ভারত ইমানা য়াইফরে!
ভারত ইমানা য়াইফরে!
ভারত ইমানা য়াইফরে!
ঐহাক্না ভগৱান বির্সা মুন্দা হায়গে – নখোয় ময়াম্না অমর ওইরসনু, অমর ওইরসনু হায়না হায়বীয়ু।
ভগৱান বির্সা মুন্দা – অমর ওইরসনু, অমর ওইরসনু।
ভগৱান বির্সা মুন্দা – অমর ওইরসনু, অমর ওইরসনু।
ভগৱান বির্সা মুন্দা – অমর ওইরসনু, অমর ওইরসনু।
বিহারগী গোবর্বনর, শ্রী রাজেন্দ্র অর্লেকর জী, বিহারগী মীয়াম্না খ্বাইদগী পাম্নরবা মুখ্যমন্ত্রী, শ্রী নিতিশ কুমার জী, কেন্দ্রগী কেবিনেত্তা ঐগা থৌ পুমিন্নরিবা জুএল ওরাওন জী, জীতন রাম মাঞ্ঝী জী, গিরিরাজ সিং জী, চিরাগ পাসৱান জী, দুর্গাদাস উইকে জী অমসুং ঐখোয়গী ইরক্তা বির্সা মুন্দা জীগী ইমুং-মনুংশিংগী চারা-নৌদাশিংশিংশু তিল্লরিবা অসি ঐখোয়গী ওইনদি য়াম্না লাইবক ফবনি, অদুম ওইনমক মখোয়গী য়ুমদশু য়াম্না চাউবা পুজা অমা পাংথোকই। ইমুংগী মীওই কয়া অমা পুজা অদুগীদমক্তা য়াম্না চিল্লি অদুম ওইনমক বুদ্ধরাম জীনা ঐখোয়গী তিল্লরে, মসিমক য়াম্না লাইবক ফরবনি অদুম ওইনসু সিদ্ধু কানহু জীগী চারা নৌদা মন্দল মুর্মু জীশু ঐখোয়গী ইরক্তা তিল্লররিবা অসিনা অমুক্কা হেন্নশু লাইবক ফহল্লে। ঐহাক্কী ওইনা য়াম্না লাইবক ফবা ৱাফম অমনা ঙসি ঐহাকনা ঐখোয়গী ভার্তিয়া জন্তা পার্তীগী ইমুং অসিদা খ্বাইদগী সেনিয়র ওইরবা নেতাবু হায়জৌ হায়রবদি, মহাক অদু অতৈ কনাশু নত্তে ঐখোয়গী করিয়া মুন্দা জীনি। মতম অমদা লোক সভাগী দেপ্যুতী স্পীকর ওইরম্মি। পদ্মা ৱিভুশনগা লোইননা ইকাইখুম্নখ্রে অমসুং ঙসিশু ঐখোববু লমজিং-লমতাকপীরি। অমসুং ঐখোয়গী জুএল ওরাওন জীনা হায়খিবা অদুগুম্না মহাক অসি ইপা শক্লবা মীওই অমগুম্বনি। অসিগুম্বা সেনিয়র করিয়া মুন্দা জীনা ঙসি অখন্ননা ঝারখন্দদগী মফম অসিদা লাক্লিবনি। বিহারগী উপমুখ্য মন্ত্রী, ঐগী মরুপ ৱিজয় সিনহা জী, ঐগী মরুপ সম্রাত চৌধরি জী, বিহার সরকারগী মন্ত্রীশিং, MPশিং, MLAশিং, অতোপ্পা মীয়ামগী মীহুৎশিং, লৈবাক অসিগী তোঙান-তোঙানবা মফমশিংদগী অঙম-অথৌশিং অমসুং জমুইগী নুংশিরবা ইচিল-ইনাওশিং, ইচে-ইচলশিং।
ঙসি, লৈবাক অসিগী মুখ্য মন্ত্রী ময়াম, গোবর্নর ময়াম, রাজ্য ময়ামগী মন্ত্রীশিং, কেন্দ্র সরকারগী মন্ত্রীশিংনা ভারতকী তোঙান-তোঙানবা জিলাশিংদা পাংথোকপা অচৌবা থৌরমশিংদা শরুক য়ারি, ঐহাক্না মখোয় পুম্নমকপুশু তরাম্না ওক্লি। অমসুং ঐহাক্না মফম অসিদগী ভর্চুৱল ওইনা ঐখোয়গা শরুক য়ামিন্নরিবা লৈবাক অসিগী ঐগী ত্রাইবল ইচিল-ইনাওশিং পুম্নমকপু সলাম তৌরি। গীত গাউর দুর্গা মাই বাবা ধনেস্বর নাথ কে ইস পিওস ধর্তি কে নমন করাহি। ভগৱান মহাবির কি ই জন্মভুমি পর অপনে সবকে অভিনন্দন করাহি। ঙসি অসি বাম্না শেংলবা নুমিৎনি। ঙসি অসি কার্তিক পুর্নিমানি, দেব দীপাৱলি নি অমসুং ঙসি অসি গুরু নানক দেব জীগী ৫৫৫শুবা প্রকাশ পর্বশুনি। ঐহাক্না কুম্মৈ অসিদা ইরৈচা