গোৱাগী রাজ্যপাল, শ্রী পি.এস. শ্রীধরন পিল্লাইজী, গোৱাগী নহা ওইরিবা মুখ্য মন্ত্রী, শ্রী ম্রমোদ সাৱন্তজী, কেন্দ্রগী মন্ত্রী মন্দলদা লৈরিবা ঐহাক্কী মরুপ, হর্দীপ সিংহ পুরীজী, রামেশ্বর তেলীজী, লৈবাক কয়াদগী লাকপীরিবা মীথুংলেন, ইবেম্মা অমসুং ইবুংঙোশিং!
ইন্দিয়া ইনর্জী ৱিক্কী হন্দক্কী অনিশুবা মীফম অসিদা ঐহাক্না পুম্নমকপু তরাম্না ওক্লি। ইনর্জীনা থল্লবা গোৱাগী লমদম অসিদা ইন্দিয় ইনর্জী ৱিক্কী থৌরম পাংথোক্লিবা অসিদি য়াম্না নুংঙাইবা থৌওং অমনি। গোৱা অসিদি সেবা ফবগীদমক্তা মমিং চৎলিবনি। মালেমগী তোঙান-তোঙানবা মফমশিংদগী লাক্নরিবা লমকোয়বশিংবু মফম অসিগী নীংথিবা অমসুং চৎনবীনা পুক্নীং শুমহৎলিবনি। ঙসিদি, গোৱা অসিদি চাউখৎ থৌরাংগী অনৌবা থাক কয়া কাখৎলিবা মফম অমসু ওইরবনি। অদুনা, ঐখোয়না ঙসি ঐখোয়গী অকোয়বগী ফিভমগী মতাংদা ৱারী শানবা অমত্তা ওইনা পুল্লিবা অসিদা ঐখোয়না সস্তেনেবল ওইবা ফ্যুচরগী মতাংদা ৱারী শাগনি, গোৱা প্সিদি মসিগুম্বা হীরমগী খ্বাইদগী চুনবা পন্থুংফম অমা ওইরবনি। সম্মিৎ অসিদা শরুক য়ানবগীদমক্তা মীরম লৈবাক্তগী লাক্লিবা মীথুংলেন খুদিংনা পুন্সি চুপ্পগী নীংশিংনিংঙাই ওইরবা গোৱাগী পুঙফম কয়া মশাগা লোয়ননা হন্নখিগনি হায়বগী ঐহাক্না থাজবা থমজরি।
মরুপশিং,
হন্দক্কী ইন্দিয়া ইনর্জী ৱিক্কী থৌরম অসি য়াম্না মরু ওইবা মতমগী মনুংদা পাংথোক্লি। হন্দক্কী শেনবা চহিগী অহানবা থা তরুক্তা ভারতকী GDPগী চাংনা চাদা তরেৎ মখায়গী চাংদগী হেন্না হেনগৎখি। মালেমগী শাহৌগী মতাংদা থাজবা থম্নরিবা চাংদগী মসিগী চাং অসিনা য়াম্না হেল্লি। ভারতনা ঙসিদি মালেমগী খ্বাইদগী খোঙজেল য়াঙনা শাহৌ লৌবা শেন্মিৎলোন ওইরিবনি। অদুগা, ঐখোয়না চপ মান্নবা খোঙজেল অসিদা মখা তানা শাহৌ লৌখিগনি হায়বা IMFনা হায়খিবসু লৈখ্রবনি। মালেমগী অখঙ-অহৈ খুদিংনা ভারতনা মালেমগী খ্বাইদগী অহুমশুবা চাউবা শেন্মিৎলোন অমা য়াম্না অথুবা মতমদা ওইরগনি হায়না ঙসি ফোংদোক্নরিবনি। ভারতকী মসিগুম্বা শাহৌ লৌবগী থৌওং অসিদা ইনর্জী সেক্তরনা য়াম্না মরু ওইবা থৌদাং লৌরি। মসিগী মরু ওইবা অসি মহৌশানা অদুম হেনগৎলক্লি।
