গুজরাতকী রাজ্যপাল শ্রী অচার্য়া দেবব্রাত জি, গুজরাতকী চীফ মিনিস্তর শ্রী ভুপেন্দ্র পতেল, সংসদকী ঐগী মরুপ শ্রী সি.আর পতিল, গুজরাত সরকারগী মিনিস্তরশিং অমসুং উদোগকী লুচিংবশিং অমসুং মফম অসিদা তিল্লিবা ঐগী নুংশিরবা ইমুং-মনুংগী মীওইশিং!
চহি ২০গী মমাঙদা ঐখোয়না অপীকপা মরু অমা হুনখি। ঙসিদি মরু অদু অচৌবা খোঙনাং পাম্বী অমা ওইরক্লে। ভাইব্রেন্ত গুজরাত গ্লোবেল সম্মিৎ চহি ২০ মপুংফারকপা থৌরমদা শরুক য়াবদা ঐ অপেনবা পোকই। ভাইব্রেন্ত গুজরাত অসি শুপ্নগী ব্রান্দিংগী থৌরম অমা নত্তে, মসি মরী চেৎশিনহন্নবগী থৌরম অমনি হায়না মমাঙদা ঐনা ফোঙদোকখিবা অদু ঐ নিংশিংলি। মসিগী মাইপাক্লবা মীফম অসি মালেমগী ব্রান্দ অমা ওইবা য়াই, অদুবু মসি ঐগী ওইনা অকনবা মরী অমগী খুদম অমনি। মীফম অসি ঐহাক অমসুং রাজ্য অসিগী মীওই করোর ৭গী তৌবা ঙম্বশিংগী লৈনবা অচেৎপা মরী অমগী খুদম অমনি। মসিগী মরী অসি মীয়াম্না ঐহাক নুংশিবদা য়ুম্ফম ওইবনি।
মরুপশিং,
শ্বামী বিবেকানন্দ জিনা হায়রম্বা ৱাফম অমা ঙসি ঐ নিংশিংলি। থবক খুদিংমক তাঙ্কক অহুম থোক্না পাংথোকই হায়না শ্বামী বিবেকানন্দ জিনা হায়রমখি। অহানবদা মীয়াম্না থবক অদু কল্লক্কনি, মখোয়না থবক অদুগী মায়োক্তা লৈগনি অমসুং তুংদা থবক অদু য়ারক্কনি। মসিগী অনৌবা ৱাখল্লোন অসি মতম অদুদগী য়াম্না ঙনখৎনা খঙখি। চহি ২০ অসি শাংলবা মতমনি। ২০০১গী য়ুহা হাবা মতুংদা গুজরাতকী ফিবম করি ওইখি হায়বা ঙসিগী নহারোলশিংনা খঙবা ঙম্লোই। য়ুহা হাবা মমাঙদা ফাওবা গুজরাত শাংলবা ইকং অমা মায়োক্নখি। য়ুহা হাবা অদুদা মীওই লিশিং কয়া শিখি। মীওই মিল্লিয়ন কয়া শোকহনখি অমসুং মখোয়গী য়ুমশিং থাদোকখি। চাক তাংবা অমসুং য়ুহা হাবগী মথক্তা, চপ মান্নবা মতমদা গুজরাত্তা অচৌবা থৌদোক অমা থৌদোকখি। মধাবপুরা মার্সেন্তাইল কোওপরেতিপ বেঙ্ক কায়বদগী অতোপ্পা কোওপরেতিপ বেঙ্ক ১৩৩শু কায়থরক্তুনা হেন্না অৱাবা মায়োক্নখি।
