অথোইবা, ঐগী মরূপ রাস্ত্রপতি মেক্রোন,
মিস্তর মোরিস লেভী, পব্লিসিস গ্রুপকী চেয়রমেন,
মালেম পুম্বদগী শরুক য়াবিরিবশিং,
খুরুমজরি!
খুদোংথিরবা মতমসিদা ভিভাতেক মায় পাক্না পাঙথোকপগীদমক্তা শিল্লি-লাংলিবশিংদা নুংঙাইবা ফোঙদোকচরি।
ফম্পাক অসিদা ফ্রান্সকী তেক্নোলোজীগী মীৎয়েং মমি তারি। ভারত অমসুং ফ্রান্সনা তোঙান তোঙানবা হীরমশিংদা পুন্না থবক তৌমিন্নরি। মসিগী মনুংদা তেক্নোলোজী অমসুং দিজিতেল অসি তেংবাংনবগী মাঙজিল থানা চৎখৎলক্লিবা লমশিংনি। অসিগুম্বা তেংবাংনবগী থৌওং অসি মখা তানা চাউখৎলকপা মথৌ তাই। মসিনা ঐখোয়গী লৈবাকশিংগী মতেং ওইবদা নত্তনা মালেমগী ওইনসু মতেং ওইগদৌরিবনি।
নহা কয়ানা ফ্রেঞ্চ ওপন পুক্নিং চঙনা য়েংনরি। ভারতকী তেক কম্পেনীশিংগী মরক্তা অমা ওইরিবা ইনফোসিসনা তুর্নামেন্ত অসিদা তেক্কী ঙাক্লৌ পীরি। মতৌ অসুম্না ফ্রেঞ্চ কম্পেনী এতোস ভারত্তা খ্বাইদগী য়াঙবা সুপর কম্প্যুতর শাবগী প্রোজেক্তা শরুক য়ারি। ফ্রান্সকী কেপজেনিমাই ওইরবসু নৎত্রগা ভারতকী তি.সি.এস. অমসুং ৱাইপ্রো ওইরবসু, ঐখোয়গী আই.তি.গী খঙ হৈরবশিংনা মালেমগী কম্পেনীশিং অমদি মীয়ামগী থৌগল তৌরি।
মরূপশিং,
চুম্না চৎনরিবা মওংনা য়ারক্ত্রবা মতমদা অনৌবা ৱাখল্লোনগী মতেং ওইরকই হায়না ঐনা থাজৈ। ৱাফমসিমক ঐখোয়গী মতমগী খ্বাইদগী চাউবা অয়েৎ-অপন ওইরিবা কোবিদ-১৯গী মালেমগী লাইচৎ মনুংসিদা উরি। লৈবাক খুদিংমক্না অমাঙ অতা কয়া থেংনখি অমদি তুংগীদমক লাংতক্নবা পোক্নখি। কোবিদ-১৯না ঐখোয়গী হান্না চৎনরিবা থৌওং কয়াবু চাংয়েং তৌরকই। অদুম ওইনমক, অনৌবা ৱাখল্লোনশিংনা মসিদগী ঙাকথোক্নবা পাম্বৈ ওইরকখি। ঐনা অনৌবা ৱাখল্লোন হায়রিবসি:
লাইচৎ মমাঙগী অনৌবা ৱাখল্লোনশিং।
লাইচৎ মনুংগী অনৌবা ৱাখল্লোনশিংদুবুনি।
ঐনা লাইচৎ মমাঙগী অনৌবা ৱাখল্লোন হায়রিবসি হান্না লৈরম্বা লাইচৎ মনুংদা ঐখোয়দা তেংবাংখিবা চাউখৎপগী থৌওংশিংদুবুনি। দিজিতেল তেক্নোলোজীনা ঐখোয়বু অৱাবা খাঙবদা, অমগা অমগা শম্নবদা, নুংঙাইহনবদা অমদি থেমজিনবদা মতেং পাংখি। দিজিতেল মিদিয়াগী খুত্থাঙদা ঐখোয়না থবক তৌবা ঙমখি, নক্ন-চান্নবশিংগা ৱারী ৱাতায় শানবা ঙমখি অমদি অতৈবুসু মতেং পাংবা ঙমখি। ভারতকী পুম্নমক কোনশিল্লবা তোপ তোপ্পা