রসিয়াগী দিপুতী প্রাইম মিনিস্তর, শ্রী দিমিত্রি পেত্রুশেভ; ঐহাক্কী মন্ত্রীমন্দলগী মরুপশিং, চিরাগ পসৱান অমসুং শ্রী রবনীত; শ্রী প্রতাপরাও য়াদব; তোঙান তোঙানবা লৈবাকশিংদগী মফম অসিদা লাকখিবা মন্ত্রীশিং অমসুং মীহুৎশিং; শক্নাইরবা মীথুংলেনশিং; নুপীশিং অমসুং নুপাশিং!
ৱার্ল্দ ফুদ ইন্দিয়াদা ময়াম পুম্নমকপু তরাম্না ওকচরি। ঙসি, থৌরম অসিদা, ঐখোয়গী লৌমীশিং, ওন্তপ্রিন্যুওরশিং, ইনভেস্তরশিং অমসুং কঞ্জ্যুমরশিং পুম্নমক্না মফম অমখক্তদা লৈরি। ৱার্ল্দ ফুদ ইন্দিয়ানা অনৌবা কন্তেক্তশিং, অনৌবা কনেক্সনশিং অমসুং ক্রিএতিবিতীগী খুদোংচাবা অমা ওইরক্লি। ঐহাক্না মফম অসিদা উৎলিবা একজিবিসনশিং য়েংখ্রে। ন্যুত্রিসনদা, ওইল কঞ্জুম্পসন হন্থহনবদা অমসুং পেকেজ প্রদক্তশিংগী মচি ওইবা হেনগৎহন্নবদা মীৎয়েং থম্লিবা অসি উবদা ঐহাক নুংঙাইবা ফাওই। থৌরম অসিগীদমক্তা ঐহাক্না ময়াম পুম্নমকপু নুংঙাইবা ফোংদোকচরি অমসুং য়াইফ-পাউজেল পীজরি।
মরুপশিং,
ইনভেস্তর খুদিংমক্না, ইনভেস্তমেন্ত অমা তৌদ্রিঙৈদা, মহাক্না ইনভেস্ত তৌগদবা মফম অদুগী মহৌশাগী ওইবা মপাঙ্গল অদু য়েংশিনগনি। ঙসিদি, মালেম, মরু ওইনা ফুদ সেক্তরগা মরী লৈনবা ইনভেস্তরশিংনা, ভারতকী মায়কৈদা চাউরবা আশা অমগা লোয়ননা য়েংলি। মসিগী মরমদি ভারতনা দাইভর্সিতী, দিমান্দ অমসুং স্কেলগী মপাঙ্গল অহুম অসি লৈ। মহৈ-মরোং খুদিংমক, উহৈ খুদিংমক অমসুং মনা-মশিং খুদিংমক ভারত্তা পুথোকই। মসিগী মখল-মখা কয়া অসিনা মরম ওইদুনা, ভারত অসি মালেমদা তোপ-তোপ্পা অমা ওইহল্লি। কিলোমিতর ১০০ খুদিংগী, ঐখোয়গী লৈবাক অসিদা চিঞ্জাক অমসুং মাগী মহাওশিং অসি হোংই। ভারত্তা, মখল কয়াগী চিঞ্জাক্কী দিমান্দ য়াম্না লৈ। মসিগী দিমান্দ অসিনা ভারতপু কম্পিতিতিব এদজ অমা পীরি অমসুং ইনভেস্তরশিংগীদমক পাম্নবা মফম অমা ওইহল্লি।
মরুপশিং,
ঙসি ভারতনা পায়খৎলিবা থবকশিং অসি মমাংদা অমুক্তা ওইখিদ্রিবা অমসুং ৱাখলনা শাগৎপা ঙমদবা অমনি। হৌখিবা চহি ১০ অসিদা ভারতকী মীওই কোতি ২৫না লায়রবদগী থোরকখ্রে। অসিগুম্বা নাগরিক পুম্নমক হৌজিক নিও মিদ্দল ক্লাসকী শরুক অমা ওইরে। নিও মিদ্দল ক্লাস অসি লৈবাক অসিগী খ্বাইদগী ইনর্জী লৈবা অমসুং খ্বাইদগী এস্পিরেস্নেল ওইবা সেগমেন্তনি। অসিগুম্বা মশিং য়াম্লবা মীওইশিংগী এস্পিরেসনশিংনা ঐখোয়গী ফুদ ত্রেনশিং শেমগনি। মসি ঐখোয়গী দিমান্দবু থৌগৎলিবা এস্পাইরিং ক্লাসনি।