গুজরাতকী শেন-থুমগী ফিবম কাং-খোং চায়খি। মতম অদুদা, ঐ অহানবা ওইনা এম.এল.এম অমা ওইখি, মসিগী থৌদাং অসি ঐগী অনৌবা অমসু ওইখি, সরকার অমা চলাইনবা ঐগী এক্সপেরিয়েন্স লৈখিদে। চৈরক অদুদা, অতোপ্পা থৌদোক অমা থোকখি। তমথিরবা গোধারা থৌদোক্না মরম ওইদুনা গুজরাত্তা হিংশা থোরকখি। অসিগুম্বা তমথিরবা ফিবম অমা থোরক্কনি হায়বা কনা অমতনা থাজখিদে। ফিবম অসিদা, চীফ মিনিস্তর অমা ওইবগী ঐগী এক্সপেরিয়েন্স ৱাৎলবসু, ঐনা গুজরাত অমসুং রাজ্য অসিগী মীয়ামদা মপুংফানা থাজবা থমখি। অদুবু মখোয়গী পান্দম লৈখিবা মীওইশিংনা থৌদোকশিং অদু হৌজিক ফাওবা মখোয়গী ওইবা মওংদা নৈনরি।
গুজরাত্তগী নহারোলশিং, গুজরাত্তগী উদোগ, গুজরাত্তগী ললোনবশিং রাজ্য অসি থাদোক্তুনা চৎনবা হায়খি, গুজরাত অসি হুন্দোকখাক অমা ওইদুনা রাজ্য অসি লৈবাক্কী পোৎলুম অমা ওইগনি। মালেমদা গুজরাতকী মিংচৎ থিনবা লৌতুনখি। নিংবা কাইবগী ফিবম অমা শেমগৎনবা হোৎনখি। কৈদৌঙৈদা গুজরাত মশা মরোমদোম লেপচবা ঙম্লরোই হায়খি। গুজরাত অমুক হন্না শেমগৎনবা ঐখোয়না খনবা খক নত্তনা রাজ্যগী তুংগী থৌরাংশু তৌখি অমসুং মসিগীদমক ঐখোয়না ভাইব্রেন্ত গুজরাত সম্মিৎ অসি মাঙজিল থাবা পাম্বৈ ওইখি। ভাইব্রেন্ত গুজরাত সম্মিৎ অসি রাজ্য অসিগী পুক্নিং থৌগৎনবা অমসুং মালেমগা থবক তৌমিন্ননবা পাম্বৈ অমা ওইরকখি।
সম্মিৎ অসি মালেমদা রাজ্য সরকারগী ৱারেপ লৌবা ঙম্বগী শক্তি অদু উৎনবা অমসুং লৈবাক অসিগী উদোগকী খুদোংচাবশিং খঙহন্নবা পাম্বৈ অমা ওইরকখি। মীফম অসি ভারত্তা তোঙান-তোঙানবা হিরমশিংদা লৈরিবা মপান নাইদ্রবা খুদোংচাবশিং উৎথোক্নবা পাম্বৈ অমা ওইরে। মসিনা ভারতকী হৈশিংবা লৈবাক মনুংদা শীজিন্নবা ঙমহল্লে। হিরম কয়াদা লৈরিবা মশিং থিঙমদ্রবা খুদোংচাবশিং উৎনবা, লৈবাক অসিগী হৈথোই-শিংথোইবশিং উৎনবা অমসুং লৈবাক অসিগী ঈশ্বরনা পীবা খুদোল, ফজবা অমসুং নাৎকী চৎনবীশিং খঙহন্নবা ভাইব্রেন্ত গুজরাত সম্মিৎ মপুংফানা শীজিন্নরে। ভাইব্রেন্ত গুজরাত সম্মিৎ অসি রাজ্য অসিগী উদোগ চাউখৎনবা কুহ্মৈ অমা ওইরে অমসুং মসি নবরাত্রি অমসুং গারবাগী হরাওবা মরক্তা পাংথোক্লি।
মরুপশিং,
ঙসি ঐনা অদোমদা ৱাফম অমা নিংশিংবা পাম্মী। ৱাফম অসি চহি ২০ শুরে, অৱাবা অমসুং নুংঙাইবা অনিমক নিংশিংবা হায়বসি হৌনশানি। ঙসিদি মালেম্না ভাইব্রেন্ত গুজরাতকী মাইপাকপা উরে। মতম অমগী কেন্দ্র সরকারনা গুজরাত্তা তোখায়বা মীৎয়েং অমা য়েংখিবা মতম অমদা ভাইব্রেন্ত গুজরাত পাংথোকখি। গুজরাত