খুরুমজরি!
তামিল নাদুগী রাজ্যপাল আর.এন রবি, কেন্দ্রগী মন্ত্রীমন্দলগী ঐগী মরুপ এল. মুরুগান, তামিল নাদু এগ্রিকচরেল য়ুনিভর্সিতিগী হান্নগী ভাইস চান্সেল্লর দোক্তর কে.রামাশ্বামী, তোঙান তোঙানবা লৌউ-শিংউগী লুপশিংগী শক্নাইরবশিং, অতোপ্পা মীয়ামগী মীহুৎশিং, ঐগী নুংশিরবা লৌমী ইনাওশিং অমসুং ইচলশিং অমসুং দিজিতেল তেক্নোলোজিগী খুৎথাংদা থৌরম শরুক য়ারিবা লৈবাক শীনবা থুংবগী লৌমী লাখ কয়া। মফম অসিনা ঐনা মখোয়দা বনাক্কাম হায়জরি অমসুং ঐনা খুরুমজরি হায়রি। অহানবদা, লৈবাক শীনবা থুংবগী লৌমীশিংদা ঙাকপীনবা ঐনা হায়জরি। ঙসি পুত্তরপরতিদা সত্য সাই বাবাগী থৌরম অমা ঐনা শরুক য়াবদগী ঐ পুং ১ রোম থেংখিবনি। থৌরম অদু খর শাংবদগী ঐ থেংখিবনি। ঐনা মরম ওইদুনা খুদোংচাদবা থোকহনবগীদমক ঙাকপীনবা ঐনা মীয়ামদা হায়জরি। লৈবাক শীনবা থুংনা মীওই কয়া তিনবা ঐ উরে।
ঐনা পান্দিয়ান জিগী ৱারোল তাবদা, ঐনা অঙাং ওইরিঙৈদগী কনাগুম্বা অমনা ঐঙোন্দা তামিল তম্বীরবদি য়াম্না ফগনি হায়না ঐনা পুক্নিংদা ফাওখি। ঙসি ঐনা ৱারোল অদু য়াম্না নুংঙাইখি, অদুবু লাইবক থিবদি, ঐনা খঙবা ঙমখিদে, মহাক্না জালিকাত্তুগী মরমদা ঙাংখি, কোবিদ মতমদা থেংনখিবা খুদোংচাদবশিং মহাক্না পনখি। অদুবু পান্দিয়ান জিগী ৱারোল অদু হিন্দী অমসুং ইংলিসতা শেম-শারগা মদু ঐঙোন্দা থারক্নবা ঐনা রবি জিদা হায়খ্রে। ৱারোল অদু পাবা ঐনা পাম্মী। ঐনা ফম্বাক্ত কারকপা মতমদা, লৌমী ইনাও অমসুং ইচল কয়া ঐনা উখি অমসুং মখোয়গী ফিশিং মখোয়না হাইখি, ঐনা থংলদ্রিঙৈ মমাংদা বিহারগী নুংশিৎ য়ৌরকখ্রে হায়না ঐনা খনখি।
ঐগী নুংশিরবা লৌমী ইনাওশিং অমসুং ইচলশিং,
কোয়েম্বতোরগী শেংলবা লমদমদা মরুধামালাইগী ভগবন মুরুগানগী মফমদা ঐনা ইকায়খুম্নবা উৎচরি। কোয়েম্বতোর অসি নাৎ, মীনুংশি অমসুং অনৌবা থবকশিংগী লমদম অমনি অমসুং মফম অসি খা ভারতকী ওন্ত্রেপ্রেন্যুরশিপকী মপাঙ্গলগী মফম অমনি। সহরগী তেক্সতাইলগী থবকশিংনা লৈবাক অসিগী শেন্মিৎলোন্দা য়াম্না চাউবা মতেং পাংলি। সহর অসিগী হান্নগী এম.পি শ্রী সি.পি রাধকৃষ্ণন হৌজিক লৈবাক অসিগী উপ-রাষ্ট্রপতি ওইদুনা হৌজিক কোয়েম্বতোর মখা তানা মশক খঙনরে অমসুং মহাক্না ঐখোয় পুম্নমক লমজিংলি।
মরুপশিং,
