ৱর্ল্দ বেঙ্ককী প্রেসিদেন্ত, হর এক্সেলেন্সী, মোরোকোগী ইনর্জী ত্রাঞ্জিসন এন্দ সস্তেনেবল দিভেলমেন্তকী মন্ত্রী, ঐগী কেবিনেত মরুপ নির্মলা সিতরমন জী, লোর্দ নিকোলাস স্তর্ন, প্রোফেসর সন্সতেন, অমদি অতৈ ইকায়খুম্নরবা মীথুংশিং
খুরুমজরি!
ৱর্ল্দ বেঙ্কনা অইং অশাগী ফীভম হোংলকপনা লমচৎ শাজত্তা অহোংবা পুরকপদা পীরিবা শাফুগী মতাঙদা থৌরম অসি পাঙথোকপিরকপসিদা ঐ নুংঙাই। মসি ঐগী থম্মোয়দা নক্না লৈবা ৱাফম অমনি, অমদি মসি মালেমগী ওইবা ইহৌ অমা ওইরকপসি নুংঙাইবা ফাওই।
মরূপশিং,
মমিং লৈরবা ভারতকী ফিলোসোফর চানক্যনা চহি লিশিং অনিগী মমাঙদা ইবিরম্মী: জল বিন্দু নিপাতেন ক্রমস: পুর্য়তে ঘত:। স হেতু: সর্ব বিধ্ধানাম ধর্মস্য চ ধনস্য চ।। অপীকপা ঈশিংগী ঈরিকশিংনা, পুনশিল্লক্লবা মতমদা, চফু অমা থল্লকই। মতৌ অসুম্না, ৱাখল লৌশিং, অফবা থৌওং নৎত্রগা তপ্না তপ্না হেনগৎলকই। মসিদা ঐখোয় পুম্নমক্কী পাউজেল অমা য়াওরি। ঈশিং ঈরিক অমমম হায়বসি য়ামদবা মাল্লমগনি। অদুবু মসিনা অতৈ ঈরিকশিংগা পুনশিল্লকপা মতমদদি, মসিনা শাফু অমা পীরি। মালেমসিগীদমক করিগুম্বা অফবা থবক অমা তৌবা হায়বসি করিসু কান্নফম খঙদবা ওইনা উরম্বদি য়াই। অদুবু মালেম পুম্বদা হায়রিবা থবক অদু পুন্না তৌমিন্নরবদি, মদুগী শাফু অদু চাউই। লনাই মীওইশিংনা ঐখোয়গী মালেমগীদমক অচুমবা ফিরেপ অমমম লৌবনা ঐখোয়গী মালেমগীদমক থেংনরিবা লান্ফম অসিদা মরুওই হায়না ঐখোয়না থাজৈ। মসি মিসন লাইফকী নুংগী ওইবা ৱাখল্লোন্দুনি।
মরূপশিং,
ইহৌ অসিগী মরূদি মতম কয়াগী মমাঙদগী হুনবা হৌখ্রবনি। ইং ২০১৫দা য়ুনাইতেদ নেসন্স জেনেরেল এসেমব্লীদা, ঐনা লমচৎ শাজত্তা অহোংবা পুরকপগী মথৌ তাবা ৱাফম থমখি। মতমদুদগী হৌনা, ঐখোয় ফনা য়াম্না চঙশিল্লক্লে। ওক্তোবর ২০২২দা, য়ু.এন. সেক্রেতরী জেনেরেল অমদি ঐহাক্না মিসন লাইফ হৌদোকখি। সি.ও.পি.-২৭গী আউতকম দোকুমেন্তকী প্রিএম্বলনসু সস্তেনেবল ওইবা পুন্সি মহিং অমদি পোৎশিং শীজিন্নবগী মতাঙদা ফোঙদোক্লি। অদুগা অইং অশাগী খল হোংলকপগী লমদা লৈরিবা অখঙ অহৈশিংনা হায়রিবা লাইৱা অসিবু শীজিন্নরিবা অসিসু নুংঙাইবা অমনি।
মরূপশিং,
মালেম পুম্বদা লৈরিবা মীয়াম্না অইং অশাগী খল হোংলকপগী মতাঙদা য়াম্না তানরে। মখোয়না মসিগীদমক করি তৌগদগে হায়বা খঙদবনা মীয়াম্না লাংতক্নবা কয়া অমা ফাওনরি। মখোয়দা লৈঙাক অমদি মালেমগী ইনস্তিত্যুসনশিংখক্তগী থৌদাং লৈ হায়না খনহল্লি। করিগুম্বা মখোয়না থৌদাং য়াবা তম্লবদি, মখোয়গী লাংতক্নবা অদু থবক্তা ওন্থোরক্কনি।
মরূপশিং,
অইং অশাগী খল হোংলকপা অসি কন্ফরেন্স তেবলখক্তদগী থেংনবা য়ারোই। মসি ইমুং খুদিংমক্কী দিন্নর তেবলদগী থেংনগদবনি। খন্ন-নৈনবগী তেবলদগী দিন্নর তেবলদা ৱাখল্লোন অমা লাল্লকপা মতমদা, মদু মীয়ামগী ইহৌ ওইরকই। ইমুং খুদিং মীপুম খুদিংদা মখোয়না লৌরিবা ফিরেপ্তুনা, থাংজিল্লুরিবা খোঙথাঙদুনা মালেম অসিদা মতেং পাংবা ঙমগনি হায়বা খলহনবনা পাক চাউবা অমদি খোঙজেল হাপ্পা ঙমগনি। মিসন লাইফ হায়বসি অইং অশাগী খও হোংলকপগী মায়োক্তা থেংনরিবা লাল অসিবু মীয়ামগী লানফম ওইহনবদুবুনি। মীয়াম্না মখোয়গী পুন্সিদা নুংতিগী তৌরিবা অচম্বা থবকশিং মতিক লৈবনি হায়বা খঙলক্লবা মতমদা, মদুনা অকোয়বগী ফীভমদা অফবা শাফু পীবা ঙম্লক্কনি।
