নমস্কার!
লৈবাক্কী জল মন্ত্রীশিংগী অহানবা ভারত পুম্বগী মীফমসিদা অদোমগী মরু ওইবা য়াম্না লৈ। ভারতনা ঙসিদি ৱাতর সেক্যুরিতীগী মতাংদা মশক থোকপা থবক পায়খৎলি, মশক থোকপা ইনভেস্তমেন্তসু তৌরি। ঐখোয়গী সংবিধানগী পথাপসিদা ঈশিংগী হীরম অসি রাজ্যগী মখুত্তা লৈ। ঈশিং য়োকখৎনবগীদমক্তা রাজ্যশিংনা হোৎনবা, লৈবাক্কী অপুনবা পান্দমশিং ফংনবগীদমক্তা হোৎনরিবশিংদা মখোয়না য়াম্না তেংবাংবা ঙমগনি। তাঞ্জা অসিদা ‘ৱাতর ভিজন @২০৪৭’না মথংগী চহি ২৫দা চৎকদৌরিবা অমৃত য়াত্রাগী ওইনসু য়াম্না মরু ওইবা থৌওং ওইগদৌরি।
মরুপশিং,
মীফম অসিদা “সরকারগী অপুনবা” অমসুং “লৈবাক্কী অপুনবা” হায়বা মঙলান অসিনা মাঙদা থমদুনা ঐখোয়না খন্ন-নৈনবা হায়বসি য়াম্না মরু ওইবনি। “সরকারগী অপুনবা” হয়বসিগী মরু ওইবা অমসু লৈ, সরকার খুদিংনা ওর্গানিক এন্তাইতীগুম্বা পথাপ অমগুম্না থবক তৌবগী মথৌ তাই। জল মন্ত্রালয়, ইরিগেসন মন্ত্রালয়, লৌউ-শিংউ মন্ত্রালয়, খুঙ্গং চাউখৎপগী মন্ত্রালয়, এনিমেল হসবেন্দরী মন্ত্রালয়গুম্বা তোঙানবা মন্ত্রালয় কয়া রাজ্যশিংগী লৈরি। মতৌ অসিগুম্না, অর্বান দিভেলপমেন্ত মিনিস্ত্রী লৈবগুম্না দিজাজতর মেনেজমেন্ত মিনিস্ত্রীসু লৈরি। হায়বদি, মখোয়গী মরক্তা চাং নাইনা পাউ ফাওনদুনা, ময়েক লাবা পান্দম অমা লৈবা হায়বসি য়াম্না মরু ওইবনি। করিগুম্বা, বিভাগশিংনা অমনা অমগা মরী লৈনবা ই-পাউ লৈনরবদি, মখোয়গী মনাক্তা দেতা লৈগনি, মদুনা মখোয়গী প্লান্নিং তৌবা মতমদা য়াম্না তেংবাংগনি।
মরুপশিং,
সরকার খক্তনা হোৎনবা মতমদা মায় পাকপা ঙমদে হায়বসিসু ঐখোয়না খঙবা তাবনি। সরকারদা লৈরিবা মীওইশিংসু মখোয় খক্তনা হোৎনবদা অপাম্বা পান্দম ফংগনি হায়বগী ৱাখল্লোন অসিদগী ৱাংমা লান্দুনা থোক্লকপা তাবনি। মরম অদুনা, ঈশিং য়োকখৎপগা মরী লৈনবা খোঙথাংগা মীয়াম, সিভিল সোসাইতী, খুন্নাইগী লুপশিংগা য়ারিবমখৈ মরী লৈনহনবা তাবনি। জন ভাগীদারীগী অতোপ্পা ৱাহন্থোক অমা লৈরিবা অসিসু ঐখোয়না খঙবা তাবনি। জন ভাগীদারী হায়বদি মীয়ামদা থৌদাং পুম্নমক শিন্নবনি হায়না মীওই খরনা খল্লি। জন ভাগীদারীবু খুমাং চাউশিলহনবা মতমদা সরকারগী থৌদাং/থবক হন্থৈ। মসি অশেংবা নত্তে। মখোয়গী