নমস্কার!
মহামন্দলেশ্বর কঙ্কেশ্বরী দেবীজী অমসুং রাম কথা শীন-লাঙলিবসিগা মরী লৈনবা মশক নাইবা মীওই খুদিং, গুজরাতকী অসিগুম্বা ধর্মগী মফমসিদা তিল্লীবা সাধু-সন্ত, মহন্তা, মহামন্দলেশ্বর, ঐচ.সি. নন্দা ত্রস্তকী মেম্বর, অতোপ্পা স্কোলর, লাইনীংবা অমসুং মহাপুরুশ অমসুং মহাস্ত্রীশিং! হনুমান জয়ন্তীগী শেংলবা তাঞ্জা অসিদা মোর্বীদা হনুমানজীগী চাইরবা মুর্তীগী মাইখুম হাংদোক্লি। মসিদি লৈবাক অমসুং মালেম শিনবা থুংবদা লৈরিবা হনুমানবু নীংজবশিংগী য়াম্না নুংঙাইবা পুংফম অমনি। অদোম খুদিংবু ঐহাক্না থাগৎচরি।
মরুপশিং,
রাম চরিত মানস্তা অসুম্না হায়রম্মি – বিনু হরিকৃপা মিলহি নহী সন্তা। মসিনা হায়বদি, ইশ্বরগী থৌজাল য়াওদনা মহাকপু নীংজরিবশিংনা মহাকপু উজবা/ফংজবা অসি য়াম্না তাঙনা থোক্কনি হায়বনি। হৌখিবা নুমিৎ খরনি অসিদা ঐহাক্না ইমা অম্বাজী, উমিয়াগী ধাম, ইমা অন্নপুর্নাগী ধামগী থৌজাল ফংবগী খুদোংচাবা ফংবসি ঐহাক্কী লাইবক ফবনি। অদুগা ঙসিসু, মোর্বীদা হনুমানজীগী অসিগুম্বা থৌরমগা মরী লৈনবগী তাঞ্জা ফংজরি, সন্ত ময়াম পুনবসিদা শরুক য়াবগী খুদোংচাবা ফংজরি।
নুংশিরবা ইচিল ইনাওশিং,
হনুমানজীগী ফুত ১০৮ ৱাংবা অসিগুম্বা মুর্তীশিং অসি লৈবাক্কী তোঙানবা মাইকৈ মরিদা খিল্লগনি হায়না ঐহাক্কী ইফমদা পাউদমবীরকখি। ঐখোয়না মমাংগী চহি খরদগী অসিগুম্বা মুর্তী অমা শিম্লাদা উবা ফংদুনা লাক্লি। ঙসি মোর্বীদা খিল্লিবা অসিনা অনিশুবা মুর্তীনি। অতোপ্পা মুর্তী অনি অমনা, খা মাইকৈদা রামেশ্বরমদা অমসুং নোংচুপকীনা নোংচুপ বেঙ্গোলদা খিনবগী থবক কন্না চত্থরি হায়না ঐহাক্কী ইফমদা তম্লকখ্রে।
মরুপশিং,
মসিদি হনুমানজীগী মুর্তী খিনবগীখক ৱারেপ লৌবা নত্তে, এক ভারত, শ্রেস্থ ভারতকী শরুক অমনি। হনুমানজীনা মশাগী লাইনীং, লিচৎনা মীওই পুম্নমকপু অমত্তা ওইনা পুন্সিনহনখি। মীওই খুদিংনা হনুমানজীদগী ইথিল লৌই। উমংগী মখা পোন্দুনা লৈজবা মীওইশিংদা মশাদা থাবা অমসুং পাঙ্গল লৈরিবা অসি হনুমানজীগী শক্তি অমসুং পাঙ্গলনা মরম ওইরগনি। মরম অদুনা, এক ভারত, শ্রেস্থ ভারত হায়বসিদা হনুমানজীসু মরু ওইবা মচল অমা ওইরিবনি।
নুংশিরবা ইচিল ইনাওশিং,
