ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଅକ୍ଟୋବର ୩୦-୩୧ ତାରିଖରେ ଗୁଜରାଟ ଗସ୍ତ କରିବେ। ଅକ୍ଟୋବର ୩୦ ତାରିଖରେ ପ୍ରଧାନମନ୍ତ୍ରୀ କେଭାଡିଆର ଏକତା ନଗର ଗସ୍ତ କରିବେ ଏବଂ ସନ୍ଧ୍ୟା ପ୍ରାୟ ୫ଟା ୧୫ ସମୟରେ ଇ-ବସର ଲୋକାର୍ପଣ କରିବେ। ସନ୍ଧ୍ୟା ପ୍ରାୟ ୬ଟା ୩୦ ମିନିଟରେ ସେ ଏକତା ନଗରରେ ୧,୧୪୦ କୋଟି ଟଙ୍କାରୁ ଅଧିକ ମୂଲ୍ୟର ବିଭିନ୍ନ ଭିତ୍ତିଭୂମି ଏବଂ ବିକାଶ ପ୍ରକଳ୍ପର ଉଦଘାଟନ ଏବଂ ଭିତ୍ତିପ୍ରସ୍ତର ସ୍ଥାପନ କରିବେ।
ଅକ୍ଟୋବର ୩୧ ତାରିଖ ସକାଳ ପ୍ରାୟ ୮ଟା ସମୟରେ ପ୍ରଧାନମନ୍ତ୍ରୀ ଷ୍ଟାଚ୍ୟୁ ଅଫ୍ ୟୁନିଟିରେ ପୁଷ୍ପମାଲ୍ୟ ଅର୍ପଣ କରିବେ। ଏହା ପରେ ସର୍ଦ୍ଦାର ବଲ୍ଲଭଭାଇ ପଟେଲଙ୍କ ୧୫୦ ତମ ଜନ୍ମବାର୍ଷିକୀ ପାଳନ ପାଇଁ ଜାତୀୟ ଏକତା ଦିବସ ପାଳନ କରାଯିବ। ପରେ, ସକାଳ ପ୍ରାୟ ୧୦ଟା ୪୫ ସମୟରେ, ସେ 'ଆରମ୍ଭ ୭.୦'ର ଏକଶତତମ ଫାଉଣ୍ଡେସନ କୋର୍ସ ଶେଷ କରିଥିବା ଅଫିସର ଟ୍ରେନିମାନଙ୍କ ସହ ଆଲୋଚନା କରିବେ ।
ପ୍ରଥମ ଦିନ-ଅକ୍ଟୋବର ୩୦
ପ୍ରଧାନମନ୍ତ୍ରୀ ଏକତା ନଗରରେ ୧,୧୪୦ କୋଟିରୁ ଅଧିକ ଟଙ୍କାର ବିଭିନ୍ନ ମୌଳିକ ଭିତ୍ତିଭୂମି ଓ ବିକାଶମୂଳକ ପ୍ରକଳ୍ପର ଲୋକାର୍ପଣ ଓ ଶିଳାନ୍ୟାସ କରିବେ । ଏହି ସବୁ ପ୍ରକଳ୍ପ ପର୍ଯ୍ୟଟକଙ୍କ ଅନୁଭୂତି ବଢ଼ାଇବା ସହ ଅଞ୍ଚଳରେ ସହଜରେ ପହଞ୍ଚିପାରିବା ଏବଂ ସ୍ଥିରତା ଥିବା ପଦକ୍ଷେପକୁ ସହାୟତା କରିବା ପାଇଁ ଉଦ୍ଦିଷ୍ଟ । ୧,୧୪୦ କୋଟିରୁ ଅଧିକ ଟଙ୍କାର ନିବେଶରେ ହେଉଥିବା ଏହି ପ୍ରକଳ୍ପ ଗୁଡ଼ିକ ବିଶ୍ୱର ସର୍ବୋଚ୍ଚ ପ୍ରତିମୂର୍ତ୍ତି ଅଞ୍ଚଳରେ ଇକୋ-ଟୁରିଜିମ, ଗ୍ରୀନ ମୋବିଲିଟି, ସ୍ମାର୍ଟ ଇନଫ୍ରାଷ୍ଟ୍ରକଚର ଏବଂ ଜନଜାତି ବିକାଶର ପ୍ରୋତ୍ସାହନ ଦିଗରେ ସରକାରଙ୍କ ଦୃଷ୍ଟିକୋଣକୁ ଦର୍ଶାଉଛି ।