একাউন্তেবিলিতী হন্থদে। খোঙথাং অসিদা মীয়াম্না থৌদাং কয়া য়াম্না য়ারিবগে, শেল কয়া য়াম্না চঙলিবগে খঙবা ঙম্বা অসিসু জন ভাগীদারীগী খ্বাইদগী কান্নবা মতৌনি। মসিগী কান্নবা য়াম্না লৈ। করিগুম্বা খোঙথাং অমগা মরী লৈনবা মতমদা, মদুগী মরু ওইবা কয়া য়াম্না লৈবগে হায়বা খঙবা ঙম্মি। মখোয়গী মপাঙ্গল মশক খঙবা ঙম্মি। মখোয়গী স্কেল খঙবা ঙম্মি, রিসোর্স কয়া য়াম্না চঙই হায়বা খঙবা ঙম্মি। মখোয়না মসিগুম্বা খোঙথাংদা শরুক য়ারকপা মতমদা মরী লৈনবা স্কিমশিংদা সেন্স ওফ ওনর্শিপকী ৱাখল্লোন মখোয়দা লাকই। মসিনা মায় পাকহনবগী খ্বাইদগী মরু ওইবা মরম ওইরিবনি। স্বচ্ছতা অভিয়ান্না কয়া য়াম্না খুদম অমা ওইবনো হায়বা অদোম্না উরে। খোঙথাং অসিদা মীয়াম্না শরুক য়ানরি, থৱাই য়াওনরি, এৱিয়র্নেসসু হেনগৎলক্লি। অমোৎপা লৈহন্দনবা মীয়াম্না পুল্লিবা মতৌসিগী মখা পোন্না তোঙানবা ৱাতর ত্রিতমেন্ত প্লান্ত কয়া শারিবা, অমাংশঙ শারিবা, মসিগুম্বা থবক কয়া সরকারগী খুত্থাংদগী পাংথোকখি। অদুবু, খোঙথাং অসিনা মায় পাকপদি মীয়াম্না অমোৎ অমায়গী মাইয়োক্তা লেপ্পা হৌরকপা মতমদনি। মীয়ামগী ৱাখল্লোন্দা হৌজিক্তি অমোৎ অকায়বু য়েক্নবনি খনবা হৌনরে। জন ভাগীদারীগী মসিগুম্বা ৱাখল্লোন অসিমক ঐখোয়না ঈশিং য়োকখৎপগী খোঙথাংদা পুরকপা তাবনি, মরী লৈনবা এৱিয়র্নেস লৈহনবা তাবনি। মীয়ামদা তঙাই ফদবা এৱিয়র্নেস লৈহন্নবগীদমক্তা ঐখোয়না হোৎনফম থোকপা হোৎনগদবনি। ঐখোয়না হৌজিক ‘জল জাগ্রুক্তা মহোৎসব’ পাংথোকপা য়াই। লোকেলগী মফম কয়াদা পাংথোকপা মেলাশিংদা ঐখোয়না ঈশিংগা মরী লৈনবা এৱিয়র্নেস কেম্পনে চত্থবা য়াই। মরু ওইবা ৱাফম অমা ওইনা, ঐখোয়না তুংগী চারোন শুরোনশিংদা মসিগী ৱাখল্লোন লৈহন্নবা মখোয়গী এজুকেসনগী কোর্স্তা মনুং চলহনবদগী হৌরগা স্কুলশিংদা মরী লৈনবা থবক পাংথোকপগী ইন্নোবেতিব ওইরবা থৌওং কয়া পায়খৎপা য়াই। লৈবাক্কী জিলা খুদিংদা অমৃত সরোবর ৭৫ শেম্লি হায়বা অদোম খঙলে। অদোম্নসু ইশাগী রাজ্যদসু মসিগী থবক কয়া নিংথিনা পাংথোক্লে। অতেনবা মতমগী মনুংদা অমৃত সরোবর লিশিং ২৫ শেমখ্রে। ঈশিং য়োকখৎপগী মাইকৈদা মালেমগী মনুংদা পাংথোকপা তোপ-তোপ্পা থৌওং অমা মসিনা ওইরি। মসিদসু জন ভাগীদারী য়াওরি। মীয়াম্না মশাগী থৌদাংনি খন্দুনা মাঙ থানা থোক্নরক্লি। ঐখোয়না মাইকৈ অসিদা পায়খৎলিবা থবকশিং লেপহন্দবা তাই।