পুম্নমকপু নুংঙাই-য়াইফবা পাউজেল পীজরি। ঙসি অসি অতোপ্পা মরম অমগীদমক্তা ইরৈচা খুদিংমক্কীদমক্তা পুৱারি ওইরবা নুমিৎ অমনি। ঙসি অসি ভগৱান বির্সা মুন্দাগী মপোক কুমওননি, রাস্ত্রিয়া জনজাতিয়া গৌরব দিৱস নি। ঐঙোন্দা খঙহল্লকখি মদুদি কুম্মৈ অসি হৌদ্রঙৈদা, জমুইগী মীয়াম্না হৌখিবা নুমিৎ হুম্নিদা বাম্না পাক-শন্না লু-নানবগী কেমপেন পাংথোকখি। এদমিনিস্ত্রেশনগী মীশিংনশু লু-নানবগী দ্রাইব অসিদা লুচিংখি। ঐখোয়গী বিজয় জীনা মফম অসিদা কেমপিং তৌখি। ভার্তিয়া জন্তা পার্তীনশু য়াম্না চাউবা লু-নানবগী দ্রাইব অমা চত্থখি। মফম অসিগী নাগ্রিকশিং, নহাশিং, ইমাশিং অমসুং ইচে-ইচলশিং মশামক্নশু মসিবু খুমাং চাউশিলহনখি। ঐহাক্না জমুইগী মীয়াম্বুশু মসিগী অখন্নবা থবক অসিগীদমক্তা থাগৎপা ফোংদোক্লি।
মরপশিং,
মমাং চহি নুমিৎ অসিদা, ঐহাক উলিহাতুদা লৈখি, ধরর্তি অবা বির্সা মুন্দাগী খুঙ্গং। ঙসি ঐহাক্না লাক্লিবা মফম অসি তিলকা মানঝিগুম্বা অথৌবগী থৌনা-লিংজেল কয়া উখ্রবা লমদম্নি। অদুবু হন্দক্কী মতাং অসিদদি থৌরম অসি অমুক্কশু হেন্না থোইদোক-হেন্দোকপা অমনি। ঙসিদগী, ঙসিদগী লৈবাক শিনথুংনা ভগৱান বির্সা মুন্দাগী ১৫০শুবা মপোক কুমওন পাংথোকপা হৌগদৌরিবনি। মসিগী থৌরম অসি মথংগী চহি অমা চুপ্না পাংথোক্কনি। ঐহাক য়াম্না হরাওই মদুদি ঙসি লৈবাক অসিগী জিলা চাম-চামদগী মী করোর অমরোম্না, জমুইগী মীশিং, নখোয়না চাউথোক্না লৈবীয়ু, জমুইগী মীশিংগীদমক্তদি ঙসি অসি য়াম্না চাউথোকচনিংঙাই ওইবা নুমিৎনি। ঙসি লৈবাক অসিগী মী করোর অমরোম্না তেক্নোলোজীগী খুত্থাংদা ঐখোয়গী থৌরম অসিদা শরুক য়াররে, জমুইগী মীশিংগা পুল্লরে। ঐহাক্না মীপুম খুদিংমকপু থাগৎপা ফোংদোক্লি। হৌজিক্তি, ঐহাক্না মফম অসিদা শ্রী বুদ্ধরাম মুন্দা জী, ভগৱান বির্সা মুন্দাগী চরা-নাওদাবু তরাম্না ওকপগী তাঞ্জা অদু ফংলরে। ঐহাক্না নুমিৎ খরনিগী মমাংদা শ্রী মন্দল মুর্মু জী, সিধু কানহু জীগী চরা-নাওদাবুশু তরাম্না ওকপগী তাঞ্জা অদুশু ফংজখ্রে। মহাক্না মফম অসিদা শরুক য়াবীবা অসিনা থৌরম অসিগী ফজবা অদুবু অমুক্কশু হেন্না হেনগৎহল্লে।
মরুপশিং,
ধর্তি অবা বির্সা মুন্দাগী নিংশিং নুমিৎকী চাউরবা থোরম অসিদা, ঙসি লুপা করোর লিশিং তরুক হেনবা প্রোজেক্তশিংগী উরেপ উয়ুং তমখ্রে অমসুং শঙ্গাখ্রে। মসিদা ঐগী ত্রাইবল ইচিল-ইনাওশিংগীদমক্তা য়ুম লাখ অমগা মখাই রোমগী এক্সেপ্তেন্স লেতরশিং য়াওরি। মসিদা ত্রাইবল অঙাংশিংগী তুংলমচৎ শেম্নবগীদমক্তা স্কুলশিং, হোস্তেলশিং, ত্রাইবল নুপিশিংগীদমক্তা হেল্থ ফেসিলিতীশিং, ত্রাইবল এরিয়াশিংগা শম্নহনবা লম্বি কিলোমিতর চাম-চাম য়াওরি। ঙসি, ত্রাইবল ইমুং লিশিং ১১ হেন্নাদেব দীপাৱলিগী নুমিত্তা মখোয়গী অনৌবা য়ুমশিংদা গ্রিহা প্রৱেশ তৌরগনি। ঐহাক্না মসিগীদমক্তা ত্রাইবল ইমুং খুদিংমকপু নুংঙাই-য়াইফবা ফোংদোক্লি।
মরুপশিং!
