নমস্কার!
মন্ত্রী মন্দলদা লৈরিবা ঐহাক্কী মরুপ, রাজ্য সরকারগী মীহুৎ, সিভিল ওর্গনাইজেসনশিংগা মরী লৈনবা মরুপ্লোই, মরু ওইনা অৱাং নোংপোক্কী অরাপ্পা মফমশিংদা লৈরিবা মরুপশিং!
ইচিল ইনাওশিং,
বজেৎকী মতুংদা বজেত্তা লাউথোকখিবশিংবু থবক্তা ওন্থোক্নবা ঙসি, অদোম স্তেকহোলদর খুদিংনা খন্ন-নৈনরিবা অসি য়াম্না মশক থোকপনি। মসি ঐখোয়গী সরকারগী পোলিসী অমসুং থবক ওইনা পাংথোক্লিবা সবকা সাথ, সবকা বিকাস, সবকা বিশ্বাস অমসুং সবকা প্রয়াসকী অসিগী মহৈনি। ঙসিগী থীম অমা ওইরিবা – “নাগ্রিক অমত্তবু হুন্দোক্তুনা থম্লমদবা” অসিসু হায়রিবা অসিদগী থোক্লকপনি। নীংতম্বগী অমৃতকী মতমগীদমক্তা ঐখোয়না লৌরিবা ৱারেপ অসি মীয়াম পুন্না হোৎনমিন্নবা মতুংদতা ফংবা ঙমগনি। মরম অদুনা, হৌখিবা চহিশিংদা ঐখোয়না লৈবাক্কী মীয়াম খুদিংগী মপাঙ্গল হাপ্নবা লেপ্তনা হোৎনদুনা লাক্লিবনি। লৈবাক্কী খুঙ্গংগী লাইরবশিংগী পক্কা য়ুম, অমাংশঙ, গ্যাস, মৈ, ঈশিং, শোরোক্কুম্বা তঙাই ফদবা পোৎলমশিং পীবা হায়বসি ঐখোয়গী স্কিমশিংগী পান্দম্নি। লৈবাক্না হীরম অসিদা মায় পাকপা কয়াসু ফংখ্রবনি। অদুগা হৌজিক্কী মতমসিনা স্কিমশিং অসিবু পাক্তক্ননা সেচ্যুরেসন তৌহনবা অমসুং ১০০%গী চাংদা মায় পাকপা ফংহনবনি। মসিগীদমক্তা ঐখোয়না অনৌবা থৌরাং কয়া য়াৎপগী তঙাই ফদে। মোনিতরিং তৌদুনা, একাউন্তেবল ওইহন্দুনা, তেক্নোলোজী নীংথিজনা শিজিন্নদুনা ঐখোয়না থৌওংশিং অসি পাংথোক্কদবনি। অনৌবা খুদোঙচাবা কয়া শেম্বা তাবনি। ঐখোয়গী পাঙ্গল খুদিংমক থাদগদবনি।
মরুপশিং,
হন্দক্কী বজেৎ অসিদা হায়রিবা স্কিমশিং অসিবু সেচ্যুরেত তৌনবগীদমক্তা সরকারগী মাইকৈদগী মশক নাইবা রোদমেপ অমা শেম্লবনি। বজেৎ অসিদা পি.এম. অৱস য়োজনা, গ্রামিন শরক য়োজনা, জল জীবন মিসন, অৱাং নোংপোক্কী কন্নেক্তিবিতী, খুঙ্গংশিংগী ব্রোদবেন্দ কন্নেক্তিবিতীগুম্বা য়োজনা খুদিংগী মশক থোকপা খুদোংচাবা কয়া য়াওরি। হায়রিবশিং অসি খুঙ্গংগী মফমশিং, অৱাং নোংপোক্কী ঙমখৈগী লমদমশিং অমসুং এস্পিরেস্নেল দিস্ত্রিক্তশিংগী খুদোংচাবশিংবু সেচ্যুরেত তৌবগী মাইকৈদা হোৎনবগী শরুক অমনি। বজেৎ অসিদা ভাইব্রেন্ত ভিলেজ প্রোগ্রাম লাউথোকখ্রে, মসিনা ঐখোয়গী তোখাই তারবা খুঙ্গংশিংগী চাউখৎপদা তেংবাংবগী মরু ওইবা থৌওং অমনি। প্রধান মন্ত্রীনা অৱাং নোংপোক চাউখৎহন্নবা খোঙথাং কয়া পায়খৎলিবশিং অসিনা, হায়বদি, পি.এম. দিভাইন নোর্থ ইস্তকী ওইনা অকক্নবা মতমগী মনুংদা ১০০%গী চাংদা চাউখৎপা পুরকপদা মশক থোক্না তেংবাংগনি।
