀୟ ସୁଯୋଗ, ଯେତେବେଳେ ମୁଁ କୋରିଆ ଆସି ଭାରତୀୟ ସମୁଦାୟଙ୍କ ସହ ସାକ୍ଷାତ କରୁଛି । ଭାରତ ଏବଂ କୋରିଆ ସଂପର୍କଗୁଡିକର ଆଧାର କେବଳ ବ୍ୟବସାୟିକ ସଂପର୍କ ନୁହେଁ, ଏହାର ମୁଖ୍ୟ ଆଧାର ହେଉଛି ଲୋକଙ୍କ ଠାରୁ ଲୋକଙ୍କ ସହ ସଂପର୍କ,ଦେଶରୁ ଆସିଥିବା ଅବା ଏଠାରେ ବସବାସ କରୁଥିବା ଭାରତୀୟ ଆମ ସଂପର୍କର ମୂଳଦୂଆ । ଜଣେ ରାଜଦୂତ ଥାଆନ୍ତି କିନ୍ତୁ ରାଷ୍ଟ୍ରଦୂତ ଅନେକ । ଭାରତ ଏବଂ କୋରିଆ ମଧ୍ୟରେ ଆତ୍ମୀୟତାର ଏହି ସଂପର୍କ ନୂଆ ନୁହେଁ ।
ପ୍ରାଚୀନ କାଳରେ ଭାରତର ରାଜକୁମାରୀ ସୂର୍ଯ୍ୟରତ୍ନା ହଜାର ହଜାର କିଲୋମିଟର ଯାତ୍ରା କରି ଏଠାରେ ପହଞ୍ଚିଥିଲେ । ତାଙ୍କର ବିବାହ ଏଠାକାର ରାଜାଙ୍କ ସହ ସଂପନ୍ନ ହୋଇଥିଲା । ଆଜି ମଧ୍ୟ ଲକ୍ଷ ଲକ୍ଷ କୋରିଆ ନିବାସୀ ନିଜକୁ ତାଙ୍କର ବଂଶଧର ମାନୁଛନ୍ତି ଏବଂ ଏଥିପାଇଁ ମୁଁ ଏହା କହିପାରିବି ଯେ କୋରିଆ ସମାଜ ସହିତ ଆମ ଲୋକମାନଙ୍କର ରକ୍ତ ସଂପର୍କ ରହିଛି ।
ଆଜି ମଧ୍ୟ ଅଯୋଧ୍ୟାରେ ରାଜକୁମାରୀଙ୍କ ପ୍ରତିମୂର୍ତ୍ତି ରହିଛି ଏବଂ ପୂର୍ବ ବର୍ଷ ଦିପାବଳୀ ଅବସରରେ ଏଠାକାର ପ୍ରଥମ ମହିଳା କିମ ଜୋଙ୍ଗ ସୁକ ଏହାର ସାକ୍ଷୀଥିଲେ । ବହୁତ ବଡ କାର୍ଯ୍ୟକ୍ରମ ଅଯୋଧ୍ୟାରେ ହୋଇଥିଲା, ବୋଧହୁଏ ଏଠାରେ ମଧ୍ୟ ଟିଭି ମାଧ୍ୟମରେ ଟେଲିକାଷ୍ଟ ହୋଇଥିବ । ବୋଧହୁଏ ଯେଉଁ ସମୟରେ ଭଗବାନ ରାମଜୀ ଫେରିଥିଲେ ଏବଂ ଅଯୋଧ୍ୟା ଆଲୋକିତ ହୋଇଥିଲା, ହଜାର ବର୍ଷ ପରେ ସେହିଭଳି ଅଯୋଧ୍ୟା ପୁନର୍ବାର ଆଲୋକିତ ହୋଇଥିଲା ।
ବନ୍ଧୁଗଣ, ଭାରତ ଏବଂ କୋରିଆର ସମ୍ପର୍କକୁ ବୌଦ୍ଧ ଧର୍ମ ମଧ୍ୟ ଅନେକ ଶକ୍ତି ପ୍ରଦାନ କରିଛି, ଶକ୍ତିଶାଳୀ କରିଛି । ଜଣେ କୋରିଆଇ ବୌଦ୍ଧ ଭିକ୍ଷୁ ହାଇଚୋ 8ମ ଶତାବ୍ଦୀରେ ଭାରତ ଯାତ୍ରା କରିଥିଲେ ।
ବନ୍ଧୁଗଣ, ଏହା ଜାଣି ଖୁସି ଲାଗେ ଯେ କୋରିଆର ବିକାଶରେ ଆପଣ ସମସ୍ତଙ୍କର ବହୁତ ବଡ ଯୋଗଦାନ ରହିଛି । ଏଠାରେ ଭାରତୀୟ ମେଧାବୀ ଏବଂ କୌଶଳର ଅନେକ ସମ୍ମାନ ରହିଛି । ଆପଣ କୋରିଆରେ ଅନୁସନ୍ଧାନ ତଥା ନବାଚାର କ୍ଷେତ୍ରରେ ଯୋଗଦାନ କରୁଛନ୍ତି । ଭାରତରେ ରହି କୋରିଆ କଂପାନୀଗୁଡିକୁ ଆର ଏଣ୍ଡ ଡି ସୁବିଧା ପ୍ରଦାନ କରାଯାଉଛି । ଏହାବ୍ୟତୀତ ଭାରତୀୟ ଶିକ୍ଷାବିତ୍ତ, ଅନୁସନ୍ଧାନ ତଥା ଡାକ୍ତରୀ ପଢିଥିବା ଛାତ୍ରଛାତ୍ରୀମାନେ ଅଗ୍ରଣୀ କୋରିଆବିଶ୍ୱବିଦ୍ୟାଳୟଗୁଡିକରେ କାର୍ଯ୍ୟ କରୁଛନ୍ତି ଅବା ଶିକ୍ଷାଲାଭ କରୁଛନ୍ତି । ଏବଂ ଏଠାରେ ରହୁଥିବା ଭାରତୀୟ କୋରିଆର ଆର୍ଥିକ ସମୃଦ୍ଧି ସହିତ ଏଠାକାର ସଂସ୍କୃତି ଏବଂ ସାମାଜିକ ଜୀବନରେ ମଧ୍ୟ ଅଂଶଗ୍ରହଣ କରୁଛନ୍ତି ।