বাইও-মেত্রিক দিজিতেল আইদেন্তিতী সিস্তেম – আধারনা – লায়রবশিংদা মতম চানা শেলগী তেংবাং য়ৌহনবদা মতেং ওইখি। ঐখোয়না মীওই মিলিয়ন ৮০০দা চীঞ্জাক লেম্না য়ৌহনবা ঙমখি অমদি য়ুমথোঙ কয়াদা চাকথোঙ-গ্যাসকী সবসিদী য়ৌহনবা ঙমখি। ভারত্তা ঐখোয়না মহৈরোইশিংবু মতেং পাংননবা স্বয়ম অমসুং দিক্সা হায়বা পব্লিক দিজিতেল এজুকেসন প্রোগ্রাম অনী থুনা মথৌ তৌহনবা ঙমখি।
অনিশুবা শরুক ওইরিবা লাইচৎ মনুংগী অনৌবা ৱাখল্লোন হায়বসিনা মীওইবা খুন্নাইনা ফীভমসিদা কমদৌনা লিৎখৎলকপগে অমদি লানথেং অসিগী ময়াই হাপখিবগে হায়বদুনি। মসিদা ঐখোয়গী স্তার্ত-অপ সেক্তরগী থৌদাং য়াম্না চাউই। ঐ ভারতকী খুদম অমখক থমজগে। লাইচৎ অসিনা ঐখোয়গী তোর্বান য়ৌশিল্লকপদা, ঐখোয়দা তেস্ত তৌবগী মতিং মরাং কায়না লৈরমদে অমদি মাস্ক, পি.পি.ই., ভেন্তিলেতর অমসুং অতৈ খুৎলায় য়াম্না ৱাৎলম্মি। হায়রিবা অৱাৎপসি মেনখৎপদা ঐখোয়গী লনাই সেক্তরনা মরুওইবা থৌদাং লৌখি। ঐখোয়গী দোক্তরশিংনা কোবিদ অমসুং নন-কোবিদগী ৱাফম খরবু ভর্চুএল ওইনা মতেং পাংনবা তেলি-মেদিসিনবু পাক চাউনা লৌশিনখি। ভারত্তা ভেক্সিন অনি শারি অদুগা অতৈ খরসু চাংয়েংগী থাক্তা লৈরি। লৈঙাক্কী মায়কৈদনা ঐখোয়গী লমদমসিগী ওইবা আই.তি. ফম্পাক, অরোগ্য সেতুনা কন্তেক্ত ত্রেসিং নীংথিনা তৌবা ঙমহনখি। ঐখোয়গী কোৱিন দিজিতেল ফম্পাক্না মীওই মিলিয়ন কয়াবু তিকা থাহনবদা মতেং পাংলি। করিগুম্বা ঐখোয়না অনৌবা ৱাখল্লোন পুথোকপা লেপ্লম্লবদি ঐখোয়না কোবিদ-১৯গী মায়োক্তা চঙশিল্লিবা লান্থেং অসি মপাঙ্গল শোল্লম্বা য়াই। মথংগী শিংনবা অমা লাকপা মতমদা হেন্না ফবা মওংদা শেম শাহৌবা ঙম্নবগীদমক ঐখোয়না অসিগুম্বা অনৌবা ৱাখল্লোনগী ইথিল অসিবু থাদোক্লোইদবনি।
মরূপশিং,
তেক অমসুং স্তার্ত-অপগী তাইবংদা ভারতকী খোঙজেল ফজনা খঙনরবা ৱাফম্নি। ঐখোয়গী লৈবাক অসি মালেমগী খ্বাইদগী চাউবা স্তার্ত-অপ ইকো সিস্তেমশিংগী মরক্তা অমা ওইরি। হৌখিবা চহি খরসিদা মাঙজিল থাবা কয়া থোরকখ্রে। ভারতনা ইনোভেতরশিং অমসুং ইনভেস্তরশিংনা মথৌ তাবশিংদু পীরি। ঐনা মালেম পুম্ববু হৈশিংবা, কৈথেল, শেল্লেপ, ইকো-সিস্তেম অমসুং পাম্বোম তিংথোকপগী মওং মতৌ হায়রিবা য়ুম্বী মঙাসিদা য়ুম্ফম ওইরগা ভারত্তা শেল থাদনবা পাউজেঞ্জরি।