চাউখৎপা অসি লৈবাক অসি চাউখৎপনি হায়না ঐনা মতম পুম্নমক্তা হায়খি। মতম অদুদা কেন্দ্র সরকারনা গুজরাত চাউখৎপা অসি রাজনিতিগী প্রিজম অমদগী য়েংখি। ভাইব্রেন্ত গুজরাত সম্মিৎতা কেন্দ্র সরকারগী মিনিস্তরশিং শরুক য়ানবা হায়বদা য়াখিদে। মতেং পাংনবা থোং হাংদোকপগী মহুত্তা মখোয়না থোং থিংজিনখি।
মপানগী ইনভেস্তরশিং গুজরাত্তা চৎতনবা কিহনখি। কিহনবা কয়া লৈজরবসু মপানগী ইনভেস্তরশিংনা গুজরাত্তা শেন থাদখি। মসি অখন্নবা খুদোংচাবা পীবদগী নত্তে। অফবা লৈঙাক, ফজবা অমসুং থৌশিলদা য়ুম্ফম ওইবা লৈঙাক, চাউখৎপা অমসুং অরোন-অথুপ লৈতবা চপ মান্নবা সিস্তেম অমা লৈবা অসিনা গুজরাত পাম্নবগী মরুওইবা মরম্নি। ভাইব্রেন্ত গুজরাত হৌদোকপা মতমদা মপানগী গেস্তশিং লৈনবা গুজরাত্তা অচৌবা হোতেলশিং লৈরমদে। সরকারগী গেস্ত হাওসশিং থল্লবা মতমদা, অতোপ্পা মীওইশিং কদাইদা লৈগনি হায়বগী ৱাহং অমা ঐখোয়গী মাঙদা তাদুনা লৈখি। অসিগুম্বা ফিবম অমদা, নখোয়গী গেস্ত হাওসশিং লৈবরা হায়না ঐনা বিজিনেস হাওসশিংদা হংখি, মখোয়না মদু শীজিন্নবা য়াগনি হায়খি। ঐখোয়না য়ুনিভর্সিতিগী গেস্ত হাওস ফাওবা শীজিন্নখি। মীওই খরদি বারোদা ফাওবদা লৈখি।
মরুপশিং,
মালেম শীনবা থুংনা শেন-থুমগী অৱাবা মায়োক্নবা মতমদা পাংথোকখিবা ২০০৯গী ভাইব্রেন্ত গুজরাত সম্মিৎ অদু ঐ নিংশিংলি। মীওই খুদিংমক্না ঐঙোন্দা হায়খি, ঐখোয়গী ওফিসারশিং ফাওবনা সার চানবীদুনা তাঞ্জা অসিদা ভাইব্রেন্ত গুজরাত য়ৈথোকপীয়ু, মসি মাইথিগনি, কনা অমতা লাক্লোই হায়খি। অদুবু মতম অদুদা ঐনা হায়খি, য়ৈথোক্লোই, মসি পাংথোক্কনি, করিগুম্বা মসি মাইথিরবসু, মরৈ য়েৎকনি, অমসুং মসিগী হৈনবী অসি থাদোকপা ঙম্লোই। মালেম শীনবা থুংনা শেন-থুমগী অৱাবা মায়োক্নবা মতমদা ভাইব্রেন্ত গুজরাত পাংথোকখি। ২০০৯দা ভাইব্রেন্ত গুজরাত্তা মাইপাকপগী অনৌবা পন্দুব অমা হাপচিনখি।
মরুপশিং,
সম্মিৎ অসিগী চাউখৎপগী খোঙচত্তা ভাইব্রেন্ত গুজরাতকী মাইপাকসু খঙবা ঙমগনি। ২০০৩ গী মীফমদা মীওই চা খর খক শরুক য়াখি। মসি য়াম্না পীকপা থৌরম অমা ওইখি। ঙসিদি মীওই ৪০০০০ হেন্না অমসুং লৈবাক ১৩৫ হেন্না শরুক য়ারে। ২০০৩দা একজিবিতর ৩০ শরুক য়ারম্বদগী ঙসিদি একজিবিতর ২০০০ হেন্না শরুক য়ারে।
