ঙসিগী ৱেবিনার অসি বজেত মতুংদা পরিং নাইনা চৎথরকপা ৱেবিনারশিংগী মরিশুবা অমসুং খ্বাইদগী মরুওইবা ৱেবিনারনি। মীয়ামগী অনিংবশিং থুংহনবা হায়বসি খন্ন-নৈনবগী মচাক অমা ওইবতা নত্তনা, মসি বজেতকী মরুওইবা পান্দমনি অমসুং সরকার অসিগী ৱাশক্নি। লাইরিক-লাইশু, স্কিল, হকশেল, তুরিজম, শান্নবা অমসুং নাৎ অসি মীয়ামগী অনিংবশিং থুংহন্নবা খ্বাইদগী চাউবা পাম্বৈশিংনি। মরম অদুনা ৱেবিনার অসিদা ঐখোয়না হায়রিবা মরুওইবা হিরমশিং অসি খন্নরে। বজেত্ত লাউথোকখিবশিং থবক ওইনা পায়খৎপদা অখঙ-অহৈশিং, থৌশিল শেম্বশিং অমসুং ওন্ত্রেপ্রেন্যুরশিং অমসুং হিরমশিংদা থবক তৌরিবা ঐগী নহা ওইরিবা মরুপশিংগী ৱাখল্লোনশিং অমসুং পাউতাকশিং য়াম্না মরুওই। মরিশুবা বজেত মতুংগী ৱেবিনার অসিদা ময়াম পুম্নমক ঐনা তরাম্না ওকচরি।
মরুপশিং,
ঙসি ভারতনা মাংজৌননা ঙাকথোকপা অমসুং অফবা অনা-লাইয়েংগীদমক অচৌবা পান্দম অমদা থবক পায়খৎলি। হৌখিবা চহি খর অসিদা, লৈবাক অসিগী হকশেলগী ইনফ্রাষ্ট্রকচর ফগৎহল্লে, জিলা চা কয়াদা অনৌবা মেদিকেল কোলেজশিং লিংখৎলে। অয়ুস্মান ভারত য়োজনা অমসুং অরোগ্যা মন্দিরশিংগী খুৎথাংদা খুঙ্গংশিংদা হকশেলগী খুদোংচাবশিং ফংহল্লে। ঐখোয়গী য়োগ অমসুং অয়ুর্বেদা মালেম শীনবা থুংনা পাম্নরে। ঐনা ফোঙদোক্নিংবা য়াম্না মরুওইবা হিরম অমদি অনাবশিংগী সেবা তৌবগী শেন্মিৎলোন অসিনি। লাক্লিবা চহিশিংদা লৈবাক অসিদা অহল মশিং য়াংনা হেনগৎলক্লগনি। মসিগী মথক্ত, ঙসি মালেমগী লৈবাক কয়াদা সেবা তৌবীনবা মীওই কয়া দরকার ওইরি। মরম অদুনা, হকশেলগী লমদা হৌজিক অনৌবা স্কিলদা য়ুম্ফম ওইবা থবকশিংনা নহারোল লাখ কয়া থবক ফংনবা খুদোংচাবশিং পীগনি। লৈবাক অসিদা ত্রেনিং পীবগী থবক মখা তানা ফগৎহন্নবা অনৌবা ত্রেনিং নমুনাশিং পুথোক্নবা অমসুং পুন্না থবক তৌমিন্ননবা ৱেবিনার অসিদা শরুক য়ারিবা হকশেলগী অখঙ-অহৈশিংদা ঐনা হায়জরি।
মরুপশিং,
অনিশুবা মরী লৈনবা হিরম্না তেলি-মেদিসিন্নি। ঙসিদি, মনুং হুঞ্জিনবা মফমশিংদগী মশিং য়াম্লবা মীয়াম্না মসিগী কান্নবা ফংলে অমসুং থাজবা হেনগৎলক্লি। অদুবু হিরম অসিগী মতাংদা খঙবা অমসুং লাইহনবা হেনগৎহনবগী দরকার ওইবা লৈরি হায়না ঐনা খল্লি।
মরুপশিং,