ବନ୍ଧୁଗଣ, କୋରିଆରେ ଯୋଗକୁ ଅନେକ ସମ୍ମାନ ଏବଂ ସ୍ନେହ ମଳିଛି । ଆପଣମାନେ କରୁଥିବେ,ମୋତେ ଜଣାନାହିଁ କିନ୍ତୁ ଯେତେବେଳେ ସାକ୍ଷାତ କରୁଥିବେ ସେତେବେଳେ ଲୋକମାନେ ତ ପଚାରୁଥିବେ ଯେ ଭାଇ ଆପଣ ଯୋଗ କଣ ଜାଣିଛନ୍ତି, ସେତେବେଳେ ଆପଣ କହୁଥିବେ ଯେ ନାକ ଧରି ବସିଯାଆନ୍ତୁ ।
ସିଓଲ, ବୁସାନ ତଥା ଅନ୍ୟ ସହରଗୁଡିକରେ ଦୁଇ ହଜାରରୁ ଅଧିକ ଲୋକ ଆନ୍ତଃରାଷ୍ଟ୍ରୀୟ ଯୋଗ ଦିବସରେ ମନଯୋଗ ଦେଇ, ଉତ୍ସାହର ସହିତ ଅଂଶଗ୍ରହଣ କରିଥିଲେ । କୋରିଆରେ ଆପଣମାନେ ହୋଲି, ଦିପାବଳୀ, ବୈଶାଖୀ – ଏକ ପ୍ରକାରର ସମସ୍ତ ଭାରତୀୟ ଉତ୍ସବଗୁଡିକୁ ପାଳନ କରିବା ସହିତ ସେଥିରେ କୋରିଆର ବନ୍ଧୁମାନଙ୍କୁ ସାମିଲ ମଧ୍ୟ କରୁଛନ୍ତି । ଏବେ ଏଠାକାର ସହରଗୁଡିକରେ ଭାରତୀୟ ରେଷ୍ଟୁରାଣ୍ଟକୁ ମଧ୍ୟ ସ୍ଥାନ ମିଳିବା ଆରମ୍ଭ ହୋଇସାରିଛି । ଏହା ସହିତ ଏଠାକାର ଖାଦ୍ୟ ସୂଚୀରେ ଭାରତୀୟ ଖାଦ୍ୟକୁ ମଧ୍ୟ ସ୍ଥାନିତ କରାଯାଇଛି । ଏଠାକାର ଲୋକମାନେ ମଧ୍ୟ ଏହାର ମାନେ କଣ ବୋଲି ଜାଣିଲେଣି ।
ଏଠାରେ ଭାରତୀୟ ଫିଲ୍ମଗୁଡିକ ଅତ୍ୟନ୍ତ ଲୋକପ୍ରିୟ ହେବାରେ ଲାଗିଛି । ଏବେ କୋରିଆର ପିଲାମାନଙ୍କ ମଧ୍ୟରେ କବାଡି-କବାଡି ଶୁଣିବାକୁ ମଧ୍ୟ ମିଳୁଛି, ଏଠାକାର ଲୋକମାନେ କବାଡି ବୋଲି କହୁଛନ୍ତି ନାଁ ? 2018ରେ ଏସିଆନ ଗେମ୍ସରେ କୋରିଆ ଟିମ ରୌପ୍ୟ ପଦକ ମଧ୍ୟ ଜିଣିଥିଲେ,ସେଥିପାଇଁ ମୁଁ ଏଠାକାର ସମସ୍ତ ଜନସାଧାରଣଙ୍କୁ ଅନେକ ଅନେକ ଶୁଭେଚ୍ଛା ଜଣାଉଛି ।
ବନ୍ଧୁଗଣ, ମୁଁ ପୂର୍ବରୁ ହିଁ କହିସାରିଛି ଯେ ରାଜଦୂତ ଜଣେ ଥାଆନ୍ତି କିନ୍ତୁ ପ୍ରତ୍ୟେକ ହିନ୍ଦୁସ୍ତାନୀ ଯେଉଁଠି ମଧ୍ୟ ଅଛନ୍ତି ସେମାନେ ହେଉଛନ୍ତି ଜଣେ ଜଣେ ରାଷ୍ଟ୍ରଦୂତ । ଆପଣ ଭାରତର ରାଷ୍ଟ୍ରଦୂତ । 30 ମିଲିୟନ ବିଦେଶୀ ଭାରତୀୟ, ସେମାନଙ୍କ କଠିନ ପରିଶ୍ରମ, ଅନୁଶାସନ ଦ୍ୱାରା ସମଗ୍ର ବିଶ୍ୱରେ ଦେଶପାଇଁ ସମ୍ମାନ ଆଣିଛନ୍ତି ଏବଂ ମୁଁ ଯେଉଁ ଦେଶକୁ ଯାଏ, ମୋତେ ଏହା ଶୁଣି ବହୁତ ଖୁସି ଲାଗେ ଯେ ଭାରତୀୟମାନଙ୍କର ପ୍ରତିଷ୍ଠା ଆଇନକୁ ସମ୍ମାନ ଦେଉଥିବା ନାଗରିକ ଭାବେ ଅତ୍ୟନ୍ତ ଗୌରବପୂର୍ଣ୍ଣ ଭାବେ ଉଲ୍ଲେଖ ହୋଇଥାଏ ।
