ଚୀନର ରାଷ୍ଟ୍ରୀୟ ଦିବସ ଅବସରରେ ସେଠାକାର ଜନସାଧାରଣଙ୍କୁ ମୋର ହାର୍ଦ୍ଦିକ ଅଭିନନ୍ଦନ ।
ଆମ ଦୁଇ ଦେଶ ମଧ୍ୟରେ ସମ୍ପର୍କ ଯୁଗ ଯୁଗର । ଅଧ୍ୟାତ୍ମବାଦ, ଶିକ୍ଷା, ଅଧ୍ୟୟନ, କଳା, ବାଣିଜ୍ୟ, ପରସ୍ପର ସଭ୍ୟତା ଓ ସମୃଦ୍ଧିକୁ ଆଦର କରିବା ହେଉଛି ଆମ ସମ୍ପର୍କର ମୂଳାଧାର । ମୁଁ ପୂର୍ବରୁ କହିଛି, ଦୁଇ ଦେଶର ସଭ୍ୟତା ଓ ସଂସ୍କୃତିରେ ଆଶା, ଆକାଂକ୍ଷା, ଆହ୍ଵାନ ଓ ସୁଯୋଗର ମିଶ୍ରିତ ପ୍ରତିଫଳନ ହେଉଛି । ଆମେ ପରସ୍ପରର ସଫଳତାରେ ଅନୁପ୍ରାଣିତ ହୋଇ ପାରିବା । ଯେତେବେଳେ ସାରା ବିଶ୍ଵ ଏସିଆ ଆଡକୁ ଅନେଇଛି, ଚୀନ ଓ ଭାରତର ପ୍ରଗତି ତଥା ସମୃଦ୍ଧି ଏବଂ ଆମ ଦୁଇ ଦେଶ ମଧ୍ୟରେ ନୀବିଡ ସହଯୋଗିତା ଏହି ମହାଦେଶର ଶାନ୍ତି ଓ ସ୍ଥିରତାର ଭବିଷ୍ୟତକୁ ଏକ ସୂନ୍ଦର ରୂପ ଦେବାର ସାମର୍ଥ୍ୟ ବହନ କରେ । ରାଷ୍ଟ୍ରପତି ଜି ଜିନପିଙ୍ଗ ଏବଂ ପ୍ରଧାନମନ୍ତ୍ରୀ ଲିଙ୍କ ସହିତ ମୁଁ ଏହି ଭବିଷ୍ୟଦୃଷ୍ଟି ଦେଖୁଛି ।
ନିକଟରେ ଆମେ ଆମର ସମ୍ବନ୍ଧର ସବୁ ଦିଗରେ ସହଯୋଗିତା ଓ ଆଲୋଚନାକୁ ଆହୁରି ମଜବୁତ କରିପାରିଛୁ । ପରସ୍ପର ମଧ୍ୟରେ ଆସ୍ଥା ଓ ବିଶ୍ଵାସ ଏବଂ ଦୁଇ ଦେଶର ଲୋକଙ୍କ ମଧ୍ୟରେ ସମ୍ପର୍କକୁ ଆହୁରି ଦିଗନ୍ତବିସ୍ତାରୀ ଓ ସୁଦୃଢ କରିବାର ଆଶା ରଖିଛୁ । ଏହି ଦିଗରେ ଯାତ୍ରା ପାଇଁ ଆମର ପ୍ରୟାସ ଜାରି ରହିବ ।