মরুপশিং,
ঙসিদি, লৈবাক অসিগী হৈ-শিংলবা নহারোলশিংনা সেক্তর খুদিংমক্তা মশক থোকপা মায় পাকপা কয়া ফংলি। ঐখোয়গী ফুদ সেক্তর অসিসু মসিদা য়াওদবা নত্তে। ঙসি, ভারত অসি মালেমগী খ্বাইদগী চাউবা অহুমশুবা স্তার্ত-অপ ইকোসিস্তেম ওইরে। মাগী স্তার্ত-অপ কয়া অমা ফুদ অমসুং এগ্রিকলচর সেক্তরশিংদা থবক তৌরি। এ.আই., ই-কমর্স, দ্রোনশিং অমসুং এপশিং অসিসু সেক্তর অসিদা পুনশিল্লি। ঐখোয়গী স্তার্ত-অপশিংনা সপ্লাই চেনশিং, রিতেল অমসুং প্রোসেসিং অসি শেমদোক্লি। অসুম্না, ভারত অসি দাইভর্সিতী, দিমান্দ অমসুং ইন্নোবেসন পুম্নমক অমুক্তংদা লৈ। ফেক্তরশিং অসিনা ভারতপু ইনভেস্তমেন্তকীদমক খ্বাইদগী পাম্নবা মফম অমা ওইহল্লি। মরম অদুনা, লাল কিলাগী লানবনদগী ঐনা হায়খিবা অদু ঐনা অমুক্কা হন্না হায়জনীংই মদুদি ভারত্তা ইনভেস্ত তৌনবা অমসুং পাকথোক চাউথোকহন্নবগী অচুম্বা মতম ওইরে।
মরুপশিং,
২১শুবা চহিচা অসিনা মালেমগী মায়োক্তা পুথোরক্লিবা শিংনবশিং অসি ঐখোয় পুম্নমক্না নীংশিংলি। মালেমগী মায়োক্তা শিংনবশিং লাকপা মতমদা, ভারতনা পোজিতিব ওইবা থৌদাং অমা লৌনবা মাংলোমদা চংশিল্লি হায়বসিসু অদোম্না খঙই। ভারতনা মালেমগী ওইবা ফুদ সেক্যুরিতীদা লেপ্পা লৈতনা মতেং পাংলি। ঐখোয়গী লৌমীশিং, শা-ষন য়োকপা মীওইশিং, ঙা য়োক্লিবশিং অমসুং মতেং পাংলিবা সরকারগী পোলিসীশিংগী কন্না হোৎনবনা ভারতকী কেপাসিতী অসি লেপ্তনা হেনগৎলক্লি। হৌখিবা চহি তরা অসিদা, ঐখোয়গী চেং-হৱাই পুথোকপা অসি য়াম্না হেনগৎলে। ঙসিদি ভারত অসি মালেমগী মিল্ক সপ্লাইগী ২৫% কন্ত্রিব্যুত তৌদুনা শঙ্গোম খ্বাইদগী য়াম্না পুথোকপা লৈবাক ওইরে। ঐখোয়না খ্বাইদগী চাউবা মিল্লেৎ পুথোকপা লৈবাক অমসু ওইরি। উহৈ অমসুং গেহুগী লমদা ঐখোয়না মালেমদা অনিশুবদা লৈরি। ভারতনা মহৈ-মরোং, মনা-মশিং অমসুং ঙা য়োকপদসু চাউনা মতেং পাংলি। মরম অসিনা মালেমদা মহৈ-মরোংগী অৱাবা লৈরকপা মতমদা, সপ্লাই চেন থিংজিল্লকপা মতমদা, ভারতনা মাগী থৌদাং অসি মপুং ফাহন্নবগীদমক মপাঙ্গল কনখৎতুনা মাংলোমদা চংশিল্লি।
মরুপশিং,
