ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ବିହାରର କରାକଟରେ 48,520 କୋଟି ଟଙ୍କାରୁ ଅଧିକ ମୂଲ୍ୟର ବହୁବିଧ ବିକାଶ ପ୍ରକଳ୍ପର ଶିଳାନ୍ୟାସ ଏବଂ ଲୋକାର୍ପଣ କରିଛନ୍ତି। ସମାବେଶକୁ ସମ୍ବୋଧିତ କରି ସେ ଉଲ୍ଲେଖ କରିଥିଲେ ଯେ, ଏହି ପବିତ୍ର ଭୂମିରେ ବିହାରର ବିକାଶକୁ ତ୍ୱରାନ୍ୱିତ କରିବାର ସୌଭାଗ୍ୟ ତାଙ୍କୁ ମିଳିଛି ଏବଂ ସେ 48,000 କୋଟି ଟଙ୍କାରୁ ଅଧିକ ପ୍ରକଳ୍ପର ଉଦଘାଟନ ଏବଂ ଭିତ୍ତିପ୍ରସ୍ତର ସ୍ଥାପନ ଉପରେ ଆଲୋକପାତ କରିଥିଲେ। ପ୍ରଧାନମନ୍ତ୍ରୀ ତାଙ୍କୁ ଆଶୀର୍ବାଦ ଦେବାକୁ ଆସିଥିବା ବିଶାଳ ସମାବେଶକୁ ସ୍ୱୀକାର କରିଥିଲେ ଏବଂ ବିହାର ପ୍ରତି ସେମାନଙ୍କର ସ୍ନେହ ଏବଂ ପ୍ରେମ ପାଇଁ ଗଭୀର କୃତଜ୍ଞତା ପ୍ରକାଶ କରିଥିଲେ ଏବଂ ସେ ସର୍ବଦା ସେମାନଙ୍କର ସମର୍ଥନକୁ ସର୍ବୋଚ୍ଚ ସମ୍ମାନରେ ରଖିବେ ବୋଲି ଗୁରୁତ୍ୱ ଦେଇଥିଲେ। ସେ ବିହାରର ମାଆ ଏବଂ ଭଉଣୀମାନଙ୍କୁ ତାଙ୍କର ଆନ୍ତରିକ କୃତଜ୍ଞତା ଜଣାଇଥିଲେ।
ସାସାରାମର ଗୁରୁତ୍ୱ ଉପରେ ମନ୍ତବ୍ୟ ଦେଇ, ଏହାର ନାମ ମଧ୍ୟ ଭଗବାନ ରାମଙ୍କ ଐତିହ୍ୟ ବହନ କରେ ବୋଲି ଗୁରୁତ୍ୱ ଦେଇ, ଶ୍ରୀ ମୋଦୀ ଭଗବାନ ରାମଙ୍କ ବଂଶର ଗଭୀର ପରମ୍ପରା ଉପରେ ଆଲୋକପାତ କରିଥିଲେ, ଅଟଳ ପ୍ରତିବଦ୍ଧତାର ନୀତି - ଥରେ ପ୍ରତିଶ୍ରୁତି ଦିଆଯାଇସାରିବା ପରେ, ତାହା ପୂରଣ ହେବା ଆବଶ୍ୟକ, ଉପରେ ଗୁରୁତ୍ୱ ଦେଇ ସେ ଦୃଢ଼ ଭାବରେ କହିଥିଲେ ଯେ ଏହି ମାର୍ଗଦର୍ଶନକାରୀ ଦର୍ଶନ ବର୍ତ୍ତମାନ ନୂତନ ଭାରତର ନୀତି ପାଲଟିଛି। ଶ୍ରୀ ମୋଦୀ ପହଲଗାଓଁରେ ହୋଇଥିବା ସମ୍ପ୍ରତିକ ଆତଙ୍କବାଦୀ ଆକ୍ରମଣକୁ ମନେ ପକାଇଥିଲେ, ଯେଉଁଥିରେ ଅନେକ ନିର୍ଦ୍ଦୋଷ ନାଗରିକଙ୍କ ଜୀବନ ଯାଇଥିଲା। ସେ ଉଲ୍ଲେଖ କରିଥିଲେ ଯେ, ଏହି ଜଘନ୍ୟ ଆକ୍ରମଣର ମାତ୍ର ଗୋଟିଏ ଦିନ ପରେ, ସେ ବିହାର ଗସ୍ତ କରିଥିଲେ ଏବଂ ଦେଶକୁ ଏକ ଗମ୍ଭୀର ପ୍ରତିଶ୍ରୁତି ଦେଇଥିଲେ ଯେ, ଆତଙ୍କବାଦର ପୃଷ୍ଠପୋଷକମାନଙ୍କୁ ଦଣ୍ଡ ଭୋଗିବାକୁ ପଡିବ, ସେମାନଙ୍କ କଳ୍ପନା ବାହାରେ ଦଣ୍ଡ ପାଇବେ। ସେ କହିଥିଲେ ଯେ, ଆଜି ପୁଣି ଥରେ ବିହାରରେ ଠିଆ ହୋଇ ସେ ସେହି ପ୍ରତିଜ୍ଞା ପୂରଣ କରିଛନ୍ତି। “ଯେଉଁମାନେ ପାକିସ୍ତାନରେ ବସି ଆମ ଭଉଣୀମାନଙ୍କ ସିନ୍ଦୂରକୁ ପୋଛି ଦେଇଥିଲେ, ଆମର ସଶସ୍ତ୍ର ବାହିନୀ ସେମାନଙ୍କର ଆଡ୍ଡାସ୍ଥଳକୁ ଧ୍ୱଂସାବଶେଷରେ ପରିଣତ କରିଥିଲେ” ବୋଲି ଶ୍ରୀ ମୋଦୀ ଉଦବୋଧନ ଦେଇ କହିଥିଲେ। “ଭାରତର ଝିଅମାନଙ୍କ ସିନ୍ଦୂରର ଶକ୍ତି ପାକିସ୍ତାନ ଏବଂ ବିଶ୍ୱ ଦେଖିଲା” ବୋଲି କହିବା ସହିତ ସେ ଆହୁରି ମଧ୍ୟ କହିଛନ୍ତି ଯେ ଯେଉଁମାନେ ପାକିସ୍ତାନୀ ସେନାର ସୁରକ୍ଷାରେ ସୁରକ୍ଷିତ ଅନୁଭବ କରୁଥିଲେ, ସେମାନଙ୍କୁ ଭାରତୀୟ ସେନା ଏକ ନିର୍ଣ୍ଣାୟକ କାର୍ଯ୍ୟାନୁଷ୍ଠାନରେ ଆଣ୍ଠୁମାଡ଼ି ପକାଇ ଦେଇଛି। ଶ୍ରୀ ମୋଦୀ ଗୁରୁତ୍ୱାରୋପ କରି କହିଥିଲେ ଯେ ପାକିସ୍ତାନର ବାୟୁସେନା ଏବଂ ସାମରିକ ପ୍ରତିଷ୍ଠାନଗୁଡ଼ିକୁ କିଛି ମିନିଟ୍ ମଧ୍ୟରେ ଧ୍ୱଂସ କରିଦିଆଯାଇଛି। ଶ୍ରୀ ମୋଦୀ ଘୋଷଣା କରି କହିଥିଲେ, “ଏହା ହେଉଛି ନୂତନ ଭାରତ - ଏକ ଅପାର ଶକ୍ତି ଏବଂ ନମନୀୟତାର ଭାରତ”।