ବନ୍ଧୁଗଣ, ଆମ ଦେଶ ପାଇଁ ଚଳିତ ବର୍ଷ ହେଉଛି ସ୍ୱତନ୍ତ୍ର, କାରଣ ? କାରଣ ? ଏଥିପାଇଁ ସ୍ୱତନ୍ତ୍ର ଯେ ରାଷ୍ଟ୍ରପିତା ମହାତ୍ମା ଗାନ୍ଧୀଜୀଙ୍କ 150ତମ ଜୟନ୍ତୀ ପାଳନ ହେବାକୁ ଯାଉଛି । ଏହା ଏକ ଏଭଳି ଅବସର ଯେତେବେଳେ ଆମେ ତାଙ୍କୁ ସ୍ମରଣ କରୁଛୁ, ତାଙ୍କ ଶିକ୍ଷା, ଦର୍ଶନ ଦ୍ୱାରା ପ୍ରେରିତ ହେଉଛୁ । ମହାତ୍ମା ଗାନ୍ଧୀଙ୍କ ଭଳି ଏତେ ବିଶାଳ ବ୍ୟକ୍ତିତ୍ୱ ବିଶ୍ୱ ମାନବ, ଯେ କି ସମଗ୍ର ସଂସାରରେ ମହାପୁରୁଷ ଭାବେ ପରିଚିତ ହେବା କଥା, ତାହା ଦୁର୍ଭାଗ୍ୟବଶତଃ ହୋଇପାରିନାହାଁନ୍ତି ।
ନେଲସନ ମଣ୍ଡେଲାଙ୍କୁ ସମଗ୍ର ବିଶ୍ୱ ଜାଣିଛି, ମାର୍ଟିନ ଲୁଥର କିଙ୍ଗଙ୍କୁ ଜାଣିଛନ୍ତି, କେନେଡୀଙ୍କୁ ଜାଣିଛନ୍ତି,ସମଗ୍ର ବିଶ୍ୱ ଏବେ ମଧ୍ୟ ଗାନ୍ଧୀଙ୍କ ବିଷୟରେ କୁହେଁ । କଣ ଆମର ଏହା ଦାୟିତ୍ୱ ନୁହେଁ ଯେ ଭାରତର ସୁଯୋଗ୍ୟ ଦାୟାଦ ମହାତ୍ମା ଗାନ୍ଧୀ, ସମଗ୍ର ଦୁନିଆର ପ୍ରତ୍ୟେକ ପିଲାଙ୍କ ମୁଖରେ ଗାନ୍ଧୀଜୀଙ୍କ ନାମ ହେବା ଆବଶ୍ୟକ, ଏହା ଆମ ସ୍ୱପ୍ନ ହେବା ଦରକାର ।
ସେ ବିଶ୍ୱ ମାନବ ଥିଲେ ଏବଂ ଆଜି ଯେତେବେଳେ ସମଗ୍ର ଦୁନିଆ ଅନେକ ଆହ୍ୱାନଗୁଡିକର ସମ୍ମୁଖୀନ ହେଉଛି ସେତେବେଳେ ମହାତ୍ମା ଗାନ୍ଧୀଙ୍କ ଦର୍ଶନ ଆହୁରି ମଧ୍ୟ ପ୍ରାସଙ୍ଗିକ ହୋଇଯାଏ । ବାପୁଙ୍କ ଜୀବନରେ ପ୍ରକୃତି ପ୍ରତି ବହୁତ ଶ୍ରଦ୍ଧା ଥିଲା, ତାଙ୍କର ମଧ୍ୟ ବହୁତ ବଡ ଭୂମିକା ଥିଲା । ନିଜ ଜୀବନରେ ପରିବେଶ ସହ ତାଳମେଳ ରକ୍ଷା କରିବା ପାଇଁ ଗୁରୁତ୍ୱ ପ୍ରଦାନ କରିଥିଲେ । କୋରିଆରେ ବାପୁଙ୍କ ପ୍ରତି ଏକ ଅନନ୍ୟ ଢଙ୍ଗରେ ଶ୍ରଦ୍ଧାଞ୍ଜଳି ଅର୍ପଣ କରାଯାଉଛି । ବାପୁଙ୍କ ସ୍ମରଣ ଉଦ୍ଦେଶ୍ୟରେ ଆମେ ସମସ୍ତେ କୋରିଆରେ 150ଟି ଚାରା ରୋପଣ କରିବାକୁ ଯାଉଛୁ ।
ବନ୍ଧୁଗଣ, କୋରିଆ ସହିତ ପ୍ରତ୍ୟେକ ଦିନ ଆମର ସଂପର୍କ ମଜବୁତ ହୋଇଚାଲିଛି, ବୃଦ୍ଧି ପାଇ ଚାଲିଛି ଏବଂ ସୁଦୃଢତାର ସହ ଆଗକୁ ଅଗ୍ରସର ହେଉଛି । କୋରିଆ ଏବଂ ଭାରତ ଏହି ସଂପୂର୍ଣ୍ଣ କ୍ଷେତ୍ରରେ ଶାନ୍ତି, ସ୍ଥିରତା ଏବଂ ସମୃଦ୍ଧିକୁ ପ୍ରୋତ୍ସାହିତ କରିବା ପାଇଁ ପାଦକୁ ପାଦ ମିଶାଇ ଆଗକୁ ଅଗ୍ରସର ହେଉଛୁ । ଆମ ମଧ୍ୟରେ ଏକ ସ୍ପଷ୍ଟ ଏବଂ ସରଳ ଅଂଶୀଦାରିତା ରହିଛି । ଆମେ ମିଳିମିଶି ପରସ୍ପରକୁ ଲାଭ ପ୍ରଦାନ କରିପାରିବୁ ।
ଏହି ଭାଗୀଦାରିତାକୁ ଭାରତୀୟ କଂପାନୀଗୁଡିକର କୋରିଆରେ ଉପସ୍ଥିତି ଆହୁରି ମଜଭୁତ କରୁଛି । କୋରିଆର ବ୍ରାଣ୍ଡ ଭାରତର ପ୍ରତ୍ୟେକ ଘରର ଏକ ଅଂଶ ହୋଇସାରିଛି । ଏଲଜି, ସାମସଙ୍ଗ, ହୁଣ୍ଡାଇ ଭଳି କୋରିଆ ବ୍ରାଣ୍ଡ ଭାରତର ଗାଁ ଗାଁରେ ପହଞ୍ଚି ସାରିଛି, ଲୋକମାନଙ୍କର ନିତି ଦିନିଆ ଆଲୋଚନାର ଅଂଶବିଶେଷ ହୋଇପାରିଛି ।
