ভারত ইমানা – য়াইফরে!
ভারত ইমানা – য়াইফরে!
রাজস্থানগী মুখ্য মন্ত্রী, শ্রী ভজন লাল জী শর্ম, কেন্দ্রগী মন্ত্রী মন্দলগী ঐগী মরূপ রাজনাথ জী, গজেন্দ্র সেখাৱত জী অমসুং কাইলাস চৌধরী জী, PSAদগী প্রোফেসর অজয় সুদ, চীফ ওফ দিফেন্স স্তাফ জেনেরেল অনিল চৌহান, এয়র চীফ মার্সেল ভি.আর. চৌধরী, নেভী চীফ এদমিরেল হরি কুমার, আর্মী চীফ জেনেরেল মনোজ পান্দে, মকোক থোংবা ওফিসরশিং, লান্মী শঙলুপ অহুম্মক্কী থৌনা ফরবা লান্মীশিং… অমসুং মফমসিদা, পোখ্রন্দা তিনবিরিবা ঐগী নুংশিজরবা ইচিল ইনাও অমসুং ইচে ইচলশিং!
ঙসি ঐখোয়না মফমসিদা উরিবা, ঐখোয়গী লান্মী শঙলুপ অহুমগী মথৌনা শিংথানিংঙাইনি। অতিয়াদা ঙংলিবা… কংফালদা থৌনা ফরিবা… মায়কৈ পুম্বদা নিল্লিবা মায় পাকপগী ইৱায় ইনিল… মসি অনৌবা ভারতকী খোল্লাউনি। ঙসি ঐখোয়গী পোখ্রন্দা অমুক্কা হন্না ভারতকী মরোমদোম লেপচবা, মশাদা থাজবা থম্বা, অমসুং মশাবু ইকায়খুম্নবগী খোঙফম উবা ফংলি। মফমসি ভারতকী ন্যুক্লিয়ন পৱার মশক উৎখিবা মফমদুনি, অমসুং মফমসিদনি ইন্দিজিনাইজেসনগী খুত্থাঙদা মপাঙ্গল হাপ্পা উখিবা। ঙসিই, লৈবাক পুম্বনা রাজস্থানগী মতিক মথৌনা লৈরবা লৈমায়দগী ভারতকী মপাঙ্গলগী কুমহৈ উবা ফংলি, অদুগা মসিগী খোন্থাঙনা ভারতখক্তদা নিনবতা নত্তনা, মখোয়না মালেম পুম্বদা নিল্লি।
মরূপশিং,
ঙরাংখক্তদা, ভারতনা লোং-রেঞ্জ স্ত্রাইক তৌবা ঙম্বা, MIRV মোদর্ন তেক্নোলোজী য়াওরবা অগ্নি-৫ মিসাইল মায় পাক্না চাংয়েং তৌখ্রে। মালেমগী লৈবাক খরখক্তা অসিগুম্বা খুমাঙ চাওশিল্লবা তেক্নোলোজী, অসিগুম্বা মোদর্ন কেপেবিলিতী লৈ। মসি দিফেন্স সেক্তরদা ‘আত্মনিরভর ভারত’কী মায়কৈদা থাংজিল্লিবা অতোপ্পা মশক থোকপা খোঙথাঙ অমনি।
মরূপশিং,
‘ভিক্সিত ভারত’ (চাওখৎপা ভারত) অমগী মঙলান অসি ‘আত্মনিরভর ভারত’ (মরোমদোম লেপচবা ভারত) য়াওদনা ওইথোকপা ঙম্লোই। ভারতনা মাঙদা চঙশিন্নবগীদমক, ঐখোয়না অতোপ্পদা তাংবা হন্থহনবা তাই। মরম অদুনা, ঙসি ভারতনা অচাথাউদগী হৌরগা মতমগা চুনরবা ফাইতর জেত ফাওবদা, হীরম খুদিংদা মরোমদোম লেপচবা ঙম্নবা হোৎনবদা মীৎয়েঙ থম্লি। ঙসিগী থৌরম অসি ফিরেপ অসিগী শরুক অমনি। ঙসি, মেক ইন ইন্দিয়াগী মায় পাকপা মীৎমাঙদা উরি। অদোম্না তাবা ফংলিবা