আন্ধ্র প্রদেশকী রাজ্যপাল শ্রী এস অব্দুল নজীরজী, মুখ্য মন্ত্রী জগন মোহন রেদ্দীজী, কেন্দ্রগী মন্ত্রী মন্দলগী ঐগী মরুপ নির্মলা সীতারামনজী, পঙ্কজ চৌধরীজী, ভাগৱত কিসনরাৱ করাদজী, অতৈ দিগনিতরীশিং, নুপী অমসুং নুপাশিং,
ময়ামবু নেস্নেল একাদেমী ওফ কস্তমস, ইন্দাইরেক্ত তেক্সেস এন্দ নর্কোতিক্সকী ফজরবা কেম্পস অসিগীদমক নুংঙাইবা ফোঙদোকচরি। শ্রী সত্য সাই জিলা, কেম্পস অসি শারিবা মফম অসিমক মশাগী অখন্নবা মগুন চেল্লি। মফম অসি স্পিরিচুএলিতী, লৈবাক শেমগৎপা অমসুং অফবা লৈঙাক্কা মরী লৈনৈ অমসুং ভারতকী হেরিতেজকী মশক তাক্লি। শ্রী সত্য সাই বাবাগী পোক্নফম অসি পুত্তাপর্থিদা লৈ, অথৌবা নীংতম লান্মী পদ্ম শ্রী কল্লুর সুব্বা রাও, মশক নাইবা পপেত্রী আর্তিস্ত দলাবাই ছলাপথী রাও অমসুং বিজয়নগর সমরাজ্যাগী মতিক ময়াই লৈরবা অফবা লৈঙাক অসিনা লমদম অসিগী ইথিলগী হৌরকফমসু ওইরি। NACINগী অনৌবা কেম্পস অসি অসিগুম্বা ইথিল পীরবা মফম অমদা শারি। ঐহাক্না থাজৈ মদুদি কেম্পস অসিনা অফবা লৈঙাক্কী অনৌবা মায়োল অমা ওইরগনি অমসুং মসিনা লৈবাক্কী ললোন-ইতিক অমসুং ইন্দস্ত্রীদা শাহৌ অমা পীরগনি।
মরুপশিং,
ঙসি অসি তিরুবল্লুবর নুমিৎনি, লম্বোইবা তিরুবল্লুবরনা হায়খি, उरुपोरुळुम उल्गु-पोरुळुम तन्-वोन्नार, तिरु-पोरुळुम वेन्दन पोरुळ মদুদি নীংথৌনা রিভেন্যু ওইনা লাকখিবা রোয়েল তেক্সশিংদা অমসুং য়েক্নবদগী লৌরকপা লনদা হক লৈ। দেমোক্রেসীদা নীংথৌ অমত্তা লৈতে। মসি মীয়াম্নবা পানবা অমসুং সরকারনা মাগী প্রজাশিং শেবা তৌনবা থবক তৌরি মরম অসিনা সরকারনা রিভেন্যু মরাং কাইনা ফংহনবদা নখোয়গী অচৌবা থৌদাং অমা লৈ।
মরুপশিং,
মফম অসিদা লাক্ত্রিঙৈ মমাংদা লেপক্ষীদা লৈবা বীরভাদ্রা মন্দিরদা চৎপগী খুদোংচাবা ঐহাক্না ফংখি। ঐহাক্না রঙ্গানাথা রামায়ন তাখি। ঐহাক্না মফম অদুগী ভক্তাশিংগা লোয়ননা ভজন কীর্তনদা শরুক য়াখি। রাম জাতায়ু সম্বদ অসি মনাক অনকপদা থোকখি হায়বগী থাজবা লৈ। নখোয়না খঙলমগনি ঐহাক্না অয়োধ্যা ধামদা লৈবা মন্দিরগী প্রান প্রিস্থাগী মাংওইননা নুমিৎ 11নিগী অখন্নবা অনুস্থান চত্থরি। শেংলবা মতমগী মনুংদা মন্দির অসিদা থৌজাল ফংজবা অসিদা ঐহাক্না নুংঙাইবা ফোঙদোকচরি। লৈবাক অসিদা রাম ভক্তিগী ওইরিবা এতমোস্ফিয়রনা থল্লি। শ্রী রামনা পীবা ইথিল অসি নীংজবদগী হেল্লি। শ্রী রাম অসি অফবা লৈঙাক্কী অথোইবা খুদম অমনি মরমদি মহাক অসি NACINগীসু ওইনা অচৌবা ইথিল অমা ওইগনি।