মরুপশিং,
ভাইব্রেন্ত গুজরাত মাইপাকপগী মরুওইবা মরম কয়া লৈরি। মসি মাইপাকপা অসিদা অনৌবা ৱাখল অমসুং থবক ওইনা পাংথোকপা য়াওরি। করিগুম্বা ঐনা অনৌবা থবক অমগী ৱারি শাবা মতমদা, ভারতকী মীয়াম্না ভাইব্রেন্ত গুজরাত আসি অখন্নবা থবক অমনি হায়না ফোঙদোকপা তাগনি। অদুবু মতমগী মতুংইন্না মাইপাক্লকপদগী মসিগী মরুওইবা অদু খঙলে। মতম খরগী মতুংদা, অতোপ্পা রাজ্যশিং মখোয় মশাগী ললোন-ইতিক অমসুং ইনভেস্তর সম্মিৎশিং পাংথোকপা হৌরকখ্রে। অতোপ্পা মরুওইবা মরম অমনা ৱাখলদা শাগৎপা অসিনি। ময়ামগা মানদনা ৱাখল খন্নবগী থৌনা অদু ঐখোয়না উৎলে। মতম অদুদা ঐখোয়না রাজ্য থাক্তা করিগুম্বা অচৌবা খর খনখি, জাতিগী থাক্তা ফাওবা খন্দবা করিগুম্বা খর খনখি। লৈবাক অমা ঐখোয়গী মরুপ ওইনবা থৌনা অদু ঐখোয়না উৎখি। মালেমগী চাউখৎলবা লৈবাক অমা অপীকপা রাজ্য অমগী পার্তনর কন্ত্রি অমা ওইরকখি। মসিগী ৱাখল অসি ঙসিদি পীক্না উরমগনি। মতম অদুদা করি ওইরমগনি হায়বা খন্দুনা য়েংউ। মদু থবক ওইনা পাংথোকখি। মসি লৈবাক অসিদা রাজ্য অমা খক্তগী অচৌবা থবক অমা ওইখি।
মরুপশিং,
অনৌবা ৱাখল্লোন অদু অচৌবা ওইরবসু, মসি থবক ওইনা পাংথোকপা অমসুং মহৈ চাহনবা হায়বসি তঙাইফদবনি। অসিগুম্বা থৌরম অসি পাংথোক্নবা নিংথিংনা থৌরাং তৌবা, কেপাসিতি বিল্দিংদা শেন থাদবা, চেকশিন্না য়েংশিনবা অমসুং কৎথোকপা দরকার ওই। ভাইব্রেন্ত গুজরাতনা রাজ্য সরকারগা চপ মান্নবা ওফিসারশিং, ফন্দ অমসুং চৎন-কাংলোনশিং লৈদুনা অতোপ্পা সরকার অমতনা ৱাখলদা ফাওবা খন্দ্রিবা মাইপাকপশিং ফংবা ঙমখিবনি।
মরুপশিং,
ঙসিদি ভাইব্রেন্ত গুজরাত অমুক্তং পাংথোকপা থৌরম অমদগী ইন্সিতিতুসন অমা ওইরক্লে। সরকার মনুং অমসুং মপান্দা মসিগী থবকশিং চহি চুপ্পা মশা মরোমদোম পাংথোক্লে। চীফ মিনিস্তরশিংগী মহুত্তা, ২০০১দা গুজরাত্তা অহানবা ওইনা সেনিয়ার ওফিসারশিং লাকখি, অদুগুম্বা ওফিসারশিংনা ঙসিদি গুজরাতকী থবক পুম্নমক পাংথোক্লে। মতমগী অহোংবা লাক্লে, অদুবু হোঙদবা অমদি লৈরে। মতম খুদিং ভাইব্রেন্ত গুজরাত মখা তানা অনৌবা মাইপাকপশিং ওইখি। থবকশিং ঐখোয়না মওং-মরিল তানা পাংথোকপদগী মসি ওইথোকপনি। মসিগা লোয়ননা ইনফ্রাস্ত্রকচর শেমগৎনবা অকনবা মীৎয়েং চঙখি, মমাংদা থৌরম অসি তেগোর হোলদা পাংথোকখি, মতম খর তেন্ত অমা খন্দুনা সাইন্স সিতিদা পাংথোকখি অমসুং ঙসিদি মসি মহাত্মা মন্দির অমা ওইরে।