মরূপশিং,
মীয়ামগী ইহৌ অমদি লমচৎ শাজৎ হোংদোকপগী ৱাফমসিদা, ভারতকী মীয়াম্না হৌখিবা চহি খরসিদা ফনা য়াম্না থবক পায়খৎখ্রে। মী্য়াম্না থৌদুনা পায়খৎপা থৌওংনা ভারতকী মফম কয়াদা নুপা-নুপীগী রেসিও হেনগৎহনখ্রে। পাক চাউরবা লু-নানবগী থৌরাং অমসু মীয়াম্না হৌদুনা পায়খৎখি। তুরেল ওইরবসু, সমুদ্র খোঙবান ওইরবসু নৎত্রগা লম্বী ওইরবসু, মখোয়না মীয়ামগী ওইবা মফমশিং লুনা নান্না থম্নবা থবক পায়খৎলি। অদুগা এল.ই.দ. বল্বশিং মায় পাক্না শীজিন্নখিবসু মীয়াম্ননি। চাউরাক্না এল.ই.দি. বল্ব মিলিয়ন ৩৭০ রোম ভারত্তা য়োনখ্রে। মসিনা চহি খুদিংগী কোর্বোন থাদোকপগী চাং মিলিয়ন তন ৩৯ লোম হন্থহনবা ঙম্লি। ভারতকী লৌমীশিংনা লৌফম হেক্তর লাখ তরেৎলোম মাইক্রো-ইরিগেসন্না কোনশিনহল্লি। পর দ্রোপ মোর ক্রোপকী লাইৱা মপুং ফাহল্লদুনা, মসিনা ঈশিং মাঙহনবদগী চাউনা ঙাকথোকপা ঙমখি। অসিগুম্বা খুদম কয়া লৈখ্রে।
মরূপশিং,
মিসন লাইফকী মখাদা, ঐখোয়না পায়খৎলিবা থবক থৌরাংশিংনা য়ৌশিল্লিবা মফমশিংদি: লোকেল বোদীশিং এনভাইরনমেন্ত-ফ্রেন্দলী ওইহনবা, ঈশিং মাঙহন্দবা, ইনর্জী মাঙহন্দবা, ফত্ত হৌদি অমদি ই-ৱেস্ত হন্থহনবা, হকচাঙ ফবা পুন্সি মহিং লৌশিনবা, মহৌশাগী লৌউ পথাপ পায়খৎপা, চনান য়োকখৎপনচিংবনি।
হায়রিবা থবক থৌরাংশিং অসিনা:
- ইনর্জী য়ুনিৎ বিলিয়ন কুননিথোই হেন্না মাঙহল্লরোই,
- ঈশিং লিতর ত্রিলিয়ন মাপনলোম মাঙহল্লরোই,
- ফত্ত হৌদিগী চাং মিলিয়ন তন চাহুম হুমফুতরামঙারোম হন্থহল্লগনি,
- ২০২৩০ ফাওবগী মনুংদা ই-ৱেস্ত মিলিয়ন তন অমগী ময়াদা রিসাইকল তৌগনি, অমদি দোলর মিলিয়ন চাম্মা হুম্ফুতরাগী হেনবা কোস্ত সেবিং ঙম্লগনি।
মখা তানা, মসিনা চীঞ্জাক মাঙহনবগী চাং বিলিয়ন তন তরামঙারোম হন্থহনবদা মতেং পাংগনি। ঐ মসি কয়ামুক য়াম্না চাউবগে হায়বদু উৎচগে। এফ.এ.ও.গী মতুং ইন্না ২০২০দা মালেমগী ওইবা প্রাইমারী ক্রোপ প্রদক্সন অসি বিলিয়ন তন মাপনলোম্নি!
মরূপশিং,
মালেমসিদা লৈরিবা লৈবাকশিংবু পুক্নিং থৌগৎপদা মালেমগী ইনস্তিত্যুসনশিংগী মরুওইবা শক্লোন লৈ। ঐনা তাবদা ৱর্ল্দ বেঙ্ক গ্রুপ্না ক্লাইমেৎ ফাইনেন্স অসি অপুনবা ফাইনেন্সিংগী চাকথুং ওইনা ২৬%দগী ৩৫%দা হেনগৎলগনি হায়না তায়। হায়রিবা ক্লাইমেৎ ফাইনেন্স অসিগী মীৎয়েঙদি কনভেন্সনেল ওইবা ৱাফমশিংদনি। লমচৎ শাজৎ হোংদোকপগী মতাংদসু শেল মতিক চানা থাদনবা পাম্বৈ পুথোকপসু মথৌ তাই। মিসন লাইফ কুম্বা লমচৎ শাজৎ হোংদোকপগী থৌরাংশিংদা ৱর্ল্দ বেঙ্কনা ঙাক্লৌ উৎপিবদা চাউনা কান্নবা পুরকপা ঙমগনি।
মরূপশিং,
ঐনা থৌরম অসি পাঙথোক্লিবা ৱর্ল্দ বেঙ্ক কাঙবুগী মফমদা নুংঙাইবা ফোঙদোকচরি। অদুগা, মীফমশিং অসিনা লনাই মীওইশিংবু মখোয়গী লমচৎ শাজৎ হোংদোকহন্নবা ইথিল পীনবা পাম্বৈ পুথোরক্কনি হায়না ঐনা থাজবা থমজরি। ময়ামবু থাগৎচরি। হন্না হন্না থাগৎচরি।
