কেন্দ্র মন্ত্রীমন্দলদা লৈবিরিবা ঐহাক্কী মরুপ, লৈবাক অসিগী ঙাকশেল মন্ত্রী শ্রী রাজনাথ সিংহ জি, ফম্পাকথক্তা শরুক য়ামিন্নরিবা অতোপ্পা শক্নাইরবা মীওই পুম্নমক, লৈবাক শিনবা থুংবদগী লাকপা এন.সি.সি. অমসুং এন.এস.এস. কেদেৎশিং, রাস্ত্রীয় রঙ্গশালাগী ইশুং-ইমান্নবশিং অমসুং ঐহাক্কী নহা ওইরিবা মরুপশিং। অদোমগী কন্না হোৎনবা পুম্নমক মফম অসিদা উবা ফংলি। অদোম্না অদোমগী দেমোন্সত্রেসন অদু চাওনা খুৎশম্নদুনা পাংথোকখ্রে।
অদুবু মরুপশিং,
ঙসিসু ঐখোয়গীদমক অচৌবা অৱাবা অমা লাক্লে। ঙসি অয়ুক মসামক মহারাস্ত্রদা য়াম্না নুংঙাইতবা প্লেন এক্সিদেন্ত অমা থোকখি। মসিগী খুদোংথিবা অসিনা ঐখোয়দগী মহারাস্ত্রগী উপ-মুখ্য মন্ত্রী অজিৎ পৱারজি, অমসুং মরুপ খরবু লৌথোকখ্রে। অজিৎ দাদানা মহারাস্ত্র অমসুং লৈবাক অসিগী চাওখৎ-থৌরাংদা অচৌবা মতেং পাংখি। মরুওইনা খুঙ্গংশিংগী পুন্সি মহিংবু হেন্না ফগৎহন্নবগীদমক মহাক্না মতম পুম্নমক্তা মাংলোমদা লাক্তুনা থবক তৌখি। ঐহাক্না অজিৎ পৱার জিগী ইমুং মনুংগী অৱাবদা শরুক য়াজরি। অৱাবা পুংফম অসিদা ঐখোয় পুম্নমক খুদোংথিবা অসিদা মাংখিবা মরুপশিংগী ইমুং মনুংগী মীওইশিংগা লোয়ননা লেপ্লি।
মরুপশিং,
অৱা-অনা অমসুং অৱা-অনাগী মীকুপশিং অসিগী মরক্তা ঐহাক্না মফম অসিদা লৈরিবা অদোম কেদেৎ পুম্নমকপু, তোঙান তোঙানবা মরুপ-মপাং ওইবা লৈবাকশিংদগী লাকপা কেদেৎশিং অমসুং ওফিসরশিংগী মফমদসু নুংঙাইবা ফোংদোকচরি। হন্দক্কী মতমদসু নুপীমচা কেদেৎশিং মফম অসিদা য়াম্না চাওনা লাক্লে। ঐহাক্না মখোয়গীদমক্তা অখন্ননা নুংঙাইবা ফোংদোকচরি।
মরুপশিং,
এন.সি.সি. অসি ভারতকি নহাশিংগী শক্তিবু মশাদা থাজবা থম্লি, মখোয়বু দিসিপ্লিন লৈহল্লি, মখোয়বু সেন্সিতীব ওইহল্লি, অমসুং মখোয়বু জাতীগীদমক কত্থোক্লবা নাগরিকশিং ওইহনবা ওর্গনাইজেসন অমনি, অসিগুম্বা মুবমেন্ত অমনি। অদোম পুম্নমক্না চহি খুদিংগী অদোমগী থৌদাং অদু হেন্না মপাঙ্গল কনখৎহল্লি। হৌখিবা চহিশিংদা এন.সি.সি.গী কেদেৎকি মশিং লাখ তরামরিদগী লাখ কুন্দদা হেনগৎলে। মরুওইনা ঐখোয়গী ঙমখৈগী মফমশিংদা, সমুদ্র খোংবালগী মফমশিংদা, এন.সি.সি. কেদেৎ মশিং অসি অখন্ননা হেনগৎলে।
ঐহাক্কী নহা ওইরিবা ইচিল-ইনাওশিং,