ভারতকী তেক-তেলেন্ত পুল অসি মালেম শিন্বা থুংনা মমিং চৎলি। ভারতকী নহাশিংনা মালেমগী খ্বাইদগী লুবা ৱায়েৎ খরদা তেককী পাম্বৈ পীখ্রে। ঙসিদি, ভারত্তা মোবাইল ফোন বিলিয়ন ১.১ লৈরে অমদি ইন্তরনেত শীজিন্নবা মীওই মিলিয়ন ৭৭৫ লৈরে। মসি লৈবাক কয়াগী অপুনবা মীশিংদগী হেল্লবনি। ভারতকী দেতা শীজিন্নবগী চাং অসি মালেমগী ওইনা খ্বাইদগী ৱাংবশিংগী মরক্তা অমনি ঐমদি মালেমগী ওইনা খ্বাইদগী হোঙবসু ওইরি। ভারত মচাশিংনা সোসিএল মিদিয়া খ্বাইদগী মশিং য়াম্না শীজিন্নরি। মফমসিদা খেন্নবা অমদি পাক চাউরবা কৈথেলনা অদোমবু ঙাইদুনা লৈরি।
মরূপশিং,
হায়রিবা দিজিতেলগী পাকথোক চাউথোক্লিবসি অফবা মখলগী মীয়ামগী দিজিতেল মচাক মথুম শেমগত্তুনা মথৌ হাপ্লিবনি। ফাইবর ওপ্তিক নেতৱর্ক কিলোমিতর ৫২৩,০০০না খুঙ্গঙগী কাউন্সিল ১৫৬,০০০বু শম্নহল্লি। লাক্কদৌরিবা মতমশিংদা অহেনবা কয়া অমসু শম্নহল্লক্কদৌরি। লৈবাক শিনবা থুংনা পব্লিক ৱাই-ফাই নেতৱর্ক থম্লক্কদৌরি। মতৌ অসুম্না, ভারতনা অনৌবা ৱাখল্লোন পুথোক্নবগী চৎনবী অমা শেমগৎনবা ইচঙ থৌনা হোৎনরি। অতল ইনোভেসন মিসনগী মখাদা মহৈ তম্ফমশঙ ৭৫০০দা অফবা মখলগী ইনোভেসন লেবশিং লৈরে। ঐখোয়গী মহৈরোয়শিংনা মপান লৈবাক্কী মহৈরোয়শিংগা লোয়ননা মশিং য়াম্লবা হেকাথোনশংদা শরুক য়ারি। মসিনা মখোয়দা মথৌ তাবা মালেমগী হৈশিংবশিং অমসুং খ্বাইদগী ফবা চৎনরিবা থৌওংশিংদা তোৎন-তিন্নহল্লি।
মরূপশিং,
হৌখিবা চহি খরসিদা, তোঙান তোঙানবা সেক্তরশিংদা অয়েৎ অপন কয়া থেংনখি। হায়রিবশিংসিগী মরক্তা কয়া অমদি হৌজিকসু লৈরি। অদুম ওইনমক অয়েৎ অপনশিং অসি নিংংহন্নবগী মরম অমদি ওইহনফম থোক্তে। মদুগী মহুত্তা ঐখোয়গী মীৎয়েং শেমজিনবা অমদি শেম শাবা হায়বা য়ুম্বী অনিসিদা থম্বা তাই। মমাঙ চহিগী মতম অসিদা মালেম অসিনা ভেক্সিন অমা থিরম্লিবনি। ঙসিদি ঐখোয়দা খরদি লৈরে। মতৌ অসুম্না ঐখোয়না হকশেলগী মচাক মথুমশিং অমদি ঐখোয়গী শেন্মিৎলোন লেপ্তনা শেমজিনবা তাই। ভারত্ত ঐখোয়না খনি, তরং, বেঙ্কিং, এতোমিক ইনর্জী অমদি অতৈ সেক্তর কয়াদা চাউনা অওনবা পুরক্নবগী থৌরাং পায়খৎখি। মসিনা ভারতপু লাইচৎ মনুংদা ফাওবা হোংলক্লিবা মতমগা চুশিন্নবা ঙমবা লৈবাক অমা