মরুপশিং,
ভাইব্রেন্ত গুজরাত সম্মিৎতা লৈরিবা ঐখোয়গী ৱাখল অসি ঐখোয়গী লৈবাক্তা পাক্না খঙদে। ঐখোয়না মীফম অসি গুজরাত্তা পাংথোক্লি অদুবু মসিগী কান্নবা রাজ্য খুদিংমক্না ফংবা ঐখোয়না পাম্মী। ঙসি ফাওবা ঐখোয়গী ৱাখল্লোন খঙবা মীওই য়ামদ্রি। গুজরাতকী চীফ মিনিস্তর অমনা লৈবাক অসিগী চীফ মিনিস্তরশিংদা মীফম অমা পাংথোক্লি হায়বা মতম অদুদা হায়খি। ভাইব্রেন্ত গুজরাত সম্মিৎতা শরুক য়ানবা অতোপ্পা রাজ্যশিংদসু খুদোংচাবা পীখি। অদোম লাকখি, মীফম অসিদা অদোমগী শক্তি পুথোকখি, মসিগী কান্নবা লৌখি। ভাইব্রেন্ত সম্মিৎ মনুংদা রাজ্য কয়া লাকখি অমসুং ঐখোয়না ওরিসা সম্মিৎ, তেলুগু সম্মিৎ, হরিয়ানা সম্মিৎ, জম্মু অমসুং কাস্মির সম্মিৎ পাংথোকখি। মসিগী মথক্তা, গুজরাত্তা অয়ুর্বেদা সম্মিৎ অমা, ওল ইন্দিয়া লোয়ার্স সম্মিৎ অমা পাংথোকখি। মখল কয়াগী সম্মিৎশিং ওইনবা ঐখোয়না হোৎনখি।
মরুপশিং,
২০শুবা চহিচাদা ঐখোয়গী গুজরাতকী শক্তম করি ওইখি? ঐখোয় ললোন-ইতিক্কী রাজ্য অমা ওইনা খঙনখি। ২০শুবা চহিচাদগী ২১শুবা চহিচা ফাওবদা পুরকখিবা অওনবশিংনা গুজরাত লৌউ-শিংউ অমসুং শেন-থুমগী মফম অমা ওইরে অমসুং ইন্দস্ত্রি অমসুং মেনুফেকচরিংগী থবকশিংগীদমক রাজ্য অসিগী অনৌবা মশক অমা তাক্লে। ললোন-ইতিক্তা য়ুম্ফম ওইবা গুজরাতকী মিংচৎ হেনগৎলে। ভাইব্রেন্ত গুজরাতন অনৌবা থবকশিং, ৱাখল্লোনশিং অমসুং উদোগশিংগী ইনকুবেতর অমা ওইনা থবক তৌদুনা অসিগুম্বা মাইপাকপশিং অসি পুরকপনি। হৌখিবা চহি ২০দা ঐখোয়গী মাইপাকপগী ৱারি অমসুং কেস স্তদিজ লিশিং কয়া লৈরে।
মসি ফবা থৌশিল অমসুং প্রোজেক ফজনা পায়খৎপদগী পাংথোকপা ঙম্বনি। হৌখিবা চহি ২০ অসিদা তেক্সতাইল অমসুং এপ্পারেল ইন্দস্ত্রিদা শেন থাদবা অমসুং থবক ফংবা হেনগৎলে অমসুং রেকোর্দ ওইনা মপান্দা থাদোকপা হেনগৎলে। ২০০১গা চাংদম্নবদা ওতোমোবাইল সেক্তরদা শেন থাদবা শরুক ৯ হেনগৎলে, মেনুফেকচরিংগী পোৎথোক শরুক ১২ হেনগৎলে। ঙসি ভারতকী দাই অমসুং ইন্তরমেদিয়েত মেনুফেকচরিংদা