ভারতকী চীফ জর্জতিস দি.ৱাই চান্দ্রচু, সুপ্রিম কোর্তকী জর্জতিসশিং, তোঙান-তোঙানবা হায় কোর্তশিংগী জর্জতিসশিং, মপান লৈবাকশিংদগী ঐখোয়গী অতিধি জর্জশিং, য়ুনিয়ন লো মিনিস্তর অর্জুন রাম মেঘাৱাল এত্তোরনি জেনেরেল ভেনকাতা রমনি, বার কাউন্সিলগী চিয়ার্মেন মনান দোক্তর কুমার মিশ্রা, সুপ্রিম কোর্ত বার কাউন্সিলগী প্রসিদেন্ত অদিস অগ্গরৱালা জি, অতোপ্পা শক্নাইরবশিং, ইবুংঙো অমসুং ইবেম্মাশিং।
নুমিৎ নিনিগী মমাঙদা ভারতকী সংবিধান চহি ৭৫ মপুংফারে। ঙসি ভারতকী সুপ্রিম কোর্ত চহি ৭৫ শুবগী থৌরম পাংথোক্লি। পুৱারি ওইরবা থৌরম অসিদা অদোমগী মরক্তা শরুক য়াবা ফংবসি য়াম্না হরাওই। থৌরম অসিদা জর্জ পুম্নমক ঐনা য়াইফ-পাউজেল পীজরি।
মরুপশিং,
নিংতম্বা, মান্নবা অমসুং অচুম্বা ফিদমশিংগা লোয়ননা নিংতম্বা ভারত অমগী মঙলান ভারতকী সংবিধান শেম্বশিংনা মঙ মঙখি। হায়রিবা অচুম্বা ফিদমশিং ঙাক্নবা ভারতকী সুপ্রিম কোর্তনা লেপ্পা লৈতনা হোৎনরি। নিংতম্না ফোঙদোকপা, লনাই নিংতম্বা, খুন্নাইগী অচুম্বগীদমক সুপ্রিম কোর্তনা মখা তানা ভারতকী ফজরবা গনতন্ত্র মপাঙ্গল কনখৎহল্লি। চহি ৭০ হেনবগী কোর্ত অসিগী খোঙচত্তা, লনাই মীওইশিংগী হকশিং অমসুং নিংতম্না ফোঙদোকপগী মতাংদা সুপ্রিম কোর্তনা মরুওইবা ৱারেপ কয়া লৌখ্রে। হায়রিবা ৱারেপশিং অদুনা লৈবাক অসিগী খুন্নাই অমসুং রাজনিতিগী ফিবমদা অনৌবা মাইকৈশিং তাকখি।
মরুপশিং,
ইজিকিউতিপ ওইগেরা নত্ত্রগা লেজিসলেচর ওইগেরা, ঙসি ভারতকী ইন্সতিতুসন খুদিংমক, লুপ খুদিংমক, লৈবাক অসিগী মাঙদা লৈরিবা মথং চহি ২৫গী পান্দমশিং ফংনবা থবক তৌরি। মসিগী ৱাখল্লোন অসিগা লোয়ননা, ঙসি লৈবাক অসিদা অচৌবা অওনবশিং পুরক্লে। ঙসিগী ভারতকী শেন-থুমগী থৌশিলশিংনা ভারতকী তুংগী অফবা ফিবম অমা শেম্নবা য়ুম্ফম ওইগনি। হয়েংগী ভারতকী অফবা ফিবম অমা শেমগৎনবা ঙসি ভারত্তা আইনশিং শেম্লে। মালেমগী হোংল্লক্লিবা ফিবমশিংদা, ঙসিদি মালেম পুম্নমক্না ভারত্তা য়েংলক্লে, মালেম শীনবা থুংবনা ভারত্তা থাজবা হেনগৎলক্লে। অসিগুম্বা ফিবম অসিদা, ঙসিগী ভারতনা খুদোংচাবা খুদিংমক লৌবা অমসুং খুদোংচাবা অমতা লেম্না থাদোকপা হায়বসি য়াম্না মরুওইবা অমনি। ঙসিগী ভারতকী মরুওইবদি হিংবদা লাইহনবা, ললোন-ইতিক পাংথোকপা লাইহনবা, চৎথোক-চৎশিন নুংঙাইহনবা, ই-পাউ ফাওনবা লাইহনবা, লাইনা অচুম্বা ফংহনবা অসিনি। ভারতকী মীয়ামদা য়াম্না লাইনা অচুম্বা ফংহল্লে অমসুং হিরম অসিদা সুপ্রিম কোর্তনা মরুওইবা থৌদাং লৌরি।