ବିହାର ହେଉଛି ବୀର କୁଁୱର ସିଂହଙ୍କ ଭୂମି, ଯିଏ ନିଜର ସାହସିକ ମନୋଭାବ ପାଇଁ ଜଣାଶୁଣା, ତାଙ୍କ ସମ୍ପର୍କରେ ଉଲ୍ଲେଖ କରି ପ୍ରଧାନମନ୍ତ୍ରୀ ଦେଶକୁ ସୁରକ୍ଷା ଦେବା ପାଇଁ ଭାରତୀୟ ସଶସ୍ତ୍ର ବାହିନୀ ଏବଂ ସୀମା ସୁରକ୍ଷା ବାହିନୀ (ଵିଏସଏଫ୍)ରେ ସେବା କରୁଥିବା ବିହାରର ହଜାର ହଜାର ଯୁବକଙ୍କ ଅବଦାନ ଉପରେ ଆଲୋକପାତ କରିଥିଲେ। ସେ ଅପରେସନ ସିନ୍ଦୂର ସମୟରେ ଵିଏସଏଫ୍ ଦ୍ୱାରା ପ୍ରଦର୍ଶିତ ଅସାଧାରଣ ସାହସ ଏବଂ ଅଦମ୍ୟ ସାମର୍ଥ୍ୟ ଉପରେ ଗୁରୁତ୍ୱାରୋପ କରି କହିଥିଲେ ଯେ ବିଶ୍ୱ ସେମାନଙ୍କ ଅତୁଳନୀୟ ସାହସିକତା ଦେଖିଛି। ପ୍ରଧାନମନ୍ତ୍ରୀ ଦୃଢ଼ ଭାବରେ କହିଛନ୍ତି ଯେ ଭାରତର ସୀମାରେ ନିୟୋଜିତ ବିଏସଏଫ କର୍ମଚାରୀମାନେ ସୁରକ୍ଷାର ଏକ ଅତୁଟ ଢାଲ, ସେମାନଙ୍କର ସର୍ବୋତ୍ତମ କର୍ତ୍ତବ୍ୟ ହେଉଛି ଭାରତ ମାତାର ସୁରକ୍ଷା। ସେ ବିଏସଏଫ ସବ-ଇନ୍ସପେକ୍ଟର ଶ୍ରୀ ଇମତିଆଜଙ୍କୁ ମଧ୍ୟ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ, ଯିଏ ମେ 10 ତାରିଖରେ ସୀମାରେ ତାଙ୍କର କର୍ତ୍ତବ୍ୟ ପାଳନ କରୁଥିବା ସମୟରେ ସହିଦ ହୋଇଥିଲେ, ବିହାରର ସାହସୀ ପୁଅଙ୍କ ପ୍ରତି ସେ ତାଙ୍କର ଗଭୀର ସମ୍ମାନ ପ୍ରକାଶ କରିଥିଲେ। ପ୍ରଧାନମନ୍ତ୍ରୀ ବିହାରରୁ ତାଙ୍କର ବକ୍ତବ୍ୟକୁ ପୁନରାବୃତ୍ତି କରି କହିଥିଲେ ଯେ, ଅପରେସନ ସିନ୍ଦୂରରେ ଭାରତ ଦ୍ୱାରା ପ୍ରଦର୍ଶିତ ଶକ୍ତି କେବଳ ଏହାର ତୂଣୀରରୁ ଗୋଟିଏ ତୀର ଥିଲା।
"ଭାରତର ଲଢ଼େଇ ଦେଶର ପ୍ରତ୍ୟେକ ଶତ୍ରୁଙ୍କ ବିରୁଦ୍ଧରେ, ସେମାନେ ସୀମା ବାହାରେ ରହି କାର୍ଯ୍ୟ କରନ୍ତୁ, କି ଦେଶ ଭିତରେ ହୁଅନ୍ତୁ" ବୋଲି ଶ୍ରୀ ମୋଦୀ ଦୃଢ଼ ଭାବରେ କହିଛନ୍ତି। ବର୍ଷ ବର୍ଷ ଧରି କିପରି ହିଂସାତ୍ମକ ଏବଂ ବିଶୃଙ୍ଖଳାକାରୀ ଶକ୍ତିକୁ ନିପାତ କରାଯାଇଛି ତାହା ବିହାର ଦେଖିଛି। ସେ ସାସାରାମ, କୈମୁର ଏବଂ ଆଖପାଖ ଜିଲ୍ଲାଗୁଡ଼ିକରେ ଅତୀତର ପରିସ୍ଥିତିକୁ ମନେ ପକାଇ କହିଥିଲେ, କିପରି ନକ୍ସଲବାଦ ଥରେ ଏହି ଅଞ୍ଚଳରେ ପ୍ରାଧାନ୍ୟ ବିସ୍ତାର କରିଥିଲା ଏବଂ ବନ୍ଧୁକ ଧରି ସଜ୍ଜିତ ମୁଖାପିନ୍ଧା ଆତଙ୍କବାଦୀଙ୍କ ଭୟ ଲୋକଙ୍କ ପାଇଁ ସବୁବେଳେ ବିପଦ ଥିଲା। ଶ୍ରୀ ମୋଦୀ ଆହୁରି ମନ୍ତବ୍ୟ ଦେଇଥିଲେ ଯେ, ସରକାରୀ ଯୋଜନା ଘୋଷଣା କରାଯାଇଥିଲେ ମଧ୍ୟ, ସେସବୁ ପ୍ରାୟତଃ ନକ୍ସଲ ପ୍ରଭାବିତ ଗ୍ରାମଗୁଡ଼ିକରେ ଲୋକଙ୍କ ପାଖରେ ପହଞ୍ଚି ପାରିନଥିଲା, ସେଠାରେ କୌଣସି ଡାକ୍ତରଖାନା କିମ୍ବା ମୋବାଇଲ୍ ଟାୱାର ନଥିଲା ଏବଂ ସ୍କୁଲ ପୋଡ଼ି ଦିଆଯାଇଥିଲା। ରାସ୍ତା ନିର୍ମାଣ କରୁଥିବା ଶ୍ରମିକମାନଙ୍କୁ ପ୍ରାୟତଃ ଟାର୍ଗେଟ କରାଯାଇ ହତ୍ୟା କରାଯାଉଥିଲା। ଶ୍ରୀ ମୋଦୀ କହିଥିଲେ ଯେ, ଏହି ବ୍ୟକ୍ତି ମାନଙ୍କର ବାବାସାହେବ ଆମ୍ବେଦକରଙ୍କ ସମ୍ବିଧାନ ଉପରେ କୌଣସି ବିଶ୍ୱାସ ନାହିଁ। ସେ ସ୍ୱୀକାର କରିଥିଲେ ଯେ, ଏହି ଆହ୍ବାନମୂଳକ ପରିସ୍ଥିତି ସତ୍ତ୍ୱେ, ନୀତିଶ କୁମାର ବିକାଶ ଦିଗରେ କାର୍ଯ୍ୟ କରିଥିଲେ, 2014 ପରଠାରୁ ଏହି ଦିଗରେ ପ୍ରୟାସ ଯଥେଷ୍ଟ ତ୍ୱରାନ୍ୱିତ ହୋଇଛି ବୋଲି ସେ ଗୁରୁତ୍ୱାରୋପ କରିଥିଲେ। ଶ୍ରୀ ମୋଦୀ ଆଲୋକପାତ କରିଥିଲେ ଯେ ମାଓବାଦୀମାନଙ୍କୁ ସେମାନଙ୍କ କାର୍ଯ୍ୟ ପାଇଁ ନ୍ୟାୟିକ ବ୍ୟବସ୍ଥା ମଧ୍ୟକୁ ଅଣାଯାଇଥିଲା ଏବଂ ଯୁବକମାନଙ୍କୁ ବିକାଶର ମୁଖ୍ୟସ୍ରୋତରେ ସାମିଲ କରିବା ପାଇଁ ପ୍ରୟାସ କରାଯାଇଥିଲା। ସେ ଉଲ୍ଲେଖ କରିଛନ୍ତି ଯେ 11 ବର୍ଷର ଦୃଢ଼ ପ୍ରୟାସର ଫଳାଫଳ ଏବେ ଦୃଶ୍ୟମାନ ହେଉଛି। 