এন.সি.সি.না নহাশিংগী প্লেতফোর্ম অমনি, অমসুং প্লেতফোর্ম অসিদা কনাগুম্বা অমনা মখোয়গী হেরিতেজসু চাওথোকচনা হিংই। খুদম ওইনা, চহি অসিদা এন.সি.সি.না ভন্দে মাতরমগী চহি চামগা য়াঙ্খৈসুবগী থৌরম অসি মপুং ফানা থৱায় য়াওনা পাংথোক্লে। লৈবাক অসিগী কোনুং খুদিংদা মসিগা মরি লৈনবা প্রোগ্রামশিং নখোয়না পাংথোকখ্রে। পরম বির সাগর য়াৎরা অসিসু মসিগী অফবা খুদম অমনি। ময়াম পুম্নমক্না খঙবিরিবা অদুনি, চহি খরগী মমাংদা সরকারনা অন্দমান অমসুং নিকোবরগী দ্বিপ কুন মাথোইদা ঐখোয়গী পরম বির চক্র মায় পাকপশিংগী মমিং পীরম্মি। মসিগী মতুংদা লৈরিবা নেস্নেল হিরোশিংদা ইকায় খুম্নবা পীবগী ৱাখল্লোন অদু অদোম্না অদোমগী সেলিং এক্সপীদিসনগী খুত্থাংদা মাংলোমদা পুখৎলে। মতৌ অসুম্না লক্সদ্বীপকি আইলেন্দা ফেস্তিবেলগী খুত্থাংদা অদোম্না সমুদ্র, কলচর, অমসুং মহৌশা, পুম্নমক পুন্না পাংথোকমীন্নখ্রে।
মরুপশিং,
এন.সি.সি.না মীতমশিংদগী পুৱারীবু লৌথোক্তুনা মীয়ামগী থম্মোয়দা হিংহন্দুনা থম্লে। বাজিরাও পেছ্ৱা জিগী থৌনা, অথোইবা লান্মি লচিৎ বোরফুকন জিগী হৈশিংবা, অমসুং ভগৱান বিরসা মুন্দাগী লুচিংবগী মতাংদা নখোয়না নখোয়গী সাইকল থৌরমশিংগী খুত্থাংদা মীয়ামগী ৱাখল পোকহন্নবা থবক পায়খৎখ্রে। থৌনা ফরবা থবক পুম্নমক অসিগীদমক ঐহাক্না ময়াম পুম্নমকপু য়াম্না থাগৎচরি। ঙসি ইকায় খুম্নবা ফংলবা মরুপশিংদসু ঐহাক্না য়াইফ-পাওজেল পীজরি।
মরুপশিং,
ঐহাক্না রেদ ফোর্তগী হায়রম্মি - মসি মতমনি, অচুম্বা মতমনি। ঐখোয়গী লৈবাক্কী নহাশিংগীদমক ঙসিগী মতম অসি খ্বাইদগী য়াম্না খুদোংচাবা ফংবগী মতমনি। ঐখোয়গী নহারোলশিংনা মতম অসিগী খ্বাইদগী য়াম্না কান্নবা ফংহনবা অসি সরকারগী হোৎনজমলনি। মসিগী খুদম অমা অদোম্না ঙরাং খক্তদা উবা ফংলে। ভারত অমসুং য়ুরোপীয়ন য়ুনিয়নগী মরক্তা পুৱারী ওইরবা ফ্রি ত্রেদ এগ্রিমেন্ত অমগী মতাংদা য়ান্নবা অমা পুরকখ্রে। মসিগী মমাংদা ভারতনা ওমান, ন্যুজিলেন্দ, ব্রিতেন, য়ু.এ.ই., অস্ত্রেলিয়া, অমসুং মোরিসসগুম্বা লৈবাকশিংগা ফ্রি ত্রেদ এগ্রিমেন্তশিংসু তৌখ্রে। য়ানচে পুম্নমক অসিনা ঐখোয়গী নহা লাখ লাখ কয়াগীদমক মশিং থিঙমদ্রবা খুদোংচাবশিং শেমগৎনবা চৎলি।
মরুপশিং,
