বনক্কম চোলা মন্দলম!
ইকায়খুম্নরবা অধিনম লুচিংবশিং, চিনময়া মিসন শ্বামীশিং, তামিল নাদুগী রাজ্যপাল আর.এন রবি জি, ঐগী মন্ত্রীমন্দলগী মরুপ দোক্তর এল. মুরুগান জি, মফম অসিগী এম.পি তিরুমা-বালবান জি, তামিল নাদুগী মিনিস্তরশিং, সংসদকী ঐগী মরুপ শ্রী ইলাইরাজা জি, ওদুবারশিং, ভক্তশিং, মহৈরোয়শিং, কলচরেল হিস্তোরিয়ানশিং অমসুং ঐগী নুংশিরবা ইনাওশিং অমসুং ইচলশিং! নমাহ সিবায়া নমাহ সিবায়া বালাঘা, নাদন তাল বালঘা, ইমাই পোলুদম, য়েন নেঞ্জিল নিনগাদন তাল বালাঘাই!
নায়ানার নাগেন্দ্রগী মিং পনবদা মফম শীনবা থুংনা খঙহৌদনা হরাওবা ঐনা উবা ফংলে।
মরুপশিং,
লমদম অসি রাজা রাজাগী লমদমনি। লাইনিংগী লমদম অসিদা ইলাইরাজানা ঐখোয় পুম্নমক সিবদা চঙজহল্লে, সাৱানগী থা অসিদা, রাজা রাজাগী লমদম অসিদা অমসুং ইলাইরাজাগী লাইনিং চেৎপা অসিদা, অঙকপা ফিবম অমনি অমসুং ঐ কাসিগী এম.পি ওইনা ঐনা ওম নমাহ সিবা তাবদা ঐ তু চুংই।
মরুপশিং,
সিবা দর্শনগী অঙকপা শক্তি, শ্রী ইলাইরাজাগী ঈশৈ, ওদুবারগী মন্ত্র শোনবা, মসিগী অধ্যাতিক্কী থবক অসিনা তশেংনা থৱায় অসি পেনহল্লে।
মরুপশিং,
শেংলবা সৱান থা অমসুং ব্রিহদেশ্বর সিব লাইশঙ শাবা হৌখিবা চহি ১০০০ মপুংফারকপগী পুৱারি ওইরবা থৌরম অসিদা ভগবান ব্রিহদেশ্বর সিবগী খুয়াদা চঙজনবা অমসুং মহাক খুরুম্নবগী অফবা খুদোংচাবা ঐনা ফংলে। পুৱারি ওইরবা লাইশঙ অসিদা ভারতমচা করোর ১৪০ গী য়াইফনবা অমসুং মখা তানা ভারত চাউখৎনবা ঐনা খুরুমজরে। মীওই খুদিংমক ভগবান সিবাগী থৌজাল ফংনবা ঐনা থৌনিজরি।
মরুপশিং,
ঐ মফম অসিদা থেংনা থুংলখি অদুবু ভারত সরকারগী কলচর মিনিস্ত্রিগী অঙকপা একজিবিসন অসিনা ই-পাউ কয়া পীরে, চহি লিশিং অমগী মমাঙদা কমদৌনা ঐখোয়গী ইপা-ইপুশিংনা মীওইবগী য়াইফনবা লমজিংবগী হায়বা খঙবদা ঐখোয় চাউথোকচরে। হৌখিবা চয়োলদগী একজিবিসন অসি য়েংনবা মীওই লিশিং কয়া লাকখি, মসি য়াম্না চাউবা অমসুং ফজবা একজিবিসন অমনি। মসি য়েংবা য়াবা অমনি অমসুং মসি শোইদনা য়েংনবা ঐনা মীয়ামদা হায়জরি।
মরুপশিং,
ঙসি ঐনা চিনময়া মিসনগী তামিল গীতা এলবুম হাংদোক্নবগী খুদোংচাবা ফংলে। মসিগী থবক অসিনা চৎনবীশিং ঙাক্নবা ঐখোয়গী থবকশিংদা থৌনা হাপ্লে। থবক অসিদা শরুক য়াখিবা মীওই খুদিংমক ঐনা থাগৎপা ফোঙদোকচরি।
