বনক্কম, ময়াম্বা পোঙ্গলগী য়াইফ পাউজেল পীজরি! ইনিয় পোঙ্গল নল্বাল্লতুক্কম!
শেংলবা পোঙ্গলগী নুমিৎ অসিদা তামিল নাদুগী য়ুমথোং খুদিংমক্তা পোঙ্গলগী ইচেল চেন্থরি। চপ মান্নবা মওংদা নুংঙাইবা, চাউখৎপগী ইচেল চেন্থবা অমসুং নখোয়গী পুন্সিদা অপেনবনা থনবা ওইরসনু হায়না য়াইফ পাউজেল পীজরি। ঙরাং খক্তমক লৈবাক অসিনা হরাও তয়াম্বগা লোয়ননা লোহরিগী কুহ্মৈ পাঙথোকখি। মীওই খরনা ঙরাং মকর সংস্ক্রান্তি-উত্তরায়ন পাঙথোকখি, খরা অমনা হয়েং পাঙথোক্নগনি। মাঘ বিহু অসিসু য়ৌরক্কদৌরে। ঐহাক্না কুহ্মৈ পুম্নমক অসিগীদমক ইরৈবাকচাশিংদা য়াইফ পাউজেল পীজরি।
মরুপশিং,
মফম অসিদা ঐনা মশক খংবা মীওই কয়া য়াওরি। মমাং চহিদা তামিল পুথান্দুগী থৌরমদা ময়ামগা উনখি। ঐহাকপু থৌরম অসিগী শরুক অমা ওইবা ফংনবগী খুদোংচাবা পীবীবগীদমক ঐহাক্না মুরুগনজীবু থাগৎপা ফোঙদোকচরি। ঐগী ইমুং মনুং অমসুং মরুপশিংগা লোয়ননা কুহ্মৈ অসি পাঙথোকপগা মান্নরি।
মরুপশিং,
সন্ত তিরুবল্লুবরনা হায়রমখি - বল্লথা বিল্লৈয়ুল্লুম তক্কারুম তাল্লবিলা চেব্বরুম সের্বদু নাদু হায়বদি অফবা লৌরোক, মহৈ হৈবা মীওই অমসুং পুকচেল শেংবা বিজিনেসমেন, অহুম অসিনা লৈবাক শেম্মি। তিরুবল্লুবরজীনা পোলিতিসিয়ন পল্লমদে, মসি ঐখোয়গী পুম্নমক্কীদমক পাউজেল অমনি। পোঙ্গল কুহ্মৈ মনুংদা ঈশ্বরগী খুয়াদা অতেকপা মহৈ-মরোং কৎপগী চৎনবী অমা লৈ। অপুনবা কুহ্মৈ অসিনা ঐখোয়গী চীঞ্জাক পীরিবশিং, ঐখোয়গী লৌমীশিংবু মরু ওইনা লৌরি। অমসুং নাকল অমরোমদা ভারতকী কুহ্মৈ খুদিংমক অসি খুঙ্গং, লৌমী, মহৈ-মরোংগা মরী লৈনৈ।
ঐনা নীংশিংলি মমাংদা ঐখোয়না তামিলগী নাৎকা মিল্লেৎ নত্ত্রগা শ্রী অন্নাগা করম্না মরী লৈনবগে খন্নখি। ঐহাক্না নুংঙাইবা পোকই মদুদি লৈবাক অমসুং মালেম অসিনা সুপরফুদকা মরী লৈন্ননা অনৌবা অওনবা অমা লাক্লি। ঐখোয়গী নহারোল কয়ানা মিল্লেৎ নত্ত্রগা শ্রী অন্নাদা অনৌবা স্তার্তঅপশিং হৌদোক্লি অমসুং স্তার্তঅপশিং অসি ঙসি য়াম্না মমিং লৈরক্লি। ঐখোয়গী লৈবাক্কী অপীকপা লৌমী করোর অহুম হেনবনা শ্রী অন্না পুথোকপদা য়াওরি। করিগুম্বা শ্রী অন্না প্রমোৎ তৌরবদি মসিনা লৌমী করোর অহুমদা কান্নবা হকথেংননা পীরগনি।