মালেমগী য়াইফ-থৌরাংগীদমক, ভারতকী তৌবা ঙম্বা অমসুং কন্ত্রিব্যুসন মখা তানা হেনগৎহন্নবা ঐখোয়না হোৎনরি। মসিগীদমক্তা, সরকারনা স্তেকহোল্দর খুদিংমক্তা অমসুং ফুদ অমসুং ন্যুত্রিসনগা মরী লৈনবা ইকোসিস্তেম পুম্নমক মপাঙ্গল কনখৎহল্লি। ঐখোয়গী সরকারনা ফুদ প্রোসেসিং সেক্তরবু পুক্নিং থৌগৎলি। মসিনা মরম ওইদুনা সেক্তর অসিদা ১০০% এফ.দি.আই. অয়াবা পীখ্রে। মসিগী মথক্তা, পি.এল.আই. স্কিম অমসুং মেগা ফুদ পার্কশিং পাকথোক চাউথোকহনবনা সেক্তর অসিদা পুক্নিং থৌগৎলি। ঙসি, ভারতনা মালেমগী খ্বাইদগী চাউবা স্তোরেজ ইনফ্রাস্ত্রকচর স্কিম পায়খৎলি। সরকারনা হোৎনরিবশিং অসিগী মহৈসু উবা ফংলি। হৌখিবা চহি ১০ অসিদা, ভারতকী প্রোসেসিং কেপাসিতী অসি শরুক ২০ হেনগৎলে। প্রোসেস তৌরবা চিঞ্জাক্কী ঐখোয়গী এক্সপোর্তসু শরুক অনি হেনগৎলে।
মরুপশিং,
লৌমীশিং, শা-ষন য়োকপা মীওইশিং, ঙা য়োকপশিং অমসুং অপীকপা প্রোসেসিং য়ুনিৎশিংনা ফুদ সপ্লাই অমসুং ভেল্যু চেনদা মরুওইবা থৌদাং অমা লৌরি। হৌখিবা চহি তরা অসিদা, ঐখোয়গী সরকারনা স্তেকহোল্দর পুম্নমকপু মপাঙ্গল কনখৎহনখ্রে। ভারত্তা চাদা ৮৫ হেন্না অপীকপা নৎত্রগা মর্জিনেল ফার্মরশিংনি হায়বসি অদোম্না খঙই। মরম অসিনা ঐখোয়না পোলিসীশিং শেমখি অমসুং মসিগী খুত্থাংদা অপীকপা লৌমীশিং অসি হৌজিক্তি কৈথেলদা মরুওইবা মপাঙ্গল অমা ওইরক্লিবা সপোর্ত সিস্তেম অমা শেমগৎখি।
মরুপশিং,
খুদম ওইনা, মাইক্রো ফুদ প্রোসেসিং য়ুনিৎশিং অসি ঐখোয়গী সেল্ফ হেল্প গ্রুপশিংনা চলাইরি। সেল্ফ হেল্প গ্রুপশিং অসি ঐখোয়গী খুঙ্গংশিংদা লৈরিবা মীওই লাখ কয়াগা মরী লৈনৈ। মখোয়বু মতেং পাংনবা, ঐখোয়গী সরকারনা ক্রেদিৎ লিঙ্ক সবসিদী পীরি। ঙসিসু, চাউরাক্না লুপা করোর ৮০০গী সবসিদী অসি অদোমগী মমাংদা লৈরিবা বেনিফিসরীশিং অসিদা ত্রান্সফর তৌখ্রে।
মরুপশিং,
অসিগুম্বা মওংদা, ঐখোয়গী সরকারনা ফার্মর প্রদ্যুসর ওর্গনাইজেসনশিং (এফ.পি.ও.শিং) পাকথোক চাউথোকহল্লি। ২০১৪দগী হৌরগা লৈবাক শীনবা থুংনা এফ.পি.ও. ১০,০০০ লিংখৎখ্রে, মসিনা অপীকপা লৌমী লাখ কয়াবু শম্নহল্লে। মসিনা অপীকপা লৌমীশিংদা মখোয়গী পোত্থোকশিং পাক-শন্না কৈথেলদা য়োনবদা মতেং পাংই। অমসুং মখোয়গী থৌদাং অসি মসিদখক্তদা য়ুম্ফম ওইদে। হায়রিবা এফ.পি.ও.শিং অসি ফুদ প্রোসেসিং সেক্তরদসু মরু ওইবা থৌদাং অমা লৌরি অমসুং ব্রান্দেদ প্রদক্তশিং শেমগৎলি। ঐখোয়গী এফ.পি.ও.শিংগী মপাঙ্গল অদু উবদা অদোম থোইদোক হেন্দোক্না অঙকপা পোক্কনি। ঙসিদি, ঐখোয়গী এফ.পি.ও.