নমস্কার!
মসিগী স্কিল দিভেলপমেন্তকী থৌরম অসি মশান্না অদুমক তোপ-তোপ্পা অমা ওইরবনি। লৈবাক শিনবা থুংবগী স্কিল দিভেলপমেন্তকা মরী লৈনবা ইন্সতিত্যুসনশিংগী অপুনবা স্কিল উৎলিবা কৌশল দিকশন্ত সমারোহ অসি য়াম্না থাগৎনীংঙাই ওইবা খোঙথাংনি। মসিনা ঙসিগী ভারতনা করম্বা হীরমদা খ্বাইদগী অহেনবা মিৎয়েং থম্বগে হায়বা তাক্লি। ঙসিদি নহা লিশিং কয়ানা তেক্নোলোজীগী খুত্থাংদা থৌরম অসিগী শরুক অমা ওইরি। ঐহাক্না মখোয়গী মফমদা অফবা তুংগী মতম অমগীদমক্তা য়াইফ পাউজেল পীজরি।
ঐহাক্কী নহা ওইরিবা মরুপশিং,
লৈবাক খুদিংগী তোঙানবা পাঙ্গল লৈ, খুদম ওইনা হায়রবদা, মহৌশাগী পোত্থোক, মিনরেলগী লন, নত্ত্রগা শাংলবা সমুদ্রগী তোর্বান। অদুবু, মসিগী শক্তিশিং অসি লোক্নবা য়াম্না মরু ওইবা পাম্বৈদি নহাশিংগী পাঙ্গলনি। নহাশিংগী মপাঙ্গল লৈরিবমখৈ, লৈবাক্না চাউখৎপা হেনগনি, লৈবাক্কী রিসোর্সশিং খল মান্ননা শিজিন্নবা ঙমগনি। ঙসিদি, ভারতনা মসিগুম্বা ৱাখল্লোন অসিগা লোয়ননা নহাশিংগী পাঙ্গল হাপ্লি, মপুং ওইবা ইকোসীস্তেম অসিদা মমাংদা অমুক্তা পাংথোকখিদ্রিবা থবক থৌরম কয়া হেন্না ফগৎহল্লি। হীরম অসিগী মতাংদা, লৈবাক অসিনা মশা অনি লোঙবা থৌওং শিজিন্নৈ। স্কিলিং অমসুং এজুকেসনগী খুত্থাংদা লাকপা অনৌবা খুদোংচাবশিং নহাশিংনা ফংহন্নবা ঐখোয়না হোৎনরি। চাউরাকপা দিকেদ মরিগী মতুংদা, ঐখোয়না লৈবাক্কী অনৌবা এজুকেসনগী পোলিসী অমা হৌদোকখ্রে। ঐখোয়না মেদিকেল কোলেজ, IIT, IIM নত্ত্রগা ITIগুম্বা স্কিল দিভেলপমেন্ত ইন্সতিত্যুসন মখল কয়া মশিং য়াম্না হাংদোক্লে। নহা মিলিয়ন কয়ানা প্রধান মন্ত্রী কৌশল বিকাস য়োজনা (প্রধান মন্ত্রীগী স্কিল দিভেলপমেন্ত স্কিম)গী মখাদা ত্রেনিং ফংনখ্রে। অতোপ্পা নাকল অমদনা, থবক পীবা নাৎকী চৎনবী কয়াগী ঐখোয়না মপাঙ্গল হাপ্লি অমসুং থবক পীবগী মতিক অমসুং ওন্তোপ্রিনরশিপকী থৌওং খুমাং চাউশিলহনগদবা অনৌবা সেক্তর কয়া চাউখৎহল্লি। ঙসিদি, ভারতনা পোত্থোক, মোবাইল ফোন, ইলেক্ত্রোনিক্স, সর্ভিস, দিফেন্স এক্সপোর্ত অমসুং মেন্যুফেকচরিংগী মতাংদা এক্সপোর্তকী অনৌবা রেকোর্দ কয়া থম্বা ঙম্লে। মসিগা লোয়ন-লোয়ননা, লৈবাক অসিনা অদোমগুম্বা নহাশিংগীদমক্তা স্পেস, স্তার্তঅপ, দ্রোন, এনিমেসন, ইলেক্ত্রিক গারী, সেমিকন্দক্তর অমসুং অতোপ্পা হীরম কয়াদা মশিং থীঙমদ্রবা খুদোংচাবা কয়া শেম্লি।
মরুপশিং,