ବନ୍ଧୁଗଣ, ଆଜି ସମଗ୍ର ସଂସାର ଭାରତ ଆଡକୁ ଆଶାଭରା ଦୃଷ୍ଟିରେ ଦେଖୁଛନ୍ତି । ଆମେ ଆଜି ଦୁନିଆରେ ସବୁଠାରୁ ଦୃତ ଗତିରେ ବୃଦ୍ଧି ହେଉଥିବା ଅର୍ଥବ୍ୟବସ୍ଥା ମଧ୍ୟରୁ ଅନ୍ୟତମ । ଆମ ଅର୍ଥବ୍ୟବସ୍ଥା ମଜବୁତ ହୋଇଛି । 2014 ପୂର୍ବରୁ ଆମେ ଏହା ଶୁଣୁଥିଲୁ ଯେ ଭାରତ କ୍ଷଣ ଭଙ୍ଗୁର,ଆମେ ତ ବୁଡିବୁ ସାଙ୍ଗ ତୁମକୁ ମଧ୍ୟ ନେଇ ବୁଡିବୁ । ଆଜି ବଡ ଅର୍ଥବ୍ୟବସ୍ଥାରେ ସମଗ୍ର ଦୁନିଆରେ ସବୁଠାରୁ ଦୃତ ଗତିରେ ଅଗ୍ରସର ହେଉଥିବା ଅର୍ଥବ୍ୟବସ୍ଥା ମଧ୍ୟରେ ଅନ୍ୟତମ ଏବଂ ଆଗାମୀ କିଛି ବର୍ଷ ମଧ୍ୟରେ ଭାରତ ପାଞ୍ଚ ଟ୍ରିଲିୟନ ଅର୍ଥବ୍ୟବସ୍ଥା ଥିବା ଦେଶ ଆଡକୁ ଦୃତ ଗତିରେ ଅଗ୍ରସର ହେଉଛି,ପାଞ୍ଚ ଟ୍ରିଲିୟନ କ୍ଳବରେ ଆମେ ସାମିଲ ହେବୁ, ସେହି ଦିନ ପାଇଁ ମଧ୍ୟ ଦୂରତ୍ୱ ବେଶୀ ନୁହେଁ । ଏବଂ 2014ରେ, ମୁଁ ଯେତେବେଳେ ଦାୟିତ୍ୱ ନେଲି ସେତେବେଳେ ସମଗ୍ର ବିଶ୍ୱରେ ଅର୍ଥନୀତି ଦୃଷ୍ଟିକୋଣରୁ ଆମେ 11 ନମ୍ବରରେ ଥିଲୁ, ଆପଣ ବିଶ୍ୱାସ କରନ୍ତୁ ଆଜି ଆମେ ଷଷ୍ଠ ସ୍ଥାନରେ ପହଞ୍ଚିସାରିଛୁ, ଏବଂପାଞ୍ଚ ନମ୍ବର ହେବା ପାଇଁ ବିଳମ୍ବ ହେବନାହିଁ । ଏବଂ ଆଗାମୀ ଦେଢ ଦଶନ୍ଧି ମଧ୍ୟରେ ଭାରତ ଶ୍ରେଷ୍ଠ ତିନିରେ ସ୍ଥାନ ପାଇବା ପାଇଁ ଆମେ ପ୍ରଚେଷ୍ଟାରତ ।
ବନ୍ଧୁଗଣ, ଭାରତରେ ବିଗତ ସାଢେ ଚାରି ବର୍ଷରେ ଆମେ ଜୀବନଧାରଣକୁ ସରଳ କରିବା ଏବଂ ସୁବିଧାରେ ବ୍ୟବସାୟକୁ ସୁନିଶ୍ଚିତ କରିବାରେ ପ୍ରଚେଷ୍ଟା କରିଛୁ । ନିରନ୍ତର ଚାଲିଥିବା ଆର୍ଥିକ ଏବଂ ସାମାଜିକ ସଂସ୍କାର ଯୋଗୁ ଆମେ ଏହି ସଫଳତା ପ୍ରାପ୍ତ କରିପାରିଛୁ । ସବୁଠାରୁ ବଡ ପରୋକ୍ଷ କର ସଂସ୍କାର, ବସ୍ତୁ ଏବଂ ସେବା ଟିକସ, ଜିଏସଟି ଆଜି ବ୍ୟବସ୍ଥାର ଅଂଶ ହୋଇସାରିଛି । ସର୍ଦ୍ଦାର ବଲ୍ଲଭ ଭାଇ ପଟେଲ ଦେଶକୁ ଏକତ୍ରିତ କରିଥିଲେ ଏହାପରେ ଆର୍ଥିକ ଭାବେ ଦେଶର ଏକୀକରଣ କାର୍ଯ୍ୟ ଜିଏସଟି ଦ୍ୱାରା ହୋଇପାରିଛି । ଆମେ ନଗଦ ବିହୀନ ଆର୍ଥବ୍ୟବସ୍ଥା ଆଡକୁ ଦୃଢତାର ସହ ଅଗ୍ରସର ହୋଇଛୁ, ଆମେ ରାଜକୋଷୀୟ ଅନୁସନ୍ଧାନକୁ ବଜାୟ ରଖିଛୁ । ଏହାର ଫଳସ୍ୱରୂପ ବିଗତ ଚାରି ବର୍ଷ ମଧ୍ୟରେ ସୁବିଧାରେ ବ୍ୟବସାୟ କ୍ଷେତ୍ରରେ ଆମେ ବୈଶ୍ୱିକ ରାଙ୍କିଙ୍ଗରେ 65ଟି ସ୍ଥାନକୁ ଅତିକ୍ରମ କରିପାରିଛୁ ଏବଂ ସଂସାରକୁ ଆଶ୍ଚର୍ଯ୍ୟ ଲାଗୁଛି ଯେ ଏତେ ବଡ ଦେଶ, ଏବେ ବିବିଧତାଗୁଡିକରେ ଭରପୂର ଦେଶ, ବିକାଶୀଳ ଦେଶ, ଏତେବଡ ସ୍ଥାନକୁ ଡେଇଁପାରେ ?