শিংগী পোত্থোক ১৫,০০০ হেন্না ওনলাইন প্লেৎফোর্মশিংদা ফংলি। কাশ্মীরদগী বসমতী রাইস, সেফ্রোন অমসুং হৈজুকাংশিং; হিমাচলদগী জেম অমসুং এপল জুস; রাজস্থানদগী মিলেৎ কুকিজ; মধ্য প্রদেশতগী সোইয়া নগগেৎশিং; বিহারদগী সুপরফুদ মখানা; মহারাস্ত্রদগী গ্রাউন্দনুত ওইল অমসুং জগরী; অমসুং কেরলাদগী বনানা চিপশিং অমসুং য়ুবী থাও... কাশ্মীরদগী কন্যাকুমারী ফাওবদা ঐখোয়গী এফ.পি.ও.শিংনা ভারতকী লৌউ-শিংউগী দাইভর্সিতী অসি য়ুমথোং খুদিংদা য়ৌহল্লি। অমসুং এফ.পি.ও. ১১০০ হেনবনা করোরপাতি ওইরে, হায়বদি মখোয়গী চহিগী তর্নওভর লুপা করোর অমা হেনখ্রে হায়বা খঙবদা অদোম নুংঙাইবা ফাওরগনি। ঙসিদি, এফ.পি.ও.শিংনা লৌমীশিংগী শেন্থোক হেনগৎহনবদা অমসুং নহাশিংদা থবক পীবদা মরু ওইবা থৌদাং অমা লৌরি।
মরুপশিং,
এফ.পি.ও.শিংগী মথক্তা, কোওপরেতিবশিং অসিসু ভারত্তা অচৌবা শক্তি অমনি। চহি অসি ইন্তর্নেস্নেল ইয়র ওফ কোওপরেতিব ওইরি। ভারত্তা কোওপরেতিবশিংনা ঐখোয়গী দাইরী সেক্তর অমসুং খুঙ্গংগী শেন্মিৎলোনবু অনৌবা পাঙ্গলগা লোয়ননা মপাঙ্গল কনখৎহল্লি। কোওপরেতিবশিংগী মরুওইবা খঙলদুনা, ঐখোয়না মখোয়গীদমক্তা তোঙানবা মন্ত্রালয় অমা লিংখৎখি। মসিনা ঐখোয়গী পোলিসীশিং অসি মখোয়গী মথৌ তাবশিং অদুগা চুনহল্লগনি। সেক্তর অসিগীদমক্তা তেক্স অমসুং ত্রান্সপরেন্সীগী রিফোর্মশিংসু পায়খৎলি। পোলিসীগী থাক্তা অহোংবা লাকপশিং অসিনা কোওপরেতিব সেক্তরদা অনৌবা পাঙ্গল পীরি।
মরুপশিং,
মেরিন অমসুং ফিসরিজ সেক্তরদা ভারতকী চাউখৎপা অসিসু মশক থোক্লি। হৌখিবা দিকেদ অমদা, ঐখোয়না ফিসরিজ সেক্তরগা মরী লৈনবা ইনফ্রাস্ত্রকচর পাকথোক চাউথোকহনখ্রে। ঐখোয়না ঙামীশিংদা শেলগী তেংবাং অমসুং দীপ-সী ফিশিং বোৎশিংদা মতেং পীরি। মসিনা ঐখোয়গী মেরিন প্রদক্সন অমসুং এক্সপোর্ত অনিমক হেনগৎহনখ্রে। ঙসি, সেক্তর অসিনা মীওই করোর অহুমরোমদা থবক পীরি। ঐখোয়না সমুদ্রগী পোত্থোকশিং প্রোসেসিং হেনগৎহন্নবা থবকসু পায়খৎলি। মসিগীদমক্তা, মোদর্ন প্রোসেসিং প্লান্তশিং, কোল্দ চেনশিং অমসুং স্মার্ত হার্বরশিংদা ইনভেস্তমেন্ত তৌরি।
মরুপশিং,
মহৈ-মরোংশিং ঙাক-শেন্নবা মোদর্ন তেক্নোলোজীদা ঐখোয়না শেল থাদরি। ফার্মরশিংবু ফুদ ইরাদিএসন তেক্নোলোজীগা শম্নহল্লি। মসিনা ঐখোয়গী লৌউ-শিংউগী পোত্থোকশিংগী সেল্ফ লাইফ হেনগৎহল্লে অমসুং ফুদ সেক্যুরিতী মপাঙ্গল কনখৎহল্লে। সরকারনা থবক অসিদা য়াওরিবা য়ুনিৎশিংদা পীবা য়াবা মতেং পুম্নমক পীরি।
মরুপশিং,