মহৌশাগী লৌউ-শিংউগী থবক অসি ঐগী থম্মোয়গা য়াম্না নকশিন্নবা হিরম অমনি। সাউথ ইন্দিয়া নেচরেল ফার্মিং সম্মিৎ শীনবগীদমক তামিল নাদুগী লৌমী ইনাওশিং অমসুং ইচলশিং ঐনা থাগৎলি। ঐ একজিবসন য়েংলুরে অমসুং লৌমী কয়াগা ৱারি শান্নবগী খুদোংচাবা ফংলে। লৌমী খরদি মেকানিকেল ইঞ্জিনিয়ারিং অমসুং পি.ঐচ.দি তম্লি, খরনা নাসাদা চন্দ্রয়ানগী থবক তোক্লবা মতুংদা লৌ উবগী থবক তৌরি অমসুং খরনা মখোয় মশামক লৌ উরি। মসি খক নত্তনা, মখোয়না লৌমী কয়া পুথোক্লি অমসুং নহারোলশিংদা ত্রেনিং পীরি। করিগুম্বা ঐ থৌরম অসিদা লাক্লমদ্রবদি, ঐগী পুন্সিদা অচৌবা মাঙজবা অমা ওইগনি হায়না ঙসি ঐনা মীয়াম মমাঙদা হায়রি। মফম অসিদা লাকপদা ঐ অসুক্কী মতিক খঙলে। তামিল নাদুগী লৌমীশিংগী থৌনা অমসুং অহোংবা পুরক্নবা মখোয়গী মপাঙ্গলদা ঐনা থম্মোয় শেংনা ইকায়খুম্নবা উৎচরি। থৌরম অসিদা শরুক য়ারিবা লৌমীশিং, লৌউ-শিংউগী বিজ্ঞান্নিকশিং, উদ্যোগকী মীওইশিং, ষ্টার্দঅপশিং অমসুং ইন্নোবেতরশিংদা ঐনা থাগৎপা ফোঙদোকচরি।
মরুপশিং,
লাক্লিবা চহিশিংদা ভারতকী লৌউ-শিংউদা অচৌবা অওনবশিং পুরক্নবা ঐনা পান্দম থম্লি। মহৌশাগী লৌউ-শিংউগী থবক্ত মালেমগী মফম অমা ওইরক্নবা লম্বীদা ভারত লৈরে। ভারতকী বাইওদাইভর্সিতি অসি অওনবা লাক্লি অমসুং ভারতকী নহারোলশিংনা লৌউ-শিংউ অসি অনৌবা মতমগী অমসুং লাইনা ফংবা ঙম্বা খুদোংচাবা অমা ওইনা মশক খঙবা হেনগৎলক্লি। অহোংবা অসিনা খুঙ্গংগী শেন্মিৎলোন মপুংফানা ফগৎহনগনি।
ঐগী নুংশিরবা লৌমী ইনাওশিং অমসুং ইচলশিং,
হৌখিবা চহি ১১ দা লৌউ-শিংউগী হিরমদা শিংথানিঙাই ওইনা অহোংবা লাক্লে। ভারতকী লৌউ-শিংউগী পোৎথোকশিং মপান্দা থাদোকপা শরুক অনি হেনগৎলে অমসুং লৌউ-শিংউগী থবক মতমগা চুন্না পায়খৎনবা লৌমশিং মতেং পাংনবা পীবা য়াবা খুদোংচাবশিং সরকারনা পীরে। চহি অসিদা কিষান ক্রেদিৎ কার্দ স্কিমনা লৌমীশিংদা লুপা করোর লাখ ১০ হেন্না ফংহনখ্রে। চহি ৭ গী মমাঙদা শা-ষন লোইবা লৌমীশিং অমসুং ঙামীশিংদা কিষান ক্রেদিৎ কার্দগী কান্নবশিং ফংহনখিবদগী, হিরমশিং অসিদা থবক তৌরিবা লৌমীশিং খুদোংচাবা মপুংফানা ফংলে। বাইও-ফর্তিলাইজরদা জি.এস.তি হন্থবা অসিনা মখা তানা লৌমীশিংদা কান্নবা ফংহল্লে।
মরুপশিং,
ঙাইহাক্কী মমাঙদা, মফম অসিদগী, লৈবাক শীনবা থুংবগী লৌমীশিংদা পি.এম-কিষান সম্মান নিধিগী ২১শুবা ইন্সতোলমেন্ত থাদোক্তুনা লৌমীশিংদা লুপা করোর ১৮,০০০ ফংহনখ্রে। তামিল নাদুদা লৌমী লাখ কয়া মখোয়গী একাউন্তশিংদা শেনফমশিং ফংলে।