ঙসি মালেম পুম্বনা নহা ওইরিবা ভারতকি নহারোলশিংবু য়াম্না থাজবগা লোয়ননা য়েংলি। অমসুং মালেমগী থাজবা অসিগী মরমদি - হৈশিংবা অমসুং ভেল্যুশিং ! ভারতকি নহারোলশিংদা গনতন্ত্রগী মগুনশিং লৈ, ঐখোয়গী নহারোলশিংদা মখল-মখা কয়াগী তোপ-তোপ্পা মওং-মতৌশিংবু ইকায় খুম্নবা উৎপগী মগুন লৈ, ভারতকি নহারোলশিংদা মালেম পুম্ববু ইমুং অমগুম লৌবগী মগুন লৈ। অদুগা মরম অসিনা ভারতকি নহারোলশিংনা চৎলিবা মফম খুদিংদা লৈবাক অদুগী মীয়ামগা য়াম্না লাইনা য়ানশিন্নৈ, মখোয়গী থম্মোয়বু মায় পাকই। ঐখোয়না ঐখোয়গী পোতেন্সিয়েলনা লৈবাক অদুগী চাওখৎ-থৌরাংদা মতেং পাংই। হায়রিবা অসি ঐখোয়গী ভেল্যুশিংনি, মসি ঐখোয়গী মহৌশানি। মমা-মপাগী মফমদা চাওনা ইকাই খুম্নবা অমসুং থবক মফম (করমভুমী)গী মায়কৈদা চাংদম্ননিংঙাই লৈত্রবা য়াদবা কত্থোকপনি, মসি ঐখোয়গী হেরিতেজনি।
মরুপশিং,
ঐহাক্না মালেম শিনবা থুংনা লৈরিবা লুচিংবশিংগা ৱারী শান্নরকপা মতমদা, অমসুং ৱারী শান্নবা অদুগী য়ুম্ফমদা ঐহাক্না মপুং ফানা ক্লেম তৌদুনা হায়রি অমসুং হায়বা ঙম্মি, ভারতকি নহারোলশিং অসি থবক কন্না শুবা মীওইশিংনি, মখোয়সু অফবা প্রোফেস্নেলশিংনি। অমসুং মরম অসিনা ভারতকি নহারোলশিংগী অচৌবা দিমান্দা অমা লৈরি। খুদম ওইনা, গল্ফ লৈবাকশিংদা য়েংবিয়ু, মফম অদুদা চহি কয়াদগী মীওই লাখ কয়া থবক তৌদুনা লাকলি। ঐখোয়গী দোক্তরশিং অমসুং ইঞ্জিনিয়রশিংনা লৈবাক কয়াদা অঙকপা হেল্থকেয়র সিস্তেমশিং অমসুং অঙকপা ইনফ্রাস্ত্রকচরশিং তৌরি। মমাংদা ঐখোয়না মফম অসিদা লৈরম্বা ওজাশিংনা লৈবাক কয়াগী খুন্নাইশিংদা অনৌবা ভেল্যুশিং হাপচিল্লে।
মরুপশিং,
মালেমদা মখোয়গী কমন্ত্রীব্যুসন অসিগা লোয়ননা মালেম পুম্বনা ঐখোয়গী লৈবাক্কী নহারোলশিংনা ফংলিবা মায়পাকপশিং অদুসু থাগৎলি। নহাশিং অসিনা মরম ওইদুনা ভারত অসি মালেমদা ইনফোরমেসন তেক্নোলোজিগী মকোক থোংবা অমা ওইরে। অমসুং হৌজিক য়াম্না নহা ওইরিবা মীওইশিং অসিগী শক্তিনা স্তার্তঅপশিংদা, স্পেসতা, দিজিতেল তেক্নোলোজিদা, দোমেন খুদিংমক্তা অনৌবা রিভোলুসন অমা হৌরে।
মরুপশিং,