মরুপশিং,
খুঙ্গং চাউখৎপগীদমক্তা মফমশিং অসিগী য়ুম অমসুং লমগী পনখৈ মতিক চানা খায়বগী য়াম্না মরু ওইবা লৈ। স্বমিত্বা য়োজনানা মফমসিদা য়াম্না তেংবাংগনি। মসিগী মখাদা, হৌজিক্কী ওইনা, প্রোপর্তী কার্দ লাখ ৪০দগী হেনবা পীথোকখ্রে। লেন্দ রেকোর্দ রেজিস্তর তৌনবগীদমক্তা লৈবাক্কী ওইবা পথাপ অমা অমসুং তোপ-তোপ্পা লেন্দ আইদেন্তিফিকেসন পিন অসিনা য়াম্না চাউবা খোঙথাং অমা ওইগনি। রেভেন্যু দিপার্তমেন্তশিংদা মীচম মীয়াম্না চত্থোক চৎশিন য়াম্না তৌহন্দনবা ঐখোয়না হোৎনগদবনি। লেন্দ রেকোর্দ দিজিতাইজেসন তৌবা অমসুং দিমার্কেসন তৌবগী থৌওংবু মতমগা চুনবা তেক্নোলোজী শিজিন্নদুনা পাংথোকপগী ঙসিদি মথৌ তারে। করিগুম্বা রাজ্যশিংনা অকক্নবা মতমগী মনুংদা হায়রিবা থৌওংশিং পায়খৎলবদি, খুঙ্গং চাউখৎপগী খোঙজেল হেন্না থুজিনগনি অমসুং খুঙ্গংশিংদা কারবারগী থৌওংশিং হেন্না লায়হনবদা তেংবাংগনি হায়বগী ঐহাক্না থাজৈ। তোঙান-তোঙানবা স্কিমশিংগী ১০০%গী চাংদা পান্দম ফংনবগীদমক্তা ঐখোয়না অনৌবা তেক্নোলোজীদা মিৎয়েং চঙবা তাবনি, মতৌ অসুম্না ঐখোয়না প্রোজেক্তশিংগসু মরী লৈনবা ঙমগনি অমসুং ক্বালিতীসু লৈহনবা ঙমগনি।
মরুপশিং,
হন্দক্কী চহিগী বজেৎ অসিদা পি.এম. অৱস য়োজনাগীদমক্তা লুপা করোর লিশিং ৪৮গী শেনফম কায়থখ্রবনি। হন্দক্কী চহিদা য়ুম লাখ ৮০ শাবগী পান্দম লৈরিবা অসিবুসু লেপখ্রবা মতমগী মনুংদা পায়খৎপা ঙম্নবা ঐখোয়না খোঙজেল থুনা থবক পায়খৎপা তাবনি। লৈবাক্কী শহর ৬তা এফোর্দেবল হাউজিংগী অনৌবা তেক্নোলোজী শিজিন্নদুনা লাইৎ হাউস প্রোজেক্ত ৬তা থবক পায়খৎলিবসি অদোম্নসু খঙলম্লগনি। অসিগুম্বা তেক্নোলোজী অসিবু খুঙ্গংশিংদা মতৌ করম্না শিজিন্নগনি, ঐখোয়গী ইকোসীস্তেমগী জোনশিংদা পাংথোক্লিবা কন্সত্রক্সন্দা ঐখোয়না অনৌবা তেক্নোলোজী মতৌ করম্না শিজিন্নবা য়াগনি হায়বসিগী মতাংদা ঐখোয়না কুপ্না খন্ন-নৈনবগী মথৌ তারি। খুঙ্গং, চিংগী লম, অৱাং নোংপোক লমদমগী শোরোকশিং মেন্তেনেন্স তৌবসিসু য়াম্না চাউনা শিংনবা অমনি। মফমশিংগী জিওগ্রাফীগী ফিভমগী মতুং ইন্না মতম কুইনা চৎনবগীদমক্তা করম্বা মেতরিএল শিজিন্নগদগে মশক খঙদোকপা হায়বসিগী ৱারোইশিন পুরকপসু য়াম্না মরু ওইরি।