মরুপশিং,
স্কিম অসিগী মখাদা হৌজিক ফাওবদা, লায়রবা লৌমীশিংগী বেঙ্ক একাউন্তশিংদা লুপা করোর লাখ ৪ হকথেংননা ফংহনখ্রে অমসুং লৌউ-শিংগী মখোয়গী দরকার ওইবশিং ফংহনখ্রে। থবক অসিগী কান্নবা ফংলবা লৌমী করোর কয়াদা ঐনা য়াইফ পাউজেল পীজরি। নুপীমচা অনি প্লেকার্দশিং পায়দুনা মফম অসিদা মতম শাংনা লেপ্লি, মখোয়গী খুৎশিং ৱারম্লগনি। কার্দশিং অদু ঐঙোন্দা পুরক্নবা ঐনা সেকুরিতি পর্সোনেলদা হায়গনি অমসুং অদোমগী পাউজেলশিং ঐনা লুম্না লৌগনি। কার্দ অদু লৌশিল্লগা মদু ঐঙোন্দা পীবীয়ু।
মরুপশিং,
ইচানুপা অদোম থাগৎচরি, অদোমগী খুৎশিং থাংগৎতুনা অদোম মতম শানা লেপতুনা লৈরি।
মরুপশিং,
মহৌশাগী লৌউ-শিংউগী থবক পাকথোক-চাউথোকহনবা অসি ২১শুবা চহিচাগী দরকার ওইবনি। দরকার ওইবা হেনগৎলকপদগী লৌবুকশিং অমসুং লৌউ-শিংউগা মরী লৈনবা হিরমশিংদা কেমিকেলশিং শীজিন্নবা অঙকপা ফংনা হেনগৎলক্লি। কা হেন্না কেমিকেলগী হারশিং অমসুং তিলহাৎ হিদাকশিং শীজিন্নবনা লৈবাক লৈহাও মাঙশিল্লকই, লৈবাক লৈহাওদা ইনিল লৈবা হন্থরকই অমসুং চহি কয়াগী মতুংদা লৌ উবদা শেন চঙবা হেনগৎলকই। মসি কোকহন্নবা পাম্বৈশিংদি মহৈ-মরোং মখল কয়া থোক্না থাবা অমসুং মহৌশাগী লৌউ-শিংউগী থবক পায়খৎপনি।
মরুপশিং,
লৈবাক লৈহাওগী ফিবম অমুক হন্না ফগৎহনবা অমসুং মহৈ-মরোংশিংগী মহাও লৈবা হেনগৎহনবগী লৈবাক অসি মহৌশাগী লৌউ-শিংউগী থবক্কী মাইকৈদা চঙশিনগদবনি। মসি মঙলান অমনি অমসুং দরকার ওইবা অমনি। মতম অদু খক্তদা তুংগী মীরোলশিংগীদমক ঐখোয়না ঐখোয়গী বাইওদাইভর্সিতি ঙাক-শেনবা ঙমগনি। অইং-অশাগী খল হোংলকপা অমসুং নোংজু-নুংশাগী শাথিরবা ফিবমশিং মায়োক্নবদা মহৌশাগী লৌউ-শিংউগী থবক্না ঐখোয়গী মতেং পাংলি, ঐখোয়গী লৈবাক লৈহাও ফগৎহল্লি অমসুং হকচাং শোকপা কেমিকেলশিংদগী মীওইশিং ঙাকথোকই। মরুওইবা মিসন অসি খুমাঙচাউশিনহনবদা ঙসিগী থৌরম অসিনা মরুওইবা থৌদাং অমা লৌগনি।
মরুপশিং,
মহৌশাগী লৌউ-শিংউগী থবক পায়খৎনবা ভারত সরকারনা থৱায় য়াওনা লৌমীশিংগী পুক্নিং থৌগৎলি। চহি অমগী মমাঙদা, কেন্দ্র সরকারনা নেসনেল মিসন ওন নেচরেল ফার্মিং হৌদোক্তুনা লৌমী লাখ কয়াগা শম্নরে। হৌজিক তামিল নাদু খক্তদা লম হেক্তর ৩৫,০০০ রোমদা ওর্গনিক অমসুং মহৌশাগী লৌউ-শিংউগী থবক পায়খৎতুনা থবক অসিগী কান্নবা খা ভারত শীনবা থুংনা উরে।
মরুপশিং,
