ভারত মাতাগী জয় !
ভারত মাতাগী জয় !
ভারত মাতাগী জয় !
তামিল নাদুগী রাজ্যপাল আর.এন রবি, চীফ মিনিস্তর এম.কে স্তেলিন, কেন্দ্রগী মন্ত্রীমন্দলগী ঐগী মরুপ জয়তিরাদিত্যা সিন্দিয়া, ঐগী মরুপ লমদম অসিগী মুরুগঞ্জি, তামিল নাদু সরকারগী মিনিস্তরশিং, এম.পিশিং অমসুং এম.এল.এশিং অমসুং তামিল নাদুগী ঐগী ইমুং-মনুংগী মীওইশিং !
বনাক্কম !
য়েনদ তামিল কুদুম্বমে, মুদালিল উঙ্গল অনাই বরাক্কম ২০২৪ পুত্তান্দ নাল বাল্থ-কাকাল
শান্তি লৈবা অমসুং নুংঙাই-য়াইফবা চহি ২০২৪গীদমক ঐনা মীয়াম পুম্নমক য়াইফ-পাউজেল পীজরি। ২০২৪গী ঐগী অহানবা মীয়ামগী থৌরম তামিল নাদুদা পাংথোকপা অসি লাইবক ফবনি। ঙসিগী লুপা করোর ২০ হেনবগী চাউখৎ-থৌরাংগী প্রোজেকশিং অসিনা তামিল নাদুগী চাউখৎপা মপাঙ্গল কনখৎহনগনি। লম্বী, রেলৱে, হিথাংফমশিং, এয়রপোর্তশিং, ইনর্জি অমসুং পেত্রোলিয়ম পাইপলাইনগা মরী লৈনবা প্রোজেকশিং অসিগী ঐনা অদোমগী মফমদা নুংঙাইবা ফোঙদোকচরি। হায়রিবা প্রোজেকশিং অসিনা চৎথোক-চৎশিন নুংঙাইহনগনি অমসুং থবক লিশিং কয়া ফংনবগী খুদোংচাবশিংশু পীরগনি।
মরুপশিং,
২০২৩গী অরোইবা চয়োলশিং তামিল নাদুগী মীয়ামগী খুদোংথিবা ওইখি। অকনবা নোং চুবদগী ঐখোয়গী নাগরিক কয়া লৈখিদ্রে। অৱাবা তারবা মতম অসিদা তামিল নাদুগী মীয়ামগীদমক কেন্দ্র সরকারনা লেপ্লি। রাজ্য সরকারদা ঐখোয়না পাংবা য়াবা মতেং পাংলি। নুমিৎ খরনিগী মমাঙদা, ঐখোয়গী তিরু বিজয়াকন্থ জি লৈখিদ্রে। মহাক সেনিমাগী তাইবংগী কেপ্তেন অমা ওইবতা নত্তনা রাজনিতিগী কেপ্তেন অমসুনি। রাজনিতিৱালা অমা ওইনা, মহাক্না মতম পুম্নমক্তা লৈবাক্কী থবকশিংনা হেন্না লুম্না লৌখি। ঐনা মহাক্কী মফমদা ইকায়খুম্নবা উৎচরি। মহাক্কী ইমুং-মনুং অমসুং মহাকপু নুংশিজবশিংগী মফমদা ঐনা ইকায়খুম্নবা উৎচরি।
মরুপশিং,
ঙসি ঐনা মফম অসিদা লাকপদা, তামিল নাদুগী অতোপ্পা মপারি দোক্তর এম.এস শ্বামিনাথান জিশু ঐনা নিংশিংলি। ঐখোয়গী লৈবাক্কী চীঞ্জাক ৱাৎহন্দনবা হোৎনবদা মহাক্না মরুওইবা থৌদাং অমা লৌখি। হৌখিবা চহিদা ঐখোয়দগী নাক্তগী মহাক চৎখ্রে।
য়েনদ তামিল কুদুম্বমে,