মরুপশিং,
ভারত অসি মালেমগী খ্বাইদগী অহুমশুবা চাউবা ইনর্জী শিজিন্নবা লৈবাক অমা ওইরি। লোয়ননা, ভারত অসি থাউ শিজিন্নবা অমসুং LPG শিজিন্নবগী মতাংদা মালেমগী খ্বাইদগী অহুমশুবা চাউবা লৈবাক অমসু ওইরিবনি। ঐখোয় অসি মালেমগী খ্বাইদগী মরিশুবা চাউবা LNG মীরমদগী পুশিনবা, খ্বাইদগী মরিশুবা চাউবা রিফাইনর অমসুং খ্বাইদগী মরিশুবা চাউবা ওতোমোবিল মার্কেত অমসু ওইরি। ঙসিদি, তু-হ্বীলর উমসুং ফোর-হ্বীলর য়োনবগী মতাংদা ভারত্তা অনৌবা রেকোর্দ অমা থম্নখ্রে। ভারতকী প্রাইমারী ইনর্জী দিমান্দ অসি ইং 2045 ফাওবদা হৌজিক্কী শরুক অনি ওইরগনি হায়না থাজনবা কয়া অমসু লৈরি। মসিনা হায়বদি, ঐখোয়না ঙসি নুমিৎ খুদিংগী থাউ বেরেল মিলিয়ন 19গী মথৌ তারবদি, ঐখোয়না ইং 2045তা বেরেল মিলিয়ন 38কী মথৌ তাগনি হায়বনি।
মরুপশিং,
তুংগী তঙাই ফদবশিং নীংথিনা খঙলবা মতুংদা, ভারতনা হৌজিক্তগী হৌনা মওং-মরিল চুম্না শেম শাবা হৌরে। ইনর্জীগী দিমান্দ হেনগৎলক্লিবা মরমসিদা ভারতনা লৈবাক্কী কাচিন কোয়া খুদিংদা শেল চঙদনা ইনর্জী ফংহল্লি। মালেমগী শিংনবা কয়ানা থল্লবসু, হৌখিবা চহি অনিদা পেত্রোল অমসুং দিজলগী মমল হন্থরকপা লৈবাক অমা ভারতনা ওইরিবনি। মসিদা নত্তনা, ভারতনা 100% ইলেক্ত্রিসিতী কবরেজ ফংলে, অমসুং য়ুম করোর কয়াদা ইলেক্ত্রিসিতী য়ৌহল্লে। মসিগুম্বা হোৎনজমন কয়ানা মরম ওইরগা, ভারতনা ঙসিদি ইনর্জী সেক্তরদা মালেমগী ওইনা থাক ৱাংনা খুমাং চাউশিনবা ঙম্লিবনি। ভারতনা মশাগী তঙাই ফদবশিং পীজবা ঙম্বখকক্তা নত্তনা মালেমগী চাউখৎ থৌরাংগী হীরমদা মায়কৈ তাকপসু ঙম্লে।
মরুপশিং,
ঙসিদি, ভারতনা 21শুবা চহি চাগী ইনফ্রাস্ত্রকচর কয়া শেমগৎলি। ঐখোয়না ইনফ্রাস্ত্রকচর বিলদিং মিসনগী মতাংদা থবক পায়খৎলি। হন্দকী শেনবা চহিসিদা, ঐখোয়না ইনফ্রাস্ত্রকচরদা চাউরাক্না লুপা করোর লাক্ষ 10 থাদখ্রে। চয়োল অমগী মমাংদা লাউথোকখিবা ভারতকী বজেত্তা ঐখোয়না ইনফ্রাস্ত্রকচরগীদমক্তা লুপা করোর লাক্ষ 11 চাদিং তৌনবা ৱারেপ লৌখ্রবনি। মসিগী চাউরবা শরুক অমদি ইনর্জী সেক্তরদা থাদগনি। লৈবাক অসিদা চাউরবা শেনফমশিং অসি রেলৱে, ৱাতরৱে, এয়রৱে নত্ত্রগা হাউজিংদবু থাদবা ওইরো, পুম্নমক অসিনা ইনর্জীগী মথৌ শোইদনা তাগনি। মসিনা মরম ওইরগা, ভারতনা মশাগী ইনর্জীগী কেপাসিতী হেনগৎহন্নবা লেপ্তনা হোৎনবগী মতৌ কয়া অদোম্না উরিবনি।
