ভারত ইমানা য়াইফরে।
ভারত ইমানা য়াইফরে।
ভারত ইমানা য়াইফরে।
উত্তর প্রদেশকী রাজ্যপাল আনন্দী বেন পতেল, উত্তর প্রদেশকী মীয়াম্না য়াবা অমসুং থৱাই য়াওবা মুখ্য মন্ত্রী, ভাই য়োগী অদিত্যনাথজী, কর্নাতকাগী মুখ্য মন্ত্রী, সিদ্দরামৈয়াজী, কেন্দ্র মন্ত্রী মন্দলদা লৈরিবা ঐহাক্কী মরুপ হর্দীপ সিংহ পুরীজী, বি.কে. সিংহজী, কৌশল কিশোরজী, অতোপ্পা সেনিয়র ওইরবা শক্নাইরবা মীয়াম অমসুং মশিং য়াম্না লেংবীরক্লিবা ঐহাক্কী ইমুংগী মীওইশিং।
ঙসি অসিদি লৈবাক পুম্বগী ওইনা পুৱারী ওইরবা পুঙফম অমনি। ঙসিদি, ভারতকী খ্বাইদগী অহানবা রেপিদ রেল সেবা, নমো ভারত ত্রেন মীয়ামদা খুৎশিন্নরি, লম্থারি। চাউরাক্না চহি মরিগী মমাংদা ঐহাক্না দিল্লী-ঘাজিয়াবাদ-মীরত রিজনেল কোরিদোর প্রোজেক্তকী উরেপ উয়ুং তমখি। ঙসিদি, সাহিবাবাদতগী দুহাই দিপো ফাওবগী মফমদা নমো ভারত চলায়বা হৌখ্রে। ঐহাক্না মমাংদসু হায়খ্রবনি, ঙসিসু হায়গনি, ঐখোয়না উরেপ উয়ুং তম্বা থবক খুদিংমক ঐখোয়না শঙ্গাই। মসিগী মীরতকী শরুক অসি চহি অমা, চহি অমা মখায়গী মতুংদা শোইদনা লোইশিনগনি, মতম অদুদসু, ঐহাক্না অদোমগী সেবাগীদমক্তা শোইদনা লাক্কনি।
ঐহাক্না মতমগা চুনরবা ত্রেন অসি তোংদুনা চৎপগী খুদোংচাবা ফংজখ্রে। ঐহাক্কী অঙাং ওইরিঙৈগী মতমদি রেলৱে প্লেতফোর্মদা লেনখিবনি, অদুনা রেলগী অনৌবা শক্তম অমা ঙসি উবদা ঐহাক্না য়াম্না নুংঙাইবা ফাওই। মসিগী এক্সপেরিএন্স অসিদি থৱাই য়াম্না নুংঙাইহনবা মতৌ অমনি। ঐখোয়গী লমদমসিদা নবরাত্রীদা অফবা থবক পাংথোকপগী চৎনবী লৈ। লৈবাক্কী অহানবা নমো ত্রেন অসিসু ইমা কত্যয়ানীগী থৌজালদগী ওইথোক্লিবনি। অনৌবা ত্রেন অসিগী দ্রাইবর্দগী হৌরগা অতোপ্পা থৌমী কয়ানা নুপী ঙাক্তা ওই, ঐখোয়গী লৈবাক্কী ইচানুপী ঙাক্তনা ওই। মসিনা ভারতকী নারিশক্তীগী হেনগৎলক্লিবা মপাঙ্গলগী খুদম অমনি। ঐহাক্না দিল্লী এন.সি.আর. অমসুং নোংচুপ য়ু.পি.গী মীপুম খুদিংবু নবরাত্রীগী য়াইফরবা পুঙফম অসিদা ফংলিবা খুদোল অসিগীদমক্তা থাগৎচরি, য়াইফ পাউজেল পীজরি। নমো ভারত ত্রেন্দা মোদর্নিতীসু লৈ, খোঙজেলসু য়াঙই। মসিগী নমো ভারত ত্রেন অসিদি অনৌবা ভারতকী অনৌবা খোঙচৎ অমসুং অনৌবা ৱারেপশিংগী শক্তাক অমসু ওইরি।