মরুপশিং,
লৈবাক অসিদা অচুম্বা ৱায়েন ফংহনবগী থবক খুদিংমক সুপ্রিম কোর্তকী চৎন-কাংলোনশিং অমসুং লমজিংগী মখা পোল্লি। কোর্ত অসি ভারতকী মীওই খুদিংমক ফংহনবা হায়বসি ঐখোয়গী থৌদাংনি অমসুং মসিনা ভারতমচা খুদিংমক্কী দরকার ওইবশিং ফংহনবা ঙমগনি। মসিগী ৱাখল্লোন অসিগা লোয়ননা, মতম খরগী মমাঙদা ই-কোর্ত মিসনগী অহুমশুবা ফেজ অয়াবা পীখ্রে। মসিগীদমক, অনিশুবা ফেজগী শেনফমদগী শরুক মরি হেন্না অয়াবা পীখ্রে। মসিগী অদোমগী হিরমনি, অদোম খুবাক খুবা য়াই। মসিগী অদোমগী অচৌবা থবক অমা ওইবনা মানন মিশ্রা হরাওরোই। লৈবাক শীনবা থুংনা লৈরিবা কোর্তশিং দিজিতাইজেসন তৌবগী থবকশিং চীফ জর্জতিস চান্দ্রচুর মশামক্না য়েংশিনবদা ঐ হরাওই। মখোয়গী থবকশিংনা অচুম্বা ৱায়েল লাইনা ফংহনবদা ঐনা থাগৎচরি।
মরুপশিং,
কোর্তশিংগী ফিজিকেল ইনফ্রাস্ত্রকচরশিং ফগৎহন্নবা ঐখোয়গী সরকারনা থবকশিং পায়খৎলে। হায়রিবা থবকশিং অসিগীদমক ২০১৪ দগী লুপা করোর লিশিং ৭ হেন্না চাদিং তৌখ্রে। হৌজিক লৈরিবা সুপ্রিম কোর্ত বিল্দিং অসিদা অদোম্না থেংনরিবা খুদোংচাদবশিং ঐ খঙলে। সুপ্রিম কোর্ত বিল্দিং কমপ্লেক্স পাকথোক-চাউথোক্নবা হৌখিবা চয়োলদা সরকারনা লুপা করোর ৮০০গী শেনফম অমা সেঙ্কসন তৌখ্রে।
মরুপশিং,
সুপ্রিম কোর্তকী দিজিতেলগী থবক খর হাংদোক্নবা ঙসি অদোম্না খুদোংচাবা অমা পীরে। দিজিতেল সুপ্রিম কোর্ত রিপোর্তশিংগী মতেংগা লোয়ননা, হৌজিক সুপ্রিম কোর্তকী ৱারেপশিং দিজিতেলগী মওংদা উবা ফংলগনি। সুপ্রিম কোর্তকী ৱায়েলগী লম লমগী লোলশিংদা হন্দোকপগী থবক অমা হৌরকপা অসিদা ঐ হরাওই। লৈবাক অসিগী অতোপ্পা কোর্তশিং অসিগুম্বা থবকশিং অথুবা মতমদা হৌরক্কনি হায়বগী থাজবা ঐনা থম্লি।
মরুপশিং,
ঙসি অচুম্বা ৱায়েল লাইনা ফংহনবদা কমদৌনা তেক্নোলোজিনা মতেং পাংবগে হায়বা ঙসিগী থৌরম অসিমক খুদম অমনি। এ.আইগী মতেংনা ঐগী ৱারোল অসি খুদক্তা ইংলিসতা হন্দোক্লে অমসুং অদোমগী মরক্তা মীওই খর লেঙ্গোইজ এপ্পকী খুৎথাংদা মসি তাবা ফংলে। মসি অহানবদা খুদোংচাদবা খর থেংনবা য়াই, অদুবু তেক্নোলোজিনা কয়া য়াম্না থবক তৌবা ঙম্বগে হায়বদা অঙকপা পোক্কনি। মসিগা মান্নবা তেক্নোলোজিশিং ঐখোয়গী কোর্তশিংদা শীজিন্নবদা, মীচম মীয়ামগী পুন্সি হেন্না নুংঙাইহনগনি। আইনশিং অচম্বা লোলশিং ইনবা ঐনা মতম খরগী মমাঙদা হায়খিবা অদু অদোম নিংশিংলমগনি। কোর্তকী ৱারেপশিং অচম্বা লোলশিংদা ইবনা মীচম মীয়াম হেন্না মতেং পাংগনি হায়না ঐনা খল্লি।