মরুপশিং,
ঈশিংগা মরী লৈনবা শিংবা কয়াগী ৱারোইশিন পুরক্নবগীদমক্তা ঐখোয়না পোলিসী অমসুং ব্যুরোক্রেতিক থৌওংশিংদগী ৱাংমা লান্থোক্তুনা লাকপগী মথৌসু তারে। ঐখোয়না শিংনবা মশক খঙদোক্তুনা মদুগী ৱারোইশিন থিদোক্নবগীদমক্তা তেক্নোলোজী, ইন্দস্ত্রী অমসুং স্তার্তঅপশিংগা মরু ওইনা মরী লৈনবা তাবনি। জিও সেন্সিং অমসুং জিও মেপ্পিংগুম্বা তেক্নিক্না ঐখোয়দা হীরম অসিদা মতেং য়াম্না পাংবা ঙমগনি।
মরুপশিং,
য়ুম্থোং খুদিংদা ঈশিং ফংহনবগী ‘জল জীবন মিসন’ অসি অদোমগী রাজ্যগী চাউখৎ-থৌরাংগী য়াম্না চাউবা দিভেলপমেন্ত পেরামীতর অমনি। রাজ্য কয়ানা হীরমসিদা থবক ফজনা পাংথোক্লি, রাজ্য কয়ানা মাইকৈ অসিদা মাঙজিল থানা চৎলি। হায়রিবা খুদোংচাবশিং অসি শেম-শাবা হেক লোইবগা মখোয়বু নিংথিনা শেন্নবগী থবক মখা তানা চত্থবা হায়বসিদসু মরু ওইবা মিৎয়েং চঙগদবনি। গ্রাম পঞ্চায়তশিংনা জল জীবন মিসনবু লুচিংবীয়ু, অদুগা থবক লোইরবা তুংদা অফবা অমসুং অশেংবা ঈশিং ফংলগনি হায়বগী সর্তিফাইসু তৌবীয়ু। গ্রাম পঞ্চায়ত খুদিংনা মাসিক নত্ত্রগা ত্রেমাসিক রিপোর্তসু ওনলাইন্দা থাগৎপা য়ারগনি। মখোয়গী খুঙ্গংগী ইমুং কয়াদা তোতি ঈশিং পীরে হায়বগী ৱারোল মসিদা হাপ্পা য়াবনি। ঈশিংগী মগুন ফনা থম্নবগীদমক্তা মতম মতমগী ওইনা ৱাতর তেস্তিং তৌবগী থৌওংসু হৌদোক্কদবনি।
মরুপশিং,
প্রধান মন্ত্রী কৃষি সিঞ্চাই য়োজনাগী মখাদা রাজ্য খুদিংনা খোঙজেল য়াঙনা থবক তৌরি। মসিগী মতুং ইন্না, পর দ্রোপ মোর দ্রোপ অভিয়ান্সু হৌরে। স্কিম অসিগী মখাদা, লৈবাক মনুংদা লম হেক্ত্যার লাখ ৭০বু হৌজিক ফাওবদা মাইক্রো ইরিগেসনগী মনুংদা পুরকখ্রে। রাজ্য খুদিংনা মাইক্রো-ইরিগেসনবু লেপ্তনা খুমাং চাউশিলহনবা তাবনি। মসিদি ঈশিং য়োকখৎপগী মতাংদা য়াম্না তঙাই ফদবা থৌওং অমা ওইগনি। হৌজিক্তি, দাইরেক্ত কেনেলগী মহুত্তা পাইপলাইন্দা য়ুম্ফমোইবা অনৌবা স্কিম কয়া পুথোক্লি। মসিবু ঐখোয়না হেন্না খুমাং চাউশিলহনবগী মথৌ তারে।
মরুপশিং,
