AI ইম্পেক্ত সম্মিত অসিদা অদোম পুম্নমকপু ভারত্তা অমুক হন্না তরাম্না ওকপদা ঐহাক য়াম্না নুংঙাইবা ফাওই। মীফম অসিনা হ্যুমেন সেন্ত্রিক, সেন্সিতিব গ্লোবেল AI ইকোসিস্তেম অমা শেমগৎপদা অচৌবা থৌদাং লৌগনি হায়না ঐহাক্না থাজবা থম্লি।
মরুপশিং,
ঐখোয়না পুৱারীদা অমুক হন্না য়েংলুরবদি, মীওইবনা অৱাবা খুদিংমকপু অনৌবা খুদোংচাবা অমদা ওন্থোকখি। ঙসি অসিগুম্বা খুদোংচাবা অমা ঐখোয়না অমুক হন্না ফংলে। ঐখোয় পুন্না হোৎনমিন্নদুনা মসিগী দিসরপ্সন অসিবু মীওইবা খুন্নাইগী খ্বাইদগী চাউবা খুদোংচাবা অমা ওইহল্লসি।
মরুপশিং,
ভারত অসি বুদ্ধগী লমদমনি অমসুং ভগবান বুদ্ধনা হায়রম্মি - অচুম্বা থবক অসি অচুম্বা ৱাখল্লোনদগী লাকপনি। মরম অদুনা, ঐখোয়না পুন্না থবক তৌমিন্নদুনা, AIনা অচুম্বা ইম্পেক্ত অমা পীবা ঙম্নবা রোদমেপ অমা শেম্বা হায়বসি য়াম্না মরু ওই, অমসুং অচুম্বা ইম্পেক্ত অসি ঐখোয়না অচুম্বা মতমদা, অচুম্বা মওংদা, অচুম্বা ৱারেপ লৌবদগী লাক্কনি।
মরুপশিং,
মালেমগী ওইনা কোবিদ লাইচৎ অসিনা মালেমদা তাকপীরিবদি ঐখোয় অমগা অমগা লেপমিন্নবা মতমদা, ওইথোক্লোইদবা অসি ওইথোকপা ঙমগনি হায়বসিনি। ভেক্সিন পুথোকপদগী হৌরগা সপ্লাই চেন ফাওবা, দেতা শেয়র তৌবদগী হৌরগা পুন্সি কনবা ফাওবা, মতেং পীনবনা সোলুসন পীরি। তেক্নোলোজীনা করম্না মীওইবা খুন্নাইগী সেবাগী পাম্বৈ অমা ওইরকপা য়াবগে হায়বদু ঐখোয়না ভারত্তা কোবিদকী মতম অসিদা উবা ফংলে। ঐখোয়গী দিজিতেল ভেক্সিনেসন প্লেৎফোর্মনা মীওই কোতি কয়াদা মতম চানা ভেক্সিন কাপথোকপদা মতেং পাংলি। ঐখোয়গী UPIনা অরুবা ফিভমশিং অদুদসু মীওইশিংনা ওনলাইন ত্রাঞ্জেক্সনশিং অসি লায়না পাংথোকপা ঙমহনখি। UPIনা ভারত্তা দিজিতেলগী খেৎনবা অদুবু কোকহনবদা য়াম্না চাউবা থৌদাং লৌখি। হৌখিবা চহি খরা অসিদা ভারতনা য়াম্না ভাইব্রেন্ত ওইবা দিজিতেল পব্লিক ইনফরাস্ত্রকচর অমা শেমখি, লোইননা ঐখোয়না মসিবু মালেম পুম্বগা শেয়র তৌরি। মরমদি ঐখোয়গী ওইনদি তেক্নোলোজী হায়বসি পাৱরগীদমক নত্তে, মসি সেবা তৌনবা পাম্বৈ অমা ওইনা লৌই, পাৱর নত্তে এমপাৱর তৌবদুনি। AIগী মাইকৈদশু অসুম্না ওইগদবনি, মসিনা মরম ওইরগা মীওইবা জাতিগী য়াইফবা ওইহনগদবনি।
মরুপশিং,
মমাংদা তেক্নোলোজীনা দিভিজনশিং থোকহল্লি, অদুবু হৌজিক্তি AI তেক্নোলোজী অসি মীপুম খুদিংমক্তা য়ৌহনগদবনি, মসি ঐখোয়গী পান্দম ওইগদবনি। মরম অদুনা, ঙসি ঐখোয়না AIগী তুংলমচৎকী মতাংদা খন্ন-নৈনরিবা অসিদা, ঐখোয়না গ্লোবেল সাউথকী এস্পিরেসনশিং অমসুং মরুওইবশিংদুসু AI গবর্নান্সকী খ্বাইদগী মরুওইবা হীরম অমা ওইনা থমগদবনি।
এক্সেলেন্সীশিং,