অজাদি কা অমৃত কাল হায়বদি মথং চহি ২৫দা ভারত চাউখৎলবা লৈবাক অমা ওইহনগনি। ঐনা চাউখৎলবা ভারত অমগী ৱারি পল্লকপা মতমদা, মসিদা শেন্মিৎলোন অমসুং নাৎকী ওইবা ৱাফমশিং য়াওরি। মসিদা তামিল নাদুগী অখন্নবা থৌদাং অমা ঐনা উরি। তামিল নাদু অসি ভারতকী ইনাকখুল্লবা নাৎকী পক্কৈ-লনগৈগী মমি অমনি। তামিল নাদুদা তামিল লোল অমসুং লৌশিংগী অরিবা পুক্কৈ অমা লৈরি। সান্ত তিরুবাল্লুবারদগী হৌরগা সুব্রামনয়া ভারতী ফাওবগী সাধু কয়ানা অঙকপা সাহিত্য কয়া পুথোক্লমখি। সি.বি রমনদগী হৌরগা হৌজিক ফাওবদা, লৈহাও অসিদগী অঙকপা সাইন্তিস্তশিং কয়া অমসুং তেক্নোলোজিগী মীওই কয়া পোকখ্রে। ঐনা তামিল নাদুদা লাকপা মতম খুদিংদা, ঐ অনৌবা থৌননা পীক থনখি।
য়েনদ তামিল কুদুম্বমে,
তিরুচিরাপ্পলী সহরদা, মসিগী ইনাকখুল্লবা পুৱারি খোঙথাং খুদিংদা উবা ফংলি। ঐখোয়না মফম অসিদা তোঙান-তোঙানবা শাগৈশিং হায়বদি পাল্লাব, চোলা, পন্দ্যা অমসুং নায়ক্কী অফবা লৈঙাক-সাসনগী নমুনা উবা ফংলে। ঐগী তামিল মরুপ কয়া লৈরি অমসুং ঐনা মখোয়গা য়াম্না নক্না লোয়নখি অমসুং ঐনা মখোয়দগী তামিল কলচরগী মরমদা তমখি। ঐনা মালেমদা চৎলুবা মফম খুদিংদা, তামিল নাদুগী মরমদা খন্নদনা ঐ লৈবা ঙমদে।
মরুপশিং,
ঐগী থবক্তি তামিল নাদুগী ফংলকপা নাৎকী ইথিল অসি মখা তানা লৈবাক্কী চাউখৎপা অমসুং হেরিতেচদা শন্দোকপনি। দিল্লিদা অনৌবা সংসদকী শঙলেন্দা শেংলবা সেঙ্গোল খিনবা অদোম উরে। মসি তামিল নাদুনা লৈরিবা অফবা লৈঙাক-সাসনগী নমুনা অদু লৈবাক শীনবা থুংনা ইথিল পীনবা হোৎনবা অমনি। কাসি-তামিল শঙ্গমম, সৌরাস্ত্রা-তামিল শঙ্গমমগুম্বা কেম্পেনশিং অসিসু মসিগী পান্দমনি। হায়রিবা কেম্পেনশিং অসি হেক হৌদোকপদগী, লৈবাক শীনবা থুংনা তামিল লোল অমসুং তামিল কলচর পাম্নবা হেনগৎলক্লে।
য়েনদ তামিল কুদুম্বমে,
হৌখিবা চহি ১০দা ভারতনা অনৌবা ইনফ্রাস্ত্রকচরদা অঙকপা ফংনা শেন থাদরে। মসি লম্বীশিং, রেলশিং, হিথাংফমশিং, এয়রপোর্তশিং, লায়রবশিং য়ুমশিং নত্ত্রগা হোস্পিতালশিং ওইবা য়াই, ঙসি ভারতনা মমাঙদা অমুক্তা ওইখিদ্রিবা মওং অমদা ফিজিকেল অমসুং সোসিএল ইনফ্রাস্ত্রকচরদা শেন থাদরে। ঙসি ভারত মালেমগী মকোক থোংবা ইকোনোমি মঙাগী মনুং চল্লে। ঙসি ভারত মালেম শীনবা থুংবগী অনৌবা থাজবা অমা ওইরক্লে। অচৌবা ইনভেস্তরশিংনা ভারত্তা শেন থাদরে। মসিনা হকথেংননা তামিল নাদুদা কান্নরি, তামিল নাদুগী মীয়ামশু কান্নরে। তামিল নাদু অসি মেক ইন ইন্দিয়াগী অচৌবা ব্রান্দ এম্বেসেদর অমা ওইরক্লে।