সরকারনা পায়খৎপা মসিগুম্বা রিফোর্ম কয়ানা মরম ওইরগা, ভারত্তা দোমেস্তিক গ্যাস পুথোকপগী চাং অসি খোঙজেল য়াঙনা হেনগৎলিবনি। ঐখোয়না নেচরেল গ্যাস প্রাইমারী ইনর্জী মিক্স তৌবগী হীরমদা চাদা তরুক্তগী চাদা তরামঙাদা হেনগৎহনবা কন্না হোৎনরি। মসিগীদমক্তা, মথংগী চহি 5-6কী মনুংদা চাউরাক্না বিলিয়ন দোল্লর হুম্ফু তরেৎ থাদরগনি। ঐখোয় অসি মালেমগী খ্বাইদগী চাউবা রিফাইনরীগী মনুংদসু চল্লিবনি। ঐখোয়গী রিফাইনিং তৌবগী মতিক অসি ঙসিদি MMTPA 254দগী হেল্লবনি। ঐখোয়না ভারতকী রিফাইনিং কেপাসিতীবু ইং 2030 ফাওবদা 450দা হেনগৎনবা পান্দম অমা থম্লি। ভারতনা পেত্রোকেমিকেল অমসুং শেম-শাবা লোইরবা অতোপ্পা পোত্থোক্কী হীরমদা খ্বাইদগী চাউনা এক্সপোর্ত তৌবা লৈবাক অমা ওইনসু থোক্লক্লবনি।
ঐহাক্না মসিগুম্বা খুদম কয়া পীবা ঙমগনি। অদুবু, পুম্নমক অসিগী ময়োলদা লৈরিবা ৱাফমদি, ভারতনা ইনর্জীগী লমদা হান্নদগী হেন্না শেল থাদরি হায়বসিনি। মসিনা মরম ওইরগা, থাউ, গ্যাস অমসুং ইনর্জী সেক্তরগা মরী লৈনবা মালেমগী লুচিংবা খুদিংনা ভারত্তা শেল থাদবা পাম্নরিবনি। মখোয়গুম্বা লুচিংবা কয়া ঙসি ঐহাক্কী মাঙদা ফম্লিবগে? ঐখোয়না অদোম্বু তরাম্না ওকচরি।
মরুপশিং,
সর্ক্যুলর ইকোনোমী হায়বসি ভারতকী অরিবা চৎনবীগী শরুক অমা ওইদুনা লাক্লি। অমুক্কা হন্না শিজিন্নবা হায়বগী ৱাখল্লোন অসি ঐখোয়গী পুন্সি মহিংগা শাগোন্নদুনা লাক্লি। মসিগী থৌওং অসি ইনর্জী সেক্তরগসু মরী লৈনৈ। ঐখোয়না মমাংগী চহিগী G20-সম্মিত্তা হৌদোকখিবা গ্লোবেল বাইওফুএল এল্লাইএন্স অসিদি চপ মান্নবা ইথিল অসিগী খুদম্নি, শক্তাক্নি। এল্লাইএন্স অসিনা মালেম শিনবা থুংবগী সরকার, ইন্সতিতুসন অমসুং ইন্দস্ত্রী কয়াবু অমত্তা ওইনা পুশিল্লক্লি। এল্লাইএন্স অসি হেক শেমখিবদগী, মালেম পুম্বনা মসিবু শৌগৎনরক্লি। লৈবাক 22 অমসুং মালেমগী লুপ 12না এল্লাইএন্স অসিদা তেল্লবা মতমগী মনুংদা য়াওশিল্লকখি। মসিনা বাইওফুএল শিজিন্নববু মালেম শিনবা থুংবদা খুমাং চাউশিনহল্লি। মসিনা চাউরাকপা $500কী শেন্মিৎলোনগী খুদোংচাবা লৈহনবদা তেংবাংগনি।