ঙসি ঐখোয়না রাস্ত্রিয়া জনজাতিয়া গৌরব দিৱস পাংথোকপা মতমদা। ঙসি ঐখোয়না জনজাতিয়া গৌরব চহি হৌবা মতমদা। মসিগী ধৌরম অসি করিগী তঙাইফদ্রিবনো হায়বদু খঙবশু য়াম্না মরু ওই। মসি পুৱারিদা য়াম্না চাউনা অচান-মীরাই খাইখিবা অদুবু লৌথোক্নবা থমোই শেংনা হোৎনবা থবক অমনি। নিংখা তম্লবা মতুংদা, ঐখোয়গী ত্রাইবল সোসাইতীনা তৌখিবা কন্ত্রিব্যুশন অদুগী ঐখোয়গী ত্রাইবল ইচিল-ইনাওশিংনা ফংফম থোকপা মফম অদু পুৱারিদা পীরমদে। ত্রাইবল খুনাই অসিনা প্রিন্স রামবু ভগবান রাম ওইহনখি। ট্রাইবল খুনাই অসি ভারতকী চৎনবী অমসুং নিংখা তম্ববু ঙাকশেন্নবগীদমক্তা চহি চা কয়া লান্থেংনখিবা কাংবুনি। অদুবু নিংখাতম্লবা মতুং দেকেদ কয়া অসিদা, ত্রাইবল পুৱারীগী মমল নাইদ্রবা কন্ত্রিব্যুশন অসিবু মুত্থৎনবা হোৎনখি। মসিগী মরুমদা মশাগী ওইজবা থিবা রাজনিতি য়াওরিবনি। ভারতকী নিংতম্বগী ক্রেদিৎ অদু পার্তী অমখক্তদা পীগদবনি হায়বা রাজণিতি। অদুবু করিগুম্বা পার্তী অমখক, ইমুং অমখক্না নিংতম্বা ফংহল্লে। অদু ওইরবদি, করিগীদমক্তা ভগৱান বির্সা মুন্দাগী উলগুনান ঈহৌ অদু করিগী থোকখ্রিবনো? সন্থাল রিভোল্যুশন অদু করিনো? কোল রিভোল্যুশন অদু করিনো? ঐখোয়না মহারানা প্রতাপকী খোংবুরোই, থৌনা ফরবা ভিলশিং অদুবু কাওথোকপা ঙম্লগদ্রা? কনানা কাওবা ঙমগনি? সাহয়াদ্রিগী শুক্লবা উমংদা ছত্রপতি সিবাজি মহারাজতা পাঙ্গল থৌনা হাপ্পীখিবা ত্রাইবলগী ইচিল-ইনাওশিং অদুবু কনানা কাওথোকপা ঙমগনি? অল্লুরি সতারাম রাজু জীগী লুচিং মখাদা ত্রাইবলশিং ভারত ইমাদা মখোয়না কত্থোকখিবশিং অদু তিলকা মানঝি, সিধু কানহু, বুধু ভগত, ধীরজ সিং, তেলঙ্গা খাদিয়া, গোবিন্দ গুরু, তেলঙ্গনাগী রামজি গোন্দ, এম.পি.গী বাদল ভোই রাজা শঙ্কর শাহ, কুমার রঘুনাথ শাহ না নিংশিংবা ঙম্লি! ঐহাক্না ময়াম অমা পনবা ঙম্মি – তান্ত্য ভিল, নিলম্বর-পিতম্বর, বীর নরায়ন সিং, দিবা কিশন সোরেন, জত্রা ভারত, লক্সমন নাইক, মিজোরামগী থৌনা ফরবা নিংতম লানমী, রোপুইল্যানি জী, রাজমোহিনি দেবি, রানি গাইদিনল্যু, বীর বালিকা কালিবাই, গোন্দৱানাগী রানি দুরগাৱতি। কানগুম্বনা অসিগুম্বা মশিং থিঙমদ্রবা, ঐহাক্কী মশিং থিঙমদ্রবা ত্রাইবলগী অথৌবশিং অসিবু কাওবা ঙমগনি? মানগরদা ব্রিতিশনা চত্থখিবা মীহাৎ-মীপুন? ঐহাক্কী ত্রাইবল ইচিল-ইনাও লিশিং কয়া অমা হাৎখি। ঐখোয়না মদুবু কাওথোকপা ঙম্লগদ্রা?