2014 ପୂର୍ବରୁ, ଭାରତର 125 ରୁ ଅଧିକ ଜିଲ୍ଲା ନକ୍ସଲବାଦ ଦ୍ୱାରା ପ୍ରଭାବିତ ହୋଇଥିଲେ, କିନ୍ତୁ ଆଜି କେବଳ 18 ଟି ଜିଲ୍ଲା ପ୍ରଭାବିତ ଅଛି ବୋଲି ସେ କହିଛନ୍ତି। "ଆମ ସରକାର କେବଳ ରାସ୍ତା ଯୋଗାଇ ଦେଉନାହିଁ ବରଂ ନିଯୁକ୍ତି ସୁଯୋଗ ମଧ୍ୟ ଯୋଗାଇ ଦେଉଛି, ସେହି ଦିନ ଦୂର ନୁହେଁ ଯେତେବେଳେ ମାଓ ହିଂସା ସମ୍ପୂର୍ଣ୍ଣ ଭାବରେ ବିଲୋପ କରାଯିବ, ଗାଁରେ ନିରବଚ୍ଛିନ୍ନ ଶାନ୍ତି, ସୁରକ୍ଷା, ଶିକ୍ଷା ଏବଂ ବିକାଶ ସୁନିଶ୍ଚିତ କରାଯିବ", ଶ୍ରୀ ମୋଦୀ ଦୃଢ଼ ଭାବରେ କହିଛନ୍ତି। ସେ ଦୃଢ଼ ଭାବରେ କହିଛନ୍ତି ଯେ, ଆତଙ୍କବାଦ ବିରୁଦ୍ଧରେ ଭାରତର ଲଢ଼େଇ ବନ୍ଦ ହୋଇନାହିଁ କିମ୍ବା ଥମି ଯାଇନାହିଁ, ସେ ଘୋଷଣା କରିଥିଲେ ଯେ, "ଯଦି ଆତଙ୍କବାଦ ପୁଣି ମୁଣ୍ଡ ଟେକେ, ତେବେ ଭାରତ ଏହାକୁ ତା'ର ଲୁଚି ରହିଥିବା ସ୍ଥାନରୁ ବାହାର କରି ନିର୍ଣ୍ଣାୟକ ଭାବରେ ଚୂର୍ଣ୍ଣ କରିବ"।
ସୁରକ୍ଷା ଏବଂ ଶାନ୍ତି ବିକାଶର ନୂତନ ପଥ ପ୍ରଶସ୍ତ କରେ ବୋଲି ଗୁରୁତ୍ୱାରୋପ କରି ପ୍ରଧାନମନ୍ତ୍ରୀ ଆଲୋକପାତ କରିଥିଲେ ଯେ, ନୀତିଶ କୁମାରଙ୍କ ନେତୃତ୍ୱରେ 'ଜଙ୍ଗଲ ରାଜ' ସରକାରଙ୍କ ବିଦାୟ ବିହାରର ସମୃଦ୍ଧି ପଥରେ ଅଗ୍ରଗତିକୁ ସୂଚିତ କରିଥିଲା। ସେ ମନ୍ତବ୍ୟ ଦେଇଥିଲେ ଯେ, ଭଙ୍ଗା ରାଜପଥ, ଖରାପ ରେଳପଥ ଏବଂ ସୀମିତ ବିମାନ ସଂଯୋଗର ଦିନଗୁଡ଼ିକ ଏବେ ଅତୀତର କଥା ହୋଇଯାଇଛି। ବିହାରରେ ପୂର୍ବରୁ ପାଟନାରେ କେବଳ ଗୋଟିଏ ବିମାନବନ୍ଦର ଥିଲା, କିନ୍ତୁ ଆଜି ଦରଭଙ୍ଗା ବିମାନବନ୍ଦର କାର୍ଯ୍ୟକ୍ଷମ ହୋଇଛି, ଦିଲ୍ଲୀ, ମୁମ୍ବାଇ ଏବଂ ବେଙ୍ଗାଲୁରୁ ଭଳି ସହରକୁ ସିଧାସଳଖ ବିମାନ ସେବା ପ୍ରଦାନ କରୁଛି ବୋଲି ଉଲ୍ଲେଖ କରି ପ୍ରଧାନମନ୍ତ୍ରୀ ପାଟନା ବିମାନବନ୍ଦରର ଟର୍ମିନାଲର ଆଧୁନିକୀକରଣ ପାଇଁ ବିହାରର ଲୋକଙ୍କ ଦୀର୍ଘକାଳୀନ ଦାବିକୁ ସ୍ୱୀକାର କରିଥିଲେ ଏବଂ ଦୃଢ଼ତାର ସହିତ କହିଥିଲେ ଯେ ଏହି ଦାବି ଏବେ ପୂରଣ ହୋଇଛି। ସେ ଆଲୋକପାତ କରିଥିଲେ ଯେ, ଗତକାଲି ସନ୍ଧ୍ୟାରେ, ତାଙ୍କୁ ପାଟନା ବିମାନବନ୍ଦରର ନୂତନ ଟର୍ମିନାଲ କୋଠା ଉଦଘାଟନ କରିବାର ସୌଭାଗ୍ୟ ମିଳିଛି, ଯାହା ବର୍ତ୍ତମାନ ଏକ କୋଟି ଯାତ୍ରୀଙ୍କୁ ସମ୍ଭାଳିବାକୁ ସକ୍ଷମ। ସେ ଏହା ମଧ୍ୟ କହିଥିଲେ ଯେ ବିହତା ବିମାନବନ୍ଦରରେ ୧,୪୦୦ କୋଟି ଟଙ୍କା ନିବେଶ କରାଯାଉଛି।