মরুপশিং,
জল জীবন মিসনগী মখাদা চাউরাক্না কনেক্সন করোর ৪ পীনবা ঐখোয়না পান্দম থম্লি। পান্দমশিং অসিবু ফংনবা ঐখোয়না হান্নদগী হেন্না হোৎনবগী মথৌ তারি। হৌজিক থারিবা পাইপ্লাইন, মদুদা ঈশিং চেল্লিবা অসিগী ক্বালিতীদা অহেনবা মিৎয়েং চঙনবা ঐহাক্না রাজ্য সরকারশিংগী মফমদা খঙহল্লি। খুঙ্গংগী থাক্তা অসিগুম্বা মপু ওইবগী ৱাখল্লোন লাকহনবা, ৱাতর গবর্নেন্সতা অহেনবা মিৎয়েং চঙবা হায়বসিসু য়োজনা অসিগী পান্দম্নি। ৱারোলশিং অসিবু খন্নরবা তুংদা, ঐখোয়না ২০২৪ ফাওবগী মনুংদা য়ুম্থোং খুদিংদা তোতি ঈশিং য়ৌহনগদবনি।
মরুপশিং,
খুঙ্গংগী দিজিতেল কন্নেক্তিবিতী হায়বসি ঐখোয়গী অপাম্বখক ওইদ্রে, তঙাইফদবা ওইরে। ব্রোদবেন্দ কন্নেক্তিবিতীনা খুঙ্গংশিংদা নুংঙাইহনবতা নত্তনা, মসিনা স্কিল লৈবা নহাশিংগী পুল অমা শেমগৎপদসু ঐখোয়দা মতেং পাংগনি। ব্রোদবেন্দ কন্নেক্তিবিতীগী তেংবাংদগী খুঙ্গংশিংদা সর্ভিস সেক্তর হৌদোক্লকপা মতমদা, লৈবাক্কী মপাঙ্গল য়াম্না হাপকৎলক্কনি। করিগুম্বা ওপ্তিকেল ফাইবরগী থবক্তা খুদোংচাদবা কয়া থেংনরবদি, ঐখোয়না মদু মশক খঙদোক্তুনা ৱারোইশিন পুথোকপদা ঐখোয়না মিৎয়েং চঙবা তাই। মসিনা য়ৌখ্রবা খুঙ্গংশিংগী ওইনদি, মফমদুদা ক্বালিতী অমসুং মদুবু নীংথিজনা শিজিন্নবগী মতাংদা ঐখোয়না ৱারোল কয়া তাকপা তাবনি। পোস্ত ওফিস ১০০%পু কোর বেঙ্কিং সীস্তেমগী মনুং চলহনবগী থবক অসিসু য়াম্না মরু ওইবনি। জন ধন য়োজনাগী খুত্থাংদা ঐখোয়না ফাইনেন্সিএল ইনক্লুজন লাকহন্নবা থবক হৌদোক্লিবা অসিনা মখোয়শিংবু সেচ্যুরেসনগী থাক য়ৌহনবদা য়াম্না তেংবাংগনি।
মরুপশিং,
খুঙ্গংগী শেন্মিৎলোনগী খ্বাইদগী মরু ওইবা পাঙ্গলদি ঐখোয়গী নুপীশিংগী মথৌনা অমসুং মপাঙ্গলনি। ফাইনেন্সিএল ইনক্লুজন্না মখোয়দা ইমুংগী শেল-থুমগী ৱারেপ লৌবগী মনুং চলহনবদা য়াম্না তেংবাংলি। মখোয়না সেল্ফ হেল্প গ্রুপকী খুত্থাংদা হায়রিবা থৌওং অসিদা শরুক য়াবগী চাং হেনগৎলি। খুঙ্গংগী লমদমশিংদা স্তার্ত-অপ মশিং য়াম্না লৈরক্নবা ঐখোয়না করি তৌগদগে হায়বগী মতাংদা হোৎনবগী মথৌ তারি।
