ফ্রান্সকী প্রেসিদেন্ত, হিজ এক্সেলেন্সী মিস্তর ইমানুএল মেক্রোনগী পাউজেল মতুং ইন্না, প্রধান মন্ত্রী শ্রী নরেন্দ্র মোদীনা জুন ১৩দগী ১৪, ২০২৬ ফাওবা (নাইস) অমসুং জুন ১৬দগী ১৯, ২০২৬ ফাওবা (এভিয়ন অমসুং পেরিস) ফ্রান্সতা ওফিসিএল ওইবা খোঙচৎ অমদা চৎকনি, মসিগা লোয়ননা জুন ১৪দগী ১৬, ২০২৬ ফাওবা স্লোভাকিয়াদশু চৎকনি। খোঙচৎ অসিগী অহানবা শরুক্তা, প্রধান মন্ত্রীনা জুন ১৪দা প্রেসিদেন্ত মেক্রোনগা বাইলেতরেল মীফম অমগীদমক নাইসতা চৎকনি। লুচিংবা অনিমক্না. চহি অসিগী অঙনবদা স্পিসিএল গ্লোবেল স্ত্রেতেজিক পার্তনরশিপকী থাক্তা থাঙ্গৎখ্রবা ভারত-ফ্রান্সকী নাকল অনিগী ওইবা মরীগী ফীভম য়েংশিনগনি। নাইসতা, লুচিংবা অনিমক্না পুন্না 'ভারত ইনোভেতস' ইভেন্ত হৌদোক্কনি, মসিনা ভারত, ফ্রান্স অমসুং অতোপ্পা লৈবাকশিংদগী খ্বায়দগী ফবা ইনোভেসন স্তার্তঅপ অমসুং ভেঞ্চর কেপিতেল ফন্দশিং পুনশিনগনি। ভারত-ফ্রান্স ইনোভেসনগী চহিগী মনুংদা পাঙথোক্লিবা থৌরম অসিনা লৈবাক অনিমক্কী মরক্তা লৈরিবা ইনোভেসন পার্তনরশিপ অসি মপাঙ্গল কনখৎহনগনি।
স্লোভাক রিপব্লিক্কী প্রাইম মিনিস্তর, হিজ এক্সেলেন্সী রোবর্ত ফিকোনা পাউজেল পীরকপগী মতুং ইন্না, প্রধান মন্ত্রী শ্রী নরেন্দ্র মোদীনা জুন ১৪দগী ১৬, ২০২৬ ফাওবা স্লোভাক রিপব্লিক্তা স্তেত ভিজিৎ তৌগনি। মসি ১৯৯৩ দা স্লোভাকিয়া নিংখা তম্বা ফংলকপদগী ভারতকী প্রধান মন্ত্রী অমনা অহানবা ওইনা চৎপা খোঙচৎ ওইগনি। খোঙচৎ অসি এপ্রিল ২০২৫ দা ইকায়খুম্নরবা রাস্ত্রপতিনা স্লোভাকিয়াদা স্তেত ভিজিৎ তৌখিবা অমসুং ফেব্রুযৱারী ২০২৬ তা এ.আই. ইম্পেক্ত সম্মিৎকীদমক স্লোভাকিয়াগী প্রেসিদেন্ত হিজ এক্সেলেন্সী মিস্তর পিতর পেল্লেগ্রিনিনা ভারত্তা লাকখিবা অদুগী মতুংদা পাঙথোকপনি। প্রধান মন্ত্রীনা প্রাইম মিনিস্তর ফিকোগা ৱারী শানগনি অমসুং তেংবাংনবগী অনৌবা লম্বীশিং থিদোক্কনি। প্রধান মন্ত্রীনা রাস্ত্রপতি পেল্লেগ্রিনিগাসু উনগনি। খোঙচৎ অসিনা ত্রেদ, ইনভেস্তমেন্ত, অমসুং ওতোমোবাইল অমসুং রেলৱে মেনুফেকচরিং য়াওনা তোঙান-তোঙানবা সেক্তরশিংদা স্লোভাকিয়াগা নাকল অনিগী মরী মপাঙ্গল কনখৎহন্নবা ভারতকী কমিতমেন্ত অদু অমুক হন্না চেৎশিনহনগনি।
