ଆସନ୍ତା ମେ ୨୨ରେ ରାଜସ୍ଥାନ ଗସ୍ତ କରିବେ ପ୍ରଧାନମନ୍ତ୍ରୀ

ଆସନ୍ତା ୨୨ ତାରିଖରେ ରାଜସ୍ଥାନ ଗସ୍ତ କରିବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ । ପୂର୍ବାହ୍ନ ୧୧ଟାରେ ସେ ବିକାନେର ଯାଇ ଦେଶନୋକେଠାରେ ରହିଥିବା କର୍ଣ୍ଣି ମଠ ପରିଦର୍ଶନ କରିବେ । ପରେ ସାଢେ ୧୧ଟା ବେଳକୁ ଅମ୍ରିତ ଭାରତ ଷ୍ଟେସନ ସ୍କିମ ଯୋଜନା ଅଧୀନରେ ପୁନର୍ଗଠିତ ଦେଶନୋକେ ଷ୍ଟେସନର ଲୋକାର୍ପଣ କରିବେ ଓ ସବୁଜ ପତାକା ଦେଖାଇ ବିକାନେର-ମୁମ୍ବାଇ ଏକ୍ସପ୍ରେସ ଟ୍ରେନର ଶୁଭାରମ୍ଭ କରିବେ । ପରେ ପଲାନାରେ ୨୬ ହଜାର କୋଟି ଟଙ୍କାର ବିଭିନ୍ନ ବହୁମୁଖୀ ଯୋଜନାର ଶିଳାନ୍ୟାସ, ଭିତିପ୍ରସ୍ତର ସ୍ଥାପନ କରିବା କାର୍ଯ୍ୟକ୍ରମ ରହିଛି ।

ପ୍ରାୟ ୧୧ ଶହ କୋଟି ଟଙ୍କାର ୧୮ଟି ରାଜ୍ୟ ଓ କେନ୍ଦ୍ରଶାସିତ ଅଂଚଳର ୮୬ଟି ଜିଲ୍ଲାରେ ୧୦୩ଟି ପୁନର୍ଗଠିତ ଅମ୍ରିତ ଷ୍ଟେସନର ଉଦଘାଟନ କରିବେ । ଅମ୍ରିତ ଭାରତ ଷ୍ଟେସନ ଯୋଜନାରେ ପ୍ରାୟ ୧୩ ଶହରୁ ଊର୍ଦ୍ଧ୍ୱ ଷ୍ଟେସନକୁ ପୁନର୍ଗଠିତ କରାଯାଇଥିବା ସୂଚନା ମିଳିଛି । ପ୍ରତିଦିନ ଶହ ଶହ ତୀର୍ଥଯାତ୍ରୀ ଓ ପର୍ଯ୍ୟଟକ ବୁଲି ଆସୁଥିବା ଦେଶନୋକେ ଷ୍ଟେସନକୁ ଏବେ ସୁନ୍ଦର ମନ୍ଦିର କଳାକୃତିରେ ପୁନର୍ଗଠିତ କରାଯାଇଛି । ତେଲେଙ୍ଗାନାର ବେଗମପେଟ ରେଲବେ ଷ୍ଟେସନକୁ କାକତୀୟ ସାମ୍ରାଜ୍ୟ ଶୈଳୀରେ ସଜାଯାଇଛି । ବିହାର ଥାବେ ଷ୍ଟେସନକୁ ୫୨ଟି ଶକ୍ତିପୀଠ ଭିତରୁ ଅନ୍ୟତମ ମା ଥାବେବାଲିଙ୍କ ମନ୍ଦିର ଅନୁସାରେ ସଜାଯାଇଛି । ଗୁଜରାଟର ଡାକୋର ଷ୍ଟେସନକୁ ରନଛୋଦ୍ରାଇ ମହାରାଜ ଦ୍ୱାରା ଅନୁପ୍ରେରିତ ହୋଇ ସଜାଯାଇଛି । ସାରା ଭାରତରେ ଅମ୍ରିତ ସ୍କିମ ଅନୁସାରେ ଏବେ ବିଭିନ୍ନ ଷ୍ଟେସନକୁ ଯାତ୍ରୀ ସୁଲଭ କରାଯିବା ସହ ବିଭିନ୍ନ ପ୍ରକାର କଳା, ସ୍ଥାପତ୍ୟରେ ରୂପ ଦିଆଯାଇଛି ।

ଭାରତୀୟ ରେଳବାଇ ଏହାର ନେଟବାର୍କକୁ ଏବେ ଶତପ୍ରତିଶତ ବିଦ୍ୟୁତିକରଣ କରି ଯାତ୍ରୀ ସୁଲଭ କରିପାରିଛି । ଏହିକ୍ରମରେ ୫୮ କିମି ବ୍ୟାପୀ ଚୁରୁ-ସାଦୁଲପୁର ରେଲବେ ଲାଇନର ପ୍ରଧାନମନ୍ତ୍ରୀ ଶିଳାନ୍ୟାସ କରିବେ ଓ ବିଦ୍ୟୁତିକରଣ ହୋଇଥିବା ୩୩୬ କିମି ବ୍ୟାପୀ ସୁରତଗଡ-ଫାଲୋଡି ରେଲବେ ଷ୍ଟେସନ, ୧୦୯ କିମି ବ୍ୟାପୀ ଫୁଲେରା-ଦେଗାନା ରେଲବେ ଷ୍ଟେସନ, ୨୧୦ କିମି ବ୍ୟାପୀ ଉଦୟପୁର-ହିମତନଗର ରେଲବେ ଷ୍ଟେସନ, ୧୫୭ କିମି ବ୍ୟାପୀ ଫାଲୋଡି-ଜୈସଲମେର ରେଲବେ ଷ୍ଟେସନ ୧୨୯ କିମି ବ୍ୟାପୀ ସମଦାରୀ-ବାରମେର ରେଲବେ ଷ୍ଟେସନକୁ ଦେଶବାସୀଙ୍କ ଉଦ୍ଦେଶ୍ୟରେ ଲୋକାର୍ପଣ କରିବେ ।