ଲୋକର୍ପିତ ହେବାକୁ ଥିବା ପ୍ରକଳ୍ପ ଗୁଡ଼ିକ ମଧ୍ୟରେ ରହିଛି, ରାଜପିପଳାରେ ବିର୍ସା ମୁଣ୍ଡା ଟ୍ରାଇବାଲ ୟୁନିଭର୍ସିଟି, ଗରୁଡେଶ୍ୱରରେ ହସପିଟାଲିଟି ଡିଷ୍ଟ୍ରିକ୍ଟ (ଫେଜ୍-୧), ବାମନ ବୃକ୍ଷ ବାଟିକା, ଶତପୁଡ଼ା ସୁରକ୍ଷା ପ୍ରାଚୀର, ଇ-ବସ୍ ଚାର୍ଜିଙ୍ଗ ଡିପୋ ଏବଂ ୨୫ ଇଲେକ୍ଟ୍ରିକ ବସ୍,ନର୍ମଦା ଘାଟର ସମ୍ପ୍ରସାରଣ, କୌଶଲ୍ୟା ପଥ, ଏକତା ଭବନରୁ ଶ୍ରେଷ୍ଠ ଭାରତ ଭବନ (ଫେଜ୍-୨) ପର୍ଯ୍ୟନ୍ତ ପାଦଚଲା ରାସ୍ତା, ସ୍ମାର୍ଟ ବସ୍ ଷ୍ଟପ୍(ଫୋଜ୍-୨), ଡ୍ୟାମ ରେପ୍ଲିକା ଫାଉଣ୍ଟେନ, ଜିଏସଇସି କ୍ୱାର୍ଟର୍ସ ।
ଏହା ବ୍ୟତୀତ ରୟାଲ କିଙ୍ଗଡମ୍ସ ଅଫ ଇଣ୍ଡିଆ ସଂଗ୍ରହାଳୟ, ବୀର ବାଳକ ଉଦ୍ୟାନ, ସ୍ପୋର୍ଟ୍ସ କମ୍ପ୍ଲେକ୍ସ, ବର୍ଷା ବନ ପ୍ରକଳ୍ପ, ଶୁଳପନେଶ୍ୱର ଘାଟ ପାଖରେ ଜେଟିର ବିକାଶ, ଷ୍ଟାଚ୍ୟୁ ଅଫ ୟୁନିଟିରେ ଟ୍ରାଭେଲଟର ଆଦି ପ୍ରକଳ୍ପର ପ୍ରଧାନମନ୍ତ୍ରୀ ଶିଳାନ୍ୟାସ କରିବେ ।
କାର୍ଯ୍ୟକ୍ରମ ଅବସରରେ ପ୍ରଧାନମନ୍ତ୍ରୀ ସର୍ଦ୍ଦାର ପଟେଲଙ୍କ ୧୫୦ ତମ ଜୟନ୍ତୀ ଉପଲକ୍ଷେ ୧୫୦ ଟଙ୍କାର ଏକ ବିଶେଷ ସ୍ମାରକ ମୁଦ୍ରା ଏବଂ ଡାକଟିକଟ ଉନ୍ମୋଚନ କରିବେ ।
ଦ୍ୱିତୀୟ ଦିନ- ଅକ୍ଟୋବର ୩୧
ପ୍ରଧାନମନ୍ତ୍ରୀ ରାଷ୍ଟ୍ରୀୟ ଏକତା ଦିବସ ସମାରୋହରେ ଭାଗ ନେବେ ଏବଂ ସର୍ଦ୍ଦାର ବଲ୍ଲଭ ଭାଇ ପଟେଲଙ୍କୁ ପୁଷ୍ପାଞ୍ଜଳି ଅର୍ପଣ କରିବେ । ସେ ଏକତା ଦିବସର ଶପଥ ପାଠ କରାଇ ପରେଡ ଅବଲୋକନ କରିବେ ।
ପରେଡରେ ବିଏସଏଫ, ସିଆରପିଏଫ, ସିଆଇଏସଏଫ, ଆଇଟିବିପି ଏବଂ ଏସଏସବି ସହିତ ବିଭିନ୍ନ ରାଜ୍ୟ ପୁଲିସ ବଳର ଟ୍ରୁପ ଅଂଶ ଗ୍ରହଣ କରିବେ । ଚଳିତ ବର୍ଷର ମୁଖ୍ୟ ଆକର୍ଷଣ ଭାବେ ରାମପୁର ହାଉଣ୍ଡ ଏବଂ ମୁଢ଼ୋଲ ହାଉଣ୍ଡ ଭଳି ଭାରତୀୟ ପ୍ରଜାତିର କୁକୁର ସହ ବିଏସଏଫର ମାର୍ଚ୍ଚିଙ୍ଗ ଗ୍ରୁପ, ଗୁଜରାଟ ପୁଲିସର ଅଶ୍ଵଆରୋହୀ ଗ୍ରୁପ, ଆସାମ ପୁଲିସର ମୋଟରସାଇକେଲ ଡେୟାରଡେଭିଲ ସୋ ଏବଂ ବିଏସଏଫର ଓଟ ଗ୍ରୁପ ତଥା ଓଟ ଉପରେ ସବାର ଥିବା ବ୍ୟାଣ୍ଡ ସାମିଲ ଅଛନ୍ତି ।