ঐহাক্কী ইমুংগী মীওইশিং,
রাজ্যশিংনা চাউখৎলবা মতুংদা ভারতনা চাউখৎকনি হায়না ঐহাক্না মতম পুম্বদা খল্লি। ঐখোয়গী নাক্তা কর্নাতকাগী মুখ্য মন্ত্রী সিদ্দরামৈয়াসু হৌজিক লৈবীরি। ঙসিগী নুমিৎসিদা বেঙ্গালুরুগী মেত্রো লাইন অনিসু লৈবাক মীয়ামদা খুৎশিন্নখ্রে। মসিনা বেঙ্গালুরুগী IT হবকী কেন্নেক্তিবিতীবু হেন্না ফগৎহনগনি। হৌজিক্তি, চাউরাকপা মীওই লাখ নিপান্না বেঙ্গালুরুদা নুংতিগী মেত্রো তোংলগনি। মসিগুম্বা মেত্রোগী অনৌবা খুদোংচাবা অসিগীদমক্তা ঐহাক্না বেঙ্গালুরুগী মীপুম খুদিংবু থাগৎচরি।
ঐহাক্কী নুংশিরবা ইমুংগী মীওইশিং,
21শুবা চহি চাগী ঐখোয়গী ভারতনা সেক্তর খুদিংদা অনৌবা চাউখৎ থৌরাংগী ৱাফম কয়া হক্তুনা থম্লি। ঙসিগী ভারতনা চন্দ্রয়ানবু থা লৈমায়দা তাহন্দুনা মালেম পুম্বদা হিন্দুস্তান অসিগী মমিং চৎহল্লে। ঙসিগী ভারতনা G20গুম্বা থৌরম্বু পাক চাউনা শিন্দুনা মালেমগী মফমদা পুক্নিং শুমহৎলি, মালেম্বু ভারতকা মরী লৈনহনবগী অনৌবা খুদোংচাবা শেম্লি। ঙসিগী ভারতনা এসিয়ন গেম্স্তা মেদল 100দগী হেন্না লৌদুনা ঐখোয় অসি তসেংনা ঙম্মি হায়বা উৎখ্রে, মসিদা ঐহাক্কী উত্তর প্রদেশকী শরুকসু য়াওখি। ঙসিগী ভারতনা মশাগী হোৎনজমন্দগী 5G হৌদোকখ্রে, লৈবাক্কী কাচিন কোয়া খুদিংদা য়ৌহনখ্রে। ঙসিগী ভারতনা মালেমগী খ্বাইদগী য়াম্বা দিজিতেল ত্রাঞ্জেক্সন পাংথোক্লি।
কোরোনাগী ইরাংনা মালেমদা অৱাবা পীনবা লাকখিবা মতমদা ভারত্তা শাবা ভেক্সিন্না মালেমগী মীওই করোর কয়াগী পুন্সি কনবীখি। অচৌবা কম্পেনী কয়ানা ভারত্তা মোবাইল অমসুং তি.ভি.-কম্প্যুতর-লেপ্তোপ শানবা চঙশিন্নরক্লি। ঙসিদি ভারতনা ফাইতর জেৎ শারি, ফাইতর জেত্তা নত্তনা সমুদ্রদা তিরঙ্গা মকা লাম্না পাইহনবা ঙম্বা বিক্রান্ত জহাজসু শারি। অদুগা খোঙজেল য়াঙলবা নমো ত্রেন ঙসি চেনবা হৌরিবা অসিসু ভারত্তা শাবনি। ভারত মশাগী ত্রেন্নি। মসি তাবদা অদোমসু চাউথোকচবা ফাওদবরনে মরুপশিং? ভারতকী য়াইফরবা তুংগী মতম উদবরনে? ঐখোয়গী নহাশিংগী অফবা তুংগী মতম উদবরনে? প্লেতফোর্ম অসিদা স্ক্রীন দোরগী সীস্তেম্বু মীয়ামদা খুৎশিন্নখ্রিবা অদুসু ভারত্তা শাবনি।