ବିଶ୍ୱବ୍ୟାଙ୍କର ଅଧ୍ୟକ୍ଷ ମୋତେ ସ୍ୱତନ୍ତ୍ର ଭାବେ ଫୋନ କରି କହିଥିଲେ ଯେ ଆମ ପାଇଁ ବଡ ଆଶ୍ଚର୍ଯ୍ୟର କଥା ଯେ କୌଣସି ଦେଶ ଦୃଢ ନିଶ୍ଚୟର ସହ ଏତେ ବଡ ପରିଣାମ ଆଣିପାରିବ, ଏବଂ ଏହା ହିନ୍ଦୁସ୍ତାନର ଶକ୍ତି ଯୋଗୁଁ ସମ୍ଭବ ହୋଇପାରିଛି ।
ବନ୍ଧୁଗଣ, ପୁଞ୍ଜି ନିବେଶ ପାଇଁ ସବୁଠାରୁ ଉତ୍କୃଷ୍ଟ ସ୍ଥାନ ଭାବେ ସମଗ୍ର ଦୁନିଆରେ ଭାରତ ଜଣାଶୁଣା ଏବଂ ସେଥିପାଇଁ ଦେଶକୁ ବିଗତ ଚାରି ବର୍ଷ ମଧ୍ୟରେ 263 ବିଲିୟନ ଡଲାରର ରେକର୍ଡ ଏଫଡିଆଇ ମିଳିଛି ।
ବନ୍ଧୁଗଣ, ଆପଣମାନଙ୍କ ମଧ୍ୟରେ କିଛି ଲୋକ ଏବେ କିଛି ଦିନ ପୂର୍ବେ ଭାରତ ଆସିଥିବେ, ଆପଣ ନିଜ ଦେଶରେ ପରିବର୍ତ୍ତନ ଦେଖିପାରିଥିବେ.. କୁହନ୍ତୁ… ଆସୁନାହଁନ୍ତି କି ? ଯଦି ଆସିଥିବେ ତେବେ ନିଶ୍ଚିତ ଭାବେ ପରିବର୍ତ୍ତନ ଦେଖିଥିବେ । ବିଗତ ଚାରି ବର୍ଷ ମଧ୍ୟରେ ଭାରତରେ ଦୃତ ଗତିରେ ପରିବର୍ତ୍ତନ ହେଉଛି ।
ଆଜି ଭାରତରେ ପାଖାପାଖି ପ୍ରତ୍ୟେକ ବ୍ୟକ୍ତିଙ୍କ ପାଖରେ ବ୍ୟାଙ୍କ ଆକାଉଣ୍ଟ ଅଛି । ଏବଂ ଏଥିପାଇଁ ଏକ ହଜାର ଦିନରେ 33 କୋଟିରୁ ଅଧିକ ଖାତା ଖୋଲାଯାଇଛି । ଏବଂ ଏକ ରିପୋର୍ଟ ଅନୁସାରେ ସମଗ୍ର ଦୁନିଆରେ ବିଗତ ଚାରି ବର୍ଷରେ ଯେତେ ବ୍ୟାଙ୍କ ଆକାଉଣ୍ଟ ଖୋଲାଯାଇଛି, ତାହାର 50 ପ୍ରତିଶତ କେବଳ ହିନ୍ଦୁସ୍ତାନରେ ଖୋଲାଯାଇଛି । ଏବଂ କେବଳ ଖାତା ଖୋଲାଯାଇଛି ତାହା ନୁହେଁ,ଯେତେବେଳେ ଲୋକ ଗରିବ ଅଛନ୍ତି ଏବଂ ବ୍ୟାଙ୍କରେ ଖାତା ଖୋଲାଯାଇଛି ସେତେବେଳେ ତାଙ୍କୁ ମଧ୍ୟ ସଞ୍ଚୟ କରିବାର ମନ ହେଉଥିବ, ଏହି ଖାତାରେ ଆଜି 12 ବିଲିୟନ ଡଲାର ଜମା ରହିଛି । ସମଗ୍ର ଦୁନିଆ ବର୍ତ୍ତମାନ ଭାରତରେ ଆର୍ଥିକ ଅନ୍ତର୍ଭୂକ୍ତିକରଣ ର କ୍ରାନ୍ତିକୁ ଅତି ନିକଟରୁ ଦେଖୁଛନ୍ତି ।
ମୁଦ୍ରା ଯୋଜନାରେ 128 ମିଲିୟନ ଲୋକଙ୍କୁ 90 ବିଲିୟନ ଡଲାରରୁ ଅଧିକଙ୍କୁ ମାଇକ୍ରୋ କ୍ରେଡିଟ ପ୍ରଦାନ କରାଯାଇଛି, ଏବଂ ଆପଣଙ୍କୁ ଜାଣି ଖୁସି ଲାଗିବ ଯେ, ସେଥିମଧ୍ୟରୁ ଋଣ ଗ୍ରହିତା ହେଉଛନ୍ତି 74 ପ୍ରତିଶତ ମହିଳା ଏବଂ ଅଧିକାଂଶ ପ୍ରଥମ ଥର ଋଣ ଗ୍ରହିତା ଅଛନ୍ତି, ବ୍ୟାଙ୍କକୁ ପ୍ରଥମ ଥର ପାଇଁ ଯାଇଛନ୍ତି, ବ୍ୟାଙ୍କରୁ ପଇସା ପ୍ରଥମ ଥର ପାଇଁ ନେଇଛନ୍ତି, ଏହା କେତେ ବଡ କ୍ରାନ୍ତି, ଆପଣ ଅନୁମାନ କରିପାରୁଛନ୍ତି ।