খোঙচৎ অসিগী অহুমশুবা শরুক্তা, প্রধান মন্ত্রীনা জুন ১৬-১৭, ২০২৬ দা ফ্রান্সকী এভিয়ন্দা পাঙথোক্কদবা G7 সম্মিত্তা শরুক য়াগনি। সম্মিৎ অদুগী মনুংদা, মহাক্না G7 গী লুচিংবাশিং অমসুং সম্মিৎ অসিদা শরুক য়ানবা কৌখিবা পার্তনর লৈবাকশিং অমসুং ইন্তর্নেস্নেল ওর্গনাইজেসনশিংগী লুচিংবাশিংগা ৱাখল্লোন ফোঙদোক্নগনি, মসিদা - অনৌবা পার্তনরশিপশিং শেমগৎপা অমসুং ইন্তর্নেস্নেল সোলিদরিতী অমুক হন্না শেমগৎপা; পুম্নমক্কীদমক খল চানবা, শরুক য়ামিন্নবা অমসুং সস্তেনেবল ওইবা ইকনমিক গ্রোথ অমুক হন্না হিংগৎহনবা; অমসুং AI অসি অৱাৎপা লৈতনা, খোঙজেল য়াংশিন্না অমসুং মতিং লৈনা শন্দোকপদা চেকশিনমিন্নবা; অসিনচিংবা সম্মিৎকী সেসনশিংদা শরুক য়াগনি। সম্মিৎ অসিগী মনুংদা, প্রধান মন্ত্রীনা মালেমগী লুচিংবা কয়া অমগা বাইলেতরেল মীফমশিং পাঙথোক্কনি।
খোঙচৎ অসিগী অরোইবা শরুক্তা, প্রধান মন্ত্রীনা জুন ১৮, ২০২৬ দা বাইলেতরেলগী অতোপ্পা থবকশিংগীদমক অমসুং য়ুরোপকী খ্বায়দগী চাউবা তেক্নোলোজী অমসুং স্তার্তঅপ ইভেন্ত ওইরিবা ভিভাতেক সম্মিৎতা শরুক য়ানবগীদমক পেরিসতা চৎকনি। প্রধান মন্ত্রীনা পেরিসতা লৈরিবা ভারতকী মীয়ামদা ৱা ঙাংলবা য়াই।
য়ুরোপ্তা প্রধান মন্ত্রীনা চৎকদবা খোঙচৎ অসিনা ফ্রান্স, স্লোভাকিয়া অমসুং G7 গা লৈনবা ভারতকী পার্তনরশিপ অদু হেন্না মপাঙ্গল কনখৎহনগনি। G7 সম্মিৎতা প্রধান মন্ত্রীনা শরুক য়াগদবা অসিনা মালেমগী ওইবা শিংনবশিং কোকহনবদা ভারতনা মকোক থোংবা লৈবাক অমনা ওইনা অমসুং মরু ওইবা পার্তনর অমনা ওইনা লৈরিবা অদু মশক তাক্কনি। 'ভারত ইনোভেতস' অমসুং ভিভাতেক সম্মিৎ অনিমক্তা প্রধান মন্ত্রীনা শরুক য়াগদবা অসিনা ভারত অসি ইনোভেসন, দিজিতেল ত্রান্সফোর্মেসন অমসুং ওন্ত্রপ্রিনরশিপকী মালেমগী হব অমনা ওইনা উৎলগনি, অমসুং মসিদগী ভারতকী, ফ্রান্সকী অমসুং য়ুরোপকী তেক্নোলোজী ইকোসিস্তেমশিংগী মরক্তা অনৌবা পার্তনরশিপশিং হৌদোক্নবা থৌনা পীগনি হায়না থাজবা থম্লি। খোঙচৎ অসিনা য়ুরোপীয়ন য়ুনিয়নগা লৈনবা ভারতকী অচৌবা স্ত্রেতেজিক পার্তনরশিপ অদু হেন্না মপাঙ্গল কনখৎহন্নবা ভারতকী কমিতমেন্ত অদু অমুক হন্না খোঙফম চেৎশিনহনগনি।