চৎলিবা চহি-চা অসিদি ভারতকীনি হায়বা মালেম পুম্বনা ঙসি খঙলে, মসিগী মরু ওইবা মরমদি, লৈবাক্কী নহাশিংগী মীশিং য়াম্লিবা অসিনি। মালেমগী লৈবাক কয়ানা মখোয়গী মীশিংনা অহল ওইশিল্লকপগী মতৌ থেংনরি, অদুবু ভারতনা নোংম-নোংমগী নহা ওইরক্লি। মসিদি ঐখোয়গী লৈবাক্কী মশক নাইবা খুদোংচাবা অমনি। মালেম্না স্কিল লৈবা নহাশিংগীদমক্তা ভারত্তা য়েংনরিবনি। মালেমগী স্কিল মেপ্পিংগী ৱাহৌদোক অমা ভারতনা হন্দক্তা থমখিবা অদুসু G20 সম্মিত্তা য়েৎনবা লৈতনা য়ানখি। মসিনা অদোমগুম্বা নহাশিংগী তুংগী মতমদা অনৌবা খুদোংচাবা কয়া শেমগনি। লৈবাক অমসুং মালেমদা থোক্লকপা খুদোংচাবা অমত্তা ঐখোয়না মাঙহনবা য়াদে। ভারত সরকারনা অদোমগীদমক্তা লেপ্লি, অদোমগী তঙাই ফদবা খুদিংগী মতেং পাংলি। মমাংগী মতমগী সরকারনা স্কিল দিভেলপমেন্ততা মরু ওইবা মিৎয়েং চঙলমদে। ঐখোয়গী সরকারনা মসিগী মরু ওইবা খঙবদগী স্কিল দিভেলপমেন্তকী তোঙানবা মন্ত্রালয় অমা শেমখি অমসুং মসিগীদমক্তা তোঙানবা বজেৎসু কাইথোকখি। ভারতনা মশাগী নহাশিংগী স্কিলগীদমক্তা হান্নদগী য়াম্না হেনবা চাংদা ইনভেস্ত তৌরি। প্রধান মন্ত্রী কৌশল বিকাস য়োজনা অসিনা নহাশিংবু গ্রাসরুত লেভেলদা মপাঙ্গল হাপ্লি। স্কিম অসিগী মখাদা, হৌজিক ফাওবদা নহা করোর 1.5তা ত্রেনিং পীখ্রে। ইন্দস্ত্রীগী ক্লস্তরশিংগী অকোয়বদা অনৌবা স্কিল সেন্তর কয়া লিংখৎলি, মসিনা ইন্দস্ত্রীশিংদা মখোয়গী তঙাই ফদবা স্কিলশিং স্কিল দিভেলপমেন্ত ইন্সতিত্যুসনশিংদগী ফংহল্লি। ইন্দস্ত্রীগী তঙাই ফদবগী মতুং ইন্না, নহাশিংগী তঙাই ফদবা স্কিল সেত পীদুনা মখোয়বু ৱর্কফোর্স্তা মওং-মরিল চুম্না চঙহল্লি।
মরুপশিং,
মতম অসি য়াম্না হোংলে হায়বা অদোমসু খঙলবনি। স্কিল অমখক তম্লগা মদুনা পুন্সি চুপ্পা চৎকনি হায়বা য়াদ্রে। হৌজিক্তি, ঐখোয়না ইন্দবা য়াদবা স্কিলিং, অপস্কিলিং অমসুং স্কিলিংগী পেত্তর্ন অমা লৈরক্লে। দিমান্দশিংসু য়াম্না য়াঙনা হোংলক্লি, থবক্কী মওংসু হোংলক্লি। মসিগী মখা পোন্না, ঐখোয়না ইশাগী স্কিল অপগ্রেদ তৌদুনা চৎপা তারে। মরম অদুনা, ইন্দস্ত্রী, রিসর্চ অমসুং স্কিল দিভেলপমেন্তনা মতমগা চুননবা চৎপা হায়বসি য়াম্না মরু ওইরে। স্কিল অমগী তোপ-তোপ্পা মতৌ অমসুং মখোয়গী কান্নবা খঙদোক্নবা হোৎনবদা মমাঙদা থোইদোক্না মিৎয়েং চঙলমদে। মসিগী ফিভম অসিদসু অহোংবা লাকপা হৌরে। হৌখিবা চহি মাপনদা, অনৌবা ITI চাউরাক্না 5000 লৈবাক অসিদা হাংদোকখি। মসিনা লৈবাক শিনবা থুংবগী ITIগী সিত্তা অনৌবা সিত 400,000 হেন্না হাপচিনখি। মসিগুম্বা ইন্সতিত্যুসনশিং অসিবু মোদেল ITI ওইনা অপগ্রেদ তৌরি, খ্বাইদগী ফবা থৌওং তাকপগা লোয়ননা কান্নবা অমসুং ক্বালিতী লৈবা ত্রেনিং পীবগী পান্দমসু থম্লি।
মরুপশিং,