হৌজিক য়ুরোপীয়ন য়ুনিয়নগা লোয়ননা য়ানবা পুরকখিবা অদু, মালেম অসিনা মসিবু “মাদর ওফ ওল দিলস” হায়না থাগৎলি; মসি মালেমগীদমক গেম-চেঞ্জর দিল অমা হায়না কৌনরি। মসিগী এফ.তী.এ.না অদোমগীদমক "ফ্রিদম তু এসপিরেসন"নি। মসিগী য়ানচে অসিনা মালেমগী জি.দি.পী.গী শরুক মরি থোকপগী অমা অমসুং মালেমগী ল্লোন-ইতীক্কী শরুক অহুম থোকপগী অমা রিপ্রজেন্ত তৌরি।
মরুপশিং,
য়ুরোপীয়ন য়ুনিয়ন, হায়বদি ভারতকি য়ানচে অসি মালেমগী লৈবাক তরানিপালগা থোক্লে । মসিগী কান্নবা অসি ভারতকি স্তার্তঅপশিংদা চৎকনি। ভারতকি স্তার্তঅপশিংগীদমকতা ফন্দা ফংহনবা অমসুং ইনোবেসন ইকোসিস্তেম অসি হেন্না লায়থোকহল্লগনি। য়ানচে অসিদগী ঐখোয়গী ক্রিয়েতীব ইকোনোমী – ফিল্ম, গেমিং, ফেসন, দিজিতেল কন্তেন্ত, ম্যুজিক, অমসুং দিজাইনসু য়াম্না কান্নবা ফংগনি। অমসুং মসিগা লোইননা রিসর্চ অমসুং এজুকেসন্দা, আই.তী.দা অমসুং অতোপ্পা প্রোফেস্নেল সর্ভিশিংদা ভারতকি নহাশিংগীদমক মশিং থিঙমদ্রবা অনৌবা খুদোংচাবশিং শেমগৎলগনি।
মরুপশিং,
মসিগী য়ানচে অসিবু “মাদর ওফ ওল দিল” হায়নসু কৌনরি মরমদি মসি য়াম্না মপুং ফাবা, য়াম্না লুবা, অনৌবা অৱাংবা থাকশিং থুগাইবা, অমসুং কান্নবা ফংবগী লিস্ত অসি য়াম্না শাংই। মসিনা শেলফ রিলিয়েন্ত ইন্দিয়া (আত্মনিরভর ভারত) মীসনদা ইনোৎ পীরগনি। মসিনা মেক ইন ইন্দিয়া, মেক ফোর ৱর্ল্দগী রিজোলুসনদা পাঙ্গল পীরগনি। মরমদি য়ানচে অসিগী মখাদা ভারতকি এক্সপোর্তকি চাদা মরিফুতরামাপল হেন্না, চাদা মরিফুতরাগী তেরিফ অসি জিরো ওইরগনি নত্রগা য়াম্না নেম্না লৈরগনি। অমসুং মসিদগী ভারতকি ইন্দস্ত্রী খুদিংমক – তেক্সতাইল, লেদর, জেমস অমসুং জ্যুলরি, খোংউপ, অমসুং ইঞ্জিনিয়রিংগী পোৎলমশিং – অমসুং এম.এস.এম.ই. অসি ঐখোয়গী ফি শাবা, খুৎশা হৈবা, অমসুং অপীকপা ওন্তর্প্রিন্যুরশিংনসু য়ুরোপীয়ন লৈবাক কুন তরেৎকি অচৌবা কৈথেল অসিদা হকথেংননা য়ৌবা ঙম্লগনি।
মরুপশিং,
য়ানচে অসিগী অতোপ্পা অচেৎপা মফম অমসু লৈরি। ভারত্তা শেল থাদবা হেন্না লাক্কনি। অনৌবা ইঞ্জিনিয়রিং, ইলেক্ত্রোনিক্স, কেমিকেল, ফার্মা, অমসুং অতোপ্পা মেন্যুফেকচরিং প্লান্তশিং লৈবাক অসিদা হৌরগনি। মসিদগী লৌউ-শিংউ, ফুদ প্রোসেশিং, অমসুং ফিসরিজদসু অনৌবা শেল থাদবগীদমক থাজবা য়াবা কৈথেল অমা শেমগৎলগনি। মসি লৌমীশিং, ঙামীশিং, অমসুং খুঙ্গংগী নহাশিংগীদমক য়াম্না চাওবা খুদোংচাবা অমনি।