মরুপশিং,
চোলা নিংথৌশিংনা শ্রী লঙ্কা, মালদিবস অমসুং খা-নোংপোক এসিয়াদা কুতনিতি অমসুং ললোন-ইতিক্কী মরীশিং থম্নখি। ঐ ঙরাং মালদিবসতগী হল্লকপনি অমসুং ঙসি ঐ তামিল নাদুদা থৌরম অসি শরুক য়ারে।
ঐখোয়গী অরিবা লাইরিকশিংদা হায়রি মদুদি সিব ভক্তশিং সিবদা লুপশিল্লি অমসুং মহাকগুম্না শিবা নাইদে। মরম অসিনা সিবদা কৎথোকপা ভারতকী চোলাগী চৎনবী ঙসি ফাওবা শিবা নাইদ্রিবনি। রাজারাজা চোলা, রাজেন্দ্র চোলা, হায়রিবা মিংশিং অসি ভারতকী শক্তম অমসুং চাউথোকচবগা মান্নৈ। চোলা ইম্পায়ারগী পুৱারি অমসুং চৎনবীশিং অসি ভারতকী অশেংনবা থৌনা অমনি। মসি ভারতকী মঙলানগী ইথিলনি, মসিগা লোয়ননা চাউখৎলবা ভারত অমগী পান্দমগী মাইকৈদা ঐখোয় চঙশিল্লি। ইথিল অসিগা লোয়ননা, ঐনা রাজেন্দ্র চোলা ইকায়খুম্নবা উৎচরি। হৌখিবা নুমিৎ খরনি অসিদা মীয়াম্না আদি তিরুবদিরাই কুহ্মৈ পাংথোক্তুনা লাক্লি। ঙসি অচৌবা থৌরম অসি লোইশিনবা নুমিৎনি। থৌরম অসিদা শরুক য়ারিবা মীওই খুদিংমক ঐনা থাগৎপা ফোঙদোকচরি।
মরুপশিং,
চোলানা পানবা মতম অসি ভারতকী সনাগী যুগশিংগী মনুংদা অমনি হায়না পুৱারি নৈনবশিংনা থাজরি। মতম অদুগী লৈঙাক অদুগী মপাঙ্গলনা যুগ অদুগী মশক তাক্লে। চোলা ইম্পায়ারনা গনতন্ত্রগী মমা ওইনা ভারতকী চৎনবী মাঙলোমদা পুখৎলে। গনতন্ত্রগী মতাংদা ব্রিতেনগী মাগনা কার্তা পুৱারি নৈনবশিংনা পল্লি, অদুবু চহি চা কয়া চোলা ইম্পায়ারনা মীখল পাংথোক্তুনা লাকখি। ঙসি মালেম শীনবা থুংনা ঈশিং তুংশিনবা অমসুং ইকোলোজিগী মতাংদা ৱারি শানরি। মখোয়গী মরুওইবা অদু চহি কয়াগী মমাঙদগী ঐখোয়গী ইপা-ইপুশিংনা খঙখি। নিংথৌ কয়ানা অতোপ্পা লৈবাকশিং লৌশিল্লবা মতুংদা সনা, চান্দি অমসুং শা-ষন কয়া পুরকখিবগী পাউ ঐখোয়না তাখি। অদুবু, রাজেন্দ্র চোলানা গঙ্গাগী ঈশিং পুরকখি। রাজেন্দ্র চোলানা অৱাং ভারত্তগী গঙ্গাগী ঈশিং পুরকখি অমসুং মসি খা ভারত্ত থমখি। “গঙ্গা জালাময়াম জয়াস্থামবম”। গঙ্গাগী ঈশিং অদু চোলাগঙ্গা পাৎতা থমখি, ঙসি ফাওবা পাৎ অসি পোন্নেরি পাৎ হায়না খঙনরি।
মরুপশিং,
