নমস্কার জী,
থৌরমসিদা শরুক য়ারিবা কেন্দ্রগী মন্ত্রী মন্দলগী ঐহাক্কী মরুপ্লোই, তোঙান-তোঙানবা রাজ্য কয়াগী মুখ্য মন্ত্রী, এম.পি., এম.এল.এ. অমসুং শক্নাইরবা মীওই, ইবেম্মা অমসুং ইবুংঙোশিং!
ঙসিগী থৌরম অসিদা পদ্ম মনা ফংলবা শক্নাইরবা মীওই কয়া য়াওরি, ঐহাক্না মখোয়বু তরাম্না ওকচরি। ওল ইন্দিয়া রেদিওনা ঙসি মশাগী FM সর্ভিস পাকথোক চাউথোকহল্লিবা অসি ওল ইন্দিয়া FM ওইবগী মাইকৈদা থাংজিনবা মশক থোকপা খোঙথাং অমনি। ওল ইন্দিয়া রেদিওনা FM ত্রান্সমিত্তর 91 হৌদোক্লিবা অসিদি লৈবাক্কী জিলা 85 অমসুং মীওই করোর 2গী মফমদা তম্বা খুদোল অমনি। মসিনা ভারতকী দাইবর্সিতী অমসুং মচু কয়াগী শক্তম অমসু মওং অমদা উৎলি। FM ত্রান্সমিত্তর 91না কোল্লিবা মফমশিং অসিদি এস্পিরেস্নেল জিলা অমসুং ব্লোকশিংনি। ঙসিগী মায় পাকপা অসিগীদমক্তা ওল ইন্দিয়া রেদিওবু থাগৎলি। খোঙথাং অসিদগী কান্নবা য়াম্না ফংগদৌরিবা অৱাং নোংপোক্কী মীয়াম্বুসু ঐহাক্না থাগৎলি।
মরুপশিং,
রেদিও অমসুং FM রেদিওগী ৱারী শাবা মতমদা, ঐখোয়গী চারোন শুরোনগী মীওইশিংনা মসিগী থৱাই তাজবা ভাবোক অমা ওইবগী মরী নিংশিংলকই। অদুগা ঐহাক্তি রেদিওগী হোস্ত ওইবা অমুক ফংলিবা অসিদা য়াম্না নুংঙাইবা ফাওই। নুমুৎ খরনিদা ঐহাক্কী ‘মন কী বাত’কী চাম্মশুবা তাঙ্কক্ক শন্দোক্লগনি। মীয়ামগা ইমোস্নেল ওইনা মরী লৈনবা অসিদি রেদিও খক্কী খুত্থাংদগী ওইথোক্কনি। ঐহাক্না থৌরমসিগী মতেংদগী লৈবাক্কী মপাঙ্গল অমসুং লৈবাক মীয়াম্না মশাগী থৌদাং পাংথোকপগী অপুনবা পাঙ্গলগা মরী লৈনদুনা লৈবা ঙম্লি। স্বচ্ছ ভারত, বেতি বচাও বেতি পড়াও অমসুং হর ঘর তিরঙ্গাবু মন কী বাতনা মীয়ামগী ইহৌ অমা ওইহনখি। মরম অদুনা, ঐহাকসু অদোমগী ওল ইন্দিয়া রেদিও তীমগী শরুক অমা মওং অমদা ওইরি।
মরুপশিং,
ঙসিগী থৌরম অসিগী য়াম্না অখন্নবা ৱাফম অমসু লৈ। মসিনা খুদোংচাদবা ফংজদবশিংগীদমক্তা শেম্লিবা সরকারগী পোলিসীবুসু খুমাং চাউশিনহল্লি। মসিগুম্বা খুদোংচাবা ফংদবা মীওইশিংবু, অথাপ্পা অমসুং মনুং হুৎচিনবা মফমদা লৈবা মীওইশিংনি হায়না খন্নরম্মি। হৌজিক্তি, ঐখোয়দগী মখোয়না হেন্না কন্নেক্ত ওইরে। ই-পাউ কয়া মতম চানা শন্দোকপা, খুন্নাই শেমগৎপগী থৌরাং, লৌউ-শিংউদা তেংবাংনবা অইং-অশাগী ই-পাউ পীবা, লৌমীশিংগী লৌশিং ওইনবা চিঞ্জাক অমসুং মনা-মশিংগী মমল খঙহনবা, লৌউ-শিংউদা কেমিকেল শিজিন্নবনা পুরকপা অকায়বা কয়া, লৌউ-শিংউদা এদভান্স ওইবা মেছিন শিজিন্নবা, নুপীশিংগী সেল্ফ হেল্প গ্রুপশিংদা মার্কেতকী অনৌবা প্রাইস তাকপা অমসুং মহৌশাগী অৱা অনা থোকপা মতমদা খুন্নাইদা তেংবাংবা ওইরো, মসিদা FM ত্রান্সমিত্তরনা অচৌবা থৌদাং অমা য়ারি। মসিগী মথক্তা, FMগী ইনফোতেনমেন্ত ভেল্যু লৈরিবা অসিসু হান্নগুম্না অদুমক লৈখিগনি।