ସାମାଜିକ ସୁରକ୍ଷା ପାଇଁ ଆଜି ସୁହାଇଲା ପରି ପେନସନ ଏବଂ ବୀମାର ଏଭଳି ଏକ ସ୍କିମ ରହିଛି ଯେଉଁଥିରେ 90 ପଇସାରୁ ଆରମ୍ଭ କରି ଏକ ଟଙ୍କା ପର୍ଯ୍ୟନ୍ତ ପ୍ରିମିୟମ ରହିଛି । 90 ପଇସା କିଛି ବି ନୁହେଁ । ଏତେ କମ ପ୍ରିମିୟମରେ ଗରିବ ବ୍ୟକ୍ତିଙ୍କୁ ଦୁଇ-ଦୁଇ ଲକ୍ଷ ଟଙ୍କାର ବୀମା ସୁନିଶ୍ଚିତ ହେଉଛି । ଆଜି ସମଗ୍ର ସଂସାରର ସବୁଠାରୁ ବଡ ସ୍ୱାସ୍ଥ୍ୟ ବୀମା ଯୋଜନା, ଆୟୁଷ୍ମାନ ଭାରତ, ଲୋକମାନେ ଏହାକୁ ମୋଦୀ କେୟାର ନାମରେ ଜାଣିଛନ୍ତି । 50 କୋଟି ଲୋକଙ୍କୁ ବିନା ମୂଲ୍ୟରେ ଚିକିତ୍ସା ସୁବିଧା ପ୍ରଦାନ କରାଯାଉଛି । 50 କୋଟି ଲୋକ ମାନେ- ଆମେରିକା, କାନାଡା, ମେକ୍ସିକୋ ଆଦି ଦେଶର ଜନସଂଖ୍ୟାଠାରୁ ବହୁ ଅଧିକ ଏବଂ ଏହା ହିନ୍ଦୁସ୍ତାନ କରୁଛି ।
ଦୁନିଆର ସବୁଠାରୁ ବଡ ଉଚ୍ଚତା ଥିବା ପ୍ରତିମୂର୍ତ୍ତି– ଏକତାର ପ୍ରତିମୂର୍ତ୍ତି ପାଇଁ ଆଜି ଭାରତର ନାଁ ସମସ୍ତେ ଜାଣିଛନ୍ତି । ଏଭଳି ବହୁତ କାର୍ଯ୍ୟ ଅଛି ଯାହାଦ୍ୱାରା ଦେଶର ପ୍ରତିଷ୍ଠାକୁ ଶକ୍ତି ମିଳିଛି ।
ଡିଜିଟାଲ ଇଣ୍ଡିଆ ଦ୍ୱାରା ଭାରତର ଲୋକମାନଙ୍କର ଜୀବନରେ ଦୃତ ଗତିରେ ପରିବର୍ତ୍ତନ ଆସିଛି । ଆଜି ପାଖାପାଖି ପ୍ରତ୍ୟେକ ଭାରତୀୟଙ୍କ ପାଖରେ ବାୟୋମେଟ୍ରିକ ପରିଚୟ ରହିଛି । ଦେଶର 1.25ଗ୍ରାମରେ ଅପ୍ଟିକାଲ ଫାଇବର ପହଞ୍ଚି ପାରିଛି ।
ବନ୍ଧୁଗଣ, ଆଜି ଅନେକ ମାମଲାରେ ଭାରତ ଦୁନିଆର ବିଶ୍ୱ ନେତୃତ୍ୱଙ୍କ ଧାଡିରେ ଛିଡା ହୋଇପାରିଛି । 2030 ସୁଦ୍ଧା ବିଶ୍ୱରୁ ଟିବି ସମାପ୍ତ କରିବା ପାଇଁ ଲକ୍ଷ୍ୟ ରଖାଯାଇଛି, ଭାରତ 2025 ସୁଦ୍ଧା ଏହି ଲକ୍ଷ୍ୟ ପୂରଣ ପାଇଁ ଲକ୍ଷ୍ୟ ରଖିଛି ଏବଂ 130 କୋଟି ଭାରତୀୟଙ୍କ ପକ୍ଷରୁ ମୁଁ ଆପଣମାନଙ୍କୁ ବିଶ୍ୱାସ ଦେଉଛି ଯେ ଆମେ 2025 ସୁଦ୍ଧା ଏହି ଲକ୍ଷ୍ୟ ହାସଲ ନିଶ୍ଚୟ କରିବୁ ।
ଆଜି ସ୍ୱଚ୍ଛ ଶକ୍ତି କ୍ଷେତ୍ରରେ ଆମେ ସମଗ୍ର ଦୁନିଆକୁ ମାର୍ଗ ଦର୍ଶନ କରାଉଛୁ । ଆମ ଦେଶ ଆନ୍ତଃରାଷ୍ଟ୍ରୀୟ ସୌର ମେଣ୍ଟ ସ୍ଥାପନ କରି ଏହାକୁ ଗତି ପ୍ରଦାନ କରିଛି ।
ଅକ୍ଷୟ ଶକ୍ତି ଉତ୍ପାଦନ କ୍ଷେତ୍ରରେ ଆଜି ଆମ ଦେଶ ଦୁନିଆର ଷଷ୍ଠ ସବୁଠାରୁ ବଡ ଉତ୍ପାଦକ ହୋଇପାରିଛି । ଆଜି ସାରା ଦୁନିଆରେ ଭାରତର ପ୍ରତିଷ୍ଠା ବୃଦ୍ଧି ପାଇଛି, ଆପଣ ଅନୁଭବ କରୁଛନ୍ତି କି?