মরুপশিং,
সোসিয়েল জস্তিসকী চৎবীবু ওইরো, ঙসিগী NDA সরকারগী ৱাখল্লোন অসি তোঙাল্লি। ঐখোয়না দ্রৌপদি মুর্মুবু প্রেসিদেন্ত ওইহনবগী খুদোংচাবা ফংবা অসি BJP খক্তা নত্তনা NDAগীদমক্তশু য়াম্না লাইবক ফবনি হায়না ঐহাক্না খঞ্জৈ। NDAনা দ্রৌপদি মুর্মুবু প্রেসিদেন্তকী কেন্দিদেত ওইহন্নবা ৱারেপ লৌখিবা মতমদা ঐখোয়গী নিতিশ বাবুনা লৈবাক অসিগী মীপুম খুদিংমক্তা দ্রৌপদি মুর্মু মার্জিন য়াম্না চাউনা কাহনগদবনি হায়না আপীল তৌখিবা অদু ঐহাক নিংশিংলি। পি.এম. জনমান য়োজনাগী মখাদা থবক কয়া অমা হৌখ্রে। মসিগী ক্রেদিৎ অসিশু প্রেসিদেন্ত দ্রৌপদি মুর্মুদা পীরি। মহাক্না ঝারখন্দগী গোবর্নর ওইবা মতমদা অমসুং মদুগী মতুংদা মহাক্না প্রেসিদেন্ত ওইবা মতমদা, মহাক্না য়াম্না তোইনা ত্রাইবলশিংগী মরক্তা খ্বাইদগী হেন্না শোত্থরবা ত্রাইবলশিংগী মতাংদা পল্লি। লুপা করোর ২৪০০০গী পি.এম. জনমান য়োজনা অসি মখোয়গী পুনশিদা অৱাবা হন্থহন্নবা হৌদোকখিবনি। পি.এম. জনমান য়োজনানা লৈবাক অসিগী খ্বাইদগী শোত্থরবা ত্রাইবশিং লৈফমশিং অদুবু চাউখৎহন্নবা হোৎনরি। ঙসিদি মসিগী স্কীম অসি চহি ১ মপুং ফারে। মতম অসিগী মনুংদা, ঐখোয়না খ্বাইদগী হেন্না শোত্থরবা ত্রাইবশিংদা চেক্কী য়ুম লিশিং কয়া পীখ্রে। শোত্থরবা ত্রাইবশিং আসিগী লৈফমশিং অদুবু কেনেক্ত তৌনবা লম্বি কিলোমিতর চাম-চামগী থবক হৌখ্রে। শোত্থরবা ত্রাইবশিং অসিগী খুঙ্গং চাম-চামদা য়ুমথোং খুদিংগী তোতিগী ঈশিং য়ৌখ্রে।
মরুপশিং,
মোদীনা কনা অমত্তা হংবীদবশিং অদুবু নিংজৈ। মমাগী সরকারগী লিচৎ অদুনা মরম ওইরগা ত্রাইবলগী খুনাই অসি দেকেদ কয়া অমা তঙাইফদনা মথৌতাবা ফেসিলিতীশিং অমত্তা ফংহন্দদুনা লাকখি। লৈবাক অসিগী ত্রাইবলনা নম্না তাবা জিলা কয়া অমা চাউখৎ-থৌরাংগী খোংজেলদা শোত্থদুনা লৈহৌরে। করিগুম্বা ওফিসর অমা চৈরাক পীগদবা ওইরগদি, চৈরাক পীনবগী পোস্তিং অদু অসিগুম্বা জিলাশিং অসিদা থারম্মি। NDA সরকারনা হান্নগী সরকারশিংগী ৱাখল্লোন অদুবু হোংদোকখ্রে। ঐখোয়না হায়রিবা জিলাশিং অসিবু এসপাইরিং দিস্ত্রিক্তশিং ওইনা লাউথোকখ্রে অমসুং মফম অদুদা অনৌবা অমসুং য়াম্না ইচং থৌবা ওফিসরশিং থাখি। ঐহাক য়াম্না পেল্লে মদুদি ঙসি এসপাইরিং দিস্ত্রিক্ত কয়া অমনা চাউখৎ-থৌরাংগী পেরামিতর কয়া অমদা অতোপ্পা জিলা কয়া অমদগী হেন্না মাংজিল থাখ্রে। ঐগী ত্রাইবল ইচিল-ইনাওশিংনা মসিদগী য়াম্না কান্নখ্রে।
মরুপশিং,