রাজেন্দ্র চোলানা গঙ্গাই-কোন্দাচোলাপুরম কোবিল লিংখৎখি। লাইশঙ অসি হৌজিক মালেমগী য়ুমশারোলগী অঙকপা অমা ওইরি। মসি চোলা ইম্পায়ারগী খুদোল অমনি অমসুং মা কাভেরিগী লমদম অসিদা ইমা গঙ্গাগী কুহ্মৈ পাংথোক্লি। পুৱারি ওইরবা থৌরম অদু নিংশিংদুনা কাসিদগী মফম অসিদা অমুক হন্না গঙ্গাগী ঈশিং পুরকপদা ঐ হরাওই। ঐনা মফম অদুদা পুজা পাংথোক্নবা চৎপদা, নিয়মশিংগী মতুংইন্না লাই-তিনগী থৌরম পাংথোকখি অমসুং গঙ্গাগী ঈশিংনা অভিষেক পাংথোকখি অমসুং ঐ কাসিগী মীয়ামগী মীহুৎনি অমসুং ইমা গঙ্গাগা ঐনা য়াম্না নক্নবা মরী অমা লৈনরি। চোলা নিংথৌশিংগী থবকশিং অসিনা এক ভারত শ্রেস্থা ভারতকী পান্দমদা অনৌবা থৌনা হাপ্লে।
মরুপশিং,
চোলা নিংথৌশিংনা নাতকী অপুনবা লংলানা ভারত অসি পুনখি। ঙসি ঐখোয়গী সরকারনা চোলা মতমগী ৱাখল্লোনশিং অদু মাঙলোমদা পুখৎলি। কাসি তামিল সঙ্গমম অমসুং সৌরাষ্ট্রা তামিল সঙ্গমমগুম্বা থৌরমশিংগী খুৎথাংদা চহি চা কয়া শুরবা অপুনবগী লংলা অদু ঐখোয়না মপাঙ্গল কনখৎহল্লি। এ.আই.এসকী খুৎথাংদা তামিল নাদুগী অরিবা লাইশঙ গঙ্গাই-কোন্দাচোলাপুরম য়োকখৎলি। লৈবাক অসিগী অনৌবা সংসদ শঙ্গাবা মতমদা, থৌরম অদুদা ঐখোয়গী সিব অধিনামগী সাধুশিংনা লুচিংখি। তামিলগী চৎনবগীগা মরী লৈনবা শেংলবা সেঙ্গোল সংসদতা থম্লে। ঙসি ফাওবা, ঐনা মিকুপ অদু নিংশিংলি অমসুং ঐ চাউথোকচৈ।
মরুপশিং,
ঐনা চিদম্বরমদা নতারাজ লাইশঙগী দিক্ষিতার খর উনরে। মখোয়না ঐঙোন্দা নাতারাজগী শক্তমদা ভগবান সিব লাৎলিবা লাইশঙ অসিগী শেংলবা প্রসাদ পীরকখি। মসিগী নাতরাজগী শক্তম অসি ঐখোয়গী ফিলোসোফি অমসুং সাইন্তিফিক রুতশিংগী খুদম অমনি। দিল্লিদা লৈরিবা ভারত মন্দপামগী ফজবা ভগবান নাতারাজগী অনন্দ তান্দাবা মীতম্না হেনগৎহল্লে। ভারত মন্দপামদা জি-২০ মীফম মনুংদা মালেম শীনবা থুংবগী লুচিংবশিং তিনখি।
মরুপশিং,
ভারতকী চৎনবী শেমগৎপদা সিব নিংবগী চৎনবী অসিনা অচৌবা থৌদাং অমা লৌখি। চোলা নিংথৌশিংনা মসিগী চৎনবী অসি শেমখৎখি। মরম অদুনা ঙসি ফাওবা সিব নিংবগী চৎনবীদা তামিল নাদুনা অহিংবা মফমশিং ওইদুনা লৈরিবনি। নয়ানমার সাধুশিং, মখোয়গী সাহিত্য, তামিল সাহিত্য অমসুং ঐখোয়গী অধিনামশিংগী থৌদাং অসিনা খুন্নাই অমসুং অধ্যাতিক্কী লমদা অনৌবা যুগ অমা পোকখি।
মরুপশিং,
