মশক নাইরবা মীথুংশিং, ইকায়খুম্নরবা সাইন্তিস্ত, ইনোভেতর, এস্ত্রোনোত, অমদি মালেম পুম্বদগী মরূপশিং
খুরুমজরি!
গ্লোবেল স্পেস এক্সপ্লোরেসন কন্ফরেন্স ২০২৫ দা ময়ামগা পুনবা ফংজবা য়াম্না নুংঙাই। স্পেস হায়বসি চুম্নগী লমথুংফম অমখক নত্তে। মসি খঙনিংবগী লাঙতক্নবা, থৌনা, অমদি অপুনবগী খোঙজেলগী খোল্লাউ অমনি। ভারতকী স্পেসকী খোঙচৎ ৱাখল্লোন অসিদগী হৌরকপনি। ১৯৬৩ দা অপিকপা রোকেৎ অমা থাগৎপদগী হৌরগা, থাগী খাথবা পোলদা খোঙদাখিবা অহানবা লৈবাক অমা ওইরকপা ফাওবগী ঐখোয়গী খোঙচৎশিং শিংথানিংঙাই ওই। ঐখোয়গী রোকেতশিংনা পেলোদখক্তা নত্তে পুরিবসি। মখোয়না ভারত মচা বিলিয়ন ১.৪গী মঙলানশিং পুরি। ভারতকী মায় পাকপশিং অসি মশক থোকপা সাইন্তিফিক মাইলস্তোনশিংনি। মদুগী মথক্তা, মখোয় অসি মীওইবগী ৱাখল্লোন্না গ্রেভিতী মায়থিবা পীবা ঙম্মি হায়বগী খুদম চাংদম্নি। ভারতনা ইং ২০১৪ দা মাগী অহানবা চাংয়েংদা মার্স য়ৌদুনা পুৱারী শেমখি। চন্দ্রয়ান-১ না থাদা ঈশিং ফংই হায়বা খঙদোকপদা মতেং পাংখি। চন্দ্রয়ান-২ না থাগী খ্বায়দগী রিজোলুসন ৱাংবা মমিশিং ঐখোয়দা পীখি। চন্দ্র্রান-৩ না থাগী খাথংবা পোলগী মরমদা খঙবা হেনগৎহনখি। ঐখোয়না রেকোর্দ ওইবা মতমদা ক্রাইওজেনিক ইঞ্জিন শেমখি। ঐখোয়না মিসন অমখক্তদা সেতলাইত ১০০ থাগৎখি। ঐখোয়না ঐখোয়গী লোঞ্চ ভেহিকল শীজিন্নদুনা লৈবাক ৩৪ গী সেতলাইত ৪০০ হেন্না থাগৎখি। চহি অসিদা ঐখোয়না মাঙদা থাংজিনবা অচৌবা খোঙথাঙ অমা ওইনা স্পেসতা সেতলাইত অনি দোক তৌখি।
মরূপশিং,
ভারতকী স্পেসকী খোঙচৎ অসি অতৈগা লমজেল তান্নবগী ৱাফম নত্তে। মসি পুন্না হেন্না ৱাংবা পন্দোল লোম্মিন্নবগী ৱাফম্নি। ঐখোয় পুন্না মীওইবা খুন্নাইগী য়াইফনবা স্পেসকী লমদা থিজিনমিন্ননবগী মান্নবা পান্দম থম্লি। ঐখোয়না খা এসিয়ন লৈবাকশিংগী ওইবা সেতলাইত অমা থাগৎখি। হৌজিক, ঐখোয়গী প্রেসিদেন্সী মনুংদা লাউথোকখিবা জি২০ সেতলাইত মিসন্না মালেগী খা থংবা শরুক্কী খুদোল অমা ওইরগনি। ঐখোয়না অনৌবা থাজবগা লোয়ননা মাঙদা চঙশিল্লি, সাইন্তিফিক এক্সপ্লোরেসনগী অনৌবা ঙমখৈ পাকথোকহল্লি। ঐখোয়গী অহানবা মীওইবা য়াউবা