ত্রাইবল ৱেলফিয়র অসি মতম পুম্বদা NDA সরকারগী খ্বাইদগী মরু ওইবা অমা ওইখি। অতল বিহারি ভাজপায়ী জীনা লুচিংবা NDA সরকারনা ত্রাইবল ৱেলফিয়রগীদমক্তা তোঙানবা মন্ত্রালয় অমা শেমখি। চহি ১০গী মমাংদা, ত্রাইবল এরিয়াশিং অমসুং ত্রাইবলগী ইমুংশিংগী চাউখৎ-থৌরাংগীদমক্তা কাইথোকখিবা বজেত অদু লুপা করোর ২৫০০০দগী তানা পীখি। চহি ১০গী মাংদা লৈরম্বা ফিভম অদু য়েংবীয়ু, করোর লিশিং ২৫দগী তানা ওইখি। ঐখোয়গী সরকার অসিনা শরুক ৫ থোক্না হেনগত্তুনা লুপা করোর লাখ ১.২৫দা হেনগৎখ্রে। নুমিৎ খরনিগী মমাংদদা, ঐখোয়নালৈবাক অসিদা ত্রাইবল খুঙ্গং লিশিং ৬০ হেন্নগী চাউখৎ-থৌরাংগীদমক্তা অখন্নবা স্কীম হৌদোকখ্রে। ধর্তি আবা জনজাতি গ্রাম উতকর্শ অভিয়ানগী মখাদালেপা করোর ৮০,০০০ রোম ত্রাইবলগী খুঙ্গংশিংদা শেল থাদরগনি। মসিগী পান্দমদি ত্রাইবল সোসাইতীশিংদা তঙাইফদনা মথৌ তাবা ফেসিলিতীশিং পীনবা অমসুং মসিগা লোইন-লোইননা নহাশিংগি ত্রেনিং পীনবা অমসুং থবক্কী খুদোংচাবশিং পীনবনি। হোমস্তেশিং শানবা মীশিংবু মতেং পাংলগনি অমসুং ত্রেন তৌরগনি। মসিনা ত্রাইবল এরিয়াশিংদা তুরিজম চাউখৎহল্লগনি অমসুং ঙসি চাউখৎলক্লিবা ইকো-তুরিজমগী কন্সেপ্ত অসিশু ঐখোয়গী উমং-ৱামংশিংদা লৈরিবা ত্রাইবল ইমুংশিংগী মরক্তা ওইথোক্লগনি অমসুং মাইগ্রেশন হন্থরগনি অমসুং তুরিজমনা লেপ্তনা হেনগৎলগনি।
মরুপশিং,
এখোয়গী সরকার অসিনা ত্রাইবল হেরিতেজপু ঙাক-শেন্দুনা থম্নবা খোংথাং কয়া অমশু লৌখৎখ্রে। ত্রাইবল আর্ত অমসুং কলচরদা কত্থোক্লবা মীওই কয়া অমা পদ্মা এৱার্দকা লোইননা ইকাইখুম্নখ্রে। ঐখোয়না ভগৱান বির্সা মুন্দাগী মিংদা রাঞ্চিদা চাউরবা ম্যুজিয়ম অমা হৌদোকখ্রে। অমসুং ঐহাক্না ঐখোয়গী স্কুল মহৈরোইশিং খুদিংমক্তা ভগৱান বির্সা মুন্দাগী ম্যুজিয়ম অসিদা চৎনবা অমসুং স্তদী তৌনবা হায়রি। ঙসি মধ্য প্রদেশকী চিন্দৱারাদা বাদল ভোই ম্যুজিয়ম অমসুং মধ্য প্রদেশকী জাবলপুরদা রাজা শঙ্কর শাহ অমসুং কুনৱার রঘুনাথ শাহ ম্যুজিয়ম শঙ্গাখিবা অদু য়াম্না হারাওই। ঙসি স্রিনাগর অমসুং সিক্কিমদা ত্রাইবল রিসর্চ সেন্তর অনি শঙ্গাখ্রে অমসুং ঙসি ভগৱান বির্সা মুন্দাগী নিংশিং খুদম ওইনা শেলয়েক অমসুং পোস্তেজ স্তামপশিং থাদোকখ্রে। মসিগী থবকশিং অসিনা লৈবাক অসিবু ত্রাইবল থৌনা-লিজেল অমসুং মখোয়গী মিংচৎ অদুবু তত্তনা নিংশিংহল্লগনি।
মরুপশিং,