মরুপশিং,
ভারতনা হীরম অসিদা য়াম্না খুমাং চাউশিনবা ঙম্লে। হৌখিবা চহি খরসিদা ভারত্তা বাইওফুএল শিজিন্নবগী চাং য়াম্না হেনগৎলে। চহি 10গী মমাংদা, পেত্রোলদা ইথানোল য়ানবগী চাংনা চাউরাক্না চাদা অমগা মখায় ওইরম্মি। মসিনা ইং 2023দা চাদা 12গী চাংদা হেনগৎখি। থৌওং অসিনা মরম ওইরগা, কার্বন থাদোকপগী চাংদা চাউরাক্না মেত্রিক তন মিলিয়ন 42 হন্থহনবা ঙমখি। ঐখোয়না ইং 2025 ফাওবদা পেত্রোলদা ইথানোল ব্লেন্দিং তৌবসি চাদা 20 য়ৌহনবগী পান্দম থম্লি। অদোম কয়ানা খঙনরম্লগনি, মমাংগী ইন্দিয়া ইনর্জী ৱিক মনুংমক্তদা ভারতনা রিতেল আউতলেত 80 হেনবদা ইথানোল ব্লেন্দিং চাদা 20 তৌবগী থবক হৌখি। চপ মান্নবা থবক অসিমক ঐখোয়না ঙসি লৈবাক্কী আউতলেত লিশিং 90 হেনবদা পাংথোক্লে।
মরুপশিং,
সরকার অসিনা ৱেস্ত তু ৱেল্থ মেনেজমেন্তকী মোদেল শিজিন্নদুনা খুঙ্গংগী শেন্মিৎলোন্দা অনৌবা শাফু পীনবা কন্না হোৎনরি। থৌওং অসিগীদমক্তা, ভারত্তা কম্প্রেস বাইওগ্যাস প্লান্ত 5000 লিংখৎনবা থবক কন্না পায়খৎলি।
মরুপশিং,
মালেমগী অপুনবা মীশিংগী চাদা 17 লৈবা লৈবাক অমা ওইরগসু, ভারতকী কার্বন ইমিসন অসি মালেমগী শুপ্নগী চাদা 4খক ওইরি। মসি ওইজরবসু, ঐখোয়গী ইনর্জী মিক্স মখা তানা হেনগৎহন্নবগীদমক্তা, অকোয়বগী ফিভমগীদমক্তা খনবা ইনর্জী সোর্স শেমগৎপগী থৌওংদা ঐখোয়না অকনবা মিৎয়েং চঙলি। ঐখোয়না ইং 2070 ফাওবদা নেত জিরো ইমিসনগী পান্দম ফংবা পাম্লি। ঙসিদি, ভারত অসি রিন্যুএবল ইনর্জী ইন্সতোল কেপাসিতীগী মতাংদা মালেমগী মরিশুবা থাক্তা লৈরি। ঐখোয়গী অপুনবা ইন্সতোল ইলেক্ত্রিসিতী কেপাসিতী অসিগী মনুংদগী চাদা 40দি নন-ফোসিল ফুএল সোর্স্তগী লাক্লি। ভারতকী সোলর ইনর্জী ইন্সতোল কেপাসিতী অসি হৌখিবা দিকেদতা শরুক 20 হেন্না হেনগৎখ্রে।