ବିହାରରେ ଚାରି ଲେନ୍ ଏବଂ ଛଅ ଲେନ୍ ରାସ୍ତାର ବ୍ୟାପକ ବିକାଶ ଉପରେ ଆଲୋକପାତ କରି, ଶ୍ରୀ ମୋଦୀ ପାଟନାରୁ ବକ୍ସର, ଗୟାରୁ ଡୋବି ଏବଂ ପାଟନାରୁ ବୋଧଗୟାକୁ ସଂଯୋଗ କରୁଥିବା ରାଜପଥ ସମେତ ପ୍ରମୁଖ ଭିତ୍ତିଭୂମି ପ୍ରକଳ୍ପଗୁଡ଼ିକର ଦ୍ରୁତ ପ୍ରଗତି ଉପରେ ଗୁରୁତ୍ୱାରୋପ କରିଥିଲେ। ସେ ପାଟନା – ଆରା - ସାସାରାମ ଗ୍ରୀନଫିଲ୍ଡ କରିଡର ସମ୍ପର୍କରେ ମଧ୍ୟ ଉଲ୍ଲେଖ କରିଥିଲେ, ଯେଉଁଠାରେ କାର୍ଯ୍ୟ ଦ୍ରୁତ ଗତିରେ ଆଗକୁ ବଢ଼ୁଛି। ଶ୍ରୀ ମୋଦୀ ଗଙ୍ଗା, ସୋନ, ଗଣ୍ଡକ ଏବଂ କୋସୀ ଭଳି ପ୍ରମୁଖ ନଦୀ ଉପରେ ନୂତନ ସେତୁ ନିର୍ମାଣ ଉପରେ ମନ୍ତବ୍ୟ ଦେଇଥିଲେ, ବିହାର ପାଇଁ ନୂତନ ସୁଯୋଗ ଏବଂ ସମ୍ଭାବନାକୁ ପ୍ରୋତ୍ସାହିତ କରିବାରେ ସେମାନଙ୍କର ଭୂମିକାକୁ ଗୁରୁତ୍ୱ ଦେଇଥିଲେ। ସେ କହିଥିଲେ ଯେ ହଜାର ହଜାର କୋଟି ଟଙ୍କାର ଏହି ପ୍ରକଳ୍ପଗୁଡ଼ିକ ହଜାର ହଜାର ଯୁବକଯୁବତୀଙ୍କ ପାଇଁ ନିଯୁକ୍ତି ସୃଷ୍ଟି କରୁଛି ଏବଂ ଏହି ଅଞ୍ଚଳରେ ପର୍ଯ୍ୟଟନ ଏବଂ ବାଣିଜ୍ୟକୁ ବୃଦ୍ଧି କରୁଛି।
ବିହାରର ରେଳ ଭିତ୍ତିଭୂମିର ପରିବର୍ତ୍ତନ ସମ୍ପର୍କରେ ଉଲ୍ଲେଖ କରି, ଶ୍ରୀ ମୋଦୀ ବିହାରରେ ବିଶ୍ୱସ୍ତରୀୟ ବନ୍ଦେ ଭାରତ ଟ୍ରେନ ପ୍ରଚଳନ ଏବଂ ରେଳ ଲାଇନକୁ ଦୋହରୀକରଣ ଏବଂ ତିନି ଗୁଣ କରିବାର ପ୍ରକ୍ରିୟା ଉପରେ ଆଲୋକପାତ କରିଥିଲେ। ସେ ଉଲ୍ଲେଖ କରିଥିଲେ ଯେ, ଛାପରା, ମୁଜାଫରପୁର ଏବଂ କଟିହାର ଭଳି ଅଞ୍ଚଳରେ କାମ ଦ୍ରୁତ ଗତିରେ ଚାଲିଛି। ସେ ଆହୁରି କହିଥିଲେ ଯେ ସୋନ ନଗର ଏବଂ ଅଣ୍ଡାଲ ମଧ୍ୟରେ ମଲ୍ଟି-ଟ୍ରାକିଂ ଚାଲିଛି, ଯାହା ଟ୍ରେନ୍ ଚଳାଚଳକୁ ଉଲ୍ଲେଖନୀୟ ଭାବରେ ଉନ୍ନତ କରିବ। ଶ୍ରୀ ମୋଦୀ ଏହା ମଧ୍ୟ ଘୋଷଣା କରିଥିଲେ ଯେ, ବର୍ତ୍ତମାନ 100 ରୁ ଅଧିକ ଟ୍ରେନ ସାସାରାମରେ ଅଟକୁଛି, ଯାହା ଏହି ଅଞ୍ଚଳର ବୃଦ୍ଧି ପାଉଥିବା ସଂଯୋଗକୁ ଦର୍ଶାଉଛି। ସେ ଦୃଢ଼ୋକ୍ତି ପ୍ରକାଶ କରିଥିଲେ ଯେ, ଦୀର୍ଘକାଳୀନ ଆହ୍ଵାନ ଗୁଡ଼ିକର ସମାଧାନ ହେବା ସହିତ, ରେଳ ନେଟୱାର୍କକୁ ଆଧୁନିକୀକରଣ କରିବା ପାଇଁ ମଧ୍ୟ ପ୍ରୟାସ କରାଯାଉଛି।
ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଥିଲେ ଯେ , ଏହି ବିକାଶଗୁଡ଼ିକ ପୂର୍ବରୁ କାର୍ଯ୍ୟକାରୀ ହୋଇପାରିଥାନ୍ତା, କିନ୍ତୁ ବିହାରର ରେଳ ବ୍ୟବସ୍ଥାକୁ ଆଧୁନିକୀକରଣ କରିବା ପାଇଁ ଯେଉଁ ବ୍ୟକ୍ତିମାନଙ୍କ ଉପରେ ଦାୟିତ୍ଵ ଥିଲା, ସେମାନେ ବ୍ୟକ୍ତିଗତ ଲାଭ ପାଇଁ ନିଯୁକ୍ତି ପ୍ରକ୍ରିୟାକୁ ଅପବ୍ୟବହାର କରି ଲୋକଙ୍କୁ ସେମାନଙ୍କ ଉପଯୁକ୍ତ ସୁଯୋଗରୁ ବଞ୍ଚିତ କରିଥିଲେ। ସେ ବିହାରର ଲୋକମାନଙ୍କୁ ପୂର୍ବରୁ 'ଜଙ୍ଗଲ ରାଜ' ଅଧୀନରେ ଶାସନ କରୁଥିବା ଲୋକଙ୍କ ପ୍ରତାରଣା ଏବଂ ମିଥ୍ୟା ପ୍ରତିଶ୍ରୁତି ବିରୁଦ୍ଧରେ ସତର୍କ ରହିବାକୁ ଅନୁରୋଧ କରିଥିଲେ। ବିଦ୍ୟୁତ ବିନା ବିକାଶ ଅସମ୍ପୂର୍ଣ୍ଣ ବୋଲି ଉଲ୍ଲେଖ କରି, ଶିଳ୍ପ ପ୍ରଗତି ଏବଂ ଜୀବନର ସହଜତା ନିର୍ଭରଯୋଗ୍ୟ ବିଦ୍ୟୁତ ଯୋଗାଣ ଉପରେ ନିର୍ଭର କରେ ବୋଲି କହି ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ ଯେ, ବିହାର ଗତ କିଛି ବର୍ଷ ମଧ୍ୟରେ ବିଦ୍ୟୁତ ଉତ୍ପାଦନ ଉପରେ ଯଥେଷ୍ଟ ଧ୍ୟାନ ଦେଇଛି। ସେ ମନ୍ତବ୍ୟ ଦେଇଥିଲେ ଯେ ବିହାରରେ ବିଦ୍ୟୁତ ବ୍ୟବହାର ଏକ ଦଶନ୍ଧି ପୂର୍ବ ତୁଳନାରେ ଚାରି ଗୁଣ ବୃଦ୍ଧି ପାଇଛି। ପ୍ରଧାନମନ୍ତ୍ରୀ ଘୋଷଣା କରିଥିଲେ ଯେ ନବୀନଗରରେ 30,000 କୋଟି ଟଙ୍କା ନିବେଶ ସହିତ ଏକ ପ୍ରମୁଖ ଏନଟିପିସି ବିଦ୍ୟୁତ ପ୍ରକଳ୍ପ ନିର୍ମାଣାଧୀନ ଅଛି ଏବଂ ଏହି ପ୍ରକଳ୍ପ ବିହାରକୁ 1,500 ମେଗାୱାଟ ବିଦ୍ୟୁତ୍ ଯୋଗାଇବ। ସେ ବକ୍ସର ଏବଂ ପିରପୈନ୍ତିରେ ନୂତନ ତାପଜ ବିଦ୍ୟୁତ୍ କେନ୍ଦ୍ର ଆରମ୍ଭ କରିବା ଉପରେ ମଧ୍ୟ ଆଲୋକପାତ କରିଥିଲେ।
