ময়াম পুম্নমক্কী মফমদা তরেৎশুবা মালেমগী য়োগ নুমিৎকী য়াম্লবা য়াইফ পাউজেল পীজরি।
ঙসি মালেম পুম্বনা কোরোনা লাইচৎ মায়োক্নদুনা লৈরিবসিদা য়োগনা অনৌবা মঙলানগী মশেক অমা ওইরি। চহি অনিসিদা মালেম পুম্বগী লৈবাকশিংদা অমদি ভারত্তা অচৌবা মীয়ামগী ওইবা থৌরমশিং পাঙথোকখিদ্রবসু য়োগ নুমিৎপু মীয়াম্না পাম্নবদি হন্থবা লৈতে। কোরোনা লৈজরবসু হন্দক্কী য়োগ নুমিৎকী থিমদি “হকচাং ফনবগীদমক য়োগ” হায়বসিনা মীওই করোর কয়াদা য়োগ শান্ননিংবগী হেনগৎহল্লি। ঙসি ঐনা য়োগ নুমিৎসিদা লৈবাক খুদিং, খুন্নাই খুদিংমক অমদি মীপুম খুদিংমক মশা ফনা লৈনবা, ঐখোয় পুনশিন্নদুনা অমনা অমগী পাঙ্গল থৌনা ওইমিন্নবা পাম্লি।
মরূপশিং,
ঐখোয়গী লাইনিংবশিংনা “পুক্নিং ফনা লৈববু য়োগ কৌই” হায়বা য়োগগী ৱাফোঙদোক অমা পীরম্মি। মখোয়না অৱা-নুংঙাই অনিদা চপ মান্ননা লৈনবা থৌওংবু য়োগগী পরিং ওইহল্লম্মি। ঙসি মালেমগী ওইবা লাংফম অসিদা য়োগনা ৱাফমসিবু অচুম্বনি হায়বা তাক্লি। কোরোনাগী লাংফমগী চহি অমা মখায়সিদা ভারত য়াওনা লৈবাক কয়ানা অৱাবা থেংনরি।
মরূপশিং,
মালেমগী লৈবাক ময়ামসিগীদমক্তদি য়োগগী নুমিৎ অসি মখোয়গী চহিচা কয়া লিরবা চৎনবী নত্তে। ঐখোয়না লাংফমগী মতমসিদা, অৱা অনা তানরবা মতমসিদা মীয়াম্না কাউথোক্নরম্লগনি হায়না খল্লম্বা য়াই। অদুবু মীয়াম্না য়োগবু শান্ননিংবা, মসিবু নুংশিবদি হেন্নদু হেনগৎলক্লি। হৌখিবা চহি অমা মখায়সিদা মালেমগী কাচিন কোয়া শিনবা থুংবদগী নৌনা য়োগ শান্নরকপা মীওই মশিং য়াম্লক্লি। য়োগগী অহান্বা পান্দমদি পুক্নিং ফাথবা অমদি লীচৎ চুম্বনি হায়নৈ, অদুগা মীপুম খুদিংনা ৱাফমসিবু মখোয়গী পুন্সিদা পুরক্নবা হোৎনরি।
মরূপশিং,
কোরোনাগী শকউদবা মহিক অসিনা মালেমদা অৱাবা পীরকপা মতমদা, লৈবাক অমত্তা শেম শাবা, পাঙ্গল অমসুং ৱাখলগী ওইবা মওংদা থৌরাং তৌহৌবা নত্তে। অসিগুম্বা অৱাবা তারবা মতমসিদা য়োগনা পুক্নিং পাঙ্গল হাপ্নবগী লম্বী অমা ওই হায়বা ঐখোয় খুদিংমক্না উরে। য়োগনা মীয়ামদা লাইচৎ অসিবু থেংনবা ঙমগনি হায়না থাজবা পীরি।