ବନ୍ଧୁଗଣ, ମୁଁ ଆପଣମାନଙ୍କୁ ଠାରୁ ଏହା ମଧ୍ୟ ଆଶା କରୁଛି ଯେ ଆପଣମାନେ ଭାରତର ସକାରାତ୍ମକ ବିକାଶର ସୂଚନାକୁ ନିଜ କୋରିଆ ମିତ୍ରମାନଙ୍କ ସହ ବାଣ୍ଟନ୍ତୁ । ମେକ ଇନ ଇଣ୍ଡିଆ ଆଜି ବୈଶ୍ୱିକ ବ୍ରାଣ୍ଡ ହୋଇସାରିଛି । କୋରିଆ ଭଳି ମିତ୍ର ଦେଶଗୁଡିକ ସହିତ ମିଶି ଆମେ ବୈଦ୍ୟୁତିକ ଉତ୍ପାଦନର ବହୁତ ବଡ ହବ ପ୍ରତିଷ୍ଠା କରିବାକୁ ଚାହୁଁଛୁ ।
ବନ୍ଧୁଗଣ, ଆଜି ଭାରତରେ ଏକ ନୂତନ କିରଣ ଦେଖାଯାଉଛି । ଏହି କିରଣର ପ୍ରତିନିଧି ଭାବେ ମୋତେ କାଲି ସିଓଲ ଶାନ୍ତି ପୁରସ୍କାର ପ୍ରଦାନ କରାଯିବ । ଏହି ପୁରସ୍କାର ମୋର ନୁହେଁ, ମୁଁ ତ 130 କୋଟି ଭାରତୀୟଙ୍କ ତରଫରୁ ଏବଂ ତିନି କୋଟି ପ୍ରବାସୀ ଭାରତୀୟଙ୍କ ତରଫରୁ, କେବଳ ଏହାକୁ ସ୍ୱୀକାର କରିବା ପାଇଁ ଆସିଛି । ଏହି ପୁରସ୍କାର ପ୍ରତ୍ୟେକ ଭାରତୀୟଙ୍କ ପ୍ରଚେଷ୍ଟାର ସମ୍ମାନ । ଏହି ପୁରସ୍କାର ବିଗତ ଚାରି ବର୍ଷରେ ଭାରତୀୟମାନଙ୍କ ଲଗାତାର, ଦିନ-ରାତି କରିଥିବା ପରିଶ୍ରମକୁ ସମ୍ମାନ ପ୍ରଦାନ କରୁଛି ।
ମୁଁ ପୁନର୍ବାର ନିଜ ଦେଶର ନାମ ଉଜ୍ଜ୍ୱଳ କରିବା ପାଇଁ ଆପଣ ସମସ୍ତଙ୍କୁ କୃତଜ୍ଞତା ଜଣାଉଛି ଏବଂ ଦେଶରେ ଆପଣମାନଙ୍କ ଉନ୍ନତି ଏବଂ ଉପଲବ୍ଧିଗୁଡିକ ପାଇଁ ମୋ ତରଫରୁ ଅନେକ ଅନେକ ଶୁଭକାମନା ଜଣାଉଛି ।
ଆମର ଏଠାରେ କୁମ୍ଭ ମେଳା କିଛି ନୂଆ କଥା ନୁହେଁ । ନୂତନ ପିଢିର ଲୋକ ଯାଉଥିବେ କି ନାହିଁ,ମୋତେ ଜଣାନାହିଁ, କିନ୍ତୁ ଏଠାରେ ଯେଉଁ ପୂରୁଣା ପିଢିର ଲୋକମାନେ ଥିବେ, ତାଙ୍କ ମନ ନିଶ୍ଚୟ ହେଉଥିବା ଯେ କୁମ୍ଭ ମେଳା ଦେଖିବାପାଇଁ । ଆମ ଦେଶର ପର୍ବ, ଏହିଭଳି ମେଳା, ତାହାର ଚିତ୍ର ମନରେ ଆସିବା ମାତ୍ରେ ଏକ ନିଶ୍ଚିତ ଛବି ମାନସପଟରେ ଝଲସୁଥିବ । କିନ୍ତୁ ଆପଣଙ୍କୁ ଜାଣି ଖୁସି ଲାଗିବ ଯେ ଭାରତରେ କୁମ୍ଭ ମେଳା ଛୋଟ ନୁହେଁ ଜୀ- ପ୍ରତ୍ୟେକ ଦିନ ଗଙ୍ଗା ନଦୀ ତଟରେ ଗୋଟିଏ ୟୁରୋପୀୟ ଦେଶର ଲୋକଙ୍କ ସଂଖ୍ୟା ସହ ସମାନ ଲୋକଙ୍କ ସମାଗମ ହୋଇଥାଏ ଏବଂ ପୂରା କୁମ୍ଭ ମେଳା ସମୟରେ ଗଙ୍ଗାରେ ବୁଡ ପକାଉଥିବା ଲୋକଙ୍କ ସଂଖ୍ୟା ଚାରିଟି କୋରିଆରୁ ଅଧିକ ହେବ । ଯେତେବେଳେ ଏହି କାର୍ଯ୍ୟକ୍ରମ ସଂପୂର୍ଣ୍ଣ ହେବ ଏଠାକାର ଜନସଂଖ୍ୟାର ଚାରିଗୁଣ ଲୋକ ସେହି ଗଙ୍ଗାରେ ସ୍ନାନ କରିଥିବେ । ପ୍ରଥମ ଥର ଏହା ଦୃଷ୍ଟିକୁ ଆସିଛି ଯେ ଯେଉଁମାନେ କୁମ୍ଭ ମେଳାକୁ ଯାଇଛନ୍ତି, ସେ ମେଳାର ବ୍ୟବସ୍ଥା ଏବଂ ମେଳାରେ ସ୍ୱଚ୍ଛତାର ଆଲୋଚନା ବ୍ୟାପକ ଭାବେ କରିଛନ୍ତି । ଆମର ପୂର୍ବରୁ ସ୍ୱଭାବ ଥିଲା ଯେ ଏସବୁ ପ୍ରତି ଆମର ଦୃଷ୍ଟି ଯାଉନଥିଲା, ଆମର ମଧ୍ୟ ଅଭ୍ୟାସ ହୋଇଯାଇଥିଲା, ଆରେ ଚଳିବ, ଚାଲ ବନ୍ଧୁ । ପ୍ରଥମ ଥର ନ୍ୟୁୟର୍କ ଟାଇମ୍ସ କୁମ୍ଭ ମେଳାର ଚର୍ଚ୍ଚା କରି କୁମ୍ଭ ମେଳାର ସ୍ୱଚ୍ଛତାର ବିଶେଷ ଭାବେ ଉଲ୍ଲେଖ କରିଛି । ଏହି ଦେଶ ଯଦି ଦୃଢ ନିଶ୍ଚୟ କରିବ-ତେବେ କଣ କରିପାରିବ, ଏହାର ଜ୍ୱଳନ୍ତ ଉଦାହରଣ ହେଉଛି ଚଳିତ ବର୍ଷର କୁମ୍ଭ ମେଳା ।