ପରେଡରେ ସିଆରପିଏଫର ୫ ଶୌର୍ଯ୍ୟ ଚକ୍ର ବିଜେତା ଏବଂ ବିଏସଏଫର ୧୬ ବୀରତା ପଦକ ବିଜେତାଙ୍କୁ ମଧ୍ୟ ସମ୍ମାନିତ କରାଯିବ, ଯେଉଁମାନେ କି ଝାଡ଼ଖଣ୍ଡରେ ନକ୍ସଲ ବିରୋଧୀ ଅଭିଯାନ ଏବଂ ଜମ୍ମୁ-କାଶ୍ମୀରରେ ଆତଙ୍କବାଦ ବିରୋଧୀ ଅଭିଯାନରେ ଅସାଧାରଣ ସାହସ ଦେଖାଇଥିଲେ । ଅପରେସନ ସିନ୍ଦୂର ଅବସରରେ ବିଏସଏଫ ଯବାନଙ୍କୁ ମଧ୍ୟ ବୀରତା ପାଇଁ ସେମାନଙ୍କୁ ସମ୍ମାନିତ କରାଯିବ ।
ଚଳିତ ବର୍ଷ ରାଷ୍ଟ୍ରୀୟ ଏକତା ଦିବସ ପରେଡରେ ଏନଏସଜି, ଏନଡିଆରଏଫ, ଗୁଜରାଟ, ଜମ୍ମୁ-କାଶ୍ମୀର, ଆଣ୍ଡାମାନ-ନିକୋବର ଦ୍ୱୀପ ସମୂହ, ମଣିପୁର, ମହାରାଷ୍ଟ୍ର,ଛତିଶଗଡ଼, ଉତ୍ତରାଖଣ୍ଡ ଓ ପୁଡୁଚେରୀର ଦଶ ପ୍ରଜ୍ଞାପନ ମେଢ଼ ସାମିଲ ହେବେ, ଯାହାକି ‘ବିଭିନ୍ନତା ମଧ୍ୟରେ ଏକତା’ ବିଷୟବସ୍ତୁ ଉପରେ ଆଧାରିତ । ୯୦୦ କଳାକାରଙ୍କ ଦ୍ୱାରା ପ୍ରସ୍ତୁତ ଏକ ସାଂସ୍କୃତିକ କାର୍ଯ୍ୟକ୍ରମରେ ଭାରତୀୟ ସଂସ୍କୃତି ଓ ବିବିଧତାକୁ ଦର୍ଶାଉଥିବା ଭାରତର ଶାସ୍ତ୍ରୀୟ ନୃତ୍ୟ ପ୍ରଦର୍ଶନ କରାଯିବ । ଚଳିତ ବର୍ଷ ରାଷ୍ଟ୍ରୀୟ ଏକତା ଦିବସର ବିଶେଷ ମହତ୍ୱ ରହିଛି, କାରଣ ଦେଶ ସର୍ଦ୍ଦାର ବଲ୍ଲଭ ଭାଇ ପଟେଲଙ୍କ ୧୫୦ତମ ଜୟନ୍ତୀ ପାଳନ କରୁଛି ।
ପ୍ରଧାନମନ୍ତ୍ରୀ ‘ଆରମ୍ଭ ୭.୦’ର ସମାପନ ଅବସରରେ ୧୦୦ତମ ଫାଉଣ୍ଡେସନ କୋର୍ସର ପ୍ରଶିକ୍ଷିତ ଅଧିକାରୀମାନଙ୍କ ସହ ଆଲୋଚନା କରିବେ । ସପ୍ତମ ‘ଆରମ୍ଭ’କୁ ‘ଶାସନର ପୁନଃକଳ୍ପନା’ ବିଷୟ ଉପରେ ଅୟୋଜନ କରାଯାଇଛି । ଏହି ୧୦୦ତମ ଫାଉଣ୍ଡେସନ କୋର୍ସରେ ଭାରତର ୧୭ ପ୍ରଶାସନିକ ସେବା ଏବଂ ଭୁଟାନର ୩ ପ୍ରଶାସନିକ ସେବାକୁ ମିଶାଇ ମୋଟ ୬୬୦ ପ୍ରଶିକ୍ଷିତ ଅଧିକାରୀ ସାମିଲ ରହିଛନ୍ତି ।