ঐহাক্কী নহা ওইরিবা ইচিল-ইনাওশিং,
মসিগী এফ.তী.এ.না ভারতকি নহাশিংবু য়ুরোপকি থবক্কী কৈথেলগা হকথেংননা শম্নহল্লি। মরুওইনা ইঞ্জিনিয়রিং, গ্রীন তেক, দিজাইন, লোজিস্তিক্স, অমসুং এদভান্স মেন্যুফেকচরিংদা খুদোংচাবা কয়া অমা শেমগৎলগনি। মসিনা তাকপদি ভারতকি নহাশিংগীদমক, অদোমগীদমক্তদি লৈবাক কুন তরেত্তা অনৌবা খুদোংচাবশিং হাংদোক্লি।
মরুপশিং,
সরকারনা অপুনবা রিফোর্মগী খুত্থাংদা মালেমগী ওইবা খুদোংচাবা পুম্নমক অসি হেন্না পাকথোক চাওথোকহল্লি। ঙসি লৈবাক অসিনা চেল্লিবা রিফোর্ম এক্সপ্রেস অসিনা নহাশিংগী শক্তিগী মাংদা লৈরিবা অথিংবা খুদিংমক লৌথোক্লি। অমসুং লৈবাক অসিগী মাংদা হেনগৎলক্লিবা খুদোংচাবশিং অসি, ভেল্যুশিং অসি অমসুং এন.সি.সি.গা মরি লৈনবা অদোম নহা পুম্নমক্তা মসিগী দিসিপ্লিন অসি - অদোমগীদমক্তদি মসি কেক (সোনে পে সুহাগা)দা আইসক্রিমগুম্না ওইরি।
মরুপশিং,
অদোম্না মফম অসিদা ওপরেসন সিন্দোরগী মতাংদা অঙকপা তেবল অমা পীবিরে। ঐহাক্না অখন্ননা ওপরেসন সিন্দোরগী মতমদা অদোম্না হোৎনখিবা অদু থাগৎপা ফোংদোকচরি। নেস্নেল সেক্যুরিতীগা মরি লৈনবা মরুওইবা পুং অদুদা ঐখোয়গী এন.সি.সি.গী কেদেৎশিংনা মখোয়গী থৌদাংশিং অদু য়াম্না ফজনা পাংথোকখি। ঐখোয়গী লান্মিশিংগী শেম শাবদা কনাগুম্বা অমনা মতেং পাংখি, কনাগুম্বা অমনা ই পীবগী কেম্পশিং থমখি, কনাগুম্বা অমনা ফর্স্ত-এদ কেম্পকি খুত্থাংদা থবক তৌখি; অদোম্না উৎখি মদুদি পেরেদ গ্রাওন্দগী ত্রেনিংগা লোয়ননা "নেসন ফর্স্ত"কী ৱাখল্লোনগী থৌওংগী ত্রেনিংসু এন.সি.সি. দা তৌই। মসি এন.সি.সি.দগী ফংলকপা য়াম্না লৈবাক নুংশিবা অদুনি, মসি অরুবা মতমদা লৈবাক্কীদমক মপুং ফানা পাঙ্গল লৈনা থবক তৌনবা ইন্সপিরেসন পীরিবা য়াম্না লুচিংবা অদুনি। অমসুং মসি তশেংনা এন.সি.সি.না ঐখোয়দা তাকপীরিবনি; ঐখোয়না মফম অদুদগী তমজৈ। ঐহাক্না এন.সি.সি.দা লৈরিঙৈ মতমদা "নেসন ফর্স্ত" হায়বা ঐহাক্কী সেন্তিমেন্ত অসি অসিগুম্না মপাঙ্গল কনখৎলকখি, অমসুং ঙসি ঐহাক্না নখোয়সু এন.সি.সি.দা মদুগা মান্ননা তম্লিবা অসি উবদা চাউথোকচৈ।
মরুপশিং,