ঐখোয়গী কেনন, তেঙ্ক, কোম্বেত এয়রক্রাফ্ত, হেলিকোপ্তর, মিসাইল সিস্তেমগী নিল্লিবা খোঞ্জেল অসিবুনি ‘ভারত শক্তি’ (ভারতকী মতিক) হায়রিবসি। খুৎশু খুৎলায় অমসুং মরুদগী হৌরগা ঈ-পাউ ফাওননবগী খুৎলায়শিং, সাইবর, অমসুং স্পেস ফাওবদা, ঐখোয়য়না মেদ ইন ইন্দিয়া মশা পান্দুনা পাইবা উরি – মসিনি ‘ভারত শক্তি’। ঐখোয়গী পাইলোতশিংনা ভারত্তা মপুং ফানা শাবা তেজাস ফাইতর জেতশিং, এদভান্স লাইত হেলিকোপ্তরশিং, লাইত কোম্বেত হেলিকোপ্তরশিং পাইরি – মসিনি ‘ভারত শক্তি’। ঐখোয়গী সেলরশিংনা ভারত্তা শাবা ফ্রিগেৎ, দেস্ত্রোয়র, অমসুং এয়রক্রাফ্ত কেরিয়রশিংদা ঈথক ইপোম লান্না হোন্দুনা চৎলি – মসিনি ‘ভারত শক্তি’। আর্মীদা লৈরিবা ঐখোয়গী লান্মীশিংনা ভারত্তা শাবা মতমগা চুনরবা অর্জুন তেঙ্ক অমসুং আর্তিলরী শীজিন্নদুনা লৈবাকসিগী ঙমখৈ ঙাক্লি - মসিনি ‘ভারত শক্তি’
মরূপশিং,
হৌখিবা চহি ১০সিদা, ঐখোয়না লৈবাকসিবু দিফেন্স সেক্তরদা মরোমদোম লেপচবা ঙমহন্নবা মশক থোকপা খোঙথাংশিং অমগী মথঙদা অমা পায়খৎখ্রে। ঐখোয়না পোলিসী থাক্তা ফীভম ফগৎহল্লে, রিফোর্মশিং চৎনহল্লে, লনাই সেক্তরশিং য়াওহল্লে, অমসুং MSMEশিং অমসুং স্তার্ত-অপশিংবু পুক্নিং থৌগৎলিই। ঙসিদি, দিফেন্স কোরিদোরশিং উত্তর প্রদেশ অমসুং তামিল নাদুদা শেমগৎলি। কোরিদোরশিং অসিদা হৌজিক ফাওবদা লুপা করোর ৭,০০০ হেন্না থাদখ্রে। ঙসি, এসিয়াগী খ্বায়দগী চাউবা হেলিকোপ্তর মেনুফেকচরিং ফেক্তরী ভারত্তা মথৌ তৌবা হৌরে। অমদি ঙসি, ঐনা লান্মী শঙলুপ অহুম্মক্কী মফমদা নুংঙাইবা ফোঙদোকচরি। ঐখোয়গী লান্মী শঙলুপশিংনা খুৎশু খুৎলায় চা কয়াগী লিস্ত অমা শেমদুনা মখোয়দু মখা তানা মপান লৈবাকশিংদগী পুশিল্লক্লরোই হায়না ফিরেপ লৌখ্রে। ঐখোয়গী লান্মীশিংনা হায়রিবা খুৎশু খুৎলায়শিং অসিগীদমক ইন্দিয়ন ইকোসিস্তেমদা ঙাক্লৌ পীরি। ঐখোয়গী লান্মীশিংগীদমক ভারতকী কম্পেনীশিংদগী লান্মীগী খুৎলায় চা কয়া লৌরি হায়য়না ঐনা অপেনবগা লোয়ননা লাউথোকচরি। হৌখিবা চহি ১০সিদা, লুপা করোর লাখ ৬কী ওইগদবা দিফেন্দকী খুৎলায়শিং লমদমসিগী কম্পেনীশিংদগী লৈখ্রে। হায়রিবা চহি ১০সিদা, লৈবাকসিগী দিফেন্স প্রদক্সন শরুক অনি হেন্না হেনগত্তুনা, লুপা করোর লাখ ১ হেল্লে। অদুগা ঐখোয়গী নহাশিংনসু মরুওইবা থৌদাং অমা লৌরি। হৌখিবা চহি ১০০সিদা, অনৌবা দিফেন্স স্তার্ত-অপ ১৫০ হেন্না লিংখৎখ্রে। ঐখোয়গী লান্মীশিংনা হায়রিবা স্তার্ত-অপশিং অসিদগী লুপা করোর ১,৮০০লোমগী পোৎলমশিং ওর্দর তৌনবা ফিরেপ লৌরে।