স্পেস-ফ্লাইত মিসন, গগনয়ান্না লৈবাক অসিগী হেনগৎলক্লিবা অনিংবা অপাম্বশিং উৎলি। লাক্কদৌরিবা চয়োলশিংদা, ভারতকী এস্ত্রোনোত অমনা অপুনবা ইস্রো-নাসা মিসনগী মনুং চন্না ইন্তরনেস্নেল স্পেস স্তেসন্দা চৎকনি। ২০৩৫ ফাওবদা, ভারতিয় অন্তরিক্স স্তেসন্না থিজিন হুমজিনবা অমদি মালেমগী ওইনা তেংবাংনবগী অনৌবা শক্তম অমা পুরক্লগনি। ২০৪০ ফাওবদা, থাগী লৈমায়দা ভারতকী খোঙ্গুল তারগনি। মার্স অমসুং ভিনসসু ঐখোয়গী মীৎয়েঙদা লৈরি।
মরূপশিং,
ভারতকীদমক্তদি, স্পেস হায়বসি থিজিনবা অমদি মপাঙ্গল কনখৎহন্নবা মফম্নি। মসিদা লৈঙাক্লোন মপাঙ্গল হাপ্লি, পুন্সি মহিং ফগৎহল্লি, অমদি মীরোল কয়াগী পুক্নিং থৌগৎলি। ঙামীশিংদা চেকশিনৱা পীবদগী গতিশক্তি প্লেতফোর্ম ফাওবা, রেলৱে সেফ্তীদগী ৱেদর ফোর্কাস্তিং ফাওবদা, ঐখোয়গী সেতলাইতনা ভারত মচা খুদিংমক্কী য়াইফনবা মীৎয়েঙ থম্লি। ঐখোয়না ঐখোয়গী স্পেস সেক্তরবু স্তার্তঅপ, ওন্ত্রপ্রিন্যুর, অমসুং নহাশিংগীদমক থোং হাংদোক্তুনা থম্লি। ঙসি ভারত্তা স্পেস স্তার্ত-অপ ২৫০ হেন্না লৈরে। মখোয়না সেতলাইত তেক্নোলোজী, প্রোপলস্ন সিস্তেম, ইমেজিং, অমদি অতৈ হীরম কয়াদা কত্তিং-এদ্জ এদভান্সমেন্ত পুরকপদা থৌদাং য়ারি। অদুগা ঐখোয়গী মিসন ময়াম অমদি নুপী সাইন্তিস্তশিংনা লমজিংলি হায়বসিনা হেন্না পুক্নিং থৌগৎনিংঙাইনি।
মরূপশিং,
ভারতকী স্পেসকী মঙলান অসি মালেম অসি ইমুং অমনি হায়রিবা, ‘বসুদৈব কুতুম্বকম’ হায়বা অরিবা মতমগী ৱাখল্লোন অসিদগী হৌরকপনি। ঐখোয়না ঐখোয়গী খুমাঙ চাওশিন্নবখক্কী হোৎনবা নত্তে, মালেমগী ৱাখল লৌশিং হেনগৎহন্নবা, মান্নবা শিংনবশিংগী পাম্বৈ পুথোক্নবা, অমদি তুংগী মীরোলশিংবু পুক্নিং থৌগৎনবা হোৎনবনি। ভারতনা পুন্না মঙ মঙমিন্নবা, পুন্না শেমগৎমিন্নবা, অমদি থৱানমিচাক্কী লক্তা পুন্না য়ৌমিন্ননবা লেপ্লি। ঐখোয় পুন্না, সাইন্স অমসুং হেন্না ফবা হয়েংগী মান্নবা মঙলান্না লমজিংদুনা স্পেস এক্সপ্লোরেসনগী অনৌবা পন্দুপ অমা হাংদোক্লসি। ঐনা ময়ামগী মফমদা ভারত্তা লৈরিঙৈ মতমদা য়াম্না নুংঙাইবা অমদি কান্নবা ওইবিয়ু হায়বা ৱাফম থমজরি।
ময়ামবু থাগৎচরি।