ରାଜ୍ୟରେ ରାସ୍ତା ଭିତିଭୂମି ସୁଦୃଢ କରିବା ଲାଗି ତିନିଟି ଅଣ୍ଡରପାସ ସହ ଜାତୀୟ ରାଜପଥର ସମ୍ପ୍ରସାରଣ ଲାଗି ବି ପ୍ରଧାନମନ୍ତ୍ରୀ ଭିତିପ୍ରସ୍ତର ସ୍ଥାପନ କରିବା କାର୍ଯ୍ୟକ୍ରମ ରହିଛି । ସେହିପରି ରାଜ୍ୟରେ ସାତଟି ରାଜରାସ୍ତା ପ୍ରକଳ୍ପକୁ ବି ସେ ଲୋକାର୍ପଣ କରିବେ । ୪୮୫୦ କୋଟି ଟଙ୍କା ମୂଲ୍ୟର ଏହି ପ୍ରକଳ୍ପ କାର୍ଯ୍ୟକ୍ଷମ ହେଲେ ଉଭୟ ମାଲ ଓ ଯାତ୍ରୀ ପରିବହନ ନେଇ ବାଟ ଫିଟିବ ବୋଲି କୁହାଯାଇଛି । ଏହି ହାଇବେ ଭାରତ-ପାକ ସୀମା ଯାଏ ଯାଇଥିବା ବେଳେ ସେନା ବାହିନୀ ଏହି ରାସ୍ତାରେ ଯିବା ଆସିବା କରିବା ସୁଗମ ହେବ ବୋଲି କୁହାଯାଇଛି ।

ଡିଡବାନା କୁଚମାନର ବିକାନେର ଓ ନାବାରେ ଥିବା ସୌର ପ୍ରକଳ୍ପ ସହ ପାର୍ଟ ବି ପାବାର ଗ୍ରୀଡ ସିରୋହୀ ଟ୍ରାନ୍ସମିଶନ ଲିମିଟେଡ ଓ ପାର୍ଟ ଇ ପାବାରଗ୍ରୀଡ ମେବାର ଟ୍ରାନ୍ସମିଶନ ଲିମିଟେଡର ବି ପ୍ରଧାନମନ୍ତ୍ରୀ ଭିତିପ୍ରସ୍ତର ସ୍ଥାପନ କରିବେ । ବିକାନେରର ସୌର ପ୍ରକଳ୍ପ, ନିମଚ ପାବାରଗ୍ରୀଡ ଫତେଗଡ-୨ ପାବାର ଷ୍ଟେସନର ବି ସେ ଲୋକାର୍ପଣ କରିବେ ।

ରାଜ୍ୟ ସରକାରଙ୍କ ୨୫ଟି ପ୍ରମୁଖ ପ୍ରକଳ୍ପର ଲୋକାର୍ପଣ ସହ ଭିତିପ୍ରସ୍ର ସ୍ଥାପନ କରାଯିବ । ଏସବୁ ପ୍ରକଳ୍ପ ରାଜସ୍‌ଥାନର ଭିତିଭୂମି, ଯୋଗାଯୋଗ, ବିଜୁଳି ସଂଯୋଗ, ସ୍ୱାସ୍ଥ୍ୟ ସେବା, ଜଳ ଯୋଗାଣ କ୍ଷେତ୍ରରେ ବିଶେଷ ସହାୟକ ହେବ । ୩୨୪୦ କୋଟି ଟଙ୍କା ବିନିମୟରେ ୭୫୦ କିଲୋମିଟର ବ୍ୟାପୀ ୧୨ଟି ରାଜ୍ୟ ରାଜପଥର ମରାମତି ସହ ସମ୍ପ୍ରସାରଣ କାମ ଏଥିରେ ଅନ୍ତର୍ଭୁକ୍ତ । ପରବର୍ତୀ ପର୍ଯ୍ୟାୟରେ ଆହୁରି ୯୦୦ କିଲୋମିଟର ଧରି ହେବାର ରହିଛି । ବିକାନେର ଓ ଉଦୟପୁରରେ ଶକ୍ତି ପ୍ରକଳ୍ପକୁ ବି ପ୍ରଧାନମନ୍ତ୍ରୀ ଲୋକାର୍ପଣ କରିବେ । ରାଜସମନ୍ଦ, ପ୍ରତାପଗଡ, ଭିଲବାରା, ଢୋଲପୁରରେ ରହିଥିବା ନର୍ସିଂ କଲେଜଗୁଡିକୁ ବି ସେ ଉଦଘାଟନ କରିବାର କାର୍ଯ୍ୟକ୍ରମ ରହିଛି । ଅମୃତ ୨.୦ ସ୍କିମରେ ପାଲି ଜିଲ୍ଲାର ୭ଟି ସହରରେ ସହରାଚଂଳ ଜଳ ଯୋଗାଣ ଯୋଜନାକୁ ପୁର୍ନଗଠନ କରି ଝୁନୁଝୁନ ଜିଲ୍ଲାରେ ଫ୍ଲୁରୋସିସ ମିଟିଗେସନ ପ୍ରକଳ୍ପ ସହ ଗ୍ରାମୀଣ ଜଳ ଯୋଗାଣ ପ୍ରକଳ୍ପଗୁଡିକୁ ଲୋକାର୍ପଣ କରିବା କାର୍ଯ୍ୟକ୍ରମ ରହିଛି ।