ওপরেসন শিন্দুরনা অমুক হন্না ভারতকি পোতেন্সিয়েল অমসুং ঐখোয়গী আর্মীগী থৌনা অদু লৈহল্লে। ওপরেসন শিন্দুরনা ঐখোয়গী ইরমগী ওইবা খুৎশু-খুৎলায়শিং অসি কয়াদা এদভান্স অমসুং হাই-তেক ওইবগে হায়বদুসু উৎলি।
মরুপশিং,
ঙসিগী মোদর্ন ৱারফেয়র অসিদা নহাশিংগী হৈশিংবগী থৌদাং অসি য়াম্না হেনগৎলে। হৌজিক লান অসি ঙমখৈদা লৈবা তেঙ্ক, নোংমৈ অমসুং শেল খক্তদা লিমীৎ তৌদ্রি। ঙসিগী লানফম অসি ফ্রন্ত কয়াদা লান্থেংনরি। ঙসিগী লান অসি কোদতসু তৌরে, অমসুং ক্লাওদতসু তৌরে। তেক্নোলোজিগী লমদা তুংদা লৈরিবা লৈবাকশিং অসি শেন্মীৎলোন খক্তা নত্তনা সেক্যুরিতীগী মতাংদসু ৱাৎলি।
মরম অদুনা মরুপশিং,
নহা অমা ওইনা ঐখোয়গী লৈবাক্কীদমক ঐখোয়না করি অনৌবা ইনোবেসন তৌরিবগে - মসিগী পামজবা অসিনা লৈবাক নুংশিববুসু মপাঙ্গল কনখৎহল্লি অমসুং লৈবাক অসিগী সেক্যুরিতীদা অচৌবা থৌদাং অমা পীরি। ময়াম পুম্নমক্না খঙবিরিবা অদুনি, ঙসি তেক্নোলোজিগী খুত্থাংদসু ইনোবেতীব নহাশিংগীদমক আর্মীশিংদা অনৌবা খুদোংচাবশিং শেমগৎলি। ঙসিদি ঐখোয়গী নহারোলশিংগী দিফেন্স স্তার্তঅপশিংনা অঙকপা থবক তৌরি। ঙসি মেদ ইন ইন্দিয়া দ্রোনশিংদা থবক পায়খৎলি; এ.আই. অমসুং দিফেন্স ইনোবেসন্না হৌজিক ঐখোয়গী ফোর্সশিং মোদর্ন ওইহল্লে। হায়বদি নখোয় নহা ওইরিবা মরুপশিংগীদমক ওইথোকপা য়াবশিং অদু য়াম্না পাকথোক চাওথোক্লি। অদুগা ঙসি ঐহাক্না পাম্মি, মফম অসিদা ফমদুনা লৈরিবা অদু খক্তা নত্তনা লৈবাক অসিগী নহা কোতী কয়ানা মসিগী কান্নবা লৌবা পাম্মি।
মরুপশিং,
লৈবাক অসিনা শুপ্নতগী নুমীৎ হুমনিগী মমাংদা জনুৱারী কুন মঙাদা নেস্নেল ভোতর দে পাংথোকখি। ঙসিগী নুমীৎ অসিদা ঐহাক্না লৈবাক মীয়ামদা চিথি অমসু ইখি। নেস্নেল ভোতর দে অসি ঐখোয়গী সংবিধান্না নাগরিক খুদিংমক্তা শিন্নরিবা অদুগুম্লবা সেন্স ওফ দ্যুতীগী, অদুগুম্বা হক অদুগী সেলেব্রেসননি। ঙসি ভারত অসি মালেমদা নহা ওইরিবা ভোতর মশিং খ্বাইদগী য়াম্না লৈবা লৈবাকশিংগী নুংদা অমনি। হায়রিবা নহাশিং অসিনা ভোতর ওইবগী ইলিজিবল ওইরকপা মতমদা, চহি তরানিপাল শুরকপা মতমদা, মখোয়না জাতীগী তশেংবা লম্বি সেম্বগী শক্তি ফংই। মরম অদুনা হৌজিক ঐখোয়না লৈবাক অসিদা অনৌবা চৎনবি অমা হৌদোকপা মথৌ তাই। ঐহাক্না পাম্মি মদুদি এন.সি.সি.-এন.এস.এস.