য়েনদ তামিল কুদুম্বমে,
ঐখোয়গী সরকারনা লৈবাক অসি চাউখৎনবা লাইৱা শীজিন্নরি। হৌখিবা চহি অমদা কেন্দ্র সরকারগী তোঙান-তোঙানবা মিনিস্তর ৪০ হেন্না তামিল নাদুদা ৪০০ রক হেন্না চৎখ্রে। তামিল নাদুনা য়াংনা চাউখৎপা মতমদা, ভারতশু য়াংনা চাউখৎকনি। লম্বী-থোং অসিশু চাউখৎনবগী অচৌবা পাম্বৈ অমনি। মসিনা ললোন-ইতিক হেনগৎহল্লি অমসুং মীয়াম চৎথোক-চৎশিন নুংঙাইহল্লি। ঙসি ঐখোয়না মসিগী চাউখৎপগী থৌনা অসি তিরুচিরাপ্পলীদা উবা ফংলে। ত্রিচি ইন্তরনেসনেল এয়রপোর্তকী অনৌবা তর্মিনেল অসিনা মসিগী কেপাসিতি শরুক অহুম হেনগৎহনগনি। মসিনা ত্রিচিগা নোংপোক এসিয়া, মিদল ইস্ত অমসুং লৈবাক অসিগী অমসুং মালেমগী মফম অতৈগা শম্নবা হেনগৎহনগনি। মসিনা ত্রিচি অমসুং মসিগী অকোয়বা মফমশিংদা শেন থাদবা অমসুং অনৌবা ললোন-ইতিক্কী খুদোংচাবশিং শেমগৎকনি। মফম অসিদা লাইরিক-লাইশু, হকশেল অমসুং তুরিজম সেক্তরশিং মপাঙ্গল কনখৎহনগনি। এয়রপোর্তকী কেপাসিতিশু হেনগৎলে, মসিগী ইলেবেতেদ রোদনা নেসনেল হায়ৱেগা শম্নহল্লে। ত্রিচি এয়রপোর্তনা মফম অসিগী কলা, নাৎ অমসুং তামিলগী চৎনবী মালেম শীনবা থুংনা মশক তাক্কদবা অসিদা ঐ হরাওই।
য়েনদ তামিল কুদুম্বমে,
ঙসি হৌদোক্লিবা অনৌবা প্রোজেক মঙা অসিনা তামিল নাদুদা রেলগী খুদোংচাবা হেনগৎহনগনি। মসিনা চৎথোক-চৎশিন অমসুং পোৎ-চৈ পুথোক-পুশিন খুদোংচাহনবা খক নত্তনা, লমদম অসিগী উদোগ অমসুং মৈ পুথোকপদা চাউখৎহনগনি। ঙসি হৌদোক্লিবা লম্বীগী প্রোজেকশিং অসিনা মরুওইবা মফমশিং হায়বদি শ্রীরঙ্গম, চিদম্বরম, মদুরাই, রামেশ্বরম, ভেল্লোরগুম্বা শম্নহল্লগনি। হায়রিবা মফমশিং অসি ঐখোয়গী লাইনিং, অধ্যতিক অমসুং তুরিজমগী মরুওইবা মফমশিংনি। মসিনা মীচম মীয়াম অমসুং ভক্তশিংদা খুদোংচাবা কয়া পীরগনি।
য়েনদ তামিল কুদুম্বমে,
হৌখিবা চহি ১০দা, হিথাংফম্না লমজিংদুনা চাউখৎপা পুরক্নবা কেন্দ্রনা মীৎয়েং চঙলে। কোস্তেল ইনফ্রাস্ত্রকচর চাউখৎনবা ঐখোয়না থবক কয়া পাংথোক্লে অমসুং ঙামীশিংগী পুন্সিদা অহোংবা পুরক্লে। অহানবা ওইনা ঐখোয়না তোখায়বা মিনিস্ত্রি শেম্লে অমসুং ফিসরিজগী তোখায়বা বজেত লৈরে। অহানবা ওইনা ঙামীশিংদা কিষান ক্রেদিদ কার্দশিং পীরে। সমুদ্রগী অরুবা ঈশিংদা ঙা ফানবা মতমগা চুনবা হিশিং পীনবা ঐখোয়না ঙামীশিংদা মতেং পাংলে। ঙাগী ললোন-ইতিক শরুক য়ারিবশিংদা পি.এম মতস্যা সম্পদা য়োজননা অচৌবা কান্নবা পীরে।