মরুপশিং,
মহাত্মা গান্ধীনা হায়রমখিবা রাম রাজ্যগী ৱাখল্লোন অসিমক তশেংবা দেমোক্রেসীগী ৱাহন্থোক অদুনি। গান্ধীজীগী ৱাফম অসি চহি কয়া নৈনরবা অমসুং মহাক্কী বিজনদা য়ুম্ফম ওই। রাম রাজ্যনা প্রজা খুদিংমক্কী ৱাখল্লোনবু তাবীবা অমসুং মীপুম খুদিংমক্না মখোয়গী ফংফম থোকপা ইকাই খুম্নবা ফংবা লৈবাক অমগী মরমদা হায়রমখি। রাম রাজ্যাদা লৈরিবা রামগী লমদমগী প্রজাশিংগীদমক অসুম্না হায়রমখি रामराज्यवासी त्वम्, प्रोच्छ्रयस्व ते शिरम्। न्यायार्थं यूध्य्स्व, सर्वेषु समं चर। परिपालय दुर्बलं, विद्धि धर्मं वरम्। प्रोच्छ्रयस्व ते शिरम्, रामराज्यवासी त्वम् মসিগী ৱাহন্থোক্তি “ও রাম রাজ্যগী প্রজাশিং, নখোয়গী কোক ৱাংনা থাংগৎতুনা অমসুং জস্তিসকীদমক থেংনবীয়ু, মীপুম খুদিংমক চপ মান্ননা লোইনৌ, অশোনববু ঙাকপী শেনবীয়ু, ধর্মবু খ্বাইদগী মরু ওইনা লৌ” হায়বনি। রাম রাজ্য অসি মীপুম খুদিংমক্না কোক ৱাংনা থাংগৎতুনা চৎপা ঙম্বা অমসুং ইকাই খুম্নবা ফংবা, প্রজা খুদিংমক চপ মান্ননা লোইনবা, অশোনববু ঙাকপী-শেনবীবা, অমসুং ধর্মবু খ্বাইদগী মরু ওইনা লৌবা হায়বা য়ুম্বী মরী অসিদা শেমখি। 21শুবা চহিচা অসিদা মোদর্ন ইন্সতিত্যুসনশিং অসিগী রুল অমসুং রিগ্যুলেসনশিং শেম্মিবা এদমিনিস্ত্রেতরশিং ওইনা নখোয়না পান্দম মরি অসিদা মীৎয়েং চংগদবনি অমসুং মসি কাওরোইদবনি।
মরুপশিং,
‘NACIN’গী থৌদাং অসি ভারত্তা বিজিনেস অমসুং ত্রেদতা খুদোংচাবা অমসুং ভারত অসি গ্লোবেল ত্রেদকী মরু ওইবা মপাং অমা ওইহনবা অমসুং ফ্রেন্দলী এনভাইর্নমেন্ত অমা লৈবা লৈবা লৈবাক অসিদা মোর্দন ইকোসিস্তেম লৈহনবনি। মসিগী পান্দমদি তেক্সেস, কস্তমস, নরকোতিক্স অমসুং অরানবা তৌবশিং অসিগুম্বা লমশিংদা লৈবাক অসিদা ইজ ওফ দুইং বিজিনেস থৌগৎপনি। মীকুপ খরগী মমাংদা ঐহাক্না নহা ওইরিবা ত্রেনীশিংগা উনখি। মখোয় অসি ‘অমৃত কাল’ মনুংগী লমজিং লমতাক্কদবা মীরোল অদুনি। সরকারনা মখোয়দা তোঙান-তোঙানবা শক্তিশিং পীখি। নখোয়গী অপাম্বগী মতুং ইন্না শক্তিশিং অসি শীজিন্নগনি অমসুং নখোয়না ভগৱামগী পুন্সিদগী ইথিল লৌগদবনি। খুদম ওইনা রামনা লক্ষ্মনদা হায়খি नेयं मम मही सौम्य दुर्लभा सागराम्बरा । न हीच्छेयम धर्मेण शक्रत्वमपि लक्ष्मण ॥ মসিগী ৱাহন্থোক্তি পৃথিবী অসি সমুদ্রনা কোইশিল্লি মসি ঐগী ওইনা অতাংবা নত্তে অদুবু ইন্দ্রগী লমদম অসি অরানবা পাম্বৈনা লৌশিনবা ঐ পামদে। অয়াম্বা মতমদা ঐখোয়না মীয়াম্না মখোয়গী থৌদাংশিং অমসুং ৱাশকশিং ঙাইহাক্কী অপাম্বনা হেক হেক কাওথোকপা য়াওই। মরম অসিনা নখোয়গী তেনর মনুংদা ভগৱান রামগী ৱাহৈশিং অসি নীংশিংদুনা লৈয়ু।