ঐহাক্না মীয়ামদা ৱাফম অমা থমজবা পাম্মি। ঐহাক্তি হেলিকোপ্তরদা চৎলি, মসি প্রধান মন্ত্রীগী হেলিকোপ্তরনিকো। অদুবু, মসিগী মনুংসে য়াম্না লাঙই, নোংথক্তা পাইবা ত্রেক্তর তোংবগা মান্নৈ, ত্রেক্তরদগীবু হেন্না হৌইদা, নাকোং মেনশিনবা তারিবনি। অদুগনে, প্লেন্দা থোকপা মখোল অদুদগী য়াম্না হন্থবা মখোল অসি নমো ত্রেন্দা থোকই, মসি ঐহাক্না ঙসি থেংনরবনি। মসিনা হায়বদি চত্থোক চৎশিন তৌবদা য়াম্না নুংঙাইরগনি হায়বনি।
মরুপশিং,
নমো ভারত অসি তুংগী মতমগী ভারতকী শক্তম অমনি। লৈবাক্কী শেন্মিৎলোনগী মপাঙ্গল হেনগৎলকপা মতমদা ঐখোয়গী লৈবাক্কী শক্তাক্তা করম্বা অহোংবা লাকই হায়বগী খুদম অমা নমো ভারত ত্রেন্না ওইরিবনি। দিল্লীদগী মীরত ফাওবগী কিলোমীতর 80গী অশাংবা অসিদি হৌবতা ঙাইরিবনি, তাবীয়ুকো, মসিদি হৌবতা ঙাইরিবনি। অহানবা ফেজতা, দিল্লী, য়ুপি, হরিয়ানা অমসুং রাজস্থানগী তোঙান-তোঙানবা সেক্তর কয়াবু নমো ভারত ত্রেন্না শম্নগনি। ঐহাক্না হৌজিক রাজস্থান পনবসিদা অশোক গেহলোতজীদি তুম্বা য়াররোই। লাক্কদৌরিবা মতমশিংদা, লৈবাক্কী অতোপ্পা শরুকশিংদা নমো ভারতকুম্বা সীস্তেম লৈরক্লগনি। মসিনা ইন্দস্ত্রীসু চাউখৎহনগনি, ঐহাক্কী লৈবাক্কী নহা ওইরিবা চারোন শুরোনশিংগী থবক্কী অনৌবা খুদোংচাবা কয়াসু লাক্কনি।
মরুপশিং,
হন্দক্কী চহি চা অসিগী অহুমশুবা দিকেদ অসিদি ইন্দিয়ন রেলৱেগী শক্তম হোংবা মতম্নি। মসিগী চহি তরাসিদা রেলগী শক্তমদা মপুং ফাবা অহোংবা লাকপা অদোম্না উগনি। অদুগা ঐদি অপীকপা মঙলান মঙবগী হৈনবী লৈতে, তপ্না চৎপগী হৈনবীসু লৈতে। ভারতকী ত্রেন্না মালেমগী মফম অমা হেক্তগী ত্রেন্দগী মনিংদা চেল্লরোই হায়বসি ঐহাক্না ভারতকী নহাশিংদা হায়বা পাম্মি, থাজবা পীবা পাম্মি। তেক্ত-কায়দবা, খুদোংচাবা, লু-নানবা, ইং তপ্পা, মীয়ামগী অপাম্বা খঙবা, মপাঙ্গল ওইরো, ভারতকী রেলনা মালেম পুম্বগী ওইনা অনৌবা থাক অমদা থম্লে। ইন্দিয়ন রেলৱেনা 100% ইলেক্ত্রিক ওইগদবা নুমিত্তগী লাপ্ত্রে। ঙসি নমো ভারত চেনবা হৌরে। মসিগী মমাংদা, বন্দে ভারতকী মওংদা