ଭବିଷ୍ୟତ ଉପରେ ସରକାରଙ୍କ ଧ୍ୟାନକୁ ଗୁରୁତ୍ୱ ଦେଇ, ବିଶେଷ କରି ବିହାରକୁ ସବୁଜ ଶକ୍ତି ଆଡକୁ ଆଗେଇ ନେବା ଉପରେ ଗୁରୁତ୍ୱାରୋପ କରି, ଶ୍ରୀ ମୋଦୀ ରାଜ୍ୟର ନବୀକରଣୀୟ ଶକ୍ତି ପଦକ୍ଷେପର ଏକ ଅଂଶ ଭାବରେ କଜରାରେ ଏକ ସୌର ପାର୍କ ନିର୍ମାଣ ଉପରେ ଆଲୋକପାତ କରିଥିଲେ। ସେ ଉଲ୍ଲେଖ କରିଥିଲେ ଯେ ପ୍ରଧାନମନ୍ତ୍ରୀ - କୁସୁମ ଯୋଜନା ଅଧୀନରେ, ଚାଷୀମାନଙ୍କୁ ସୌର ଶକ୍ତି ମାଧ୍ୟମରେ ଆୟ ସୃଷ୍ଟି କରିବାର ସୁଯୋଗ ପ୍ରଦାନ କରାଯାଉଛି, ନବୀକରଣୀୟ କୃଷି ଫିଡରଗୁଡ଼ିକ ଚାଷ ଜମିକୁ ବିଦ୍ୟୁତ୍ ଯୋଗାଣ କରୁଛନ୍ତି, ଯାହା କୃଷି ଉତ୍ପାଦକତାକୁ ଆହୁରି ଉନ୍ନତ କରୁଛି। ସେ କହିଥିଲେ ଯେ, ଏହି ପ୍ରୟାସର ଫଳସ୍ୱରୂପ, ଲୋକଙ୍କ ଜୀବନରେ ଉନ୍ନତି ଆସିଛି ଏବଂ ମହିଳାମାନେ ସୁରକ୍ଷିତ ଅନୁଭବ କରୁଛନ୍ତି। ଶ୍ରୀ ମୋଦୀ ଗୁରୁତ୍ୱାରୋପ କରିଥିଲେ ଯେ ଆଧୁନିକ ଭିତ୍ତିଭୂମି ଗ୍ରାମ, ଗରିବ, ଚାଷୀ ଏବଂ କ୍ଷୁଦ୍ର ଶିଳ୍ପ ପାଇଁ ସର୍ବାଧିକ ଲାଭ ଆଣିଥାଏ, କାରଣ ଏହା ଦ୍ଵାରା ସେମାନେ ବଡ଼ ଜାତୀୟ ଏବଂ ଅନ୍ତର୍ଜାତୀୟ ବଜାର ସହିତ ସଂଯୋଗ କରିପାରିବେ। ସେ ଉଲ୍ଲେଖ କରିଥିଲେ ଯେ ରାଜ୍ୟରେ ନୂତନ ନିବେଶ ନୂତନ ସୁଯୋଗ ସୃଷ୍ଟି କରେ ଏବଂ ଆର୍ଥିକ ଅଭିବୃଦ୍ଧିକୁ ଆଗେଇ ନିଏ। ଗତ ବର୍ଷ ଅନୁଷ୍ଠିତ ବିହାର ବାଣିଜ୍ୟ ସମ୍ମିଳନୀକୁ ମନେ ପକାଇ, ଯେଉଁଠାରେ ବହୁ ସଂଖ୍ୟକ କମ୍ପାନୀ ରାଜ୍ୟରେ ନିବେଶ କରିବାକୁ ଆଗେଇ ଆସିଥିଲେ, ଶ୍ରୀ ମୋଦୀ କହିଥିଲେ ଯେ ରାଜ୍ୟ ମଧ୍ୟରେ ଶିଳ୍ପ ଅଭିବୃଦ୍ଧି ଶ୍ରମିକ ପ୍ରବାସର ଆବଶ୍ୟକତାକୁ ହ୍ରାସ କରେ, ଲୋକଙ୍କୁ ଘର ପାଖରେ ନିଯୁକ୍ତି ପାଇବା ବ୍ୟବସ୍ଥାକୁ ସୁଗମ କରେ। ସେ ଉଲ୍ଲେଖ କରିଥିଲେ ଯେ, ଉନ୍ନତ ପରିବହନ ସୁବିଧା ଚାଷୀମାନଙ୍କୁ ଅଧିକ ଦୂର ସ୍ଥାନରେ ସେମାନଙ୍କର ଉତ୍ପାଦ ବିକ୍ରୟ କରିବାକୁ ସକ୍ଷମ କରିଥାଏ, ଯାହା କୃଷି କ୍ଷେତ୍ରକୁ ଆହୁରି ମଜବୁତ କରିଥାଏ।
ବିହାରରେ ଚାଷୀଙ୍କ ଆୟ ବୃଦ୍ଧି ପାଇଁ ସରକାରଙ୍କ ନିରନ୍ତର ପ୍ରୟାସ ଉପରେ ଗୁରୁତ୍ୱାରୋପ କରି ପ୍ରଧାନମନ୍ତ୍ରୀ କହିଥିଲେ ଯେ, ପ୍ରଧାନମନ୍ତ୍ରୀ - କିଷାନ ସମ୍ମାନ ନିଧି ଯୋଜନା ଅଧୀନରେ ବିହାରର 75 ଲକ୍ଷରୁ ଅଧିକ ଚାଷୀ ଆର୍ଥିକ ସହାୟତା ପାଉଛନ୍ତି। ସେ ମଖାନା ବୋର୍ଡ ପ୍ରତିଷ୍ଠା ସମ୍ପର୍କରେ ଘୋଷଣା କରିଥିଲେ, ଏହା ଉପରେ ଗୁରୁତ୍ୱ ଦେଇ କହିଥିଲେ ଯେ, ବିହାରର ମଖାନାକୁ ଜିଆଇ ଟ୍ୟାଗ୍ ପ୍ରଦାନ କରାଯାଇଛି, ଯାହା ମଖାନା ଚାଷୀମାନଙ୍କୁ ଯଥେଷ୍ଟ ଲାଭ ଦେଇଛି। ସେ ଆହୁରି ଉଲ୍ଲେଖ କରିଥିଲେ ଯେ, ଏହି ବର୍ଷର ବଜେଟରେ ବିହାରରେ ଏକ ଜାତୀୟ ଖାଦ୍ୟ ପ୍ରକ୍ରିୟାକରଣ ପ୍ରତିଷ୍ଠାନ ଘୋଷଣା ଅନ୍ତର୍ଭୁକ୍ତ। ପ୍ରଧାନମନ୍ତ୍ରୀ ମନ୍ତବ୍ୟ ଦେଇଥିଲେ ଯେ ମାତ୍ର ଦୁଇରୁ ତିନି ଦିନ ପୂର୍ବରୁ କ୍ୟାବିନେଟ ଖରିଫ ଋତୁ ପାଇଁ ଧାନ ସମେତ 14 ଟି ଫସଲ ପାଇଁ ସର୍ବନିମ୍ନ ସହାୟକ ମୂଲ୍ୟ (ଏମଏସପି) ବୃଦ୍ଧିକୁ ଅନୁମୋଦନ କରିଥିଲେ, ଏବଂ କହିଥିଲେ ଯେ ଏହି ନିଷ୍ପତ୍ତି ଚାଷୀଙ୍କ ଉତ୍ପାଦର ଉତ୍ତମ ମୂଲ୍ୟ ସୁନିଶ୍ଚିତ କରିବ ଏବଂ ଅଧିକ ଆୟ ଆଣିବ।