মরুপশিং,
নখোয়না হকথেংননা তেক্স সিস্তেমগী থবক তৌগনি। রাম রাজ্যদা স্বামী তুলসিদাসনা তেক্স সিস্তেমগী মরমদা হায়রমখিবা অদু য়াম্না মরু ওই। মহাক্না অসুম্না হায়রমখি - बरसत हरषत लोग सब, करषत लखै न कोइ, तुलसी प्रजा सुभाग ते, भूप भानु सो होइ। মসিগী ৱাহন্থোক্তি নুমিৎনা পৃথিবীদগী ঈশিং লৌরকপা, মতুংদা মদুনা লৈচিল ওন্দুনা পৃথিবীদা অমুক নোং ওইনা চুহল্লি, চাউখৎপা পুরকই। ঐখোয়গী তেক্স সিস্তেম অসিসু মসিগা মান্নৈ। ঐখোয়গী খোঙথাং অসি তেক্স ওইনা মীয়ামদগী খোমগৎখিবা শেনফম খুদিংমক মীয়ামগী য়াইফনবা শীজিন্নবনি অমসুং মসিনা চাউখৎপা পুরক্কনি। করিগুম্বা অদোম্না নৈনরবদি নখোয়না চপ মান্নবা বিজন অসিনা ইথিল পীদুনা হৌখিবা চহি 10 অসিদা তেক্স সিস্তেমদা পুরকখিবা অচৌবা রিফোর্মশিংগী মরমদা থেংনগনি। মমাংদা লৈবাক অসিদা তোঙান-তোঙানবা তেক্স সিস্তেমশিং লৈরমখি মসি মীচম মীয়াম্না লাইনা খঙবা ঙমলমদে। নন-ত্রান্সপরেন্ত তেক্স সিস্তেমশিংনা মরম ওইরগা পুকচেল শেংবা তেক্সপেয়রশিং অমসুং বিজিনেস তৌরিবা মীওইশিংনা অৱাবা মায়োক্নরমখি। ঐখোয়না GST অমসুং অচম্বা ইনকম তেক্সকী মওংদা অমসুং ফেসলেস এসেসমেন্ত হৌদোক্তুনা মোর্দন সিস্তেম অমা পীখি। রিফোর্ম পুম্নমক অসিনা রেকোর্দ ওইনা তেক্স খোমজিনবা ঙমহনখি। ঐখোয়না তোঙান-তোঙানবা স্কিমশিংগী খুত্থাংদা মীয়ামগী শেল অদু হন্দোক্লি। 2014গী মতুংদা তৌখিবা তেক্স রিফোর্মশিং অসিনা প্রজাশিংগী লুপা করোর লাখ 2.5রোমগী তেক্স তুংশিনবা ঙমহনখি। IT একজেম্পজন লিমিৎ অসি লুপা লাখ 2গী ইনকম লাকপা ওইরম্বদগী লুপা লাখ 7দা হেনগৎহনখি। সরকারা মীয়ামগী য়াইফনবা স্কিম কয়া হৌদোকখি অমসুং মোদর্ন ইনফ্রাস্ত্রকচরদা রেকোর্দ ওইনা ইনভেস্তমেন্ত তৌখি।ঙসি লৈবাক অসিদা লৈরিবা তেক্সপেয়রশিংনা মশিং লেপ্পা লৈতনা হেনগৎলক্লি মরমদি মখোয়না মখোয়গী তেক্সকী শেনফম অসি অফবা মওংদা শীজিন্নবনা নুংঙাইবা পোক্লি। ঐখোয়না মীয়ামদগী লৌবা খুদিংমক, ঐখোয়না মখোয়দা অমুক পীরি অমসুং মসিনি অফবা লৈঙাক অমসুং মসিনা রাম রাজ্যাগী পাউজেলনি।
মরুপশিং,