ত্রাইবল সোসাইতীদা ভারতকী লিরবা মেদিকেল সিস্তেমগী চাউরবা কন্ত্রিব্যুশন লৈ। মসিগী হেরিতেজ অসিবুশু ঙাক-শেন্দুনা থম্লি অমসুং তুংগী মীরোলশিংগীদমক্তা অনৌবা দাইমেন্সনশিংশু হাপখ্রে। NDA সরকারনা লেহদা নেস্নেল ইনস্তিত্যুত ওফ সোৱা রিগপা লিংখৎখ্রে। অরুনাচল প্রদেশতা নোর্থ ইস্তর্ন ইনস্তিত্যুত ওফ অয়ুরবেদ অমসুং ফোক মেদিসিন রিসর্চ অপদেৎ তৌখ্রে। WHOগী গ্লোবল সেন্তর ফোর ত্রেদিস্নেল মেদিসিনশু ভারত্তা শারগনি। মসিনা ভারতকী ত্রাইবলগী ত্রেদিস্নেল মেদিকেল সিস্তেম লৈবাক অসি শিনথুংনা অমসুং মালেম শিনথুংনা য়ৌহল্লগনি।
মরুপশিং,
ঐখোয়গী সরকার অসিনাত্রাইবল সোসাইতীগী মহৈ-মশিং, শেন্থোক লম্বি অমসুং হিদাক-লাংথক্তা য়াম্না চাউনা মরু ওইবা থমখি। ঙসি ত্রাইবলগী ইচানুপাশিং অমসুং ইচানুপীশিংনা হিদাক-লাংথক, ইঞ্জিনীয়রিং, আর্মী, এরোপ্লেন পাইলোতপু ওইরো হিরম খুদিংমক্তা শরুক য়ারক্লি। মসি পুম্নমক ওইরক্লিবা অসিগী মরমদি হৌখিবা দেকেদতা স্কুলদগী হাইবর এজুকেশন ফাওবদা ত্রাইবল এরিয়াশিংদা হেন্না ফবা খুদোংচাবশিং পীখিবনা মরম ওইরগনি। নিংতম্লবা মতুং দেকেদ তরুক তরেতকী মতুংদা ফাওবা লৈবাক অসিদা সেন্ত্রেল ত্রাইবল য়ুনিভর্সিতী অমখক্তমক লৈখি। হৌখিবা চহি ১০ অসিদা, NDA সরকারনা লৈবাক অসিদা অনৌবা ত্রাইবল য়ুনিভর্সিতী অনি পীখ্রে। চহিশিং অসিদা, দিগ্রী কোলেজশিং, ইঞ্জিনীয়রিং কোলেজশিং, ITI কয়া অমা ত্রাইবলনা নম্না তাবা জিলাশিংদা শাখি। হৌখিবা চহি ১০ অসিদা অনৌবা মেদিকেল কোলেজ ৩০ অমশুং ত্রাইবল জিলাশিংদা শাখ্রে অমসুং মেদিকেল কোলেজ কয়া অমাদা থবক কয়া অমা তৌখ্রে। জমুইদা মফম অসিদা অনৌবা মেদিকেল কোলেজ অমশু শারি। ঐখোয়না লৈবাক অসি শিনথুংনা একলৱ্য স্কুল ৭০০ হেন্নগী য়াম্না লিংবা নেতৱার্ক অমশু শেম্লগনি।
মরুপশিং,
লোল হায়বসিনা মেদিকেল, ইঞ্জিনীয়রিং অমসুং তেক্নিকেল এজুকেশনদা ত্রাইবল কম্যুনিতীগীদমক্তা খ্বাইদগী চাউবা অৱাবা অমা ওইরকখি। ঐখোয়গী সরকার অসিনা মমা লোলদা একজামিনেশনশিং থানবগী ওপ্শনশিং পীরি। মসিগী ফিরেপশিং অসিনা ত্রাইবল কম্যুনিতীগী অঙাংশিংদা অনৌবা থৌনা অমা পীরে। মসিনা মখোয়গী মঙালনশিং অদুদা অনৌবা আশা অমা উহল্লে।
মরুপশিং,
হৌখিবা চহি ১০ অসিদা, ত্রাইবলগী নহাশিংনা স্পোর্তসকী লমদা ময়ামদগী থোইদোক-হেন্দোকপা কয়া অমা তৌখ্রে। ত্রাইবলগী শান্নরোইশিংনা ইন্তর্নেস্নেল তুর্নামেন্তশিংদা ভারতকীদমক্তা মেদল কয়া অমা পুরকপদা য়াম্না চাউনা শরুক বাখি। ত্রাইবলগী নহাশিংগী হৈথোই-শিংথোইবাঅসি উরগা, ত্রাইবলগী মফমশিংদা স্পোর্ত ফেসিলিতীশিং শাখ্রে। খেলো ইন্দিয়া কেমপেনগী মখাদা ত্রাইবলনা নম্না তাবা জিলাশিংদা মোদর্ন গ্রাউন্দশিং অমসুং স্পোর্তস কমপ্লেক্সশিং শারি। ভারতকী খ্বাইদগী অহানবা নেস্নেল স্পোর্তস য়ুনিভর্সিতীশু মনিপুরদা শাখ্রে।