ବିରୋଧୀ ଦଳକୁ କଟାକ୍ଷ କରି ପ୍ରଧାନମନ୍ତ୍ରୀ ମନ୍ତବ୍ୟ ଦେଇଥିଲେ ଯେ, ଯେଉଁମାନେ ବିହାରକୁ ସର୍ବାଧିକ ପ୍ରତାରଣା କରିଛନ୍ତି ସେମାନେ ଏବେ କ୍ଷମତା ଫେରି ପାଇବା ପାଇଁ ସାମାଜିକ ନ୍ୟାୟର ମିଥ୍ୟା କାହାଣୀ ବ୍ୟବହାର କରୁଛନ୍ତି। ସେମାନଙ୍କ ଶାସନ କାଳରେ ବିହାରର ଗରିବ ଏବଂ ଅବହେଳିତ ସମ୍ପ୍ରଦାୟକୁ ଏକ ଉନ୍ନତ ଜୀବନ ଖୋଜିବା ପାଇଁ ରାଜ୍ୟ ଛାଡିବାକୁ ବାଧ୍ୟ କରାଯାଇଥିଲା ବୋଲି ସେ ଉଲ୍ଲେଖ କରିଥିଲେ। "ଦଶନ୍ଧି ଧରି, ବିହାରରେ ଦଳିତ, ପଛୁଆ ବର୍ଗ ଏବଂ ଆଦିବାସୀ ସମ୍ପ୍ରଦାୟ ମୌଳିକ ପରିମଳ ସୁବିଧାରୁ ମଧ୍ୟ ବଞ୍ଚିତ ଥିଲେ" ବୋଲି ପ୍ରଧାନମନ୍ତ୍ରୀ କହିଥିଲେ। ଏହି ସମ୍ପ୍ରଦାୟଗୁଡ଼ିକୁ ବ୍ୟାଙ୍କିଂ ସୁବିଧାରୁ ବଞ୍ଚିତ କରାଯାଇଥିଲା, ପ୍ରାୟତଃ ବ୍ୟାଙ୍କରେ ପ୍ରବେଶ ମନା କରାଯାଇଥିଲା ଏବଂ ପ୍ରାୟତଃ ବାସହୀନ ରହିଥିଲେ, ଲକ୍ଷ ଲକ୍ଷ ଲୋକ ଉପଯୁକ୍ତ ଆଶ୍ରୟ ବିନା ଜୀବନ ବିତାଉଥିଲେ। ସେ ପ୍ରଶ୍ନ କରିଥିଲେ ଯେ ବିଗତ ସରକାରଙ୍କ ଅଧୀନରେ ବିହାରର ଲୋକମାନେ ଯେଉଁ ଦୁଃଖ, କଷ୍ଟ ଏବଂ ଅନ୍ୟାୟ ସହ୍ୟ କରିଥିଲେ ତାହା ବିରୋଧୀ ଦଳଗୁଡ଼ିକ ଦ୍ୱାରା ପ୍ରତିଶୃତି ଦିଆଯାଇଥିବା ସାମାଜିକ ନ୍ୟାୟ କି? ସେ ଦୃଢ଼ୋକ୍ତି ପ୍ରକାଶ କରିଥିଲେ ଯେ, ଏହା ଠାରୁ ବଡ଼ ଅନ୍ୟାୟ ଆଉ କିଛି ହୋଇପାରେ ନାହିଁ। ପ୍ରଧାନମନ୍ତ୍ରୀ ମନ୍ତବ୍ୟ ଦେଇଥିଲେ ଯେ ବିରୋଧୀ ଦଳ କେବେବି ଦଳିତ ଏବଂ ପଛୁଆ ସମ୍ପ୍ରଦାୟଙ୍କ ସଂଘର୍ଷକୁ ପ୍ରକୃତରେ ଚିନ୍ତା କରିନଥିଲେ ଏବଂ ବିହାରର ବିକାଶ ପାଇଁ କାମ କରିବା ପରିବର୍ତ୍ତେ ଏହାର ଦାରିଦ୍ର୍ୟ ପ୍ରଦର୍ଶନ କରିବା ପାଇଁ ବିଦେଶୀ ପ୍ରତିନିଧିମଣ୍ଡଳ ଆଣିବା ପାଇଁ ସେମାନଙ୍କୁ ସମାଲୋଚନା କରିଥିଲେ। ପ୍ରଧାନମନ୍ତ୍ରୀ କହିଥିଲେ ଯେ ବର୍ତ୍ତମାନ, ଦଳିତ, ଅବହେଳିତ ଗୋଷ୍ଠୀ ଏବଂ ପଛୁଆ ସମ୍ପ୍ରଦାୟ ନିଜ ଭୁଲ କାର୍ଯ୍ୟ ଯୋଗୁଁ ବିରୋଧୀ ଦଳଠାରୁ ଦୂରେଇ ଯିବା ପରେ, ଦଳ ସାମାଜିକ ନ୍ୟାୟର ଆହ୍ୱାନ କରି ନିଜର ପରିଚୟ ପୁନର୍ଜୀବିତ କରିବାକୁ ଚେଷ୍ଟା କରୁଛି।
ତାଙ୍କ ସରକାର ଅଧୀନରେ ବିହାର ଏବଂ ଦେଶ ସାମାଜିକ ନ୍ୟାୟର ଏକ ନୂତନ ସୂର୍ଯ୍ୟୋଦୟ ଦେଖିଛି ବୋଲି ଉଲ୍ଲେଖ କରି ଶ୍ରୀ ମୋଦୀ ଗୁରୁତ୍ୱାରୋପ କରିଥିଲେ ଯେ, ସରକାର ଗରିବ ଲୋକଙ୍କ ପାଇଁ ଅତ୍ୟାବଶ୍ୟକ ସେବାର ଉପଲବ୍ଧତା ସୁନିଶ୍ଚିତ କରିଛନ୍ତି ଏବଂ 100% ଯୋଗ୍ୟ ହିତାଧିକାରୀଙ୍କ ନିକଟରେ ଏହି ଲାଭ ପହଞ୍ଚାଇବା ପାଇଁ କାର୍ଯ୍ୟ କରୁଛନ୍ତି। ସେ କହିଥିଲେ ଯେ ଚାରି କୋଟି ନୂତନ ଘର ଯୋଗାଇ ଦିଆଯାଇଛି ଏବଂ 'ଲକ୍ଷପତି ଦିଦି' ପଦକ୍ଷେପ ମାଧ୍ୟମରେ ତିନି କୋଟି ମହିଳାଙ୍କୁ ସଶକ୍ତ କରାଯାଉଛି। ସେ ଆହୁରି ମଧ୍ୟ କହିଛନ୍ତି ଯେ, ସାରା ଦେଶରେ ବର୍ତ୍ତମାନ 12 କୋଟିରୁ ଅଧିକ ପରିବାରରେ ଟ୍ୟାପ୍ ପାଣି ସଂଯୋଗ ଅଛି, ଯାହା ଦ୍ୱାରା ସାରା ଦେଶରେ ଜୀବନର ମାନ ଉନ୍ନତ ହେଉଛି। ଶ୍ରୀ ମୋଦୀ ଆଲୋକପାତ କରିଥିଲେ ଯେ, 70 ବର୍ଷରୁ ଅଧିକ ବୟସର ପ୍ରତ୍ୟେକ ବୟସ୍କ ନାଗରିକ 5 ଲକ୍ଷ ଟଙ୍କା ପର୍ଯ୍ୟନ୍ତ ମାଗଣା ଚିକିତ୍ସା ପାଇବାକୁ ହକଦାର। ସେ ଉଲ୍ଲେଖ କରିଥିଲେ ଯେ, ଆବଶ୍ୟକ ଲୋକଙ୍କୁ ସମର୍ଥନ କରିବା ପାଇଁ ପ୍ରତି ମାସରେ ମାଗଣା ରାସନ ଯୋଗାଇ ଦିଆଯାଉଛି। "ଆମ ସରକାର ପ୍ରତ୍ୟେକ ଗରିବ ଏବଂ ଅବହେଳିତ ବ୍ୟକ୍ତିଙ୍କ ସହିତ ଦୃଢ଼ ଭାବରେ ଠିଆ ହୋଇଛି, ସେମାନଙ୍କର କଲ୍ୟାଣ ଏବଂ ଉନ୍ନତି ସୁନିଶ୍ଚିତ କରୁଛି" ବୋଲି ଶ୍ରୀ ମୋଦୀ ଦୃଢ଼ ଭାବରେ କହିଥିଲେ।