মতৌ অসুম্না, লৈবাক্কী মফম খুদিংদা রাম কথা শীন-লাঙবগী চৎনবী অসি মতম কয়াদগী চত্থদুনা লাক্লি। তোঙান-তোঙানবা লোলদা শান্নজরবসু, রাম কথাগী ৱাখল্লোন অসিদি অমত্তনি, ইশ্বরবু নীংজদুনা অমত্তা ওইবনি। মসিনবু, ভারতকী থাজবা থম্বা, স্পিরিচুএল অমসুং ঐখোয়গী নাৎ অমদি চৎনবীগী পাঙ্গলনি। ঐখোয়না মীখা পোল্লিঙৈগী লুরবা মতমগী মনুংদা ফাওবা, তোঙানবা মফমশিংদা লৈরিবা মীয়াম্বু অমত্তা ওইনা থম্বা ঙম্লমখিবা অসিদি ঐখোয়গী স্পিরিচুএল হেরিতেজ, নাৎ অমসুং চৎনবীগী মপাঙ্গলননি। চহি লিশিং কয়াদগী হোংদুনা লাক্লিবা ফিভম কয়া লৈরবসু, ভারতনা খোঙফম চেৎনা তুংলমচৎকীদমক্তা চঙশিনবদা ঐখোয়গী সংস্কৃতীগী চাউরবা থৌদাং য়াওরি।
নুংশিরবা ইচিল ইনাওশিং,
ঐখোয়গী থাজবা অমসুং চৎনবীগী ইচেলনা নুংশি চান্ননা লৈবা, মান্নবা মিৎয়েং য়েংবা অমসুং হীরম খুদিংমক মনুং চলহনবনা ওইদুনা লাক্লি। অদুনা, ফত্তববু অফবনা মাইথীবা পীবগী ৱাফম লাকপা মতমদা ভগবান রাম্না মশা মথন্তনা মতিক চাবা অমসুং পুম্নমক ঙম্বা ওইরবসু, মহাক্কী পান্দম ফংনবা মীয়াম পুনবগী মপাঙ্গলবু অমত্তা ওইনা শিজিন্নখিবা অসিদা হায়রিবা ৱাফম অসিগী তসেংবা মমি তারি। মসিমক অসিবুনি সবকা সাথ, সবকা প্রয়াস হায়রিবসি। সবকা সাথ, সবকা বিকাস হায়রিবা অসিগী মতিক চাবা খুদমদি প্রভু রামগী পুন্সি ৱারীনি অমসুং মসিদা হনুমানজীগী মরু ওইবা থৌদাং য়াওরি। সবকা প্রয়াসকী অসিগুম্বা ৱাখল্লোন অসিগা লোয়ননা ঐখোয়না নীংতম্বগী অমৃত মহোৎসবকী মতম্বু হেন্না ঙালহনগদবনি অমসুং লৈবাক্কী ৱারেপ কয়া মঙফাওনহন্নবা ঐখোয়না অমত্তা ওইগদবনি।
ঙসিদি, মোর্বীগী কেশ্বনন্দ বাপুজী তপোভুমী অসিদা অদোম পুম্নমক্কা উন্নবগী খুদোংচাবা ফংলে। ঐখোয়না সাউরাস্ত্রদা লৈবা মতমদা, ঐখোয়গী সাউরাস্ত্রগী লমদম অসি লাইনীংবা, সুরা, দাতাগী লমদম্নি হায়না নোংমদা চাউরাক্না ২৫লক্তি শোইদনা তারমগনি। মসিগী লমদম অসি কাথিয়াৱার, গুজরাত অমসুং ভারতকী শক্তাক অমা ওইরিবনি। ঐহাক্কী ওইনদি, খোখ্রা হনুমান ধাম অসি ইশাগী য়ুমগুম্বা মফম্নি। মসিগা ঐহাক্না মর্ম অমসুং কর্মগী মরী লৈনৈ। ইথিল পীবা মরী অমনি। ঐহাক্না মোর্বীদা মমাংদা লাকপা খুদিংদা, মফমসিদা করিগুম্বা থৌরম অমা লৈবা মতমদা, নুমিদাংগী মতমদা হনুমান ধামদা চৎনীংবা ফাওরকপা মতমদা অদুম লাক্লম্মি। নুংশিরবা বাপুগী মনাক্তা মিনিৎ ৫-১৫মুক লেঞ্জৈ, মহাক্কী মখুত্তগী প্রসাদ লৌদুনা হঞ্জৈ। অদুগা, মছু ধামগী খুদোংথীবা থৌদোক্তা হনুমান ধাম্না মরী লৈনবা থৌওং কয়াগী ময়োল ওইবা মফম ওইখি। মসিনা মরম ওইরগা, ঐহাক্কা বাপুগা অচেৎপা মরী লৈখিবনি। মীয়াম কয়ানা মফমসিদা তেংবাংনীংবগী ৱাখল্লোনগা লোয়ননা লাক্নখিবা মতমদা মফমসিনা পুম্নমক্কী ময়োল ওইখি। অমসুং মোর্বীগী য়ুম্থোং খুদিংদা তেংবাং য়ৌহনবগী থবক মফমসিদগী পাংথোকখি। ঐহাক্না অচম্বা ভলন্তিয়র অমা ওইনা, অদোমগা