সোলর ইনর্জীদা মায় ওনশিনবগী কেম্পেন অসি ভারত্তা মীয়ামগী ইহৌ অমা ওইরক্লি। ভারত্তা নুমিৎ খরনিগী মমাংমক্তদা অতোপ্পা অচৌবা মিসন অমসু হৌদোকখ্রে। ভারতকী য়ুম করোর 1গী য়ুম্থক্তা সোলর রুফতোপ খিনবগী থৌরাং অমসু লাউথোকখ্রে। থৌওং অসিনা ঐখোয়গী ইমুং করোর অমনা ইনর্জীগী লমদা মরোমদোম লেপদবা ঙম্লগনি। ঐখোয়গী য়ুমদগী পুথোকপা অহেনবা ইলেক্ত্রিসিতীবু গ্রিদতা হকথেংননা থানবা থৌরাংসু পায়খৎপা হৌখ্রে। স্কিম অসিনা ভারতকুম্বা লৈবাক্তা কয়া য়াম্না শাফু পীগনি হায়বসি অদোম্না অমুক্তা খন্দুনা য়েংবীয়ু। মসিগুম্বা অপুনবা সোলর ভেল্যু চেন অসিদা ইনভেস্ত তৌবগী চাউরবা খুদোংচাবা অমসু থৌওং অসিনা লৈহল্লগনি।
মরুপশিং,
ভারত অসি ঙসিদি গ্রীন হাইদ্রোজেনগী হীরমদা খোঙজেল য়াঙনা খুমাং চাউশিল্লি। নেস্নেল গ্রীন হাইদ্রোজেন মিসন্না মরম ওইরগা, ভারতনা হাইদ্রোজেন পুথোকপা অমসুং মীরমদা থাদোকপগী ময়োল অমা অথুবা মতমদা ওইরগনি। ভারতকী গ্রীন ইনর্জী সেক্তরনা ইনভেস্তর অমসুং ইন্দস্ত্রী অনিমকপু শোইদনা মায় পাকহনবা ঙমগনি হায়বগী ঐহাক্না থাজবা থম্লি।
মরুপশিং,
ইন্দিয়া ইনর্জী ৱিক্কে থৌরম অসি ভারত্তা পাংথোকপা শুপ্নতগী থৌরম অমখক নত্তে। থৌরম অসিদি ‘ভারতকা মালেমগা লোয়ননা অমসুং মালেমগীদমক্তা ভারত’ হায়বা ৱাখল্লোনগী মমি অমনি। অদুনা, মসিগী ফম্বাক অসিদি ইনর্জী সেক্তরগা মরী লৈনবা এক্সপেরিএন্স কয়া খন্ন-নৈনবা অমসুং লান্নবগী ফম্বাক অমা ওইরবনি।
ঐখোয় মশেলনা অমনা অমদগী তম্নবা, তেক্নোলোজী লান্নবা অমসুং সস্তেনেবল ইনর্জীগী মাইকৈদা অনৌবা লম্বী থীদোকমিন্নবগী থৌওংগা লোয়ননা তুংলমচত্তা খোঙদামিন্নরসি। ঐখোয়না মশেলনা অমনা অমদগী তম্নরসি, থাক ৱাংবা অমসুং অওনবা পুরকপা ঙম্বা তেক্নোলোজীগী মতাংদা তেংবাংমিন্নরসি অমসুং সস্তেনেবল ওইবা ইনর্জী পুথোক্নবা পাম্বৈ কয়া থীমিন্নরসি।
নুংঙাই য়াইফবা অমসুং অকোয়বগী ফিভম্না মতম কুইনা চৎকদবা তুংগী মতম অমা ঐখোয়না পুন্না শেমগৎমিন্নরসি। ফম্বাক অসিনা ঐখোয়গী অমত্তা ওইনা হোৎনমিন্নবগী ফম্বাক অমা ওইরক্কনি হায়বসি ঐহাক্কী থাজবনি। ঐহাক্না পুম্নমকপু থৌরম অসিগীদমক্তা অমুক্কা হন্না থাগৎচরি।
পুম্নমকপু হন্না হন্না থাগৎচরি।