গুজরাতনা চাদা ৭৫ মতেং পাংলে। লৈবাক অসিদা এগ্রো অমসুং ফুদ প্রোসেশিং ইন্দস্ত্রিদা খ্বাইদগী য়াম্না শেন থাদরে, ফুদ প্রোসেশিং য়ুনিত ৩০,০০০ হেন্না গুজরাত্তা মথৌ তৌরে, মেদিকেল দিভাইস মেনুফেকচরিংদা চাদা ৫০ হেন্না পুথোক্লে অমসুং কার্দিয়ক স্তেন্তশিং পুথোকপদা চাদা ৮০ হেন্না শরুক য়ারে, মালেমগী দাইমন্দগী চাদা ৭০ হেন্না প্রোসেস তৌরে, ভারতকী মপান্দা দাইমন্দ থাদোকপগী চাদা ৮০ শরুক য়ারে অমসুং সেরামিক তাইলশিং, সেনিতরিগী পোৎলমশিং অমসুং তোঙান-তোঙানবা সেরামিক পোৎথোকশিং শাবা মেনুফেকচরিং য়ুনিত লিশিং ১০ রোম্না লৈবাক অসিগী সেরামিক কৈথেলদা চাদা ৯০ শরুক য়ারে। হৌজিক্কী ত্রান্সসেক্সনগী ভেলু য়ু.এস দোল্লর বিল্লিয়ন ২ ওইদুনা ভারত্তা গুজরাতনা খ্বাইদগী চাউবা মপান্দা থাদোকপা রাজ্য ওইরি। লাক্কদৌরিবা মতমশিংদা দিফেন্স মেনুফেকচরিং অচৌবা সেক্তর অমা ওইরগনি।
মরুপশিং,
ঐখোয়না ভাইব্রেন্ত গুজরাত হৌদোকপা মতমদা, ঐখোয়না খনবদি লৈবাক অসিগী চাউখৎপদা রাজ্য অসিনা ইঞ্জিন অমা ওইহনবনি। ঐনা হায়রিবা অসি অদোম খঙবীবরা? ঐখোয়গী ৱাখলদি গুজরাতনা লৈবাক অসিগী চাউখৎপগী ইঞ্জিন ওইবনি। মীওই খর খক্তনা মসি খঙবা ঙমখি। মসিগী পান্দম অসি লৈবাক অসিনা থবক ওইনা উরে। লৈবাক অসিগী থবক তৌনবা ঐখোয়দা ২০১৪দা খুদোংচাবা পীবা মতমদা, ঐখোয়গী পান্দম পাকথোক-চাউথোকহনখি অমসুং ঐখোয়গী পান্দমদি ভারতনা মালেম শীনবা থুংবগী চাউখৎপগী ইঞ্জিন ওইবনি। ভারতনা মালেমগী চাউখৎপগী ইঞ্জিন ওইনবা ২০১৪গী পান্দম অদু মালেমগী এজেন্সিশিং অমসুং অখঙ-অহৈশিংগী মরক্তা খোন্থাং য়ৈখি। ঙসি মালেমদা ভারত য়াংনা চাউখৎলিবা ইকোনোমি ওইরে। ভারত মালেমগী ইকোনোমিক পৱারহাওস অমা ওইনবগী ফিবম অমদা হৌজিক ঐখোয় লৈরি। হৌজিক ভারত মালেমদা অহুমশুবা খ্বাইদগী চাউবা ইকোনোমি ওইরগনি। মসি মোদীনা পীবা থাজবনি। ভারতকী অনৌবা খুদোংচাবশিং পীগদবা হিরমশিংদা উদোগকী মীওইশিংনা পুক্নিং চঙগদবনি।