মরুপশিং,
হন্দক্কী বজেৎ অসিদা লাউথোকখিবশিংবু মতমগী মনুংদা ঐখোয়না মতৌ করম্না পাংথোক্কদগে হায়বগী মতাংদা মন্ত্রালয়, স্তেকহোলদর খুদিংবু অমত্তা ওইনা করম্না পুন্সিনগনি হায়বগী মতাংদা ৱেবিনার অসিদা মমুৎ তানা খন্নরি। ‘নাগ্রিক অমত্তবু তুংদা হুন্দোক্তবা’ হায়বগী পান্দম অসি অসিগুম্বা হোৎনবগী থৌওংদগী ফংবা ঙমগনি হায়না ঐহাক্না থাজৈ।
অসিগুম্বা সম্মিৎ পাংথোকপা অসিদা ঐহাক্না সরকারগী মাইকৈদগী থোইদোক্না ঙাংবা পামদে হায়না হায়জনীংই। ঐখোয়না অদোমগী মফমদগী তাজনীংই, অদোম্না থেংনরকপশিং খঙনীংই। ঐহাক্না মতম শাংনদগী রাজ্যগী মুখ্য মন্ত্রী ওইদুনা লাকখি, মদুনা মসি ঐখোয়গী হৈনবী নত্তে। নোংমনা, এগ্রিকলচরগী মীওইশিংগা উন্নগনি, নোংমনা ইরিগেসনগী মীওইগা উন্নগনি, অতোপ্পা নুমিত্তনা হকশেলগী মীওইগা উন্নগনি, এজুকেসনগী মীওইশিংগসু উন্নগনি অদুগা অমহা অমগগী মরক্তসু করিমত্তা খঙনরোই। মখোয়না মফম অমত্তদা পুন্না ফম্মিন্নদুনা হীরমশিংগী মতাংদা খন্নদুনা, থৌওং পুন্সিল্লবদি হেন্না কান্নবা ফংগনি।
মরুপশিং,
রাজ্য সরকার, কেন্দ্র সরকার, লোকেলগী লুপশিংনা অমত্তা ওইনা পুন্দুনা ঐখোয়গী বিভাগশিংদা লৈরিবা সাইলোশিংবু মুত্থৎপা য়াগনি। ঐখোয়না করিগুম্বা অসিগুম্বা থবক অসিবু পাংথোক্কে হায়না লেপ্লবদি, কান্নবা মহৈ কয়া অমা ফংগনি হায়বসি ঐহাক্কী অচেৎপা থাজবনি। নীংতম্বগী ৭৫শুবা চহি অসিদা ঐখোয়না লৈবাক্কীদমক্তা করিগুম্বা খরা পীফম থোকই, মসিগী ৱাখল্লোন অসিগা লোয়ননা ঐখোয়না থবক তৌগদবনি। ঙসি নুমিৎ চুপ্পা অমা ঐখোয়না খন্ন-নৈনগনি, বজেৎনা খুঙ্গং চাউখৎপদা করি শাফু পীদুনা করম্বা অহোংবা পুর্ক্কনি হায়বা খন্নগনি। শেল অমসুং রিসোর্স খুদিংমকপু নীংথিনা শিজিন্নদুনা মসিগী খ্বাইদগী ফবা কান্নবা করম্না লৌসিগে হায়বা ঐখোয়না খন্নগনি। মসি ঐখোয়না করম্না পাংথোক্কনি হায়বা ঐখোয়না নীংথিজনা খঙলবদি, লৈবাক্কী মীওই অমত্তা তুংদা থনম্লোই হায়বা ঐখোয়না উগনি। ঐখোয়গী অপাম্বা লোইনমক ফংগনি। ঐহাক্না অদোম্বু অমুক্কা হন্না থাগৎচরি।
মীয়াম্বু অমুক্কা হন্না হন্না থাগৎচরি।
President Mirziyoyev conveys warm greetings to PM and the people of India on the upcoming 79th Independence Day.