তা অমসুং "মেরা য়ুবা ভারত" ওর্গনাইজেসন, "মাই ভারত" ওর্গনাইজেসন্দা, জনুৱারী কুনমঙাদা মতম খুদিংগী অচৌবা থৌরম অমা পাংথোক্কদবনি। নুমীৎ অসিদা অহানবা ওইনা ভোৎ থাদরিবা মীওইশিংবু ইকায় খুম্নবা উৎনবা অচৌবা থৌরম অমা পাংথোক্কদবনি। ঐহাক্না মপুং ফানা থাজবা থম্লি মদুদি হোৎনরিবা অসিনা ঐখোয়গী নহা ওইরিবা মীরোলদা থৌদাংগী ৱাখল্লোন অদু হেন্না চেৎশিলহল্লগনি অমসুং ঐখোয়গী গনতন্ত্রবু মপাঙ্গল কনখৎহনগনি।
মরুপশিং,
চাওখৎলবা ভারত (বিকসিত ভারত)গী ৱাহন্থোক্তি শেল-থুমগী য়াইফবখক্তদা লোইবা নত্তে। নাগরিক অমা ওইনা ঐখোয়গী লমচৎ-শাজৎ অসি করম্না লৈরিবগে হায়বসিসু দিবেলপ তৌরবা ভারতকি মরুওইবা মশক অমনি। নাগরিক অমা ওইনা ঐখোয়না ঐখোয়গী দ্যুতীদা খ্বাইদগী ৱাংবা প্রায়োরিতী পীগদবনি। খুদম ওইনা, অদোম্না উবিরমগনি, স্তচ্ছ ভারত অভিয়ান হৌদোকপদা সরকারগী কমন্ত্রীব্যুসন লৈরবসু, করিগুম্বা কনাগুম্বা অমনা মসিবু মাংলোমদা পুখৎলম্লবদি ঐহাক্না চাওথোকচনা হায়বা ঙম্মি মদুদি মসিবু মাংলোমদা পুখৎপগী থবক অসি ঐখোয়গী লৈবাক্কী নাগরিকশিংনা, নহারোলশিংনা অমসুং অপীকপা অঙাংশিংনা তৌখ্রে। য়ুমগী মনুং অমসুং য়ুমগী মপান্দা ফাওবা শেংদোকপা অসি চৎনবি অমনি, পুন্সি মহিং অমনি, ভেল্যু অমনি। ঐখোয়না সিভিক দ্যুতীগী ৱাখল্লোন অসি ঐখোয়গী পুন্সিগী শরুক অমা ওইহনগদবনি। ঐখোয়গী কোরৎতা ঐখোয়না উবা পাম্লিবা ফজবা অদু, ঐখোয়না ঐখোয়গী সহর অসি চপ মান্নবা সেন্তিমেন্তকা লোয়ননা ফজবা ওইহনগদবনি অমসুং মদুসু ফজনা থমগদবনি। ঐহাক্না মফম অসিদা লৈরিবা নহা ওইরিবা মরুপ খুদিংমক্তা হায়গনি মদুদি মখোয়না নুমীৎ অমগী নুংদা নুমীৎ অমদা পুং অমা চুপ্না শেংদোকপগা মরি লৈনবা কেম্পেন খরা চত্থগদবনি। এন.সি.সি.-এন.এস.এস.না মসি য়াম্না ফজনা তৌবা ঙম্মি। নহাক্কী মফম অমদা এক্তািভিতী খরা নৎত্রগা অতোপ্পা অমবু শোয়দনা প্লান তৌবিয়ু।
মরুপশিং,
‘এক পেড় মা কে নাম’ কেম্পেনগী মখাদা এন.সি.সি.না চাওরাক্না উ লাখ নিপাল থাখ্রে হায়বা খঙবদা ঐহাক নুংঙাইবা ফাওই। ঐখোয়না থারিবা উশিং অসিসু ফজনা চাওখৎহনগদবনি - মসিসু উবা অসি ঐখোয়গী থৌদাংনি।
মরুপশিং,