মরুপশিং,
অমৃত কালদা ঐখোয়গী আইনশিংদা ভারতকী ৱাখল্লোন অমসুং অনৌবা মতমগী চপ মান্নবা থৌনা লৈবা দরকার ওই। হৌজিক ওইরিবা ফিবমশিং অমসুং খ্বাইদগী ফবা থবকশিং য়েংলগা আইনশিং মতমগা চুনবা মওংদা শেমদোক্নবা সরকারনা থবক পায়খৎলি। লোয়লম লৈঙাক্কী অরিবা আইনশিং মুৎথৎতুনা, সরকারনা ইন্দিয়ান সিবিল প্রোতেক্সন কোদ, ইন্দিয়ান জুদিসিএল কোদ অমসুং ইন্দিয়ান ইভিদেন্স এক্ত হৌদোক্লে। হায়রিবা অহোঙবশিং অসিনা মরম ওইদুনা, ঐখোয়গী আইন, থৌশিল অমসুং থিজিনবগী থবকশিং অনৌবা যুগ অমা চঙশিল্লে। মসি অচৌবা অহোংবা অমনি। চহি চা কয়া শুরবা অরিবা আইনশিং অনৌবা অরাইবা আইনশিংদা ওন্থোকপা অসি য়াম্না মরুওই। মসিগীদমক সরকারগী থবক তৌবা মীওইশিং ত্রেনিং অমসুং কেপাসিতি বিল্দিং হৌখ্রে। অসিগুম্বা কেপাসিতি বিল্দিংগী থবক্তা শরুক য়ানবা ঐনা সুপ্রিম কোর্ততা হায়জরি।
মরুপশিং,
চাউখৎলবা ভারত অমগীদম মপাঙ্গল কনবা ৱায়েল-থৌদাগী থবক অসি য়াম্না মরুওই। থাজবা য়াবা সিস্তেম অমা ওইহন্নবা সরকারশু লেপ্তনা থবক পায়খৎলি। জন বিশ্বাস বিল অসি মাইকৈ অসিদা থাংজিনবা খোঙথাং অমনি। মসিনা তুংদা ৱায়েল-থৌদাগী থবক্তা দরকার লৈতনা পোৎলুম থাগৎপা হন্থহনগনি। মসিনা কেসশিং পন্দুনা লৈবা হন্থহনগনি। অলতর্নেতিপ দিসপুত রিজোলুসনগীদমক সরকারনা লো ওফ মেদিতেসন থৌরাং তৌরে হায়বা অদোম খঙলে। ঐখোয়গী জুদিসিয়ারিগী পোৎলুম, মরুওইনা সব-ওর্দিনেত জুদিসিয়ারিগী পোৎলুমশু হন্থহল্লে।
মরুপশিং,
মীওই খুদিংমক্কী হোৎনবনা ২০৪৭দা ভারতনা চাউখৎলবা লৈবাক অমগী পান্দম ফংবা ঙমগনি। হিরম অসিদা মথং চহি ২৫দা সুপ্রিম কোর্তনা শোইদনা মরুওইবা থৌদাং অমা লৌগনি। অদোম্না ঐ অমুক হন্না মফম অসিদা লাক্নবা বার্ত্তন তৌরক্লে, অদোম্না থৱায় য়াওবদগী ঐ মফম অসিদা লাকপা ফংবনি। হন্দক পীখিবা পদ্ম এৱার্দশিংগী মনুংদা, সুপ্রিম কোর্তকী থবক্তগী পোথারবা জর্জ ফাতিমা বিবিদা ঐখোয়না পদ্ম ভুষন পীরে অমসুং মহাক এসিয়াদা অহানবা মুস্লিম সুপ্রিম কোর্ত জর্জনি। মসি ঐগী ওইনা চাউথোকচবা অমনি। সুপ্রিম কোর্তকী চহি ৭৫ মপুংফারকপা থৌরম অসিদা ঐনা অমুক হন্না থাগৎপা ফোঙদোকচরি।
অদোম থাগৎপা ফোঙদোকচরি।