স্কিল দিভেলপমেন্তকী স্কোপ অসি ভারত্তা লেপ্তনা হেনগৎলক্লি। ঐখোয়না হৌজিক মেকানিক্স, ইঞ্জিনিয়র, তেক্নোলোজী নত্ত্রগা অতোপ্পা অখন্নবা সর্ভিসশিংদা অকক্নদুনা লৈত্রে। হৌজিক্তি, নুপীশিংনা শরুক য়াবা সেল্ফ হেল্প গ্রুপ কয়া অমসু লৈরে। নুপীশিংগী সেল্ফ হেল্প গ্রুপশিংদা দ্রোন তেক্নোলোজীগী ত্রেনিং পীরি। মান্নবা মতৌ ওইনা, ঐখোয়গী বিশ্বকর্মা মরুপশিংসু লৈরি। মখোয়দি ঐখোয়গী পুন্সিগী তৎন-থানবা য়াদ্রবা শরুক অমনি, মখোয় য়াওদনা থবক অমত্তা লায়না পাংথোকপা ওইথোক্তে। চৎনবী অমা ওইনা, মখোয়গী মহৈ অসি মখোয়গী অহল-লমনশিংদগী তম্মি অমসুং মথং-মথং থংথনৈ। হৌজিক্তি, পি.এম. বিশ্বকর্মা য়োজনাগী মখাদা, মখোয়গী নাৎকী মহৈশিং অসিদা মতমগী তেক্নোলোজী অমসুং খুৎলায়শিং হাপচিল্লে।
ঐহাক্কী নহা ওইরিবা মরুপশিং,
ভারতকী শেন্মিৎলোন্না পাকথোক চাউথোক্লকপগা লোয়ননা, অনৌবা খুদোংচাবা কয়াসু অদোমগুম্বা নহাশিংগীদমক্তা থোক্লক্লি। ভারত্তা থবক লৈবগী চাংনা অনৌবা অৱাংবা থাক্তা লৈরে হায়না হন্দক্তা পাংথোকপা সর্ভে অমনা হায়রি। হৌজিক্কী মতমসিদা, ভারতকী অনইমপ্লোয়মেন্তকী চাংনা চহি তরুক্কী মনুংদা খ্বাইদগী নেম্লে। ঐহাক্না হৌজিক শারিবা ৱারি অসি অনইমপ্লোয়মেন্তকীনি। অনইমপ্লোয়মেন্ত অসি খুঙ্গং অমসুং শহরদা খোঙজেল য়াঙনা হন্থরক্লি। মসিনা হায়বদি, চাউখৎপগী কান্নবনা খুঙ্গং অমসুং শহরশিংদা খল মান্ননা ফংলে হায়বনি। অনৌবা খুদোংচাবা কয়াসু খল মান্ননা লৈরক্লি হায়নসু মসিনা তাক্লি। সর্ভে অসিনা খঙবা ঙমখিবা মমাংদা অমুক্তা থোকখিদ্রিবা ৱাফমদি, লৈবাক্কী ৱর্কফোর্সতা নুপীশিংনা মশক থোক্না শরুক য়ারক্লিবা অসিনি। নুপীশিংবু পাঙ্গল হাপ্পগী মখল কয়াগী খোঙথাং কয়া লৈবাক অসিদা পায়খৎলিবা খুদিংমক মহৈ য়াল্লে হায়না মসিনা তাক্লি।
মরুপশিং,
ইন্তর্নেস্নেল মনিতরী ফন্দ (IMF)না অদোমগী থৱাই য়াওবগী চাংবু হেন্না হেনগৎহনগদবা ফিগর অমা থাদোকখ্রে। IMFকী মতুং ইন্না, ভারতনা লাক্কদৌরিবা চহিশিংদা খ্বাইদগী খোঙজেল য়াঙনা চাউখৎপা মরু ওইবা শেন্মিৎলোন অমা ওইরগনি হায়রি। ঐহাক্না ভারতপু মালেমগী খ্বাইদগী মকোক থোংবা শেন্মিৎলোন অহুমগী মনুংদা পুরক্কনি হায়খিবা অদোম নীংশিংলমগনি। মথংগী চহি 3-4গী মনুংদা ভারতনা মালেমগী খ্বাইদগী মকোক থোংবা শেন্মিৎলোন অহুমগী মনুং চল্লগনি হায়বসিদা IMFনসু মপুং ফানা থাজবা থম্লি। মসিনা হায়বদি, অদোমগী খুদোংচাবা হেন্না ফংগনি হায়বনি। ইমপ্লোয়মেন্ত অমসুং ওন্তোপ্রিনরশিপকী খুদোংচাবসু অদোমগীদমক্তা হেন্না লৈরগনি হায়বনি।
মরুপশিং,
অদোমগী মাঙদা লোইবা নাইররোইদবা খুদোংচাবা কয়া লৈরে। ঐখোয়না ভারতপু স্কিল লৈবা মেনপাৱরগী মালেমগী খ্বাইদগী চাউবা পাৱরহাউস ওইহনবগী মথৌ তাই। ঐখোয়না মালেমদা স্মার্ত অমসুং স্কিল লৈবা মেনপাৱরগী ৱারোইশিন পীগদবনি। মহৈ তম্বা, তাকপীবা অমসুং খুমাং চাউশিনবগী থৌওং মখা চত্থহল্লসি। অদোমগী পুন্সিগী খোঙথাং খুদিংদা মায় পাকপা ওইয়ু। ঐহাক্না পুম্নমক্কী মফমদা থম্মোই শেংনা থাগৎচরি, অমসুং য়াইফ পাউজেলসু পীজরি।