মহৌশাগী লৌউ-শিংউগী থবক্কী ৱাখল্লোন ভারত মশাগী ৱাখল্লোন্নি। অসি মপান লৈবাকশিংদগী পুশিল্লকপা নত্তে- লমদম অসিগীচৎনবীদগী পোক্লকখিবনি অমসুং মহৌশাগী অকোয়বগী ফিবমগা চুনরে। খা ভারতকী লৌমীশিংনা পঞ্চগাব্যা, জিবামরিত,বীজামরিত অমসুং মুলচিংগুম্বা মমাংঙৈদগী লৈরক্লবা মহৌশাগী লৌউ-শিংউগী থবক পায়খৎপদা ঐ হরাওই। হায়রিবা থবকশিং অসিনা লৈবাক লৈহাও ফগৎহল্লি, মহৈ-মরোশিং কেমিকেল য়াওহন্দে অমসুং লৌ উবদা চঙবা শেনফম হন্থহল্লি।
মরুপশিং,
মহৌশাগী লৌউ-শিংউগী থবক অসিগা শ্রী অন্না-মিলেতশিং থাবগা পুনশিনবনা মালেম ইমা ঙাক-শেনবদা মরুওইবা থৌদাং অমা লৌরি। তামিল নাদুদা, খোইহি অমসুং শ্রী অন্নদগী শেম্বা মথেল অমা তেনুম তিনাই মাভুম ভগবন মুরুগান্দা কৎলি। তামিল লমদমগী কাম্বু অমসুং সমাইগুম্বা মিলেতশিং, কেরলা অমসুং কর্নাতকাগী রাগী অমসুং তেলুগু ঙাংবা রাজ্যশিংগী সাজা অমসুং জোন্না মীরোল কয়াগী চীঞ্জাকশিংগী শরুক অমা ওইদুনা লাক্লি। কান্নরবা চীঞ্জাক অসি মালেমগী কৈথেলশিংদা য়ৌহন্নবা সরকারনা থবক পায়খৎলে অমসুং মখোয় মালেমগী লৈবাকশিংদা য়ৌহনবদা মহৌশাগী লৌউ-শিংউগী থবক অমসুং কেমিকেল য়াওদবা লৌ উবগী থবক্না মরুওইবা থৌদাং অমা লৌগনি। মরম অদুনা পাংথোক্লিবা মীফম অসিদা অসিগুম্বা থবকশিংগী খন্ন-নৈনবশিং য়াওহনগনি হায়না ঐনা থাজৈ।
মরুপশিং,
মহৈ-মরোং মখল অমা খক থাবগী মহুত্ত তোঙান তোঙানবা মহৈ-মরোংশিং থাবগী থবক য়োকখৎনবা ঐনা অপীল তৌরি। হিরম অসিগী মতাংদা খা ভারতকী রাজ্য কয়া ইথিলগী হৌরকফম অমা ওইরি। কেরলা অমসুং কর্নাতকাগী চীঙগী শরুকশিংদা থাক-থাক নাইদুনা লৌউ-শিংউগী থবক পায়খৎপা উরে। লৌফম অমদা, য়ুবী, ক্বা অমসুং উহৈ পানবা পাম্বীশিং থারে অমসুং মদুগী মখাদা স্পাইসশিং অমসুং ব্লেক পেপর থারে। অপীকপা লৌবুক অমদা মহৈ-মরোংশিং পুন্না থাবা অসি মহৌশাগী লৌউ-শিংউগী থবক্কী নুঙগী ওইবা ৱাখল্লোন্নি। অসিগুম্বা লৌউ-শিংউগী নমুনা অসি ভারত শীনবা থুংবগী থাক্ত য়োকখৎকদবনি। লৈবাক অসিগী তোঙান তোঙানবা মফমশিংদা অসিগুম্বা থবকশিং কমদৌনা পায়খৎকদগে হায়বগী মতাংদা খন্ননবা ঐনা রাজ্য সরকারশিংদা হায়গনি।
মরুপশিং,