হৌখিবা চহি ১০ দা লৈবাক অসিগী ৱাখল্লোন্দা অচৌবা অহোংবা অমা লাক্লে। ঙসি, খুঙ্গং, তাউন, সহরগী ঙমখৈশিংগী ৱাংমদা, ভারত্ত নহারোলশিংনা করিগুম্বা অনৌবা খর পাংথোক্নিংবগী অপাম্বা লৈরে, করিগুম্বা পাংথোক্নবগী অপাম্বা লৈরে। অনৌবা মীরোলগী অনৌবা ৱাখল্লোন অসি লৈবাক অসিগী খ্বাইদগী কনবা মপাঙ্গলনি, অফবা তুংলমচৎ অমগী খ্বাইদগী ফবা লন্নি। মসিগী কান্নবা লৌনবা, ঐখোয়না লেপ্তনা ঐখোয়গী লাইরিক-লাইশুগী থবক মতমগা চুন্নবা শেমগৎকদবনি, ফগৎহনগদবনি। মসিগীদমক অনৌবা ইজুকেসন পোলিসিনা শেম-শারে। কৈথেলগী দরকার ওইবশিং ফংবা ঙম্নবা ঐখোয়গী করিকুলম নৌথোকহনবা হৌজিক য়াম্না মরুওইরে। ঐখোয়গী লাইরিক-লাইশু তাকপী-তম্বীবগী থবক্ক অশেংবা মালেমগী শেন্মিৎলোনগা শম্নবা য়াংখৎহনগদবনি। এ.আই অমসুং ওতোমেসন, দিজিতেল ইকোনোমি অমসুং দিজাইন্না লমজিংবা মেনুফেকচরিংগুম্বা হিরমশিংদা ঐখোয়না মীৎয়েং চঙবা হেনগৎহনগদবনি।
মরুপশিং,
লাইরিক লাইশু তম্বগা থবক ফংবা অমসুং ললোন-ইতিক্কা শম্ননবা লৈবাক অসিনা লেপ্তনা হোৎনরি। থৌরাং অসিদা য়ুনিভর্সিতি তাউন্সিপগুম্বা অনৌবা নমুনাশিংগী মমি তারে। ঙসি, ভারতনা এ.ভি.জি.সি সেক্তর – এনিমেসন, ভিজুয়েল ইফেক্তস, গেমিং অমসুং কমিক্স য়োকখৎলি। ইন্নোবেসন্না লমজিংবা শেন্মিৎলোন অমগী মাইকৈদা ভারত চঙশিল্লি। ঙসিগী ৱেবিনার অসিদা অখঙ-অহৈশিং অমসুং মহৈলোয়শঙ কয়া শরুক য়ারি। অদোমগী কেম্পসশিং উদ্যোগকা পুন্না থবক চৎমিন্নবা অমসুং থিজিনবনা লমজিংদুনা তম্নবগী মফমশিং ওইনা শেমগৎনবা অদোম্না খন্ন-নৈন্নবা ঐনা হায়জরি। মসিনা মহৈরোয়শিংদা অশেংবা তাইবং মশক খঙহনগনি অমসুং স্কিল লৈহন্নবা থবক ফগৎহনগনি।
মরুপশিং,
খ্বাইদগী মরুওইবা সবজেক্তি ষ্টেম - সাইন্স, তেক্নোলোজি, ইঞ্জিনিয়ারিং অমসুং মেথেমেতিক্সনি। ঐখোয়গী লৈবাক্ত নুপীমচাশিংনা সাইন্স, তেক্নোলোজি, ইঞ্জিনিয়ারিং অমসুং মেথেমেতিক্স সবজেক্তশিংদা থৱায় য়াওবা উবা অসি য়াম্না চাউথোকনিঙাইনি। ঐখোয়না তুংগী তেক্নোলোজিশিংগী শেম-শাবা ওইনা, খুদোংচাবশিং ফংদবদগী নুপীমচা অমতা মনিংদা লৈহৌদবা হায়বসি য়াম্না মরুওই। ৱেবিনার অসিদা, হিরম অসিদা অদোম খন্নগদবনি। নুপীশিং শরুক য়াবা হেনগৎলক্নবা ঐখোয়না অকনবা মীৎয়েং চঙগদবনি। নহা ওইরিবা থিজিল্লোয়শিং চাংয়েং তৌনবা অমসুং অনৌবা ৱাখল্লোনশিংদা থবক তৌনবা খুদোংচাবশিং মপুংফানা পীনবা ঐখোয়না থিজিনবগী কাংলোন অমা শেমগৎকদবনি।
মরুপশিং,
নহারোলশিং মশা ফরবা, থকসি-খাসি লৈরবা অমসুং মশানা মশাবু মপুংফানা থাজবা লৈরবা মতমদা নহারোলগী শক্তি লৈবাক্কি শক্তি ওইরক্কনি। মরম অদুনা, চহি খর অসিদা, শান্নবনা লৈবাক অসি চাউখৎনবা মরুওইবা হিরম অমা ওইরক্লে। লৈবাক অসিগী শান্ন-খোৎনবগী থবক্ত খেলো ইন্দিয়াগুম্বা থবকশিংনা অনৌবা থৌনা হাপ্লে। লৈবাক শীনবা থুংনা শান্নবগী মচাক-মথুমশিং ফগৎহল্লে। ৱেবিনার অসিদা, অদোম্না মরুওইবা