মরুপশিং,
নিংখা তম্লবা মতুং চহি ৭০ অসিদা, ৱাগা মরি লৈনবা আইনশিং অসি ঐখোয়গী লৈবাক অসিদ আবাম্না চেকশিল্লম্মি। ত্রাইবল সোসাইতীনা মসিদগী খ্বাইদগী হেন্না অৱাবা মায়োক্নখি। ঐখোয়গী সরকার ৱা য়ানবগা মরি লৈনবা আইনশিং অদুবু য়াম্না লাইথোক্নখ্রে। হান্নগী সরকারগী মতমদা, উমংগী পোত্থোক ৮-১০ খক্তমক MSP ফংলম্মি। NDA সরকার অসিনা MSPগী মখাদা উমংগী পোত্থোক ৯০ রোম পুরকই। ঙসিদি লৈবাক শিনথুংনা ৱন ধন কেন্দ্র ৪০০০ হেন্না থবক তৌরি। ত্রাইবল ইচিল-িনাও লাখ ১২না মখোয়গা পু্ন্না থবক তৌমিন্নরি। মখোয়না হেন্না ফবা শেন্দান লম্বি ফংলে।
মরুপশিং,
লাখপতি দিদি অভিয়ান্না হেক হৌরকপদগী, ত্রাইবল কম্যুনিতীদগী ইচে-ইচল চাউরাক্না লাখ ২০ হেন্না লাখপতি দিদি ওইখ্রে। লাখপতি দিদি হায়বা অসি অমুক্তং লুপা লাখ অমা তানবা অদু নত্তে চহি খুদিংগী লাখ অমা হেন্না তানবা অদুনা ঐগী লাখপতি দিদিনি। ত্রাইবল ইমুং ময়াম অমা ফজরবা ফিশিং, শান্নপোৎশিং অমসুং দেকোরেশনগী পোৎশিং শাবগী থবক তৌই। ঐখোয়না অসিগুম্বা পোৎলমশিং অসিগীদমক্তা অচৌবা সহরশিংদা হোত মার্কেতশিং হাংদোক্লি। মফম অসিদশু য়াম্না চাউবা হোত মার্কেত অমা থমখ্রে, মদু য়েংবা য়াবা মফম্নি। ঐহাক্না মফম অদুদা পুংখাই অমা কোইদুনা লৈখি। ঐগী ত্রাইবল ইচিল-ইনাওশিংনা ভারতকী তোঙান-তোঙানবা জিলাশিংদগী লাকখি, অমসুং মখোয়না শাবা ফজরবা পোৎলমশিং অদু উবদা ঙকপা ফাওখি। ঐহাক্না নখোয়দা মসিবু য়েংনবা হায়জরি অমসুং করিগুম্বা নখোয়না লৈনিংবা ফাওরবদি মদু নখোয়না লৈবা য়াগনি। মসিগীদমক্তা ইন্তর্নেত্তা গ্লোবল মার্কেত অমা শেম্লি। ফোরেন লীদরশিংদা ঐহাক ইশামক্না খুদোংপোৎশিং পীবা মতমদা, ঐহাক্না ত্রাইবল ইচিল-ইনাওশিংনা শাবা য়াম্নায়াম্লবা পোৎলমশিং পী। হন্দক্তা ঐহাক্না মালেমগী মকোক থোংবা লুচিংবশিংদা ঝারখন্দগী সোহরাই পেন্তিং, মধ্য প্রদেশকী গোন্দ পেন্তিং অমসুং মহারাস্ত্রগী ৱার্লি পেন্তিং খুদোল তমখি। হৌজিক্তি পেন্তিংশিং অসি মখোয়গী সরকারশিংগী ফকলাংদা ুবা ফংগনি। মসিনা মালেম অসিদা নখোয়গী হৈথোই-শিংথোইবা অমসুং কলা অদুগী মিংচৎ হেনগৎহল্লগনি।
মরুপশিং,