মতম শাংনা লোয়নদুনা লৈদুনা, মীয়ামগী অৱাবগী মতাংদা ঐহাক্কী ওইবা করিগুম্বা খরা পাংথোকচবগী খুদোংচাবা ফংজখি। মতমদুদা, নুংশিরবা বাপুগা শান্নবা ৱারী খুদিংদা মোর্বীবু মশক নাইবা ওইহন্নবা ৱারী কয়া য়াওখি। ইশ্বরগী অপাম্বনি অমসুং মহাক্কী চাংয়েংনি হায়না বাপুনা অসুম্না তাকপী। হৌজিক্তি ঐখোয়না লেপকদবা নত্তে, মীয়াম খুদিংনা শরুক য়াগদবনি। বাপুনা ৱা য়াম্না ঙাংদে, অদুবু মরু ওইবা ৱারোল ঙাংবা হায়বসিনা মহাক্কী অখন্নবা মগুন্নি। মসিগী মতুংদা, মহাক্কা উন্নবগী খুদোংচাবা কয়াসু ফংজখি। ভুজকী কৎচতা য়ুহা হাবগী খুদোংথীবা থোকখিবা মতমদা, থৌদোক অসিগী মনুংদা তমখিবা পারানা কৎচতা য়ুহা হাখিবদসু তেংবাংখি। ফিভম অসিবু করম্না লাকশিনগনি হায়বগী লৌশিং কয়া লৈদুনা য়ুহা হাবগী মতমদা ইয়াম্না কান্নবা ফংখি। মসিনা মরম ওইরগা, শেংলবা মফম অসিদা ঐহাক্না লমন য়াম্না তোনশিল্লবনি। অচৌবা থৌওং অমা পাংথোকপগী তাঞ্জা খুদিংদা, ভুজকী মীয়াম্না তেংবাংবগী ৱাখল্লোনগা লোয়ননা সেবাগী ইথিলগা লোয়ননা থোক্নরকই। য়ুহা হাবগী থৌদোক্কী মতুংদগী কৎচকী লমদম্না মশেক মঙাল থোকপা হেল্লকখ্রে। অসিগুম্বা শিংনবা কয়াবু খুদোংচাবদা ওন্থোকপা ঙম্বগী গুজরাতকী মীয়ামগী পাংগল অমা লৈরিবসি মোর্বীনসু তাকখ্রে। চাইনাগী মাতি পুথোকপা, তাইল্স শাবগী থবক, খরি শাবগী থবক্নচিংবা কয়াগা লোয়ননা মোর্বীনা ইন্দস্ত্রীগী মরু ওইবা মফম ওইরিবা অসি অদোম্না ঙসি উরি। মমাংদদি, মছু দামগী মাইকৈ মরিদা চেক কিল্ন নত্তনা করিমত্তা উবা ফংলম্বা নত্তে। চাউর-চাউরবা চিম্নী অমসুং চেক্কী কিল্ন কয়ানা ঙসিদি মোর্বীগী মশেক মঙালগা লোয়ননা লেপমিন্নরি। মোর্বীনা মাইকৈ অমদা, রাজকোত অমসুং জাম্নগরনা তোঙানবা মাইকৈদা লৈ হায়না ঐহাক্তি হান্নসু হায়দুনা লাকপনি। ঐখোয়না জাম্নগরগী পিথ্রাই, রাজকোতকী ইঞ্জিনিয়রিং অমসুং মোর্বীগী ঘরিগী ইন্দস্ত্রীদা য়েংলুবা মতমদা, মসিনা ঐখোয়দা “জাপান মচা” অমগী ৱাখল্লোন পোকহল্লি। ঙসিদি, সাউরাস্ত্রগী মনুং চঙলকপা মতমদা ত্রাইএঙ্গল অমা লৈবা ঐখোয়না উরি অমসুং মসিগী মনিংদা লৈদুনা কৎচনা মসিগী শরুক অমা ঙসিদি ওইরে। ঐখোয়না মসিবু হেন্না শিজিন্নরিঙৈ, অমসুং মোর্বীগী ইনফ্রাস্ত্রকচরনা চাউখৎলক্লিবা অসিনা মরম ওইরগা মসিনা মীয়াম পুম্বগা হৌজিক্তি মরী লৈনরে। মতৌ অসুম্না, মোর্বী, রাজকোত, জাম্নগর অমসুং অতোপ্পদা কৎচনা থবক পীবগী অনৌবা খুদোংচাবা লৈহল্লে অমসুং অপীকপা ইন্দস্ত্রী কয়ানা চলায়বা মফম অমসু ওইরে। অদুগা