ବନ୍ଧୁଗଣ, ଦେଶ ବହୁତ ଦୃତ ଗତିରେ ପରିବର୍ତ୍ତିତ ହେଉଛି, ଦେଶ ବହୁତ ଦୃତ ଗତିରେ ଆଗକୁ ଅଗ୍ରସର ହେଉଛି । ପର୍ଯ୍ୟଟନ ବିକାଶ ପାଇଁ ବହୁତ ବଡ ଶକ୍ତି । ଏବଂ ମୁଁ ଯେଉଁଠିକୁ ମଧ୍ୟ ଯାଏ,ଭାରତୀୟ ସଂପ୍ରଦାୟଙ୍କ ସହ ମାଗଣାରେ ସାକ୍ଷାତ କରୁନାହିଁ, ଏହା ପରିବର୍ତ୍ତେ କିଛି ମାଗୁଛି-ଦେବେ ?ସମସ୍ତେ କହିଦିଅନ୍ତି-ମୋଦୀ କଣ ଆଉଥରେ ଆସିବେ କି, ପଚାରିବା ପାଇଁ ଏବଂ ଆଜି ସେ ଚାଲିଯାଇଛି, ଏବେ ଚାରି ବର୍ଷ ପରେ, ତିନି ବର୍ଷ ପରେ ଆସିବ, କିଏ ମନେରଖିବ ।
ମୁଁ ଏଭଳି ନୁହେଁ, ମୁଁ ତ ପଚାରିବି, ମାଗିବି । ସତରେ ମୁଁ ମାଗିବି ? କଣ ଆଜି ଆମର ପ୍ରତ୍ୟେକ ହିନ୍ଦୁସ୍ତାନୀ, ଯିଏ ଦୁନିଆରେ ରହୁଛନ୍ତି- କୋଉଠି ଆପଣମାନେ ପଢିଥିବେ, କୋଉଠି ଫ୍ୟାକ୍ଟ୍ରିରେ କାମ କରୁଥିବେ, କୋଉଠି ମ୍ୟାନେଜମେଣ୍ଟରେ କାମ କରୁଥିବେ- ସେତେବେଳେ ଲୋକାଲ ଲୋକମାନଙ୍କ ସହ ଆପଣଙ୍କ ସଂପର୍କରେ ଆସିବା ସ୍ୱାଭାବିକ । କଣ ଆପଣ ମନରେ ନିଶ୍ଚୟ କରିଛନ୍ତି ଯେ ପ୍ରତ୍ୟେକ ବର୍ଷ ଅତି କମରେ ପାଞ୍ଚଟି ଅଣ ଭାରତୀୟ ପରିବାରଙ୍କୁ ହିନ୍ଦୁସ୍ତାନ ଦେଖିବା ପାଇଁ ପ୍ରଚେଷ୍ଟା କରିବି ?ଏତିକି କରିପାରିବେ କି ? ଯଦି କେବଳ ବିଶ୍ୱର ବିଭିନ୍ନ ସ୍ଥାନରେ ରହୁଥିବା ହିନ୍ଦୁସ୍ତାନୀ ଏହା ନିଶ୍ଚୟ କରିପାରିବେ ଯେ ଦେଶକୁ ଯାଇଁ ପୁଞ୍ଜିନିବେଶ କରିବି, ପ୍ରତ୍ୟେକଙ୍କ ପାଖରେ ପଇସା କୋଉଠି ଅଛି,ସେ ନିଜ ପରିବାର ଚଳାଇ ଅଳ୍ପ କିଛି ସଞ୍ଚୟ କରିପାରୁଛି ।
କିନ୍ତୁ ଦେଶ ସେବା କ୍ଷେତ୍ରରେ ଗୋଟିଏ କାମ ନିଶ୍ଚିତ କରିପାରିବେ ଯେ ମୁଁ ଗୋଟିଏ ବର୍ଷ ମଧ୍ୟରେ ଅତି କମରେ ପାଞ୍ଚଟି ଅଣ ଭାରତୀୟ ପରିବାରକୁ ଭାରତ ଭ୍ରମଣ ପାଇଁ ପ୍ରେରିତ କରିବି, ପ୍ରୋତ୍ସାହିତ କରିବି,ଯିବା ପାଇଁ ସହଯୋଗ କରିବି । ଆପଣ କଳ୍ପନା କରିପାରିବେ ଯେ ଭାରତର ପର୍ଯ୍ୟଟନ କେତେ ବୃଦ୍ଧି ହୋଇପାରିବ, କେତେ ବଡ ସେବା ଆପଣ କରିପାରିବେ ।
ମୁଁ ଆପଣଙ୍କୁ ମାଗିଛି, ମୁଁ ପଚାରିବି ଆମ ଏମ୍ବାସୀକୁ ଯେ କେତେଜଣ ଭିସା ମାଗିଛନ୍ତି, କୁହନ୍ତୁ । ଏବଂ ମୋର ମତ ଯେ ହିନ୍ଦୁସ୍ତାନ ପ୍ରତିଶୃତି ଦେଇଥାଏ ଏବଂ ତାକୁ ପୂରଣ କରିଥାଏ । ଦେଖନ୍ତୁ, ମୁଁ ଆପଣଙ୍କ ପ୍ରଶଂସା କରୁଛି, ଆପଣମାନେ ହସୁଛନ୍ତି ।
ମୁଁ ଆସିବି, ମୁଁ ଆସିବି, ବାରମ୍ବାର ଆସିବି, ଆପଣ ଚିନ୍ତା କରନ୍ତୁ ନାହିଁ । କିନ୍ତୁ ଯେତେବେଳେ ମୁଁ ଆସିବି ସେତେବେଳେ ପୁଣି ଏ ବିଷୟରେ ପଚାରିବି । ଦେଖନ୍ତୁ ଏହା ଦେଶ ପାଇଁ ବହୁତ ବଡ ସେବା ହେବ ।
ଶୀତ ଦିନରେ ଆପଣ ଏଠାକୁ ଆସିଛନ୍ତି, ମୋତେ ଆଶୀର୍ବାଦ ଦେଇଛନ୍ତି, ସେଥିପାଇଁ ମୁଁ ଆପଣମାନଙ୍କ ପାଖରେ ଅଶେଷ ଅଶେଷ କୃତଜ୍ଞ ।
ଧନ୍ୟବାଦ ।