মতমগী খেন্নবা লৈতনা, এথিক্স অসি মতম পুম্বদা খন্ন-নৈনবগী খ্বাইদগী মরুওইবা অমা ওইদুনা লৈ। খেন্নবা অমখক্তমক লৈরিবদি, মমাংদা এথিকেল ওইদবা লমচৎ-শাজৎকী স্কোপ অসি য়াম্না পীকই, অদুবু AIদা, মসিগী স্কোপ অসি অকক্নবা নত্তে। মরম অদুনা, AIগীদমক্তা, ঐখোয়না এথিকেল বিহেবিয়র অমসুং নোর্মশিংগী স্কোপসু পাকথোক চাউথোকহনগদবনি। AI কম্পেনীশিংগী য়াম্না চাউরবা থৌদাং অমা লৈ; শেন্দোংগা লোয়ননা, অসিগুম্বা ইথিলদসু মিৎয়েং চংবা হায়বা অসিগুম্বা এথিকেল ওইবা ফিরেপ অসি য়াম্না মথৌ তাই। ইন্দিভিজুৱল লেভেলদা, AI না ঐখোয়গী লর্নিং, ইন্তেলিজেন্স, অমসুং ইমোসনদা ইথিল পীরি।
এক্সেলেন্সীশিং,
AIবু এথিকেল ওইনা শীজিন্ননবা ঐহাক্না ৱাফম অহুম থম্লি। অহানবদা, দেতা সোভরেন্তীবু ইকাই খুম্নবা AI ত্রেনিংগী দেতা ফ্রেমৱার্ক অমা শেমগদবনি। AIদা হায়নরিবা অসিগুম্না, “গার্বেজ ইন, গার্বেজ আউৎ।” করিগুম্বা দেতা অদু সেক্যুর, বেলেন্স তৌরবা অমসুং থাজবা য়াদ্রবদি, আউতপুত অদু থাজবা য়াদে। মরম অদুনা, গ্লোবেল ত্রস্তেদ দেতা ফ্রেমৱার্ক অমা মথৌ তাই। অনিশুবদা, AI প্লেতফোর্মশিংনা ময়েক শেংবা অমসুং ত্রান্সপরেন্ত ওইবা সেফতী রুলশিং ঙাক্না চৎকদবনি। সেফতী রুলশিং অসি য়েংশিনবা অমসুং ভেরিফাই তৌবা ঙম্বা ব্লেক বোক্স এপ্রোচ অমগী মহুত্তা গ্লাস বোক্স এপ্রোচ অমা ঐখোয়না মথৌ তাই। মসিনা ময়েক শেংবা পাউখুম পীবা অমসুং ললোন-ইতিক্তা এথিকেল ওইবা লমচৎ-শাজৎ প্রমোৎ তৌগনি। অহুমশুবদা, পেপরক্লিপ প্রোব্লেম অসি AI রিসর্চতা তোইনা হায়নৈ। করিগুম্বা মেছিন অমবু পেপরক্লিপ শেম্নবা পান্দম অমা পীরবদি, মসিনা মালেমগী রিসোর্স পুম্নমক শিজিন্নরবশু থবক অদুমক মখা চত্থখিগনি। মরম অদুনা, AIনা ময়েক শেংবা মীওইবগী ভেল্যু অমসুং লমজিং-লমতাক মথৌ তাই। তেক্নোলোজী অসি শক্তি লৈ, অদুবু মীওইবনা মতম পুম্নমক্তা মাইকৈ তাকপীগনি।
মরুপশিং,
এস্পিরেস্নেল ইন্দিয়া AIনা আর্তিফিসিয়েল ইন্তেলিজেন্সকী মালেমগী খোঙচৎতা মরুওইবা থৌদাং অমা লৌরি অমসুং মসিগী থৌদাং অসি খঙলদুনা ঙসিদি ভারতনা মরুওইবা খোংথাং কয়া অমা লৌখৎলি। ঐখোয়গী AI মিসনগী খুত্থাংদা, ভারতনা ঙসি GPU 38,000 লৈরে, অমসুং লাক্কদৌরিবা থা তরুক অসিদা ঐখোয়না GPU 24,000 হেন্না হাপচিল্লগনি। ঐখোয়না ঐখোয়গী স্তার্ত-অপশিংদা মালেমগী থাক্কী কম্প্যুতিং পাৱর অসি য়াম্না হোংবা মমলদা ফংহল্লি। ঐখোয়না AI সেল অমসু শেমখ্রে, মসিগী খুত্থাংদা দেতা সেৎ 7500 হেন্না অমসুং AI মোদেল 270 হেন্না নেস্নেল রিসোর্স ওইনা শেবর তৌখ্রে।
মরুপশিং,
AIগী মতাংদা ভারতকী মাইকৈ অমসুং মিৎয়েং অদু ময়েক শেংলে। AI অসি মীওইবা খুন্নাই পুম্নমক্কী কান্ননবগীদমক্তা শেয়র তৌরবা রিসোর্স অমনি। ঐখোয় ময়াম চংদুনা ইন্নোবেসনবু খুমাং চাউশিনহনবা, ইনক্লুজনবু মপাঙ্গল কনখৎহনবা, অমসুং মীওইবগী মগুনশিংবু মশক তাকপা AIগী তুংলমচৎ অমা শেমগদবনি। তেক্নোলোজী অমসুং মীওইবগী থাজবগা লোয়ননা চৎমিন্নবা মতমদা, AIগী অশেংবা ইমপেক্ত অদু মালেমদা উবা ফংলগনি।