মরূপশিং,
দিফেন্সকী লমদা মরোমদোম লেপচবা ঙম্লক্লিবা ভারতনা ঐখোয়গী লান্মীশিংদা থাজবসু পীরি। লানগী মতমদা, ঐখোয়গী লান্মীশিংনা মখোয় মশাগী ওইবা খুৎশু খুৎলায়শিং শীজিন্নরি খঙবদা, মখোয়দা কৈদৌঙৈদা অৱাৎপা লৈররোই, মখোয়গী ইনর্জী শরুক কয়া হেনগৎলগনি। হৌখিবা চহি ১০সিদা, ভারতনা মশাগী কোম্বেত এয়রক্রাফ্ত পুথোক্লে। ভারতনা মশাগী এয়রক্রাফ্ত কেরিয়র পুথোক্লে। 'C-295' ত্রান্সপোর্ত এয়রক্রাফ্ত ভারত্তা শারি। মতমগা চুনবা ইঞ্জিনসু ভারত্তা পুথোক্লগনি। অদুগা অদোমসু খঙই, নুমিৎ খরগী মমাঙদা, মন্ত্রী মন্দলনা অচৌবা ৱারেপ অমসু লৌখি। হৌজিক্তি, ৫শুবা জেনেরেসনগী ফাইতর জেতশিংসু ভারত্তা দিজাইন তৌরগনি, শেমগৎলগনি, অমসুং পুথোক্লগনি। তুংদা ভারতকী লান্মী অমসুং দিফেন্স সেক্তর কয়া য়াম্না চাউগনি, অমসুং থবক পীবা অমসুং মশানা থবক পীজবগী লমদা নহাশিংগী খুদোংচাবা কয়া শেমগদৌর হায়বা অদোম্না ৱাখলনা লাম্বা ফংবিরমগনি। মতম অমদা ভারত মালেমগী খ্বায়দগী চাউবা দিফেন্স ইম্পোর্তর ওইরম্মি, ঙসিদি, ভারতনা দিফেন্স সেক্তরগী অচৌবা এক্সপোর্তর অমা ওইরক্লি। ভারতকী দিফেন্স এক্সপোর্ত ২০১৪গা চাংদম্নবদা শরুক নিপান হেন্না হেনগৎলে।
মরূপশিং,
নীংতম্লবা মতুংদা দেকেদ কয়া লৈবাকসিদা পাল্লম্লিবশিংনা লৈবাক্কী সিক্যুরিতীবু লুম্না লৌরমদবা লাইবক থিবনি। লৈরমখিবা ফীভমদুদি নীংতম্লবা মতুংদা অহানবা অচৌবা স্কাম অসি লান্মীগী পোৎ লৈবদা থোকখি। মখোয়না থৌওইনা ভারতপু দিফেন্সকী মথৌ তাবশিং মপান লৈবাকশিংদা তাংদুনা থম্লম্মি। অদোম্না ২০১৪গী মমাঙদা লৈরম্বা ফীভম নীংশিংবা ঙমবরা? মতমদুদা দিফেন্সী দীলশিংদা স্কামগী মরমদা ৱা খন্নরম্মি। দেকেদ কয়া পন্থদুনা লৈরবা দিফেন্স দীলশিংগী মরমদা ৱা খন্নরম্মি। আর্মীনা নোংমৈ মরু ৱাৎকদ্রা হায়না মিপাইরম্মি। মখোয়না ঐখোয়গী ওর্দনান্স ফেক্তরীবু মাঙহল্লম্মি। ঐখোয়না হায়রিবা ওর্দনান্স ফেক্তরীশিং হিঙ্গৎহন্দুনা মখোয়বু অচৌবা কম্পেনী তরেত্তা