মরুপশিং,
ঐখোয়গী সরকারনা তেক্নোলোজীবু মীয়াম পুম্বনা শিজিন্নবা য়াহন্নবা লেপ্তনা হোৎনরি। ভারতনা মশাগী তসেংবা তৌবা ঙম্বগী মতিক ফোংদোক্তুনা চাউখৎপা পুরক্কে হায়রবদি ভারত মচা অমত্তদা খুদোংচাবগী অৱাৎপা লৈহন্দবা হায়বসি য়াম্না মরু ওইবনি। মসিনা মোদর্ন তেক্নোলোজীবু এসেসিবল অমসুং এফোর্দেবল ওইহনবা ঙম্বগী অচৌবা পাম্বৈ অমসু ওইরি। খুঙ্গংশিংদা ওপ্তিকেল ফাইবর য়ৌহনখিবা অমসুং দেতাবু খ্বাইদগী হোঙবা মমলদা ফংহন্দুনা ইনফোর্মেসনগী এসেস য়াম্না লায়না ফংহনখি। লৈবাক্কী কাচিন কোয়া, খুঙ্গং খুদিংদা দিজিতেল ওন্তোপ্রিনর কয়া থোক্লক্লিবা অসি ঐখোয়না ঙসি উরি। মতৌ অসুম্না, পীক্না কারবার তৌবা অমসুং স্ত্রীত ভেন্দরশিংনা ইন্তর্নেত অমসুং UPIগী মতেং ফংলকপা মতমদা, মখোয়না বেঙ্কিং সর্ভিসকী কান্নবা লৌবা হৌরকই। ঙসিদি, ঐখোয়গী ঙামীশিংনা তেক্নোলোজীগী মতেংদগী ঈশিং-নুংশিৎকী অচুম্বা ই-পাউ কয়া মতম চানা ফংলে। ঐখোয়গী স্মোল ইন্তর্প্রাইসশিংনা তেক্নোলোজীগী মতেংদগী মশাগী পোত্থোকশিং লৈবাক্কী মফম খুদিংদা য়োনবা ঙম্লি। মসিদা গবর্নমেন্ত ই মার্কেতপ্লেস, হায়বদি GeMদগীসু মখোয়না মতেং ফংলি।
মরুপশিং,
লৈবাক অসিদা মমাংগী চহি খরদগী লৈরক্লিবা তেক রিভোল্যুসন অসিনা রেদিও অমসুং FMবু অনৌবা মওং অমদা শেমদোক্লে। ইন্তর্নেত থোক্লকপদগী রেদিও মুত্থখিবা নত্তে, ওনলাইন FM অমসুং পোদকাস্তকুম্বা ইনোভেতিব ওইবা থৌওং কয়াগা লোয়ননা মাঙদা অমুক লাক্লবনি। হায়বদি, দিজিতেল ইন্দিয়ানা রেদিওগী মফমদা অনৌবা ভাবোক পীবতা নত্তনা প্রোগ্রাম শন্দোকপগী অনৌবা থৌওং অমসু পীরে হায়বনি। মসিগা চপ মান্নবা ইহৌ অসিমক ব্রোদকাস্তিং মীদিয়ম খুদিংদা উরে হায়না। লৈবাক্কী খ্বাইদগী চাউবা DTH প্লেতফোর্ম ওইরিবা DD ফ্রী দিশকী সর্ভিস অসি য়ুম করোর 4গা লাক্ষ 30দা পীরি অমসুং মসিনা মালেমগী হৌজিক হৌজিক্কী ওইবা ই-পাউ কয়াবু খুঙ্গং অমসুং ঙমখৈগা নক্নবা লমদম খুদিংগী য়ুম্থোং খুদিংদা য়ৌহল্লি। দিকেদ কয়াদগী নাথৈবীদুনা লাক্লবা খুন্নাইগী কাঙলুপশিংদা এজুকেসন অমসুং ইন্তর্তেনমেন্ত য়ৌরে। মসিনা খুন্নাইগী কাঙলুপ কয়াগী মরক্তা খেন্নবা লৈববু লৌথোক্লে অমসুং মীপুম খুদিংদা ক্বালিতী ইনফোর্মেসন ফংহল্লে। তোঙান-তোঙানবা এজুকেসন কোর্স কয়া অমা DTH চেন্নেলশিংদা পীরি অমসুং য়ুনিভর্সিতী কয়াগী লৌশিংসু য়ুম্থোং খুদিংদা হকথেংননা য়ৌরে। মসিনা লৈবাক্কী মহোরোই কয়াদা, মরু ওইনা কোরোনাগী মতমদা মশক থোক্না তেংবাংখি। DTH নত্ত্রগা FM রেদিও ওইরো, মসিগুম্বা শক্তি অসিনা ভারতকী তুংগী মতমগী শক্তম অমা উহল্লি। ঐখোয়না মসিগুম্বা তুংগী মতম অসিগীদমক্তা ইশাবু শেম শাবা তাই।