ভারতনা মতমগা চুনবা ত্রেন ফংখ্রে। অমৃত ভারত স্তেসন খোঙথাংগী মখাদা লৈবাক্কী রেলৱে স্তেসনশিংবু মতমগা চুনহনবগী থবকশিং খোঙজেল য়াঙনা পায়খৎলি। অমৃত ভারত, বন্দে ভারত অমসুং নমো ভারতকী ত্রিবেনী অসিনা হন্দক্কী চহি চা অসিগী অরোইবা ফাওবদা রেলগী মোদর্ন ওইবগী খুদম ওইরগনি।
লৈবাক অসিদা মলতি মোদেল কন্নেক্তিবিতীগী হীরমদসু ঙসি খোঙজেল য়াঙনা থবক পায়খৎলি। মসিনা হায়বদি, চত্থোক চৎশিন তৌবগী পাম্বৈ কয়াবু অমত্তা ওইনা পুনশিনহল্লে হায়বনি। মসিগী নমো ভারত ত্রেন অসিদসু মলতিমোদেল কন্নেক্তিবিতীগী মতাংদা য়াম্না খন্নখি। দিল্লীগী সরাই কালে খান, আনন্দ বিহার, হগাজিয়াবাদ অমসুং মীরতকী স্তেসন্দগী রেল মেত্রো নত্ত্রগা বস স্তেন্দ ফাওবদা চৎপদা ৱাররোই, পুম্নমক শম্নরবনি। ত্রেন্দগী কুমথরবা মতুংদা বস স্তেন্দ নত্ত্রগা ওফিস ফাওবা য়ৌনবা করিদা চৎকনি হায়বগী অৱাবা অমত্তা লৈররোই।
ঐহাক্কী ইমুংগী মীওইশিং,
অহোংবা নাইবা ভারত অসিগী লৈবাক মীয়ামগী পুন্সিগী থাক ফগৎপা হায়বসিসু য়াম্না মরু ওইরি। মীয়াম্না অশেংবা নুংশিৎ হোনবা, চত্থোক চৎশিন নুংঙাইনা তৌবা, মহৈ তম্বগী অফবা ইন্সতিত্যুসন লৈবা, লাইয়েংবগী অফবা খুদোংচাবা লৈবা, মসিগুম্বা হীরমশিং অসিদসু ভারত সরকারনা অহেনবা মিৎয়েং চঙলি। পব্লিক ত্রান্সপোর্তকী হীরমদসু ঙসি সরকারনা শেল য়াম্না থাদরি, মসি লৈবাক অসিদা অমুক্তা থোকখিদ্রিবা থৌওং অমনি।
মরুপশিং,
ঐখোয়না মীয়ামগী চত্থোক চৎশিন তৌনবগীদমক্তা ঈশিং, কংফাল অমসুং স্পেস, মসিগুম্বা হীরম খুদিংদা হোৎনরি। ৱাতর ত্রান্সপোর্ত্তা য়েংবীরো, ঙসিগী মতমদা, লৈবাক্কী তুরেলশিংদা ৱাতরৱে 100 হেন্না শেমগৎলি। মসিগী মনুংদগী খ্বাইদগী চাউবা ৱাতরৱে অসিসু ইমা গঙ্গাগী ইচেলদা শেমগৎলি। বনারস্তগী হলদিয়া ফাওবগী গঙ্গাজীদা জহাজশিংগী ওইবা মশিং য়াম্লবা তর্মিনেল কয়া শারি। মসিনা লৌমীশিংনা ঈশিং লম্বীগী খুত্থাংদা মখোয়গী মহৈ মরোং থাদোক থাজিনা তৌবা য়াহনগনি। হন্দক্তসু, মালেমগী খ্বাইদগী শাংবা রিভর ক্রুজ, গঙ্গা বিলাসনা কিলোমীতর 3200গী অশাংবা চেন্দুনা রেকোর্দ থমখ্রে। ঙসিদি, লৈবাক্কী সমুদ্র তোর্বানশিংদা