কেন্দ্র সরকারনা ঈশিং য়োকখৎপগীদমক্তা অতল ভুজল সংরক্সন য়োজনা হৌদোক্লে। মসিদি য়াম্না সেন্সিতিব ওইবা কেম্পেন্নি, অমসুং সেন্সিতিব ওইবা মান্ননা মহা চত্থবগী মথৌসু তাই। ওথোরিতীশিংনা গ্রাউন্দৱাতর মেনেজমেন্তকী মতাংদা হকচিন্না থবক পায়খৎপগী মথৌসু তাই। গ্রাউন্দৱাতর রিচার্জ তৌনবগীদমক্তা জিলা খুদিংদা ৱাতর শেদ শাবগী থবক্সু পাক শন্না পাংথোকপগী মথৌ তাই। ঐহাক্কী অপাম্বদি, মনরেগাগী ওইনা খ্বাইদগী য়াম্বা থবকশিং ঈশিংগী মতাংদা পাংথোকপনি। চিংগী লমদমশিংদা স্প্রিং শেদ নৌহৌননা হিংগৎহন্নবা থবক পায়খৎপা হৌখ্রে। খোঙজেল য়াঙনা চত্থবগী মথৌ তাই। ঈশিং য়োকখৎপগা মরী লৈননা অদোমগী মফমশিংগী উমংগী মফমশিংদা পুক্নিং থৌগৎপগী মথৌসু মান্ননা তাই। মসিগীদমক্তা, ইনভাইরনমেন্ত মন্ত্রালয় অমসুং ঈশিংগী মন্ত্রালয়না পুন্না থবক তৌমিন্নবগী মথৌ তাই। ঈশিং চাং নাইনা ফংহন্নবগীদমক্তা মফম খুদিংগী ঈশিং থোকফমশিংবু নিংথিনা য়োকখৎপগী মথৌ য়াম্না তাবনি। গ্রাম পঞ্চায়তশিংনা মথংগী চহি ৫গী থৌরাং য়াৎসি, মসিদা ঈশিংদা মরু ওইবা পীরগা শেম্বীয়ু। মসিদা ৱাতর সপ্লাইদগী হৌরগা লু-নানবা অমসুং ৱেস্ত-মেনেজমেন্তকী রোদমেপসু মনুং চলহনবীয়ু। করম্বা খুঙ্গংদা ঈশিংগী তঙাই ফদবা য়াম্না লৈবগে, মফমদুদা মরী লৈনবা করি থবক পায়খৎপা য়াবগে, মসিগী মখা পোন্না রাজ্য খরদদি পঞ্চায়তকী থাক্তা ৱাতর বজেত শেম্বগী থবকসু পাংথোকখ্রবনি। থৌওং অসি অতোপ্পা রাজ্যশিংনা মতৌ তম্বদা য়াম্না কান্নবা ওইগনি। কেৎচ দি রেন খোঙথাংনা মীওই কয়াগী পুক্নিং চিংশিনখি হায়বা ঐখোয়না ইকুই কুইদনা উখ্রে। মসিগুম্বা থবকশিং অসিনা রাজ্য সরকারশিংগী নুমিৎ খুদিংগী পাংথোকপা থৌওংশিংগী মনুং চলহনবা হায়বসি য়াম্না মরু ওইবা অমা ওইরবনি। রাজ্য সরকারশিংগী চহিগী থবকশিংগী মনুংদা শোইদনা চলহনগদবনি। মসিগুম্বা খোঙথাংগীদমক্তা ঐখোয়না নোং তাবা ঙাইবগী মহুত্তা, নোং তাদ্রিঙৈদগী হৌনা থৌরাং য়াৎপনা য়াম্না হেন্না ফগনি।
মরুপশিং,