মোর্বীনা উনা উনা শহর অমগী মতৌ চেনবা হৌরক্লে অমসুং মশাগী শক্তাক অমসু শেমজরে। মসিনা মরম ওইরগা মোর্বীগী তোঙানবা শক্তম অমা চেল্লে, অদুগা সন্ত, মহাত্মা অমসুং মহন্তশিংনা মীচমগী পুন্সি হিংলিঙৈদা কত্থোকখিবা, ঐখোয়দা মাইকৈ তাকপীখিবা অদুগী মহৈনি হৌজিক ওইরিবা শক্তম অসি। ঐখোয়গী গুজরাত অসিদদি তেংবীনবা মীগী অৱাৎপা লৈতে, অফবা থবক অমা তৌগে হায়না থোক্লকপদা তেংবাংনবা মীওইনা পরিং শাংনা থোক্নরকই। ঙসিদি, কাথিয়াৱারনা য়াত্রধামগী মফম অমা ওইরক্লি, থা অমদা মপান লমদগী মীওই লিশিংদগী তানা লাকপা য়াওদ্রি। অদুগা লাক্লিবা মীয়াম্ন অসিনা মরম ওইরগা কাথিয়াৱারগী অনৌবা মপাঙ্গল হাপ্লি। ঐখোয়গী সমুদ্রগী তোর্বান্সু মীয়াম্না থল্লে, ঐহাক্না ঙরাংদি অৱাং নোংপোক্কী ইচিল ইনাওশিংগা উন্নবগী তাঞ্জা ফংজখি, সিক্কিম, ত্রিপুরা, মনিপুরগী মীওইশিংগা উন্নবগী খুদোংচাবা ফংজখি। মখোয়না নুমিৎ খরনিগী মমাংদা গুজরাত্তা লাকখিবনি, মচানুপীগী লুহোংবগী থবকশিং য়াওখিবনি, শ্রীকৃষ্ণ অমসুং রুকমনিগী লুহোংবদা রুকমনিগী মাইকৈগী মীওইশিংনা শরুক য়াখ্রে। থৌদোক অসিনা মশমকপু পাঙ্গল হাপ্পা থৌওং অমনি। ভগবান কৃষ্ণগী লুহোংবা পাংথোকখিবা মফম, অদুগুম্বা মাধবপুরদা অৱাং নোংপোক্না শরুক য়াখি অমসুং মসিনা নোংচুপকী অমত্তা ওইবগী খুদম অমা ওইরিবনি। মফমদুদগী লাকখিবা মীওইশিংগী হেন্দিক্রাফকী পোত্থোক য়োনখিবনা অৱাং নোংপোক্কী চাগা তানবগী অনৌবা সোর্স অমসু ওইখি। ঐহাক্না হৌজিক খল্লিবদি, মাধবপুরগী মেলানা গুজরাত্তা য়াম্না ফাওরিবমখৈ, ভারত পুম্বগী কান্নবা ওইগনি হায়বসিনি। শেন্মিৎলোনগী থৌওংশিং হেনগৎলকপগা লোয়ননা, কৎচকী রান্দা রনোৎসব পাংথোক্লি অমসুং মসি য়াওনবগীদমক্তা মোর্বী ফাওদুনা চৎপা তাবনি। মসিনা হায়বদি, মোর্বীদা কান্নবা য়াম্না ফংলগনি হায়বনি অমসুং মোর্বীগী হাইৱেগী মনাক নকপশিংদসু হোতেল কয়া অমা শারে। মীওই য়াম্না পুনবা হৌরবদি, মোর্বীনা কান্নবা অদুমক ফংলগনি। মতৌ অসুম্না অপুনবা চাউখৎপা লাক্কনি। মসিনা মতম শাংনা নুংঙাই য়াইফবগী মরম অমসু ওইরগনি। হৌজিক গির্নারদা রোপ-ৱে শারে। কাথোক কাশিন তৌবদা ৱাবনা মরম ওইরগা গির্নারদা অমুক্তা চৎপা ফংজদ্রিবা অহল কয়া অমনা হৌজিক্তি গির্নারদা চৎপা লায়রগনি। চহি ৮০-৯০গী অহল-লমনশিংনা মখোয়গী অঙাংশিংগা লোয়ননা গির্নারদা লাকপা হৌরে হায়না ঐহাক্কী ইফমদা পাউদম্লক্লি। ঐখোয়না ঙসি নীংতম্বগী চহি ৭৫ মপুং ফাবগী নুংঙাইবা ফোংদোক্লি, সেবাগী ইথিলনা ঐখোয়গী ইথানুংদা কন্না