অনৌবা পোর্ত ইনফ্রাস্ত্রকচর কয়া শেমগৎলি। মতমগা চুনহল্লি। মসিগী কান্নবদি কর্নাতকাগুম্বা রাজ্যশিংনা ফংলি। কংফালগী ওইনা হায়রুরবদি, মতমগা চুনবা এক্সপ্রেসৱেগী নেতৱর্ক শেম্নবগীদমক্তা ভারত সরকারনা লুপা করোর লাখ মরি হেন্না চাদিং তৌরিবনি। নমো ভারতকুম্বা ত্রেন ওইরো, নত্ত্রগা মেত্রো ত্রেন ওইরো, মসিগীদমক্তসু ঐখোয়না লুপা করোর লাখ অহুম হেন্না চাদিং তৌখ্রবনি।
হৌখিবা চহিশিংদা মফমসিদা মেত্রো লম্বী করম্না শেমগৎখি হায়বা দিল্লী এন.সি.আর.দা লৈবা মীওইনা মমুৎ তানা খঙলবনি। য়ুপিদা ঙসি নোইদা, ঘাজিয়াবাদ, লখনৌ, মীরত, আগ্রা, কানপুরগুম্বা শহরশিংদা ঙসিদি মেত্রোনা থোঙ থিল্লিবনি, মফম খরদা মেত্রো য়ৌরে, মফম খরদনা অথুবা মতমদা য়ৌরক্লগনি। কর্নাতকাদসু, বেঙ্গালুরু ওইরো, মৈসুরু ওইরো, মেত্রো চেনবা শহর য়াম্না থুনা ওইরগনি।
ভারতনা অতিয়াদসু মহাক্কী মশা পাক চাউনা ফন্দোক্লি। হৱাই চপ্পল তোংবা মীওইনা নোংথক্তা পাইদুনা চৎপগী ফিভম ওইথোকহল্লি। হৌখিবা চহি 9গা চাংদম্নবদা, ঙসিদি এয়রপোর্ত মশিং অসি শরুক অনি থোক্না হেনগৎলবনি। হৌখিবা মতম খরদা, ঐখোয়গী এয়রলাইনশিংনা ভারত্তগী অনৌবা প্লেন লিশিং অমগী ওর্দর পীখ্রবনি। মতৌ অসিগুম্না, ঐখোয়না স্পেস্তসু ঐখোয়গী খোঙ্কাপ থাংজিল্লি। ঐখোয়গী চন্দ্রয়ান্না থা লৈমায়দা ইকুই কুইদনা তিরঙ্গা পাইহনখ্রে। ঐখোয়না ইং 2040 ফাওবগী শোইদ্রবা রোদমেপ শেমখ্রে। মতম খরগী মতুংদা, ঐখোয়গী গগনয়ান্না ভারত মচাশিং পুদুনা স্পেস্তা চৎলগনি। মদুদগী ঐখোয়না ইশাগী স্পেস স্তেসন শারগনি। ঐখোয়গী ইশাগী স্পেসশিপ্তা খ্বাইদগী অহানবা ভারত মচানা থা লৈমায়দা খোঙদাবগী মতমদু কুইদ্রবনি। মসি কনাগীদমক্তা পাংথোক্লিবনো? মসিদি লৈবাক্কী নহাশিংগীনি। মখোয়গী তুংগী মতম্বু য়াইফবা মতম অমা ওইহন্নবনি।
মরুপশিং,