রাম রাজ্যদা রিসোর্সশিং নীংথিনা শীজিন্নবদা অখন্নবা মীৎয়েং চংলি। মমাংগী সরকার লৈবাক অসিদা অচৌবা অমাংশিং থোকহন্দুনা প্রোজেক্তশিং পন্দুনা অমসুং থৈদোক্তুনা থমলমখি। ভগৱান রামগা ভারতকা ৱারী শাবদা অসিগুম্বা মতৌশিং অসিদগী চেকশিন্নবা হায়খি। রামনা ভারত্তা হায়খি - कच्चिदर्थं विनिश्चित्य लघुमूलं महोदयम्। क्षिप्रमारभसे कर्तुं न दीर्घयसि राघव।। মদুদি ঐহাক্না থাজৈ মদুদি নখোয়না শেল চংবা হন্থনা থবকশিং অসি লোইশিনগনি অমসুং মতম মাংহনবা তৌদনা কান্নবা হেন্না পীগনি। হৌখিবা চহি 10 অসিদা হৌজিক পাল্লিবা সরকারনা মসি খঙনা চৎখি অমসুং প্রোজেক্তশিং মতম চানা লোইশিনবদা মীৎয়েং থমখি।
মরুপশিং,
গোস্বামী তুলসিদাসজীনা হায়খি, 'माली भानु किसानु सम नीति निपुन नरपाल । प्रजा भाग बस होहिंगे कबहुँ कबहुँ कलिकाल। ৱাহন্থোক্তি সরকারনা মালী, নুমিৎ অমসুং লৌমী অমগুম্না গুনশিং চেনগদবনি। মালিনা অপীকপা পাম্বীশিং মতেং পাংই, মখোয়বু মখোঙ শোম্বী অমসুং মখোয়গী ফংফন থোকপা হক অদু ফংবদগী মুলিবা মীওইশিং লৌথোকই। মতৌ অসুম্না সরকারনা খুন্নাইগী খ্বাইদগী শোত্থরবশিংবু শক্তি পীগনি অমসুং মপাঙ্গল হাপকনি। নুমিৎনা অমম্বা মাংহল্লি, অকোইববু শেংদোকই অমসুং নোং চুহল্লি। হৌখিবা চহি 10 অসিদা ঐখোয়না লায়রবা, লৌমী, নুপী অমসুং নহারোলদা শক্তি পীনবা মীৎয়েং থমদুনা লাকখি। ঐখোয়না শোত্থরবা, তুহৎপীরবা অমসুং খুন্নাইদা মনিংদা লেপ্পীশিংবু মরু ওইনা লৌখি। হৌখিবা চহি 10 অসিদা দোক্যুমেন্তশিংদগী অশাবা মীওইশিংগী মমিং করোর 10 লৌথোকখি। ঙসি ফংফম থোকপা বেনিফিসরীগী বেঙ্ক একাউন্তদা শেল খুদিংমক য়ৌরি। শেঞ্জা-থুমজাগী মায়োক্তা থেংনবা অমসুং শেঞ্জা-থুমজা তৌবা মীওইশিংগী মায়োক্তা এক্সন লৌখৎপনা সরকারগী মরু ওইবা ওইখি। নখোয়না ৱাখলদা মসিবু মরু ওইনা লৌদুনা নখোয়গী থবক মখা চত্থগদবনি।
মরুপশিং,
সরকারনা লায়রবদা মীনংশিং ফাওখি, সরকারনা খুদোংচাদ্রবশিংগী সমসা কোকহন্নবা থমোয় শেংনা থবক তৌরবা মতমদা মদুগী মহৈ ময়েক শেংনা উবা ফংগনি। হৌজিক পাল্লিবা সরকারগী খোঙথাংশিংনা হৌখিবা চহি 9দা মীওই করোর 25রোম লৈতা-লায়রবদগী কোকহনখি হায়না ঙরাং ফোঙখিবা NITI আয়োগকী খ্বাইদগী নৌবা রিপোর্তনা ফোঙদোকখি। লৈবাক অসিদা দিকেদ কয়া ‘লাইরবা মাংহল্লু’ হায়বা খোলাউ লাউদুনা লাকখি, শুপ্নগী চহি মাপনদা লৈতা লায়রবদগী মীওই করোর 25 রোম লাউথোকপা ঙম্বগী পুৱারী ওইরবা মাইপাকপা অসি মমাংদা অমুক্তা থোকখিদ্রি। 