য়েনদ তামিল কুদুম্বমে,
ঙসি তামিল নাদু য়াওনা লৈবাক্কী তোঙান-তোঙানবা হিথাংফমশিং সাগরমালা স্কিমগী অফবা লম্বীশিংনা শম্নহল্লে। কেন্দ্র সরকারনা কন্না হোৎনবদগী হিথাংফমশিংগী কেপাসিতি হেনগৎহল্লে অমসুং ঙসি ভারত্তা জহাজশিং থুংলবগী চাং ৱাংখৎলে। ঙসি লৈবাক অসিদা কামরাজার হিথাংফম অসি খ্বাইদগী য়াংনা চাউখৎলক্লিবা হিথাংফমশিংগী মনুংদা অমা ওইরে। ঐখোয়না হিথাংফম অসিগী কেপাসিতি শরুক অনিদা হেনগৎহল্লে। জেনেরেল কার্গো বার্থ-২ অমসুং কেপিতেল দ্রেদজিং ফেজ-৫ হাংদোকপা অসিনা তামিল নাদুদা এক্সপোর্ত-ইম্পোর্তদা অনৌবা ইনোৎ অমা হাপ্লগনি। মসিনা ওতোমোবাইল সেক্তরদা তামিল নাদুগী তৌবা ঙম্বা হেনগৎহনগনি। নিউক্লিয়ার রিয়েক্তরশিং অমসুং গ্যাস পাইপলাইনশিংনা তামিল নাদুদা উদোগ অমসুং থবক ফংবা চাউখৎহনগনি। য়েনদ তামিল কুদুম্বমে, হৌখিবা চহি ১০দা কেন্দ্র সরকারনা তামিল নাদুদা লুপা করোর লাখ ১২০ রোম থাদখ্রে। ২০১৪গী মমাং চহি ১০দা, কেন্দ্র সরকারনা তামিল নাদুদা লুপা করোর লাখ ৩০ রোম থাদখি। মমাঙগা চাংদম্নবদা, তামিল নাদুদা নেসনেল হায়ৱে শেমগৎনবা ঐখোয়গী সরকারনা হান্নদগী শরুক অহুম হেন্না চাদিং তৌখি। তামিল নাদুগী রেলৱে মতমগা চুনবা মওংদা শেমগৎনবা ঐখোয়গী সরকারনা হান্নদগী শরুক ২.৫ হেন্না চাদিং তৌখি। তামিল নাদুগী লায়রবা ইমুং লাখ কয়া লেম্না চেঙ, লেম্না লায়য়েংবা কেন্দ্র সরকারদগী ফংলে। ঐখোয়গী সরকারনা মীয়ামদা পাক্কাগী য়ুম, তোইলেত, তোতি ঈশিং, গ্যাস য়াওনা খুদোংচাবা কয়া ফংহল্লে।
য়েনদ তামিল কুদুম্বমে,
চাউখৎলবা ভারত অমা শেমগৎনবা মীওই খুদিংমক্কী হোৎনবা দরকার ওই। তামিল নাদুগী মীয়াম, মফম অসিগী নহারোলশিংগী শক্তিদা ঐনা চিংনবা লৈতনা থাজবা থম্লি। তামিল নাদুগী নহারোলশিংগী মরক্তা অনৌবা ৱাখল্লোল, অনৌবা থৌনা লাকপা ঐনা উরে। মসিগী থৌনা অসি চাউখৎলবা ভারত অমগী শক্তি ওইগনি। চাউখৎ-থৌরাংগী থবকশিং অসিগীদমক ঐনা ময়াম পুম্নমক অমুক হন্না থাগৎচরি।
ভারত মাতানা য়াইফরে!
ভারত মাতানা য়াইফরে!
ভারত মাতানা য়াইফরে!
বনাক্কম !