মরুপশিং,
পোঙ্গলগী থৌরমদা তামিল নুপীশিংনা মখোয়গী য়ুমশিংগী মমাংদা কোলমশিং য়েক্লি। অহানবা ওইনা মহাক্না য়াম শীজিন্নদুনা লৈবাক্তা দোৎ কয়া য়েক্কনি। অমসুং দোৎ পুম্নমক অসি য়েক্লবা মতুংদা অমমমগী তোপ-তোপ্পা মরু ওইবা লৈ। মমি অসিমক পুক্নীং শুমহৎনীংঙাই লৈ। অদুবু কোলমগী তশেংবা শক্তম অসি দোৎশিং অসি পুনশিল্লবা মতমদা হেন্না মগুন লৈ অমসুং মসি অচৌবা আর্তৱার্ক অমা শেম্নবা মচুনা থলহনখি।
ঐখোয়গী লৈবাক অমসুং মাগী দাইভর্সিতী অসি কোলমগা পাঙ্খক ওই। লৈবাক্কী কাচিন কোয়া খুদিংমক অমগা অমগা মরী লৈনৈ, ঐখোয়গী শক্তি অসি তোঙান-তোঙানবা মওংদা উৎলি। পোঙ্গলগী কুহ্মৈ অসি ৱান ইন্দিয়া, গ্রেত ইন্দিয়াগী জাতিগী ৱাখল্লোন মমি তারিবা অদুগুম্বা কুহ্মৈ অমসু ওইরি। মমাংদা কাশী-তামিল সঙ্গামম অমসুং সৌরস্ত্রা তামিল সঙ্গামমগুম্বা য়াম্না মরু ওইবা চৎনবীশিং হৌখি অমসুং মসিদসু ৱাখল্লোন অসি ময়েক শেংনা উরি। মশিং য়াম্লবা ঐখোয়গী তামিল ইচিল-ইনাওশিংনা থৌরমশিং অসিদা থৱায় য়াওনা শরুক য়ারি।
মরুপশিং,
অপুনবগী মসিগী ৱাখল্লোন অসিনা 2047 ফাওবদা চাউখৎপা ভারত অমা শেমগৎনবা খ্বাইদগী চাউবা শক্তিনি অমসুং খ্বাইদগী চাউবা কেপিতেলনি। নখোয়না নীংশিংলমগনি লাল কিলাদগী ঐহাক্না ফোঙদোকখিবা পঞ্চ প্রানগী মরু ওইবা মচাক অসি লৈবাক্কী অপুনবা শক্তমদা শক্তি পীবনি, লৈবাক্কী অপুনবা শক্তমদা মপাঙ্গল হাপ্পনি। পোঙ্গলগী শেংলবা কুহ্মৈ অসিদা ঐহাক্না লৈবাক্কী অপুনবা শক্তম মপাঙ্গল কনখৎহন্নবা ঐখোয়গী ফিরেপ নৌহৌনা লৌরসি।
মরুপশিং,
ঙসি আর্তিস্তশিং, মশক নাইবা আর্তিস্তশিং অমসুং দিস্তিঙ্গুইস আর্তিস্তশিংনা মফম অসিদা পরফোর্ম তৌনবা শেম শাদুনা লৈরি, নখোয় পুম্নমক্না ঙাইরি, ঐসু ঙাইরি। আর্তিস্ত পুম্নমক অসিনা দিল্লীদা তামিল নাদুবু হিংগৎহল্লি। ঐখোয়না মীকুপ খুরা তামিলদা লৈরবা ওইনা ফাওনবা খুদোংচাবা অমা ফংগনি, মসি য়াম্না লাইবক ফবনি। ঐহাক্না আর্তিস্তশিংগীদমক য়াইফ মঙ্গোল পীজরি। ঐহাক্না অমুক হন্না মুর্গনজীবু থাগৎচরি!
মুনক্কম!