ପ୍ରଧାନମନ୍ତ୍ରୀ ସରକାରଙ୍କ ପ୍ରତିବଦ୍ଧତା ଉପରେ ଗୁରୁତ୍ୱାରୋପ କରିଥିଲେ ଯେ, ଯେପରି କୌଣସି ଗ୍ରାମ କିମ୍ବା ଯୋଗ୍ୟ ପରିବାର ଏହାର କଲ୍ୟାଣକାରୀ ପଦକ୍ଷେପରୁ ବାଦ ନପଡ଼ିବେ ଏବଂ ଏହି ଦୃଷ୍ଟିକୋଣ ସହିତ ବିହାର ଡକ୍ଟର ଭୀମରାଓ ଆମ୍ବେଦକର ସମଗ୍ର ସେବା ଅଭିଯାନ ଆରମ୍ଭ କରିଥିବାରୁ ସେ ସନ୍ତୋଷ ପ୍ରକାଶ କରିଥିଲେ। ସେ ଆଲୋକପାତ କରିଥିଲେ ଯେ ଏହି ଅଭିଯାନ ଅଧୀନରେ, ସରକାର ଏକକାଳୀନ 22ଟି ଅତ୍ୟାବଶ୍ୟକ ଯୋଜନା ସହିତ ଗ୍ରାମ ଏବଂ ସମ୍ପ୍ରଦାୟରେ ପହଞ୍ଚିବାରେ ଲାଗିଛନ୍ତି ଏବଂ ଦଳିତ, ମହାଦଳିତ, ପଛୁଆ ବର୍ଗ ଏବଂ ଗରିବ ଲୋକଙ୍କୁ ସିଧାସଳଖ ଲାଭ ପହଞ୍ଚାଇବାକୁ ଲକ୍ଷ୍ୟ ରଖିଛନ୍ତି। ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ ଯେ, ଏପର୍ଯ୍ୟନ୍ତ 30,000 ରୁ ଅଧିକ ଶିବିର ଆୟୋଜନ କରାଯାଇଛି ଏବଂ ଲକ୍ଷ ଲକ୍ଷ ଲୋକ ଏହି ଅଭିଯାନ ସହିତ ଯୋଡ଼ି ହୋଇଛନ୍ତି। ସେ ଗୁରୁତ୍ୱାରୋପ କରିଥିଲେ ଯେ, ଯେତେବେଳେ ସରକାର ସିଧାସଳଖ ହିତାଧିକାରୀଙ୍କ ନିକଟରେ ପହଞ୍ଚନ୍ତି, ସେତେବେଳେ ଭେଦଭାବ ଏବଂ ଦୁର୍ନୀତି ଦୂର ହୁଏ ଏବଂ ଏହାକୁ ସାମାଜିକ ନ୍ୟାୟର ପ୍ରକୃତ ପ୍ରତିଫଳନ ଭାବରେ ନିଶ୍ଚିତ କରାଯାଏ।
ବାବା ସାହେବ ଆମ୍ବେଦକର, କର୍ପୂରୀ ଠାକୁର, ବାବୁ ଜଗଜୀବନ ରାମ ଏବଂ ଜୟପ୍ରକାଶ ନାରାୟଣଙ୍କ ଦ୍ୱାରା କଳ୍ପିତ ବିହାର ନିର୍ମାଣ କରିବାର ଦୃଷ୍ଟିକୋଣକୁ ରେଖାଙ୍କିତ କରି ଶ୍ରୀ ମୋଦୀ କହିଥିଲେ ଯେ, ଚୂଡ଼ାନ୍ତ ଲକ୍ଷ୍ୟ ହେଉଛି ଏକ ବିକଶିତ ବିହାର, ଯାହା ଏକ ବିକଶିତ ଭାରତରେ ଯୋଗଦାନ ଦେବ। ସେ ମନ୍ତବ୍ୟ ଦେଇଥିଲେ ଯେ, ଯେତେବେଳେ ବି ବିହାର ପ୍ରଗତି କରିଛି, ଭାରତ ବିଶ୍ୱ ସ୍ତରରେ ନୂତନ ଶିଖରରେ ପହଞ୍ଚିଛି। ସେ ବିଶ୍ୱାସ ପ୍ରକାଶ କରି ତାଙ୍କ ବକ୍ତବ୍ୟ ସମାପ୍ତ କରି କହିଥିଲେ ଯେ, ସମସ୍ତେ ମିଶି ବିକାଶର ଗତିକୁ ତ୍ୱରାନ୍ୱିତ କରିବେ ଏବଂ ଏହି ବିକାଶମୂଳକ ପଦକ୍ଷେପ ପାଇଁ ଲୋକମାନଙ୍କୁ ଅଭିନନ୍ଦନ ଜଣାଇଥିଲେ।
ବିହାରର ରାଜ୍ୟପାଳ ଶ୍ରୀ ଆରିଫ୍ ମହମ୍ମଦ ଖାନ, ବିହାରର ମୁଖ୍ୟମନ୍ତ୍ରୀ ଶ୍ରୀ ନୀତିଶ କୁମାର, କେନ୍ଦ୍ର ମନ୍ତ୍ରୀ ଶ୍ରୀ ଜିତନ୍ ରାମ ମାନଝି, ଶ୍ରୀ ଗିରିରାଜ ସିଂହ, ଶ୍ରୀ ରାଜୀବ ରଞ୍ଜନ ସିଂହ, ଶ୍ରୀ ଚିରାଗ ପାସୱାନ, ଶ୍ରୀ ନିତ୍ୟାନନ୍ଦ ରାୟ, ଶ୍ରୀ ସତୀଶ ଚନ୍ଦ୍ର ଦୁବେ, ଡକ୍ଟର ରାଜ ଭୂଷଣ ଚୌଧୁରୀ ଏହି କାର୍ଯ୍ୟକ୍ରମରେ ଅନ୍ୟ ମାନ୍ୟଗଣ୍ୟ ବ୍ୟକ୍ତିମାନଙ୍କ ମଧ୍ୟରେ ଉପସ୍ଥିତ ଥିଲେ।
ପୃଷ୍ଠଭୂମି