2014দা শক্তি পাইখিবা সরকার অসিনা লায়রবশিংগী য়াইফনবা মীৎয়েং চংখিবগী মহৈনি। ঐহাক্না মতম চুপ্পদা থাজৈ মদুদি লৈবাক অসিগী লায়রবশিংদা পাম্বৈ অমসুং রিসোর্সশিং পীরবদি মখোয়না লৈতা লায়রবা মাইথীবা পীবা ঙম্নবগী মতিক ময়াই লৈগনি। ঐখোয়না মসি ঙসিদি মঙফাওনবা ঙম্বা উবা ফংলে। সরকারনা হকশেল, এজুকেসন, এম্প্লোয়মেন্ত অমসুং সেল্ফ-এম্প্লোয়মেন্তদা চাদিং তৌখি অমসুং লায়রবশিংগী খুদোংচাবশিং হেনগৎহল্লি। লায়রবশিংগী শক্তি হেনগৎহল্লবা অমসুং খুদোংচাবশিং পীরবা মতমদা মখোয়না লৈতা লায়রবদগী থোরকপা ঙমগনি। জনুৱারী 22দা রাম মন্দির থোং হাংগদৌরিবা অসিগী মমাংদা নুংঙাইবা পাউ অমগা লৈ। ভারত্তা লৈতা লায়রবা হন্থহনখি, মসিনা মীপুম খুদিংমক্তা অনৌবা থাজবনা থলহনগনি অমসুং লৈবাক অসিগী থাজবা হেনগৎহনগনি। লৈবাক অসিদা লৈতা লায়রবা হন্থহনবা অসিনা নিও-মিদ্দল ক্লাস অমসুং মিদ্দল ক্লাসকী প্রোলিফরেসন হন্থহনবা ঙমখি। ইকনোমীগী লমদা লৈরিবা মীওইশিংনা নিও-মিদ্দল ক্লাসকী গ্রোথকী পোতেন্সিএল খঙখি অমসুং মখোয়না ইকনোমিক এক্তিবিতীশিংদা শরুক তম্মিবা অসি খঙখি। “অসিগুম্বা ফীভম অমদা NACINনা পুক্নিং চংবগা লোয়ননা মখোয়গী থৌদাং মপুংফানা পাংথোক্কদবনি।
মরুপশিং,
ঐহাক্না লাল কিলাগী লানবন্দগী লাউখিবা সবকা প্রয়াস খোলাউ অদু নখোয়না নীংশিংলমগনি। ভগৱান রামগী পুন্সি ৱারীদা সবকা প্রয়াস অসি মরু ওই হায়বসু খঙখি। শ্রী রামনা রাবনগী মায়োক্তা লান্থেংনবদা মহাক্না লৌশিং লৈনা রিসোর্সশিং শিজিন্নখিবা অমসুং মদুবু অচৌবা ফোর্স অমা ওইহনখি। শীংনবশিং অসি ময়োক্নবা ঙম্নবা মহাক্না অপীকপা রিসোর্সশিং খোমজিনখি, তোঙান-তোঙানবা জিবশিং পুনশিনখি, মখোয়গী অপুনবা শক্তি অদুবু অচৌবা শক্তি অমদা ওন্থোকখি অমসুং চাউনা মাইপাকপা ঙমখি। চপ মান্নবা মওংদা ওফিসর খুদিংমক, কর্মচারি খুদিংমক অমসুং প্রজা খুদিংমক্না ‘ভিকসিৎ ভারত’ অমা শেম্বদা মরু ওইবা থৌদাং লৌগদবনি। ইনকম অমসুং ইনবেস্তমেন্ত হেনগৎহন্নবা অমসুং ইজ ওফ দুইং বিজিনেস হেনগৎহন্নবা পুন্না থবক তৌগদবনি। মন্ত্র অদুদি সবকা প্রয়াসকা লোয়ননা মাংদা চংশিনবনি। মসিগা লোয়ননা NACINগী অনৌবা কেম্পস অসিনা অমৃত কালদা অফবা লৈঙাক্কী ইথিল ওইবা ওইরসনু। পুম্নমক্তা অমুক হন্না নুংঙাইবা ফোঙদোকচরি। থাগৎচরি।