য়াওরিবমখৈ, মসিগী ৱাহন্থোকপু হেন্না লৈবা হেল্লক্কনি, খুন্নাইনা পুন্সিগা নক্নবা হেল্লক্কনি। লৈবাক্না হেন্না মপাঙ্গল কল্লক্কনি। ভারতনা হান্নগুম্না অদুম লৈবা হায়বসিদি য়াবা ৱাফম নত্তে, ঐখোয়না হৌজিক্তি মিকপ থোক্লগদবনি অমসুং তুংলমচৎকীদমক্তা খোঙ থাংজিল্লগদবনি। মালেমগী ফিভম হোংলক্লে, মালেম পুম্বনা মশানা মরোমদোম লেপ্পা ঙমগদবনি হায়নরবনি। সন্তশিংগী মরক্তা ঐহাক্না ফম্লি, ঐহাক্না মীয়ামদা তাক্লোই, লোকেলগীদমক্তা ভোকেল ওইসি। ভোকেল লোর লোকেলগী ৱাফম অসি ঐখোয়না তোয়না খন্নফম থোকিকো? ঐখোয়গী লৈবাক্তা শাবা, ঐখোয়গী মীয়াম্না শাবা, ঐখোয়গী হুমাং তাদুনা কন্না হোৎনদুনা শাখিবা পোৎলমশিংবু ইশাগী য়ুমদা শিজিন্নসি। অসিগুম্বা ফিভম অমা লাকপা মতমদা মীওই কয়ানা থবক ফংগনি হায়বা অমুক্তা খন্থবীয়ু। মীরমদগী পুশিল্লকপদা ঐখোয়না নুংঙাইবা ফাওই, ১৯-২০ খরগী খেন্নবা লৈ। অদুবু ভারতকী মীয়াম্না শাবা ওইরবা, ভারতকী শেলদগী শাবা ওইরবা, ভারতকী হুমাংগী মনম চেল্লবা, ভারতকী লৈবাক্কী মনম চেল্লবা, মদুদা চাউথোকচবা ফাওবনা খ্বাইদগী তোঙানগনি। মসিগী মতমদা, মীরমদা চৎপা ঐখোয়গী সন্ত, মহন্তশিংনা ভারত্তা শাবা পোত্থোক শিজিন্নবীয়ু হায়না হায়বা য়াগনি। অদুবু, ঐখোয়গী লৈবাক মনুং অসিদা পুন্সি মহিংগা মরী লৈনবা শিংনবা অমত্তা লৈহল্লোইদবনি, অসিগুম্বা নুমিৎ অসি ঐখোয়না লাকহল্লোইদবনি। ঐখোয়না হনুমানজীনা মসি তৌরম্মি, মদু তৌরম্মি হায়না থাগৎনরি। অদুবু মহাক্না করি হায়রম্বগে হায়বসিনা ঐখোয়গী পুন্সিগী ইথিল ওইগদবনি। হনুমানজীনা মতম পুম্বদা অসুম্না হায়বীরম্মিঃ “সো সব তব প্রতাপ রঘুরাই, নাথ ন কছু মোরি প্রভুতাই”,
মসিনা হায়বদি, থবক খুদিংগী মায় পাকপগী মরমবু মহাক্না শ্রী রামজীনি হায়না পী, মহাক্না পাংথোকপদগী ওইবনি হায়না কৈদৌনুংদা হায়দে হায়বনি। ওইখিবা খুদিংমক প্রভু রামগী মরমদগী ওইবনি। হিন্দুস্তান্না ঙসি ফাওবদা য়ৌরিবা থাক, তুংদা লৌনীংবা ৱারেপ, মদুগী লম্বী অমখক লৈ, ভারতকী মীয়াম ঐখোয় পুম্নমক, মসিনা অশেংবা পাঙ্গলনি। ঐহাক্কী ওইনদি, ঐহাক্কী লৈবাক মীয়াম করোর ১৩০, মখোয়না রামগী মশক্নি। মখোয়গী ৱারেপ্না লৈবাকপু তুংলমচত্তা পুগনি। মখোয়গী থৌজালদগী ঐখোয়না তুংলমচত্তা চঙশিল্লি। ৱাখল্লোন অসিগা লোয়ননা ঐখোয়না চৎকদবনি, ৱাখল্লোন অসিগা লোয়ননা ঐহাক্না ঙসিগী য়াইফরবা থৌরম অসিদা মীয়ামদা য়াইফ পাউজেল অমুক্কা হন্না পীজরি। হনুমানজীগী খুয়াখাদা কোক নোঞ্জরি।
হন্না-হন্না থাগৎচরি!