ঙসি ৱাথোক কয়ানা থল্লবা মালেম অসিদা, সিবগী অচুম্বা ফিদমশিংনা ঐখোয়দা পাম্বৈশিং তাক্লি। অদোম্না উরে, তিরুমুলারনা ইখি- “ অন্বে সিবম”- হায়বদি নুংশিবা হায়বসি সিবনি। করিগুম্বা মালেম্না মসিগী ৱাখল্লোন অসি ইল্লবদি, অৱাবা অয়াম্বা মশা মরোমদোম কোকজগনি। মালেম অমা, ইমুং অমা, তুংলমচৎ অমগী শক্তমদা ঙসি ভারতনা মসিগী ৱাখল্লোন অসি য়োকখৎলি।
মরুপশিং,
ঙসি ভারতনা চাউখৎপা অমসুং হেরিতেচ অনিমক পুন্না চৎমিন্ননবগী লাইৱাদা থবক পায়খৎলি। ঙসি ভারতনা লৈবাক অসিগী পুৱারিগীদমক চাউথোকচরি। হৌখিবা চহি ১০ দা, লৈবাক অসিগী চৎনবীশিং ঙাক্নবা ঐখোয়না মিসনগী মওংদা থবক পায়খৎখি। লৈবাক অসিগী হুরানখিবা অরিবা মীতমশিং অমসুং কলাগী পোৎলমশিং মপান লৈবাকশিংদগী অমুক পুরক্লে। ২০১৪ দগী মালেমগী তোঙান তোঙানবা লৈবাকশিংদগী অরিবা মীতম অমসুং কলাগী পোৎলম ৬০০ হেন্না ভারত্ত পুরক্লে। মখোয়গী মনুংদা ঐখোয়গী তামিল নাদুদগী ৩৬ য়াওখি। ঙসি, নাতরাজ, লিঙ্গোদভাব, দক্ষিনামুর্তি, আর্ধানারিশ্বর, নন্দিকেশ্বর, উমা পরমেশ্বরি, পারবতি, শামবান্দরগুম্বা মরুওইবা হেরিতেচশিংনা অমুক হন্না লৈবাক অশিগী ফজবা হেনগৎহল্লে।
মরুপশিং,
ঐখোয়গী চৎনবী অমসুং সিবগী ফিলোসোফিনা ভারত খক নত্ত্রগা মালেম অসি খক্তদা ইথিল পীবা নত্তে। থাগী খা মেরুদা তাবা অহানবা লৈবাক ভারতনা ওইবা মতমদা, ঐখোয়না থাগী মফম অদু সিব শক্তি ওইনা মমিং থোনখি। থাগী মরুওইবা মফম অসি হৌজিক সিব শক্তি হায়না খঙনরে।
মরুপশিং,
চোলা নিংথৌশিংগী মতমদা ভারতনা শেন-থুম অমসুং লাল্লোংগী চাউখৎখিবা অদুনা হৌজিক ফাওবা ঐখোয়দা ইথিল পীরি। রাজারাজা চোলানা মপাঙ্গল কল্লবা নেভি অমা শেমখৎখি। রাজেন্দ্র চোলানা মসি মখা তানা ফগৎহনখি। মহাক্কী লৈঙাক মনুংদা অওনবা কয়া পুরকখি। মহাক্না লৈবাক ঙাকপগী থবকশিং মপাঙ্গল কনখৎহনখি। খজনা লৌবগী অকনবা থবকশিং পায়খৎখি। ললোন-ইতিক চাউখৎহনবা, সমুদ্রগী লম্বীশিং শীজিন্নবা, কলা অমসুং চৎনবী য়োকখৎপা য়াওনা হিরম খুদিংমক্ত ভারত য়াংনা চাউখৎখি।
মরুপশিং,
চোলা ইম্পায়ার অসি অনৌবা ভারত অমা শেমগৎনবা অরিবা লম্বী অমগুম্বনি। করিগুম্বা ঐখোয়না চাউখৎলবা লৈবাক অমা ওইবা পাম্লবদি, ঐখোয়না অপুনবগী শক্তম শাগৎপদা মীৎয়েং চঙগদবনি হায়না ঐখোয়দা তাক্লি। ঐখোয়না ঐখোয়গী নেভি, ঐখোয়গী ফোর্সশিং মপাঙ্গল কনখৎহনগদবনি। ঐখোয়না অনৌবা খুদোংচাবশিং খঙদোক্কদবনি। মসিগা লোয়ননা, ঐখোয়না ঐখোয়গী গুনশিং ঙাক-শেন্দুনা থমগদবনি। মসিগী ইথিল অসিগা লোয়ননা ঙসি লৈবাক অসি মাঙলোমদা চঙশিনবদা ঐ অপেনবা ফাওই।