ঐনা ফ্রন্তলাইন ৱাররিয়রশিংগা, দোক্তরশিংগা ৱারী শানবা মতমদা, মখোয়না হায়রকপা ৱাফমসি কোরোনাগী মায়োক্তা থেংনরিবা লানফমসিদা মখোয়না য়োগবু মশা ঙাকথোক্নবগী চুঙ্গোয় ওইনা শীজিন্নৈ হায়বসিনি। দোক্তরশিংনা য়োগ তৌদুনা মশা ফহল্লি, অমদি অনাবা মীওইশিংবু থুনা ফগৎলক্নবগীদমক্তসু শীজিন্নরি। ঙসি অনা লায়েংশঙশিংদগী দোক্তর, নর্সশিংনা অনাবা মীওইশিংদা য়োগ তম্বিবগী ফোতোশিং উরি অদুগা মফম খরদনা অনাবা মীওইশিংদুনা মখোয়দা ফাওবা ৱাখলশিং ফোঙদোরক্লি। প্রনায়ম, অনুলোম-বিলোম্নচিংবা নিংশা হোনবগী শাজেলনা ঐখোয়গী নিংশা হোনবগী থৌওংদা মতেং কয়া ওইরি হায়বসিমক্নসু মালেমদা মরুওইবা পাউজেল পীরি।
মরূপশিং,
অফাওবা তামিল লাইনিংবা শ্রী তিরুবল্লবরনা হায়বিরম্মি –
“নোই নাদি, নোই মুতল নাদি, হদু তমিক্কুম, ৱায় নাদি ৱায়পচ্চয়ল” হায়বদি অনাবা অমা লৈরবদি মদু খঙদোকউ, মদুগী মরু ফংনা থিজিল্লু, অনাবগী মরম করিনো হায়বদু খঙদোকউ, অদুগা মদুগী লায়েং চত্থৌ হায়বনি। য়োগনা লম্বী অসিবু তাক্লি। ঙসি মেদিকেল সাইন্সনসু লায়েং চত্থবগা লোয়ননা নুংদা ফহল্লকপগী থৌওংদসু চপ চান্না চঙশিল্লি, অমদি য়োগনা নুংদগী ফহল্লক্নবগী থৌওংগী পাম্বৈ অমা ওইরি। ঙসি মালেমগী খঙ-হৈরবশিংনা ৱাফম অসিদা তোঙান তোঙানবা মওংদা থিজিল্লিবসিদা ঐঙোন্দা নুংঙাইবা ফাওই।
কোরোনাগী মতমসিদা য়োগনা ঐখোয়গী হকচাঙদা পীবা কান্নবা, ঐখোয়গী ইম্ম্যুনিতীদা পীবা ইথিলগী মতাঙদা কয়া অমা থিজিল্লি। ঙসিদি স্কুল কয়াগী ওনলাইন ক্লাস হৌরকপগী মিনত ১০-১৫দি অঙাঙশিংদা প্রনায়ম তৌহনবা উরি। মসিনা কোরোনা থেংনবদা অঙাঙশিংগী মশা মউ ফনা থম্নবগীদমক্তা শেম শারি। য়
মরূপশিং,
ভারতকী লাইনিংবশিংনা ঐখোয়দা তাকপিরম্মি –
ব্যায়ামাত্ লভতে স্বাস্থ্যম্,
দীর্ঘ আয়ুশ্যম্ বলম্ সুখম্।
আরোগ্যম্ পরমম্ ভাগ্যম্,
স্বাস্থ্যম্ সৱার্থ সাধনম্।।
ৱাহন্থোক্তি, য়োগ-ব্যায়ামদগী ঐখোয়না হকচাঙ ফনা লৈবা ঙম্মি, নুংঙাইনা লৈবা ফংই, অমদি পুন্সি নুংশাংনা হিংবা ঙম্মি। ঐখোয়গীদমক্তা হকচাঙ ফবা হায়বসিনা খ্বাইদগী মরুওইবনি, অমদি হকচাঙ ফবনা মায় পাকপগী পাম্বৈ ওইরি। ভারতকী লাইনিংবশিংনা, ভারতনা হকশেলগী ৱাফম হেক হৌদোরকপা মতমদা, মদু হকচাং ফবা খক্তা