খা ভারত লৌউ-শিংউগী অহিংবা য়ুনিভর্সিতি অমনি। লমদম অসিদা মালেমদা খ্বাইদগী লিরবা মথৌ পাংথোক্লিবা দাম খর লৈরি অমসুং কালিঙ্গরায়ান কেনেল ১৩ শুবা চহিচাদা শাখিবনি। লমদম অসিগী লাইশঙদা লৈরিবা ইকোনশিংনা তোঙান তোঙানবা মফমশিংদা ঈশিং তুংশিন্দুনা থম্বগী থবকশিংগী নমুনাশিং ওইরে। লৌ-শিংউগী থবকশিংগীদমক তুরেলগী ঈশিং শীজিন্নদুনা চহি লিশিং কয়াগী মমাঙদা লমদম অসিনা সাইন্তিফিক ওইনা ঈশিং শীজিন্নবগী থবকশিংদা মাঙজিল থাখি। মহৌশাগী লৌউ-শিংউগী থবক্ত লমদম অসিনা লৈবাক অসি লমজিংগনি হায়না ঐনা থাজৈ।
মরুপশিং,
বিকসিত ভারত অমগীদমক তুংগী লৌউ-শিংউগী থবক অমা শেমগৎনবা অপুনবগী থবকশিং দরকার ওইরে। লৌমীশিংনা “একর অমা, কুম অমা” পাংথোকপা হৌনবা লৈবাক শীনবা থুংবগী ঐগী লৌমী ইনাওশিং অমসুং ইচলশিং অমসুং তামিল নাদুগী লৌমীশিংদা ঐনা হায়নিংই। কুম অমদা লম একর অমদা নেচরেল ফার্মিং (মহৌশাগী লৌউ-শিংউগী থবক) পায়খৎকদবনি। অদোম্না ফংলিবা ফলশিংদা য়ুম্ফম ওইদুনা, অনিশুবা চহিদা খর হেন্না পাংথোক্কনি, অহুমশুবা চহিদা খরগা হেন্না পাংথোক্কনি অমসুং মাঙলোমদা চঙশিনগনি। বিজ্ঞান্নিকশিং অমসুং রিছার্স ইন্সতিতুসনশিংনা মহৌশাগী লৌউ-শিংউগী থবক অসি এগ্রিকচরল করিকুলমগী মরুওইবা শরুক অমা ওইহনগদবনি, লৌমীশিংগী লৌবুকশিং অহিংবা লেবোরেতোরিশিং ওইনা লৌনবা মখোয়গী পুক্নিং থৌগৎকদবনি। ঐখোয়গী পান্দমদি মহৌশাগী লৌউ-শিংউগী থবক অসি বিজ্ঞান্না মপুংফানা শৌগৎপা খোঙজং অমা ওইহনবনি। খোঙজং অসিদা রাজ্য সরকারশিং অমসুং ফার্মর প্রদুসর ওর্গনাইজেসনশিংগী মরুওইবা থৌদাং অমা লৈরি। হৌখিবা চহি খরদা লৈবাক অসিদা ফার্মর প্রদুসর ওর্গনাইজেসন ১০,০০০ শেমখ্রে। মখোয়না শৌগৎতুনা, লায়রবা লৌমীশিংগী ক্লষ্টরশিং শেম্লে, চামথোক্নবা, য়োম্নবা অমসুং শেম-শানবা খুদোংচাবশিং ফংহল্লে অমসুং ই-নামগুম্বা ওনলাইন কৈথেলশিংগা হকথেংননা শম্নরে। মমাংঙৈগী লৌশিং, সাইন্সকী মপাঙ্গল অমসুং সরকারগী মতেং পুন্না চৎমিন্নবা মতমদা, লৌমীশিং নুংঙাই য়াইফগনি অমসুং মালেম ইমা মশা ফনা লৈগনি।
মরুপশিং,
সম্মিৎ অসিনা লৈবাক অসিদা মহৌশাগী লৌউ-শিংউগী থবক্ত ঐখোয়গী লৌমী ইনাওশিং অমসুং ইচলশিংদা লমজিংগনি অমসুং অনৌবা মাইকৈ অমা তাক্কনি হায়না ঐনা চেৎনা থাজবা থম্লি। মফম অসিদগী অনৌবা ৱাখল্লোনশিং অমসুং পাম্বৈশিং থোক্লক্কনি। থাজবা অসিগা লোয়ননা, ময়ামগী মফমদা ঐনা অমুক হন্না ঐগী য়াইফ পাউজেল পীজরি। অদোম থাগৎপা ফোঙদোকচরি! ঐগা লোয়ননা হায়মিন্নসি:
ভারত মাতা কি জয়!
ভারত মাতা কি জয়!
ভারত মাতা কি জয়!
অদোম থাগৎচরি!