এজুকেশন অমসুং শেল তানবগী কান্নবা অসি ইমু-মনুংশিং অদুনা হকচাং ফনা অসোই-অঙাম য়াওদনা লৈরবা মতমদতা লৌবা ঙমগনি। সিক্কল সেল অনেমিয়া অসিনা ত্রাইবল সোসাইতীদা য়াম্না চাউবা শিংনবা অমনি। ঐখোয়গী সরকারনা মসিবু য়েংশিন্নবা নেস্নেল কেমপেন অমা হৌদোকখ্রে। মদু হৌখবা চহি অমা ফারে। মতম অসিদা, চাউরাক্না মী করোর মরি মখাই রোম স্ক্রীন তৌখ্রে। ত্রাইবলগি ইমুংশিংনা অতোপ্পা লাইনাশিংগীদমক্তালম লাপ্না চত্তনবা য়াম্লবা অয়ুশমান আরোগ্যা মন্দিরশিং শাখ্রে। খ্বাইদগী হেন্না রিমোত ওইবা মফমদফাওবা মোবাইল মেদিকেল য়ুনিৎশিং থমখ্রে।
মরুপশিং,
ঙসি ভারতনা ক্লাইমেত চেঞ্জকী মায়োক্তা লান্থেংনবদা অমসুং এনভাইরনমেন্ত ঙাক-শেন্দুনা থম্বদা মমিং লৈবা লৈবাক অমা ওইরে। মসিগী মরমদি ঐখোয়গী ৱাখল্লোনশিং অসিগী মপুং ওইবা ভেল্যুশিং অদু ত্রাইবল সোসাইতীনা তম্বীবনি। মরম অদুনা ঐহাক্না মালেম পুম্বদা মহৌশাবু নুংশিজবা ত্রাইবলগী সোসাইতীগী মতাংদা হায়নবা হোৎনরিবনি। ত্রাইবল সোসাইতী অসি নুমিৎ অমসুং নুংশিৎ, উপাম্বিশিং অমসুং পাম্বিশিংবু নিংবা সোসাইতী অমনি। ঙসিগী শেংলবা নুমিৎ অসিদা ঐহাক্না নখোয়দা ই-পাউ অমশু তমগে। ভগৱান বির্সা মুন্দাগী ১৫০শুবা মপোক কুমওন থৌরম অসিদা, লৈবাক অসিগী ত্রাইবলনা নম্না তাবা জিলাশিংদা বির্সা মুন্দা ত্রাইবল গৌরব উপৱন শেম্লগনি। বির্সা মুন্দা ত্রাইবল গৌরব উপৱনদা উপাম্বি ৫০০-১০০০ থারগনি। মসিগীদমক্তা মীপুম খুদিংমক্কী সপোর্ত ফংগনি, মীপুম খুদিংমক্না মতেং পাংলগনি হায়না ঐহাক্না য়াম্না চেৎনা থাজৈ।
মরুপশিং,
ভগৱান বির্সা মুন্দাগী মপোক কুমওনগী থৌরম অসিনা ঐখোয়বু অচৌবা ফিরেপশিং লৌনবা পুক্নিং থৌগৎলি। ঐখোয় পুন্না লৈবাক অসিগী ত্রাইবল আইদিয়াশিংবু অনৌবা ভারত অমা শেম্নবগী য়ুমফম ওইরগনি। ঐখোয় ময়াম পুন্নাত্রাইবল সোসাইতীগী হেরিতেজপু ঙাক-শেন্দুনা থম্লগনি। ঐখোয় ময়াম পুন্না চহি চা কয়াদগী নিংথিনা ঙাক-শেন্দুনা থম্লকপা ত্রাইবল সোসাইতীগী চৎনবীশিং অদুদগী তমশিনগনি। অসুম্না তৌরবা মতমদতা ঐখোয়না য়াম্না লিংবা, নুংঙাই-য়াইফবা অমসুং মতিক চাবা ভারত অমা তশেংনা শেম্বা ঙমগদৌরিবনি। অমুক্কশু হন্না জনজাতিয়া গৌরব দিৱসতা ময়াম পুম্নমকপু য়াইফ-পাউজেল পীরি। ঐগা লোইননা অমুক হন্না হায়মিন্নসি।
ঐহাক্না ভগৱান বির্সা মুন্দা হায়গনি – নখোয় ময়াম্না অমর ওইরসনু অমর ওইরসনু হায়গনি।
ভগৱান বির্সা মুন্দা - অমর ওইরসনু, অমর ওইরসনু।
ভগৱান বির্সা মুন্দা - অমর ওইরসনু, অমর ওইরসনু।
ভগৱান বির্সা মুন্দা - অমর ওইরসনু, অমর ওইরসনু।
ময়াম্বু হন্না-হন্না থাগৎচরি!