ওইরকখিদে। মরম অসিনা য়োগদা হকচাঙ ফবগা লোয়ননা পুক্নিং ৱাখলদসু মীৎয়েং নিংথিনা থম্লি। ঐখোয়না প্রনায়ম তৌবদা, হিরি কোনবদা অতোপ্পা য়োগগী থৌওংশিং তৌবদা ঐখোয়গী পুক্নিংগী পাঙ্গলবু কনখৎহল্লি। য়োগ শান্নবনা ঐখোয়গী ৱাখল খনবা ঙম্বগী পাঙ্গল, পুক্নিংগী থৌনা কয়া য়াম্না হাপ্পগে হায়ববু মালেমগী লাংফম অমত্তনা, নেগেতিভিতী অমত্তনা ঐখোয়গী পাঙ্গল হলহনবা ঙম্লোই হায়না খল্লি। য়োগনা ঐখোয়বু পুক্নিং ৱাখল ৱাবদগী পাঙ্গলদা অমদি নেগেতিভিতীদগী ক্রিএতিভিতীদা লাক্নবগী লম্বী উৎলি। য়োগনা ঐখোয়বু পুক্নিং শোন্থবদগী নুংঙাইবরোমদা অমদি চেকশিন্দবদগী য়াইফবরোমদা পুদুনা চৎলি।
মরূপশিং,
ৱায়েৎ কয়া লৈরবসু ঐখোয় ইশাদা লোইনাইদ্রবা পাম্বৈ কয়া লৈরি হায়না য়োগনা ঐখোয়দা তাক্লি। তাইবংপানসিদা ঐখোয় ইশাসি খ্বাইদগী চাউবা পাঙ্গলগী হৌরকফমনি। ঐখোয়না হায়রিবা পাঙ্গল অসি তোখাই তাবা ৱাখল্লোন লৈবসিনা খঙজদে। করিগুম্বা মতমদা মীয়ামগী পুন্সি তোখাই তানা লৈবা য়াওই। হায়রিবা তোখাই তাবগী ৱাখল্লোন অসিনা ঐখোয়গী শক্লোন্দসু মমি তাই। তোখাই তাবদগী পুনশিন্নবদা লাক্নবগী লম্বীসু য়োগনি। অমত্তা ওইবগী পান্দম ফংনবগী চুম্লে খঙলবা লম্বীদি য়োগনি। শক্নাইরবা গুরুদেব তেগোরনা হায়বিরম্বা ৱাহৈ খরা ঐনা নিংশিংলি অমদি অমুক হায়জরি:
“ঐখোয় ইশা কনানো হায়বগী পাউখুম অসি লাই অমসুং অতৈদগী তোখাই তাদুনা লৈবনা ফংবা ঙম্লোই, য়োগ অমসুং পুনশিনবগী মরমদা লেপ্পা নাইদনা খঙলবা মতমদা খঙগনি।”
ভারতনা চহি কয়াগী মমাঙদগী ইন্দুনা লাক্লিবা বসুধৈব কুতুম্বকম হায়রিবা লাইৱা অসি হৌজিক্তি মালেম পুম্বনা য়ানরক্লি। ঐখোয় খুদিংমক্না অমনা অমগী নুংঙাই য়াইফনা লৈনবগীদমক থৌনিরি। করিগুম্বা মীওইবা খুন্নাইদা শিংনবা কয়া লৈরবদি, য়োগনা ঐখোয়দা পুম্নমক কোনশিল্লবা হকশেলগী লম্বী পীরি। য়োগনা ঐখোয়গী পুন্সি হেন্না নুংঙাইনা হিংনবগী লম্বী অমসু পীরি। য়োগনা মীয়ামগী হকশেলগী লমদা লায়না ঙাকথোক্নবা অমদি হকশেল য়োকখৎনবা থৌদাং মখা তানা লৌখিগনি হায়না ঐনা থাজৈ।
মরূপশিং,