অফবা নুংশিৎ ফংহনগে হায়রবদি শহরশিংদা পোল্ল্যুসন হন্থবগী মথৌ তাই। মসিমক ৱাখল্লোন্দা থমদুনা, ইলেক্ত্রিক বসশিংগী অচৌবা নেতৱর্ক অমা ঐখোয়না শেমগৎলি। কেন্দ্র সরকারনা রাজ্যশিংদা ইলেক্ত্রিক বস লিশিং অমা পীবগী স্কিম হৌদোকখ্রে। ভারত সরকারনা হোৎনদুনা, কোনুং দিল্লীদা লুপা করোর 600 থাদদুনা, ইলেক্ত্রিক বস 1300 হেন্না চেলহনবা হায়বসি ঐখোয়গী ৱারেপনি। মসিগী মনুংদা, ইলেক্ত্রিক বস 850 হেনবদি শহরসিদা চেনবসু হৌখ্রবনি। মতৌ অসিগুম্না, বেঙ্গালুরুদসু ইলেক্ত্রিক বস 1200 হেন্না চেলহন্নবা ভারত সরকারনা লুপা করোর 500গী তেংবাং পীরি। দিল্লী, য়ুপি, কর্নাতকা ওইরো, শহর খুদিংদা মতমগা চুনবা অমসুং গ্রীন পব্লিক ত্রান্সপোর্ত খুমাং চাউশিলহন্নবা কেন্দ্র সরকারনা কন্না হোৎনরি।
মরুপশিং,
ঙসি ভারত্তা শেমগৎলিবা ইনফ্রাস্ত্রকচর খুদিংদা মীয়ামগী খুদোংচাবা হায়বা ৱাফম অসিগী য়াম্না খন্নৈ। মসিদা অহেনবা মিৎয়েং চঙই। ওফিস চৎপশিংদা মেত্রো নত্ত্রগা নমো ভারত ত্রেনগুম্বা ইনফ্রাস্ত্রকচর অসি য়াম্না মরু ওইগনি। অপীকপা অঙাং লৈবা ইমুং, অহল ওইবা ইমা-ইপা লৈবা ইমুং, মসিগুম্বা ইনফ্রাস্ত্রকচর অসিনা মখোয়গুম্বা ইমুংগী মতম কনগনি। অফবা ইনফ্রাস্ত্রকচর লৈবনা অচৌবা কম্পেনী কয়া লাক্কনি, ইন্দস্ত্রে কয়া লাক্কনি, মসিনা নহাশিংদা কান্নবা পীগনি। অফবা এয়রৱে অমসুং অফবা শোরোক লৈবনা, কারবার তৌবা মীওইশিংনা মখোয়গী কস্তমরশিংদা লায়না য়ৌবা ঙমগনি। অফবা ইনফ্রাস্ত্রকচর লৈবদগী, মখল কয়াগী কারবার লাকই, মসিনা মীপুম খুদিংদা কান্নবা ফংহল্লি। থবক তৌবী নুপী অমদা মেত্রো নত্ত্রগা RRTS অসিনা মখোয়গী তেক্ত কায়দবগী ফিভম হেনগৎহল্লি। মখোয়না তেক্ত কায়দনা ওফিস চৎপখক্তা নত্তনা মখোয়গী শেলসু য়াম্না কনগনি।
মেদিকেল কোলেজ মশিং হেনগৎলকপা মতমদা, লাইয়েংনবা ঙাইরিবা অনাবা অমসুং দাক্তর ওইনিংবগী অপাম্বা থম্বা নহাশিং অনিমক্তা কান্নবা ফংই। দিজিতেল ইনফ্রাস্ত্রকচর চাউখৎলকপা মতমদা, খ্বাইদগী লাইরবা মীওইসু মশাগী হক্কী ফংফম থোকপা শেল খুদিংমক মশাগী একাউন্ততা লাকই। মীয়ামগী সেবাশিং ওনলাইন্দা ফংলকপা মতমদা, ওফিস কয়াদা চৎপগী মথৌ তারক্তে। অদুগা, ঐখোয়না ঙৈহাক্কী মমাংদা উখিবা UPI শিজিন্নবা য়াবা তিকেত য়োনবগী মছিনশিং অসিনা অদোমগী খুদোংচাবা য়াম্না হেনগৎহনগনি। মসিগুম্বা সেক্তর কয়াদা হৌখিবা দিকেদ অসিদা মশক থোকপা থবক কয়া পাংথোকখ্রে। মসিনা মীয়ামগী পুন্সিদা লাইহনবতা নত্তনা হান্না লৈরম্বা অৱাবা কয়াসু লাপথোকহনখ্রে।