ঐখোয়গী নহাশিংগী শক্তিগী য়াম্না চাওবা চাংয়েং অমদি লাক্কদৌরিবা মতম অসিদা ঐখোয়না কয়া য়াম্না ফিৎ ওইরবগে হায়বসিনি। ফিৎনেস অসি মীনিৎ খরখক্তদা এক্সরসাইজ তৌবখক্তদা লিমীৎ ওইদে। মসি ঐখোয়গী মহৌশাদসু লাকপা তাই। ঐখোয়গী চাবগী হৈনবিদগী হৌরগা ঐখোয়গী নুংতীগী চৎনবি ফাওবা, দিসিপ্লিন লৈবা পুন্সি মহিং অমসু মথৌ তাই। নখোয়না ফিৎ ইন্দিয়া কেম্পেন অসি মাংলোমদা পুখৎলি হায়বা খঙবদা ঐঙোন্দা নুংঙাইবা ফাওখি। এন.সি.সি.গী কেদেৎশিংনা শান্ন-খোৎনবদসু ফজনা থবক তৌখ্রে।
মরুপশিং,
ঙসি অদোম নহাশিংগী মরক্তা ঐহাক্না অমুক হন্না ওবেসিতীগী হীরম অমা পুখৎলি। থিজিনবগী থবকশিংনা হায়রি মদুদি লাক্কদৌরিবা মতম অসিদা ভারতকি তরেৎশুবা মীওই খুদিংমক ওবেসিতীনা অৱাবা মায়োক্নরকপা য়াই। ওবেসিতীগী প্রোব্লেম অসিদগী দাইবেতীস, ব্লদ প্রেসর, অমসুং অসিগুম্বা লায়না কয়া অমসু লৈবাক অসিদা নারি। মসিগী খ্বাইদগী শোকহল্লবা ক্লাস অসি ঐখোয়গী নহাশিং ওইবা য়াই। মরম অদুনা হৌজিক্তাগী ঐখোয়না চেকশিন্না লৈবা মথৌ তাই; ঐখোয়না ঐখোয়গী থা চাবা হন্থহন্নবা হোৎনগদবনি। মতম খরগী মমাংদা ঐহাক্না চিঞ্জাক্তা থাওগী চাং চাদা তরা হন্থহন্নবা কন্না হায়খি। ঙসি ঐহাক্না অদোম নহা পুম্নমক্তা অমুক হন্না হায়জরি ।
মরুপশিং,
এন.সি.সি.না নহাকপু দ্রীল (কদমতাল) খক্তমক তম্বিদে; ওর্গনাইজেসন অসিনা নহাকপু নাগরিক অমা ওইনা থৌদাং লৌদুনা হিংনবা তাকপীরি। মফম অসিদা অদোম্না অদুগুম্বা স্কীলশিং অদু, অদুগুম্বা ভেল্যুশিং অদু তম্লি, মদুনা অদোম্বু হেন্না ফবা নাগরিক অমা ওইহনবদা মতেং পাংই। রিপব্লিক দেগী থৌরমশিংদা অদোম্না ফংলিবা এক্সপরিয়েন্সশিং অসিনা অদোমগী পর্সোনেলিতী অদু হেন্না ফগৎহল্লি। পুন্সিগী চাংয়েং খুদিংদা অদোম মায় পাকপা ওইরসনু, অমসুং চাওখৎলবা ভারত (বিকসিত ভারত) শেমগৎপদা অদোমগী কন্ত্রীব্যুসন অদু মখা তানা মঙাল পীবা ওইরসনু। ময়াম পুম্নমকপু য়াইফ-পাওজেল কয়া কয়া পীজরি।
ভারত মাতা কি জয়!
ভারত মাতা কি জয়!
অদুগা ঙসি লৈবাক অসি বন্দে মাতরম অসি চহী চামগা য়াঙ্খৈ শুরবা মতমসিদা, ওইরসি-
বন্দে মাতরম! বন্দে মাতরম!
বন্দে মাতরম! বন্দে মাতরম!
বন্দে মাতরম! বন্দে মাতরম!
বন্দে মাতরম! বন্দে মাতরম!
বন্দে মাতরম! বন্দে মাতরম!
বন্দে মাতরম! বন্দে মাতরম!
অদোম ময়াম্বু য়াম্না থাগৎচরি।