ওইনা উৎলি। অদুগা ঐনা শেম শাবা হায়রিবসিনা ঐখোয়গী মালেম লৈকোয়পুং অসিবু মথংগী লাইচৎ অমদগী ঙাকথোক্তুনা থম্বা অদুবুনি। মহৌশাগী ওইরিবা খলবু মাঙহনবা তৌদনা তুং কোইনা চৎকদবা পুন্সি মহিং অমদা মীৎয়েং থম্ববুনি। থিজিন হুমজিনবা অমদি অনৌবা ৱাখল্লোনশিং মখা তানা পুথোরক্নবগীদমক তেংবাংনবা হেনগৎহনববুনি।
মরূপশিং,
ঐখোয়গী মালেম লৈকোয়পুং অসিনা থেংনরিবা শিংনবশিং অসি পুন্না হোৎনমিন্নবগী ৱাখল্লোন অমদি মীওইবগী ওইবা লম্বী পরিংদা চঙশিল্লবখক্তদা মায়োক্নবা ঙমগনি। মসিগীদমক ঐনা স্তার্ত-অপ ফুরুপশিংদা মাঙজিল থানবা ৱাফম থমজরি। স্তার্ত-অপকী মফম অসি নহাশিংনা নম্না কল্লিবনি। মখোয়শিং অসি হৌখিবা পুন্সিগী পোৎলুম কয়ানা পুনশিনদ্রিবা মীওইশৎংনি। মখোয়সি মালেমগী ওইনা অওনবা পুরক্নবগীদমক মফম চানা লৈরবা মীওইশিংনি। ঐখোয়গী স্তার্ত-অপশিংনা হকশেল, ফত্ত-হৌদি রিসাইকল তৌবা য়াওনা মহৌশাগী চুনবা তেক্নোলোজী, লৌউ-শিংউবা, অনৌবা মতমগী তমশিনবগী খুৎলায়নচিংবা হীরমশিংদা চঙশিনবা মথৌ তাই।
মরূপশিং,
মালেমগী থৌওংগীদমক লেপ্লিবা মনীং তম্বা খুন্নাই, শেন্মিৎলোন অমদি লৈবাক অমা ওইনা ভারতনা খোংবু ওইনা চৎমিন্নববু লূম্না লৌই। ফ্রান্স অমসুং য়ুরোপ ঐখোয়গী মরুওইবা খোঙবুশিংগী মরক্তা অমনি। মেক্রোনগী রাস্ত্রপতিগা ঐগা ৱারী শান্নবদা মে থাদা পোর্তোদা ই.য়ু. লুচিংবশিংগা পাঙথোকখিবা মীফমদা স্তার্ত-অপদগী হৌরগা ক্বান্তম কম্প্যুতিং ফাওবদা দিজিতেলগী খোঙবু ওইবা হায়বা ৱাফমসি মরুওইবা ৱাফম অমা ওইনা পুথোক্নরকখি। অনৌবা তেক্নোলোজীদা লমজিংবনা শেন্মিৎলোনগী মপাঙ্গল, থবক পীবা অমদি নুংঙাই য়াইফবা হেনগৎহল্লি হায়বসি পুৱারীনা তাক্লি। অদুবু ঐখোয়গী খোঙবু অসিনা মীওইবা খুন্নাইসিদা হেন্না চাউবা পান্দম অমসি ফংহনবা তাই। লাইচৎ অসি ঐখোয়না হান্নগী ফীভমদা অমুক হঞ্জিল্লকপগী চাংয়েং অমা ওইবখক নত্তনা ঐখোয়গী ৱাখল খনবগী চাংয়েং অমসু ওইরি। মসি হেন্না পুনশিল্লবা, অফবা অমদি পুম্নমক্কীদমক তুং কোইনা চৎকদবা তুংগী খুন্নাই অমা শেম্নবগী তাঞ্জা অমনি। অদুগুম্বা তুংগী খুন্নাই অদু ফংনবা হোৎনবদা কাঙলোনগী মতিক অমদি অনৌবা ৱাখল্লোনশিংগী ওইথোকপা য়াবশিংদা মেক্রোনগী রাস্ত্রপতিগুম্না ঐনসু থাজবা থম্মি।