মরুপশিং,
ঙসি ভারতনা লৈবাক অসিগী সেকুরিতি মরুওইনা লৌরে। ওপরেসন সিন্দুর মনুংদা, ভারতকী সেকুরিতি অমসুং মনিংতম্বদা শিংনরকপশিং কমদৌনা ভারতনা পাউখুম পীবগে হায়বা মালেমগী লৈবাকশিংনা উখ্রে। ভারতকী য়েক্নবশিংগী লোৎফম অমতা লৈতে হায়বা ওপরেসন সিন্দুরনা উৎলে। ঙসি ঐনা হেলিপেত্তগী কিলোমিতর ৩-৪ লাকপদা, ঐনা অচৌবা রোদ সো অমা উখি অমসুং মীওই খুদিংমক্না ওপরেসন সিন্দুর থাগৎপা ফোঙদোকখি। ওপরেসন সিন্দুরনা লৈবাক শীনবা থুংনা অনৌবা ৱাখলগী মিকপ থোকহল্লে, অনৌবা থাজবা অমা লৈহল্লে অমসুং মালেমগী লৈবাকশিংনা ভারতকী মপাঙ্গল খঙলে।
মরুপশিং,
রাজেন্দ্র চোলানা গঙ্গাই-কোন্দাচোলাপুরম শাখি হায়বা ঐখোয়না খঙলে, মহাক মসিগী মতোল অসি তাঞ্জাপুরগী ব্রিহদেশ্বর লাইশঙদগী হেন্না নেমহনখি। মহাক্কী মপানা শারম্বা লাইশঙ অদুনা হেন্না ৱাংনা লৈহনবা মহাক্না পামখি। মহাক মমিং য়াম্না চৎলবসু, রাজেন্দ্র চোলানা মীনুংশি উৎখি। ঙসিগী ভারতনা ৱাখল্লোন অসিদা মাঙলোমদা চঙশিল্লি। ঐখোয় লেপ্তনা মপাঙ্গল কনখৎলক্লি, অদুবু ঐখোয়গী ৱাখলদি মালেমগী লৈবাকশিং মচিন-মনাও ওইবা অমসুং মালেমগী য়াইফনবা থবক পায়খৎপনি।
মরুপশিং,
ঐখোয়গী হেরিতেচগী চাউথোকচবা অসি মাঙলোমদা পুখৎলক্নবগী ৱাখলগা লোয়ননা ঙসি ঐনা মফম অসিদা অতোপ্পা ৱারেপ অমা লৌরে। তুংদা ঐখোয়না তামিল নাদুদা রাজারাজা চোলা অমসুং মহাক্কী মচানুপা রাজেন্দ্র চোলা ১ গী অচৌবা মীতমশিং খনগনি। হায়রিবা মীতমশিং অসিনা ঐখোয়গী পুৱারি খঙবগী অনৌবা মতমগী য়ুম্বীশিং ওইগনি।
মরুপশিং,
ঙসি অসি দোক্তর এ.পি.জে অবদুল কলাম লৈখিদবগী কুমওনসু থোক্লে। বিকসিত ভারত অমা শেমগৎনবগীদমক, ঐখোয়না দোক্তর কলাম অমসুং চোলা নিংথৌশিংগুম্বা নহারোল লাখ কয়া দরকার ওইরি। অসিগুম্বা নহারোলশিংনা মীওই করোর ১৪০ গী মঙলানশিং মঙফাওনবা ঙমগনি। অমতা ওইনা ঐখোয়না এক ভারত শ্রেস্থা ভারতকী ৱারেপ অসি মাঙলোমদা পুখৎকদবনি। মসিগী ৱাখল অসিগা লোয়ননা, থৌরম অসিদা ঐনা ময়াম পুম্নমক অমুক হন্না থাগৎপা ফোঙদোকচরি। অদোম থাগৎচরি।
ঐগা লোয়ননা হায়মিন্নসি-
ভারত মাতা কি জয়!
ভারত মাতা কি জয়!
ভারত মাতা কি জয়!
খুরুমজরি!