ওন্থোকখি। মখোয়না HAL বু মাঙহন তাকহনবগী ফীভমদা থম্লমখি। ঐখোয়না HAL বু শেন্দোং লৈবা কম্পেনী অমা ওন্থোকখি। মখোয়দা কার্গিল লানগী মতুংদা ফাওবা CDS (চীফ ওফ দিফেন্স স্তাফ)কী ফম লৈহন্নবা মথৌনা উৎলমদে। ঐখোয়না মদু পায়খৎখি। মখোয়না দেকেত কয়া ঐখোয়গী মথৌনা ফরবা লান্মীশিংগী লৈবাক্কী ওইবা নীংশিং খুদম অমত্তা ফাওবা শাবিরমদে। থৌদাং অসিসু ঐখোয়গী লৈঙাক্না য়াখি। মমাঙগী লৈঙাক্না ঐখোয়গী ঙমখৈদা মতমগা চুনবা ইনফ্রাস্ত্রকচর শাবা ফাওবা কিরম্মি। অদুবু ঙসিদি য়েংবিয়ু, মতমগা চুনবা লম্বী অমসুং মতমগা চুনবা তন্নেলশিং ঐখোয়গী ঙমখৈগী মফমশিংদা শাগৎলি।
মরূপশিং,
মোদীগী ৱাশক হায়রিবসি করিনো? ঐখোয়গী লান্মীগী ইমুংশিংনসসু মশি উবা ফংখ্রে। দেকেদ মরি চুপ্না, লান্মীশিংগী ইমুংশিংদা OROP – ৱন রেঙ্ক ৱন পেন্সনগী মতাঙদা মীনমদুনা থম্লম্মি নীংশিংবিয়ু। অদুবু মোদীনা OROP চৎনহন্নবা ৱাশক অমা পীখি অমসুং ৱাশক অদু ঙাক্লে। হৌজিক ঐ রাজস্থান্দা লৈরি, রাজস্থানগী হান্নগী লান্মী ১,৭৫,০০০গী ময়ানা OROPগী কান্নবা ফংলে হায়না ঐনা হায়বা ঙম্মি। মখোয়না OROPগী মখাদা লুপা করোর ৫,০০০ হেন্না ফংখ্রে।
মরূপশিং,
আর্মীগী মপাঙ্গল অসি লৈবাকসিগী শেন্মিৎলোন কনখৎলবা মতমদা হেনগৎলক্কদৌরিবনি। হৌখিবা চহিই ১০সিদা হনবা নাইদনা অমসুং পুকচেল শেংনা হোৎনদুনা, ঐখোয়না মালেমগী মঙাশুবা খ্বায়দগী চাউবা শেন্মিৎলোন ওইরে, অদুগা ঐখোয়গী লান্মীগী মতিংসু হেনগৎলক্লে। লাক্কদৌরিবা চহিশিংদা ঐখোয়না মালেমগী অহুমশুবা খ্বায়দগী চাউবা শেন্মিৎলোন ওইরক্লবা মতমদা, ভারতকী লান্মীগী মতিংসসু অনৌবা থাক অমদা লৈরগনি। অদুগা রাজস্থান্না ভারতপু অহুমশুবা খ্বায়দগী চাউবা শেন্মিৎলোন ওইহনবদা মরুওইবা থৌদাং অমা লৌগনি। ‘ভিক্সিত রাজস্থান’না ‘ভিক্সিত সেনা’ (চাওখৎলবা লান্মী)দসু চপ চানা মপাঙ্গল হাপকনি। থাজবা অসি থমজবগা লোয়ননা, ঐনা অমুক্কা হন্না ময়াম পুম্নমক্কী মফমদা অমসুং লান্মী শঙলুপ অহুম্মক্না হোৎনরিবশিংগী মফমদা ‘ভারত শক্তি’ মায় পাক্না পাঙথোকপগীদমক থম্মোয়নুংদগী নুংঙাইবা ফোঙদোকচরি। ঐগা লোয়ননা লাউবিয়ু –
ভারত ইমানা – য়াইফরে!
ভারত ইমানা – য়াইফরে!
ভারত ইমানা – য়াইফরে!
ময়ামবু হন্না হন্না থাগৎচরি।