ৱাহং খর খন্নগদবনি: কমদৌনা অপীকপা সহরশিং অমসুং খুঙ্গংশিং ফাওবদগী হৈথোই-শিংথোইবা মীওই মশক খঙদোক্কনি? শান্নরোয় লিশিং কয়া ফগৎনবা কমদৌনা শেন-থুমগী মতেং পাংগনি? অহুমশুবদা, কমদৌনা ঐখোয়গী শান্নবগী লুপশিং হেন্না ফজনা থবক পাংথোক্কনি? লাক্লিবা চহিশিংদা, ভারত্ত কম্মনৱেল্থ গেমস পাংথোক্লগনি অমসুং লৈবাক অসিনা ওলেম্পিক্স য়ুম্বু ওইনবা হোৎনরি। অসিগুম্বা ফিবম অমদা, ঐখোয়না নহা ওইরিবা শান্নরোয়শিং চহি য়াম্না নৌরিঙৈদগী মশক খঙদোক্কদবনি অমসুং মখোয় য়োকখৎকদবনি, মতম অদু খক্তদা মালেমগী চাংদম্নবশিংদা ভারতনা লৈবাক অসিগী ফিরাল পাইহনবা ঙমগনি।
মরুপশিং,
অনৌবা থবক ফংনবা খুদোংচাবশিং পীবদা তুরিজম অমসুং নাৎনা মরুওইবা থৌদাং অমা লৌরি। মফম অমদা তুরিজম চাউখৎলকপা মতমদা, মফম অদু নত্ত্রগা সহর অদু মশক খঙবসু হেনগৎলকই। মসিনা সহর অদু হিরম খুদিংমক্ত চাউখৎপা য়াংখৎহল্লি। ভারতকী ওইনা পুৱারিগী মফমশিংগী অৱাৎপা লৈতে। মতম কয়াগী মমাঙদগী, তুরিজম অসি অকক্নবা মফম খর খক্তগী ওইরমখি। হৌজিক ঐখোয়না লৈবাক অসিগী মফম খুদিং শীনবা থুংনা লমকোয়ফমশিং শেমগৎনবা মীৎয়েং চঙলে।
মরুপশিং,
ৱেবিনার অসিদা, ভারতকী তুরিজমগী থবক মপাঙ্গল কনখৎহন্নবা অচুম্বা থৌরাং অমা অদোম্না খন্নগদবনি। ত্রেনিং পীরবা গাইদশিং, সেবা তৌনবা লৌশিং, দিজিতেল কন্নেক্তিবিতি, মীয়াম শরুক য়াবা, লু-নানবা, তুরিজম অমসুং মরী লৈনবা হিরমশিংদা অদোমগী পাউতাকশিং য়াম্না মরুওই।
মরুপশিং,
মহৈলোয়শঙশিং, উদ্যোগ অমসুং থিজিনবগী লুপশিং পুন্না থবক তৌমিন্নবা মতমদা, অওনবা পুরকপগী খোঙজেল য়াংখৎলি। বজেত মতুংগী ৱেবিনারশিংনা তুংগীদমক চপ চাবা লম্বী অমা তাক্কনি হায়না ঐনা থাজৈ। অসিগুম্বা থবকশিংনা বিকসিত ভারত অমগী য়ুম্ফম মপাঙ্গল কনখৎহনগনি। ৱেবিনারশিংগী চৎনবীনা মরম ওইদুনা, বজেত মতুংদা অমসুং মরুওইনা থবক ওইনা পায়খৎলিঙৈদা, মসি য়াম্না নুংঙাইবা অমনি, মীওই লাখ কয়া অখঙ-অহৈশিং, বেনিফিসরিশিং অমসুং থবক অমদা শরুক য়ারিবশিং থৱায় য়াওনা ৱেবিনারশিংদা শরুক য়ারে হায়না ঐনা চহি অসিদা ফোঙদোকখ্রে। অফবা অমসুং থবক ওইনা পাংথোকপা য়াবা পাউতাকশিং ফংখি হায়না ঐখোয়গী ওফিসিএলশিংনা ঐঙোন্দা হায়খি। মসিনা খুদোংচাদবশিংগী পাম্বৈশিং ওইবা খক নত্তনা থাজবগা লোয়ননা মাঙলোমদা চঙশিন্নবা অনৌবা থৌনা অমসুং অনৌবা ইনোৎ অমসু ওইরে। ৱেবিনার অসিদা শরুক য়ারিবা মীওই খুদিংমক ঐনা থাগৎপা ফোঙদোকচরি অমসুং তৌবীমল খঙবা উৎচরি। অমুক হন্না, ময়ামগী মফমদা ঐনা ঐগী য়াইফ পাউজেল পীজরি।
খুরুমজরি!