পান্দম অসিদা ভাইব্রেন্ত গুজরাতনা কমদৌনা মথৌ হাপকনি হায়বসু ঐখোয় খল্লি। সম্মিৎ অসিদগী কমদৌনা ঐখোয়গী স্তার্দঅপ ইকোসিস্তেম্না কান্নবা লৌগনি হায়বা ঐখোয়না খল্লি। ঙসি এগ্রিতে অসি অনৌবা হিরম অমা ওইরক্লে। ফুদ প্রোসেসিং সেক্তরসু য়াংনা পাথোক-চাউথোরক্লি। শ্রী-অন্ন শীজিন্নবা হেনগৎলক্তুনা, ঙসিদি ঐখোয়গী মিল্লেতশিং মালেমগী দাইনিং তেবদা মফম অমা কল্লে। শ্রী অন্না শীজিন্নবনা অনৌবা খুদোংচাবা কয়া পীরে। শেম-শাবা, য়োম্বা, মসি মশক হোংহনবা অমসুং মালেমগী কৈথেল য়ৌহন্নবা ওইথোকপশিংনা অনৌবা খুদোংচাবা কয়া পীরে।
ঙসিগী মপুংফানা শম্নরবা মালেম অসিদা, শেন-থুমগী ইন্সিতিতুনশিং মতেং পীনবা হেনগৎহনবা দরকার ওইরে। গুজরাতকী হান্না গিফ সিতি লৈজরে, মসিগী দরকার ওইবা নোংম-নোংমগী হেনগৎলক্লি। ঐখোয়গী সরকারনা পুক্নিং চঙনা হোৎনরিবা অসি গিফ সিতিদা মমি তারে। মালেমদা খ্বাইদগী ফবা চৎন-কাংলোন শেম্নবা সেন্তর, স্তেৎ অমসুং আই.এফ.এস.সি ওথোরিতিশিং পুন্না থবক তৌমিন্নগদবনি। লৈবাক অসি মালেমদা চাংদম্নবা য়াবা শেন-থুমগী কৈথেল অমা ওইনা শেমগৎনবা ঐখোয়না থবকশিং মপাঙ্গল কনখৎহনগদবনি। মসিগীদমক ঐখোয়গী লৈবাক মনুংগী মশিং য়াম্লবা দরকার ওইরবশিংগী খুদোংচাবা লৌগদবনি। ভাইব্রেন্ত গুজরাতকী পান্দমদি কমদৌনা গিফ সিতি মপাঙ্গল কনখৎহনগনি অমসুং মসি মালেমদা শরুক য়াবা হেনগৎহনবা অসিনি।
মরুপশিং,
ভাইব্রেন্ত গুজরাত মাইপাকপগী ৱারি মরক্তা, মসি লেপ্পা মতম নত্তে হায়না ঐনা হায়গনি। মথং চহি ২০ অসি হৌখিবা চহি ২০দগী হেন্না মরুওই। ভাইব্রেন্ত গুজরাতনা চহি ৪০ মপুংফারকপা মতমদা, লৈবাক অসিনা নিংতম্বা চহি ১০০শুবা থৌরম পাংথোক্কদবা মতম অদু কুইদ্রে। হৌজিক অসি ভারত ২০৪৭দা চাউখৎলবা অমসুং অত্মানির্ভর লৈবাক অমা ওইনবা লম্বী অমা শেমগদবা মতম অদু য়ৌরে। মীফম অসিনা মাইকৈ অসিদা চঙশিনহনগনি হায়বগী থাজবা ঐনা থম্লি।
ভাইব্রেন্স সম্মিৎ অসি জনুৱারিদা পাংথোক্নবা লেপ্লে। রাজ্য সরকার অমসুং মালেমগী ইন্দস্ত্রিগী মরুপশিং মপুংফানা শরুক য়াগনি, অদুবু ঙসি অদোম্না ঐ মফম অসিদা কৌবা অসি হরাওবা অমনি। ঐসু চহি ২০ নহা ওইখৎলে অমসুং গুজরাতকী অৱাবা মতমশিং অদু নিংশিংদ্রে। মরুপশিং, করিনা পুন্সিদা খ্বাইদগী অপেনবা ওইগনি? চহি ২০ অসিগীদমক ঐনা অমুক হন্না গুজরাত সরকারা থাগৎপা ফোঙদোকচরি। অদোমগা লোয়ননা নুংঙাইবা মতমশিং নিংশিংনবা খুদোংচাবা পীবগীদমক অদোম থাগৎচরি অমসুং য়াইফ-পাউজেল পীজরি।