মরুপশিং,
FM ত্রান্সমিত্তরনা পুরক্লিবা অনৌবা কন্নেক্তিবিতী অসিগী অখন্নবা অমসু লৈরি। FM ত্রান্সমিসন অসি লোল খুদিংদা শন্দোক্কনি। মসিগী কন্নেক্তিবিতী অসিনা কম্ম্যুনিকেসনগী খুৎলায়শিং শমজিন্নবগী মথক্তা মীয়াম্বুসু অমত্তা ওইনা শমজিন্নগনি। মসিগুম্বা থৌওং অসিদা ঐখোয়গী সরকারগী থবক তৌবগী চৎনবীগী মমি তারি। ঐখোয়না কন্নেক্তিবিতীগী মতাংদা ৱারী শাবা মতমদা, ঐখোয়গী মাঙদা লম্বী-শোরোক, রেল, এয়রপোর্তকী শক্তম লাকই। অদুবু ঐখোয়গী সরকারনা ফিজিকেল কন্নক্তিবিতীগা লোয়ননা সোসিএল কন্নেক্তিবিতীদসু মিৎয়েং চঙনবা ৱারেপ লৌখি। ঐখোয়গী সরকারনা কলচরেল কন্নেক্তিবিতীগা লোয়ননা ইন্তেলেকচুএল কন্নেক্তিবিতীগী মপাঙ্গল হেনগৎহল্লি। খুদম ওইনা হায়রবদা, ঐখোয়না মমাংগী চহি 9 অসিদা পদ্ম এৱার্দ, সহিত্য অমসুং কলা এৱার্দকী খুত্থাংদা লৈবাক্কী তোঙান-তোঙানবা মফমদা লৈবা অশেংবা হিরোশিংবু ইকায় খুম্নদুনা লাকখি। রিকম্মেন্দেসন্দা য়ুম্ফম ওইদুনা মমাংদা এৱার্দ পীরম্বা অদুগী মহুত্তা ঐখোয়না লৈবাক অমসুং খুন্নাইদা তেংবাংবগী থৌওংদা য়ুম্ফম ওইদুনা পীরে। মনা অসি ফংলবা মীওই কয়া অমা ঙসি ঐখোয়গী মরক্তা য়াওরি, মখোয়না ৱাফম অসি নিংথীনা খঙলবনি। লৈবাক্কী তোঙান-তোঙানবা মফমশিংগী ধর্মগা মরী লৈনবা মফম অমসুং লাইনিংফম কয়াবু নৌনা শেমগৎলবা মতুং অসিদা রাজ্য অমগী মীওই কয়ানা অতোপ্পা রাজ্যদা চৎনরি। তুরিস্তকী মফমশিংদা লাক্লিবা মীওই মশিং হেনগৎলক্লিবা অসি লৈবাক্কী কলচরেল কন্নেক্তিবিতী হেনগৎলক্লি হায়বগী খুদম্নি। ত্রাইবেল নিংতম লান্মীশিংগী ম্যুজিয়ম, বাবাসাহেব অম্বেদকরগী পাঞ্চতীর্থ, পি.এম. ম্যুজিয়ম অমসুং নেস্নেল ৱার মেমোরিএলগুম্বা অহানবা ওইনা পাংথোকপা থৌওংশিং অসিনা লৈবাক্কী ইন্তেলেকচুএল অমসুং ইমোস্নেল কন্নেক্তিবিতীদা অনৌবা পাঙ্গল হাপ্লি।
মরুপশিং,
কন্নেক্তিবিতীগী মখল অসিনা ওইনিংবা মখল অমা ওইজসনু, মসিগী অমত্তা ঙাইবা পান্দমদি খুদিংনা লৈবাক অমসুং মসিগী মীয়াম করোর 140বু অমত্তা ওইনা শমজিনবনি। ওল ইন্দিয়া রেদিওগুম্বা কম্ম্যুনিকেসন চেন্নেল কয়াগী পান্দম অসি মসিমক ওইগদবনি, মখোয়গী মিসনসু মসিমক ওইগদবনি। অদোম্না পান্দম অসিগা লোয়ননা তুংলমচত্তা চঙশিনগনি হায়না ঐহাক্না থাজবা থম্মি, পান্দম অসি দাইলোগী খুত্থাংদা ফংবা ঙমগনি। ঐহাক্না ওল ইন্দিয়া রেদিও অমসুং অথাপ্পা অমসুং মনুং হঞ্জিনবা মফমদা লৈরিবা ঐহাক্কী মরুপ খুদিংবু য়াইফ পাউজেল পীবগা লোয়ননা থাগৎচরি।