ঐহাক্কী ইমুংগী মীওইশিং,
হৌজিক অসিদি কুহ্মৈগী মতম্নি। নুংঙাইবা ফোংদোকপগী মতম্নি। ঐহাক্কী লৈবাক্কী ইমুং খুদিংনা কুহ্মৈশিং অসি নুংঙাইনা পাংথোকপা ঙমহন্নবগীদমক্তা কেন্দ্র সরকারনা অচৌবা ৱারেপ কয়া লৌখ্রে। মসিনা লৌমী, থবক তৌবা মীওই, পেন্সন চাবা মীওইশিংদা কান্নবা পীগনি। ভারত সরকারা রবী মহৈ মরোংগী MSP য়াম্না চাউনা হেনগৎখ্রে। মসুর হৱাইগী MSP অসি কিলোদা লুপা 450, হঙ্গামথাওনা লুপা 200 অমসুং গেহুনা কুইন্তলদা লুপা 150 হেনগৎখ্রে। মসিনা ঐখোয়গী লৌমীশিংদা অহেনবা শেনফম ফংহনগনি। ইং 2014দা গেহুগী MSP অসি ক্বিন্তলদা লুপা 1400 ওইরম্বদু হৌজিক লুপা লিশিং অনি হেল্লে। মসুর হৱাইগী MSP অসিসু চহি 9গী মনুংদা শরুক অনি হেনগৎলে। হঙ্গামথাওগী MSP অসিসু মতমসিগী মনুংদা ক্বিন্তলদা লুপা 2600 হেনগৎলে। অপীবা মমলদগী শরুক য়াম্না হেনগত্তুনা লৌমীশিংদা তেংবাংবগী ঐখোয়গী ৱাখল্লোন অদু মসিগুম্বা থৌওংশিংনা উৎলিবনি।
মরুপশিং,
কেন্দ্র সরকারনা য়ুরিয়া য়াওনা মখল কয়াগী হারবু লৌমীশিংদা অহোঙবা মমলদা ফংহল্লি। মালেমগী মফমশিংদা বোরাদা লুপা লিশিং অহুম পীবা য়ুরিয়া অসিমক ঐখোয়না লুপা চহুমদা ফংহল্লি। মসিদগীসু হেন্না তানা পীবা য়াওরি। মশিং অসি অদোম নীংশিংবীয়ুকো? মসিগী কান্নবা অসি য়ুপি, কর্নাতকা, লৈবাক্কী লৌমী খুদিংনা ফংলিবনি। মসিগীদমক্তা ভারত সরকারনা লুপা করোর অমগা মখায় চাদিং তৌরিবনি। য়ুরিয়াবু হোংনবু ফংহল্লবদি হায়দুনা ঐখোয়না শেলশিং অসি চাদিং তৌরিবনি।
মরুপশিং,
মহৈ মরোং খাওখ্রবা মতুংদা লেমহৌবা অরেম্বশিং মাঙহন্দনা লৌমীশিংনা মদুগী কান্নবা লৌহন্নবগীদমক্তা ঐখোয়গী সরকারনা থবক পায়খৎলি। মসিগীদমক্তা বাইও ফুএল অমসুং ইথানোল য়ুনিৎশিং লৈবাক শিনবা থুংবদা শেমগৎলি। হৌখিবা চহি 9গা চাংদম্নবদা, ঙসি লৈবাক অসিদা পুথোক্লিবা ইথানোলগী চাং অসিনা শরুক 10 হেল্লে। মসিগুম্না ইথানোল পুথোক্লিবা অসিদগী লৈবাক্কী লৌমীশিংগী ফুরিৎখাওদা লুপা করোর লিশিং 65 চঙখ্রবনি। শুপ্নগী থা তরাগী মনুংদা, লৈবাক্কী লৌমীশিংদা লুপা করোর লিশিং 18 