ଏହି କ୍ଷେତ୍ରରେ ବିଦ୍ୟୁତ୍ ଭିତ୍ତିଭୂମିକୁ ବୃଦ୍ଧି କରି ପ୍ରଧାନମନ୍ତ୍ରୀ ଔରଙ୍ଗାବାଦ ଜିଲ୍ଲାରେ ନବୀନଗର ସୁପର ଥର୍ମାଲ ପାୱାର ପ୍ରୋଜେକ୍ଟ, ପର୍ଯ୍ୟାୟ- ll (3x800 MW) ପାଇଁ ଶିଳାନ୍ୟାସ କରିଥିଲେ, ଯାହାର ଲକ୍ଷ୍ୟ ବିହାର ଏବଂ ପୂର୍ବ ଭାରତ ପାଇଁ ଶକ୍ତି ସୁରକ୍ଷା ସୁନିଶ୍ଚିତ କରିବା। ଏହା ଶିଳ୍ପ ଅଭିବୃଦ୍ଧିକୁ ବୃଦ୍ଧି କରିବ, ନିଯୁକ୍ତି ସୁଯୋଗ ସୃଷ୍ଟି କରିବ ଏବଂ ଏହି ଅଞ୍ଚଳରେ ସୁଲଭ ମୂଲ୍ୟରେ ବିଦ୍ୟୁତ୍ ଯୋଗାଇବ।
ଏହି ଅଞ୍ଚଳରେ ସଡ଼କ ଭିତ୍ତିଭୂମି ଏବଂ ସଂଯୋଗୀକରଣକୁ ଏକ ପ୍ରମୁଖ ପ୍ରୋତ୍ସାହନ ସ୍ୱରୂପ, ପ୍ରଧାନମନ୍ତ୍ରୀ ଏନ୍ ଏନ୍ -119A ର ପାଟନା - ଆରା - ସାସାରାମ ସେକ୍ସନର ଚାରି-ଲେନ୍ ଏବଂ ବାରଣାସୀ- ରାଞ୍ଚି- କୋଲକାତା ରାଜପଥ (ଏନ୍ ଏନ୍ - 319B) ଏବଂ ରାମନଗର- କାଚ୍ଚି ଦରଘା ଷ୍ଟ୍ରେଚ୍ (ଏନ୍ ଏଚ୍ -119D) ର ଛଅ- ଲେନ୍ ଏବଂ ବକ୍ସର ଏବଂ ଭରୌଲି ମଧ୍ୟରେ ଏକ ନୂତନ ଗଙ୍ଗା ସେତୁ ନିର୍ମାଣ ସମେତ ବିଭିନ୍ନ ସଡ଼କ ପ୍ରକଳ୍ପର ଶିଳାନ୍ୟାସ କରିଛନ୍ତି। ଏହି ପ୍ରକଳ୍ପଗୁଡ଼ିକ ବାଣିଜ୍ୟ ଏବଂ ଆଞ୍ଚଳିକ ସଂଯୋଗୀକରଣକୁ ବୃଦ୍ଧି କରିବା ସହିତ ରାଜ୍ୟରେ ସୁଗମ ହାଇ-ସ୍ପିଡ୍ କରିଡର ସୃଷ୍ଟି କରିବ। ସେ ଏନ୍ ଏଚ୍ -22 ର ପ୍ରାୟ 5,520 କୋଟି ଟଙ୍କା ମୂଲ୍ୟର ପାଟନା - ଗୟା - ଡୋବି ସେକ୍ସନର ଚାରି ଲେନ୍ ଏବଂ ଏନ୍ ଏଚ୍ - 27 ର ଗୋପାଳଗଞ୍ଜ ଟାଉନରେ ଗ୍ରେଡ୍ ଉନ୍ନତିକରଣର ମଧ୍ୟ ଉଦଘାଟନ କରିଥିଲେ।
ଦେଶବ୍ୟାପୀ ରେଳ ଭିତ୍ତିଭୂମିର ଉନ୍ନତି ପାଇଁ ତାଙ୍କର ପ୍ରତିବଦ୍ଧତା ଅନୁଯାୟୀ, ପ୍ରଧାନମନ୍ତ୍ରୀ 1330 କୋଟି ଟଙ୍କାରୁ ଅଧିକ ମୂଲ୍ୟର ସୋନ ନଗର - ମହମ୍ମଦ ଗଞ୍ଜ ମଧ୍ୟରେ ତୃତୀୟ ରେଳ ଲାଇନକୁ ଲୋକାର୍ପଣ କରିଛନ୍ତି।
ସମ୍ପୂର୍ଣ୍ଣ ଅଭିଭାଷଣ ପଢିବା ପାଇଁ ଏଠାରେ କ୍ଲିକ କରନ୍ତୁ
जिन लोगों ने पाकिस्तान में बैठकर हमारी बहनों का सिंदूर उजाड़ा था... हमारी सेना ने उनके ठिकानों को खंडहर में बदल दिया: PM @narendramodi pic.twitter.com/10ak60BiMr
— PMO India (@PMOIndia) May 30, 2025
भारत की बेटियों के सिंदूर की शक्ति क्या होती है... ये पाकिस्तान ने भी देखी और दुनिया ने भी देखी! pic.twitter.com/EfKAb8mEwG
— PMO India (@PMOIndia) May 30, 2025
वो दिन दूर नहीं जब माओवादी हिंसा का पूरी तरह से खात्मा हो जाएगा... शांति, सुरक्षा, शिक्षा और विकास गाँव-गाँव तक बिना रुकावट के पहुंचेंगे। pic.twitter.com/wXMWbe2zVh
— PMO India (@PMOIndia) May 30, 2025
बिहार के लोगों की लंबे समय से मांग थी कि पटना एयरपोर्ट के टर्मिनल को आधुनिक बनाया जाए... अब ये मांग भी पूरी हो गई है: PM @narendramodi pic.twitter.com/jj4oEocl8B
— PMO India (@PMOIndia) May 30, 2025
हमारी सरकार ने मखाना बोर्ड की घोषणा की है। हमने बिहार के मखाना को जीआई टैग दिया, इससे मखाना किसानों को बहुत लाभ हुआ है: PM @narendramodi pic.twitter.com/hBtpQKlEp7
— PMO India (@PMOIndia) May 30, 2025
