ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଲୋକମାତା ଦେବୀ ଅହିଲ୍ୟା ବାଇ ହୋଲକରଙ୍କ ୩୦୦ତମ ଜୟନ୍ତୀ ଅବସରରେ ମେ ୩୧ ତାରିଖରେ ମଧ୍ୟପ୍ରଦେଶ ଗସ୍ତ କରିବେ । ସେ ପୂର୍ବାହ୍ନ ପ୍ରାୟ ୧୧ଟା ୧୫ ମିନିଟରେ ଭୋପାଳରେ ଲୋକମାତା ଦେବୀ ଅହିଲ୍ୟାବାଇ ମହିଳା ସଶକ୍ତୀକରଣ ମହାସମ୍ମିଳନୀରେ ଭାଗ ନେବେ । ପ୍ରଧାନମନ୍ତ୍ରୀ ଭୋପାଳରେ ଅନେକ ଉନ୍ନୟନମୂକଳ ପ୍ରକଳ୍ପର ଲୋକାର୍ପଣ ଓ ଶିଳାନ୍ୟାସ କରିବେ ଏବଂ ଏକ ସମାରୋହରେ ଜନସାଧାରଣଙ୍କୁ ସମ୍ବୋଧିତ କରିବେ ।
ପ୍ରଧାନମନ୍ତ୍ରୀ ଲୋକମାତା ଦେବୀ ଅହିଲ୍ୟାବାଇ ମହିଳା ସଶକ୍ତୀକରଣ ମହାସମ୍ମିଳନୀରେ ଭାଗ ନେବା ସହ ଲୋକମାତା ଦେବୀ ଅହିଲ୍ୟାବାଇଙ୍କୁ ସମର୍ପିତ ଏକ ସ୍ମାରକ ଡାକଟିକଟ ଏବଂ ଏକ ବିଶେଷ ମୁଦ୍ରା ମଧ୍ୟ ଜାରି କରିବେ । ୩୦୦ ଟଙ୍କା ମୂଲ୍ୟର ଏହି ମୁଦ୍ରାରେ ଅହିଲ୍ୟାବାଇଙ୍କ ଫଟୋ ରହିବ । ପ୍ରଧାନମନ୍ତ୍ରୀ ଜନଜାତୀୟ, ଲୋକ ଏବଂ ପାରମ୍ପରିକ କଳା କ୍ଷେତ୍ରରେ ଯୋଗଦାନ ପାଇଁ ଜଣେ ମହିଳା କଳାକାରଙ୍କୁ ମଧ୍ୟ ପ୍ରଧାନମନ୍ତ୍ରୀ ରାଷ୍ଟ୍ରୀୟ ଦେବୀ ଅହିଲ୍ୟାବାଇ ପୁରସ୍କାର ମଧ୍ୟ ପ୍ରଦାନ କରିବେ ।
ପ୍ରଧାନମନ୍ତ୍ରୀ କ୍ଷିପ୍ରା ନଦୀରେ ୮୬୦ କୋଟିରୁ ଅଧିକ ଟଙ୍କାରେ ହେବାକୁ ଥିବା ଘାଟର ଶିଳାନ୍ୟାସ କରିବେ । ଏହା ଉଜ୍ଜୈନରେ ୨୦୨୮ରେ ହେବାକୁ ଥିବା ସିଂହସ୍ଥ ମହାକୁମ୍ଭ ପାଇଁ ପ୍ରସ୍ତୁତ କରାଯାଉଛି ।
ଅଞ୍ଚଳର ଶେଷ ସୀମା ପର୍ଯ୍ୟନ୍ତ ଯୋଗାଯୋଗ ବ୍ୟବସ୍ଥା ସୁଦୃଢ଼ କରିବାକୁ ପ୍ରଧାନମନ୍ତ୍ରୀ ଦାତିଆ ଓ ସାତନା ବିମାନବନ୍ଦରର ଉଦଘାଟନ କରିବେ । ଏହା ବିନ୍ଧ୍ୟ ଅଞ୍ଚଳରେ ଉଦ୍ୟୋଗ, ପର୍ଯ୍ୟଟନ, ଶିକ୍ଷା ଏବଂ ସ୍ୱାସ୍ଥ୍ୟସେବାକୁ ମଜବୁତ କରିବାରେ ସହାୟତ ହୋଇପାରିବ ।
ସହରାଞ୍ଚଳରେ ଯୋଗାଯୋଗ ବ୍ୟବସ୍ଥାର ଭିତ୍ତିଭୂମିକୁ ସୁଦୃଢ଼ କରିବା ଦିଗରେ ପ୍ରତିବଦ୍ଧତା ସ୍ୱରୂପ ପ୍ରଧାନମନ୍ତ୍ରୀ ଇନେ୍ଦାର ମେଟ୍ରୋର ୟେଲୋ ଲାଇନର ସୁପର ପ୍ରାୟୋରିଟି କରିଡରରେ ଯାତ୍ରୀସେବାର ଉଦଘାଟନ କରିବେ । ଏହାଦ୍ୱାରା ଯାତାୟାତ ଭିଡ଼ ଓ ପ୍ରଦୂଷଣ ହ୍ରାସ ପାଇବା ସହ ଯାତ୍ରୀମାନଙ୍କୁ ଆରାମଦାୟକ ଯାତ୍ରାର ସୁବିଧା ମିଳିପାରିବ ।
ପ୍ରଧାନମନ୍ତ୍ରୀ ୧୨୭୧ ଅଟଳ ଗ୍ରାମ ସୁଶାସନ ଭବନର ନିର୍ମାଣ ଉପଲକ୍ଷେ ପ୍ରଥମ କିସ୍ତିରେ ୪୮୦ କୋଟିରୁ ଅଧିକ ଟଙ୍କା ହସ୍ତାନ୍ତର କରିବେ । ଏହି ଭବନ ଗ୍ରାମ ପଞ୍ଚାୟତକୁ ସ୍ଥାୟୀ ମୌଳିକ ଭିତ୍ତିଭୂମି ପ୍ରଦାନ କରିବ ଏବଂ ଏଠାରେ ପ୍ରଶାସନିକ କାର୍ଯ୍ୟର ପରିଚାଳନା, ବୈଠକ ଆଦି ଆୟୋଜନ କରିବାକୁ ଏବଂ ତଥ୍ୟଗୁଡ଼ିକୁ କୁଶଳତାର ସହ ସଂରକ୍ଷଣ କରି ରଖିବାର ସୁବିଧା ମିଳିପାରିବ ।