পীখ্রবনি। অদুগা, মীরত-ঘাজিয়াবাদ লমদমগী লৌমীশিংগী ৱারি শারবদি, ইথানোলগীদমক্তা চহি অমগী মনুংদা থা 10গী ওইনা, মখোয়গী মফমদা লুপা করোর 300 পীরিবনি। ত্রান্সপোর্তকী মতাংদা ইথানোল শিজিন্নবগী চাং হেনগৎলিবা অসিদগী, ঐখোয়গী মীরত-ঘাজিয়াবাদকী চু থাবা লৌমীশিংনা অখন্নবা কান্নবা ফংলি। মসিনা ঐখয়গী চু থাবা লৌমীশিংগী এরিয়র পীবগী শিংনবা হন্থহনবদসু তেংবাংলি।
মরুপশিং,
কুহ্মৈগী কুমজা হৌরকপা অসিদা ভারত সরকারনা ইচে-ইচলশিংগী মফমদা মখোয়গী খুদোলপোৎ পীখ্রবনি। উজ্বালাগী বেনেফিশরী ইচে-ইচলশিংগীদমক্তা সিলিন্দর অমদা লুপা 500 হোঙথহনখ্রবনি। লৈবাক্কী ইমুং করোর 80দা লেম্না রেসন পীরি। কেন্দ্র সরকারগী থৌমী অমসুং পেন্সন ফংবা মীওইশিংগী 4% DA পীবগী ৱাফমসু লাউথোকখ্রবনি। ঐখোয়গী রেলৱেগী গ্রুপ বি. অমসুং সি.গী নন-গেজেতেদ থৌমী লাখ কয়া লৈরিবা অসিগীদমক্তা দিৱালী বোনস পীখ্রে। লৌমী অমসুং থবক তৌবা মীওইশিংগী মফমদা লুপা করোর লিশিং কয়াগী খুদোংচাবা ফংলিবা অসিনা খুন্নাই পুম্বদা কান্নবা পীগনি। মখোয়না পোৎলম লৈবদা কৈথেলদা মী চিনবা হেনগনি, মরী লৈনবা মীওইশিংগী কারবার হেনগৎকনি।
ঐহাক্কী ইমুংগী মীওইশিং,
মীয়ামগী অপাম্বা ৱারেপ লৌবা মতমদা, কুহ্মৈগী নুংঙাইবা অসি মীপুম খুদিংগী হেনগৎলি। অদুগা লৈবাক্কী ইমুংশিংনা হরাও নুংঙাইবা মতমদা, কুহ্মৈসু নুংঙাইবা হেল্লি। অদোমগী কুহ্মৈনা হেন্না নুংঙাইবা মতমদা ঐহাকসু হেন্না নুংঙাই।
অদুনা ইচিল ইনাওশিং,
ঐহাক অদোমগী মফমদগী করিগুম্বা খরা নিজবা পাম্মি। ফরে, লাইরবা ওইরবসু, মহাক্কী সাইকল অমা লৈবা মতমদা মহাক্না মদুবু শেংদোক্তুনা তরু-তনান্না থম্মি। থম্মিকো? মতৌ অসিগুম্না, ঐখোয়গী অনৌবা ত্রেন অসিবুসু তরু-তনান্না থম্বীয়ু, খেৎহনবা য়াদেকো? অদুগুম্না চেকশিন্না থম্বীগনিকো? মসিগী থাজবা অসিগা লোয়ননা, ঐহাক্না অদোম খুদিংবু নমো ভারত ত্রেনগীদমক্তা হন্না হন্না থাগৎচরি অমসুং ঐহাক্কী ৱাফম অসিবু অশেংবা ওইহনবীয়ু।
ঐহাক্কা লোয়ননা, অদোমগী অপুনবা পাঙ্গলগা লোয়ননা হায়বীয়ু,
ভারত ইমানা য়াইফরে।
ভারত ইমানা য়াইফরে।
ভারত ইমানা য়াইফরে।
পুম্নমকপু হন্না হন্না থাগৎচরি।
