ମହାରାଷ୍ଟ୍ରର ପୁଣେସ୍ଥିତ ଭାରତୀୟ ବିଜ୍ଞାନ ଶିକ୍ଷା ଓ ଗବେଷଣା ସଂସ୍ଥାନ (ଆଇଜର)ର ବୈଜ୍ଞାନିକମାନଙ୍କ ସହ ଆଜି ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ମତ ବିନିମୟ କରିଛନ୍ତି ।
କୃଷି ଜୈବ ପ୍ରଯୁକ୍ତି, ସ୍ଵଚ୍ଛ ଇନ୍ଧନର ପ୍ରୟୋଗ ଓ ପ୍ରାକୃତିକ ସମ୍ପଦର ସୁବିନିଯୋଗ ଆଦି ବିଭିନ୍ନ ବିଷୟ ଉପରେ ପ୍ରଧାନମନ୍ତ୍ରୀଙ୍କ ସମ୍ମୁଖରେ ଆଇଜର ବୈଜ୍ଞାନିକମାନେ ଉପସ୍ଥାପନା କରିଥିଲେ । ଆଣବିକ ଜୀବ ବିଜ୍ଞାନ, ରୋଗ ପ୍ରତିଷେଧକ, ଜଳବାୟୁ ଅଧ୍ୟୟନ ଏବଂ ଗାଣିତିକ ଅର୍ଥ ବିଜ୍ଞାନ ଗବେଷଣା କ୍ଷେତ୍ରରେ ଅତ୍ୟାଧୁନିକ ପ୍ରଯୁକ୍ତି ବିଦ୍ୟାର ପ୍ରୟୋଗ ସମ୍ପର୍କରେ ବୈଜ୍ଞାନିକମାନେ ପ୍ରଧାନମନ୍ତ୍ରୀଙ୍କୁ ଅବଗତ କରାଇଥିଲେ ।
ବୈଜ୍ଞାନିକମାନଙ୍କ ସୂଚନାଗତ ଉପସ୍ଥାପନା ଲାଗି ପ୍ରଧାନମନ୍ତ୍ରୀ ପ୍ରଶଂସା କରିଥିଲେ । ସ୍ୱଳ୍ପ ମୂଲ୍ୟର ପ୍ରଯୁକ୍ତିବିଦ୍ୟାକୁ ବିକଶିତ କରିବା ଲାଗି ପ୍ରଧାନମନ୍ତ୍ରୀ ବୈଜ୍ଞାନିକମାନଙ୍କୁ ଅନୁରୋଧ କରିଥିଲେ, ଯାହା ଭାରତର ବିଶେଷ ଆବଶ୍ୟକତାକୁ ପୂରଣ କରିବା ସହିତ ଦେଶର ବିକାଶ ଗତିକୁ ବଢାଇବାରେ ସହାୟକ ହେବ ।
ଏହା ପୂର୍ବରୁ ପ୍ରଧାନମନ୍ତ୍ରୀ ପୁଣେର ଆଇଜର ପରିସର ବୁଲି ଦେଖିଥିଲେ ଏବଂ ଛାତ୍ର ଓ ଗବେଷକଙ୍କ ସହ ମତ ବିନିମୟ କରିଥିଲେ । ଆଇଜରରେ ସି-ଡିଏସି ଦ୍ଵାରା ସ୍ଥାପିତ ସୁପର କମ୍ପ୍ୟୁଟର ପରମ ବ୍ରହ୍ମକୁ ମଧ୍ୟ ଦେଖିଥିଲେ, ଯେଉଁଥିରେ 797 ଟେରାଫ୍ଲପ୍ସର ଚରମ କମ୍ପ୍ୟୁଟିଂ କ୍ଷମତା ରହିଛି ।
ଭାରତୀୟ ବିଜ୍ଞାନ ଶିକ୍ଷା ଓ ଗବେଷଣା ସଂସ୍ଥାନଗୁଡିକ ଭାରତର ପ୍ରମୁଖ ବିଜ୍ଞାନ ଶିକ୍ଷା ଓ ଗବେଷଣା ସଂସ୍ଥାନର ଏକ ସମୂହ ଅଟେ ।
ପୁଣେଠାରେ ପୁଲିସ ମହାନିର୍ଦ୍ଦେଶକମାନଙ୍କ ସମ୍ମିଳନୀରେ ଯୋଗଦେବା ଲାଗି ପ୍ରଧାନମନ୍ତ୍ରୀଙ୍କ ଏହି ଦୁଇ ଦିନିଆ ଗସ୍ତ କରିଛନ୍ତି ।