ভারতনা য়ুনাইতেদ নেসন্সতা মালেমগী য়োগগী নুমিৎকী ৱাফম হৌদোকপা মতমদা লৈখিবা ৱাখল্লোন্দি য়োগগী কাঙলোন অসিনা মালেম পুম্বদা কান্নবা পীবদুনি। ঙসিদি মায়কৈ অসিদা ভারতনা য়ুনাইতেদ নেসন্স, দব্লিউ.ঐচ.ও.গা লোয়নরগা অতোপ্পা মরুওইবা খোঙথাঙ অমসু লৌখৎলে।
হৌজিক্তি মালেম অসিনা M-Yoga এপকী কান্নবা লৌবা ফংবা হৌরক্লি। এপ অসিদা কমন ওইবা য়োগগী চৎন-পথাপ্তা য়ুম্ফম ওইবা য়োগ তম্নবগী ভিদিও কয়া মালেমগী তোঙান তোঙানবা লোনশিংদা ফংগনি। মসি অনৌবা তেক্নোলোজী অমসুং অরিবা মতমগী কাঙলোন অনি পুনশিনবগী অফবা খুদম অমসুনি। m -Yoga এপ অসিনা য়োগবু মালেম শিনবা থুংনা শন্দোকপদা অমদি মালেম অমা, হকশেল অমা হায়বসিগী থৌরাংবু মায় পাকহনবদা অচৌবা থৌদাং লৌরক্কনি হায়না ঐনা থাজৈ।
মরূপশিং,
গীতাদা হায়রম্মি –
তন বিদ্যাদ দুখ সন্য়োগ-
বিয়োগন য়োগ সঞ্জিতম।
ৱাহন্থোক্তি, অৱা-অনাদগী খাইদোরক্তুনা নিংতম্বা ফংবগী লম্বীবু য়োগ কৌই। পুম্নমক্কা পুন্না চৎমিন্নবা হায়বা মীওইবা খুন্নাইগীদমক্তা য়োগগী লম্বী অসি ঐখোয়না খুদিংমক্না মাঙদা পুখত্তুনা চৎকদবনি। মফম অমা হেক্তা ওইরবসু, ফীভম অমা হেক্তা ওইরবসু, চহি মতাং অমা হেক্তা ওইরবসু পুম্নম্কীদমক্তা য়োগদা পাম্বৈ অমা নৎত্রগা অমা শোয়দনা লৈগনি। ঙসি মালেমসিদা য়োগগী মরমদা খঙনিংবা মীশিং য়াম্না হেনগৎলক্লি। লৈবাকসিদা অমদি মপান লৈবাকশিংদা য়োগ শান্নফমসু মশিং হেনগৎলক্লি। ফীভমসিদা য়োগগী নুংগী ওইবা ৱাঙুলোন, নুংগী ওইবা লীচত্তা মীৎয়েঙ থমদুনা মীপুম খুদিংদা য়ৌহন্নবা, শিনবা থুংনা য়ৌহন্নবা অমদি লেপ্পা নাইদনা য়ৌহন্নবা থৌরাং লৌখৎপা মথৌ তাই। থবক থৌরাং অসি য়োগগা লোয়নরিবা মীওইশিংনা য়োগগী লমতাক্লোয়শিংনা, য়োগ শন্দোক্লিবশিংনা পুন্না পায়খৎমিন্নবা মথৌ তাই। ঐখোয় ইশাশু য়োগগী কান্নবা লৌগদবনি, অমদি ইশাবুসু থৌরাং অসিগা পুন্না চৎমিন্নগদবনি। য়োগদগী তেংবাংনবা হায়বা লাইৱাসিনা ঐখোয়দা অনৌবা তুংগী পুন্সি অমগী লম্বী তাক্কদৌরিবনি, মীওইবা খুন্নাইবু মপাঙ্গল কলহনগদৌরিবনি।
অসুম্না য়াইফ পাউজেলশিং অসিগা লোয়ননা ঙসি মালেমগী য়োগ নুমিৎ অসিদা মীওইবা ফুরুপ খুদিংমক্তা অদোম খুদিংমক্তা য়াইফ পাউজেল পীজরি।
হন্না হন্না থাগৎচরি!