সরকারনা হন্দক্কী বজেত্তা সর্ক্যুলর ইকোনোমীদা অখন্নবা মিৎয়েং চঙলি। ঈশিং য়োকশিনবগী সেক্তরদসু সর্ক্যুলর ইকোনোমীগী অচৌবা থৌদাং লৈরি। ত্রিতমেন্ত তৌরবা ঈশিং অমুক হন্না শিজিন্নবা য়ারবা, ফ্রেস ৱাতরবু য়োকশিন্দুনা থম্বা য়ারকপা মতমদা, ইকোসীস্তেম অপুনবনা য়াম্না কান্নবা ফংগনি। মরম অদুনা, ঈশিংবু ত্রিতমেন্ত, রিসাইকল তৌবসি য়াম্না মরু ওইবনি। রাজ্যশিংগী তোঙানবা থবকশিংদা ‘ত্রিতমেন্ত’ তৌরবা ঈশিং শিজিন্নবা হেনগৎহনবনা ফত্ত হৌদীদগী চাগা তানবগী ৱাখল্লোন্দসু তেংবাংগনি। অদোমগী লোকেলগী তঙাই ফদবশিং খঙদোকপীয়ু, মদুগী মতুং ইন্না স্কিম শেম্বা তাবনি। ঐখোয়না খন্নগদবা ৱাফম অমগসু লৈরি। ঐখোয়গী তুরেল, ৱাতর বোদীবু মপানগী অমোৎপশিংনা মোৎশিনহন্দবা হায়বসিগীদমক্তা রাজ্য খুদিংদা খ্বাইদগী ফবা ৱেস্ত মেনেজমেন্ত অমসুং সিৱেজ ত্রিতমেন্ত নেতৱর্ক শেম্বা তাবনি। ত্রিতেদ ৱাতরবু অমুক হন্না শিজিন্নবা য়াহনবা হায়বগা মরী লৈননা ঐখোয়না মথৌ নিংথিনা পাংথোকপা পথাপ্তা মিৎয়েং চঙবা তাবনি। নমামী গঙ্গে মিসনবুসু তেমপ্লেত অমা ওইহন্দুনা ঐখোয়গী মফমগী তুরেল য়োকখৎপা অমসুং হিংগৎহনবগী থবক হৌবা য়াই।
মরুপশিং,
ঈশিংবু তেংবাংনবা অমসুং থবক শীন্দোক্নবগী হীরম ওইহনসি। তেংবাংননা থবক তৌমিন্নবগী হীরম ওইহন্সি। মসি ঐখোয় পুম্নমক্কী থৌদাংনি। অর্বান্নাইজেসনগী হীরম অমা লৈরক্লি হায়বা অদোম খুদিংনা উরে। ঐখোয়গী মীয়াম্না মসিগী মাইকৈদা খোঙজেল য়াঙনা চঙশিন্নরি। মসিনা খোঙজেল য়াঙলিবমখৈ ঈশিংগী হীরমদা হেন্না খন্দবা য়ারোই। সিৱেজকী ফেসিলিতীগী মতাংদা খন্দবা য়ারোই। সিৱেজ ত্রিতমেন্তকী মতাংদা হৌজিক্তগী হৌনা খন্দবা য়ারোই। শহরশিং চাউখৎলকপগী খোঙজেলগা মান্ননা ঐখোয়না হায়রিবা থবকশিং পাংথোকপা তাবনি। সম্মিত অসিদা মীপুম খুদিংনা মশাগী এক্সপেরিএন্স লান্থোক্কনি হায়না ঐহাক্না থাজবা থম্মি, মদুদা খন্ন নৈনগনি খল্লি। নিংথিনা থবক পায়খৎপা য়াবা স্কিম শেমগনি, অদুগা পান্দম ফংদবা য়াদে হায়বা ৱারেপকা লোয়ননা মাংজিল থানা চঙশিনগনি হায়না ঐহাক্না থাজৈ। রাজ্য খুদিংনা মখোয়গী মীয়ামগী নুংঙাই য়াইফবগীদমক্তা, নাগ্রিকশিংগী থৌদাংশিংদসু মিৎয়েং চঙলগা ঈশিংগী হীরমদা অহেনবা অমসুং অহানবা মিৎয়েং চঙলগা ঐখোয়না থবক তৌগনি হায়বগী থাজবগা লোয়ননা মসিগী ৱাতর কনফরেন্স অসিবু ঐখোয়দা থাজবগা লোয়ননা মখা চত্থসি।
ঐহাক্না পুম্নমকপু য়াইফ পাউজেল পীজরি।
থাগৎচরি!