ঙসিগী ভারত অসি ইন্নোবেসন অমসুং রিফোর্মশিংগী অনৌবা লম্বীদা মাংলোমদা চংশিল্লি। হৌজিক ঐখোয়গী লৈবাক অসিদা নেক্স –জেনরেসন জি.এস.তি. রিফোর্মশিংগী মরমদা য়াম্না খন্নখ্রে। লৌমীশিংগীদমক্তদি, রিফোর্মশিং অসিনা মমল হন্থবা অমসুং কান্নবা হেন্না ফংবগী থাজবা পীরি। বতর অমসুং ঘীদা চাদা ৫গী জি.এস.তি. খক্তা লৌবগা লোয়ননা মসিনা চাউনা কান্নবা পীরগনি। মিল্ক কেনশিংদসু, তেক্স অসি চাদা ৫ খক্তনি। মসিনা লৌমীশিং অমসুং পোত্থোক পুথোক্লিবশিংদা হেন্না ফবা মমল ফংহল্লগনি। মসিনা লায়রবশিং অমসুং মিদ্দল ক্লাসকী মীওইশিংগীদমক মমল হন্থনা ন্যুত্রিসন ফংহনগনি। ফুদ প্রোসেসিং সেক্তরসু রিফোর্মশিং অসিদগী য়াম্না কান্নবা ফংগনি। কঞ্জ্যুম তৌনবা শেম-শারিবা অমসুং প্রিঞ্জার্ব তৌরবা মহৈ-মরোং, মনা-মশিং অমসুং নৎশিং অসি জি.এস.তি. চাদা ৫ খক্তা লৌগনি। ঙসিদি, প্রোসেস তৌরবা ফুদ প্রদক্তশিংগী চাদা ৯০ হেনবনা জিরো নত্ত্রগা চাদা ৫গী তেক্স স্লেবতা য়াওরি। বাইও-পেস্তিসাইদশিং অমসুং মাইক্রো-ন্যুত্রিএন্তশিংগী তেক্স হন্থখ্রে। জি.এস.তি.গী রিফোর্মশিংগী মতুং ইন্না, বাইও-ইনপুতশিং অসি মমল হন্থরে, মসিনা অপীকপা ওর্গানিক ফার্মরশিং অমসুং এফ.পি.ও.শিংদা হকথেংননা কান্নবা ফংহল্লে।
মরুপশিং,
ঙসিদি, মতম অসিগী দিমান্দ অসি বাইওদিগ্রেদেবল ওইবা পেক্কেজিংগীদমক্তসু ওইরি। ঐখোয়গী পোত্থোকশিং অসি ফ্রেস অমসুং অৱাংবা থাক্কী ওইহনবা অসি য়াম্না মরু ওই, অদুবু মসিগা লোয়ননা ঐখোয়না মহৌশাগী ফীভম ঙাকশেনবগী মায়কৈদসু থৌদাং অমা লৈ। মরম অদুনা, সরকারনা বাইওদগ্রেদেবল পেক্কেজিংদা জি.এস.তি. ১৮%দগী ৫%দা হন্থহনখ্রে। ঐহাক্না ইন্দস্ত্রীগী পার্তনর পুম্নমকপু বাইওদিগ্রেদেবল পেক্কেজিংগা মরী লৈনবা ইন্নোবেসনশিংদা শেল থাদনবা অমসুং ঐখোয়গী প্রদক্ত পেক্কেজিং পুম্নমকপু য়ারিবমখৈ থুনা বাইওদিগ্রেদেবল মেতরিএলশিংদা হোংদোক্নবা তকশিনবা পাম্মি।
মরুপশিং,
ভারতনা মালেমগীদমক্তা থম্মোয় শেংনা মাগী থোংশিং হাংদুনা থম্লি। ঐখোয়না ফুদ চেনগা মরী লৈনবা ইনভেস্তর পুম্নমক্তা খুদোংচাবা পীরি। ঐখোয়না থম্মোয় শেংনা পুন্না থবক তৌমিন্ননবা শেম-শারি। ঐহাক্না অমুক্কা হন্না ময়াম পুম্নমকপু ভারত্তা খ্বাইদগী হেন্না ইনভেস্ত তৌনবা কৌজরি। সেক্তর অসিদা অচৌবা ওইথোকপা য়াবশিং লৈ। মসিগী খুদোংচাবা অসি লৌবিয়ু, অমসুং থৌরম অসিগা মরী লৈনবা মীওই পুম্নমক্তা ঐহাক্না নুংঙাইবা ফোংদোকচরি। ময়াম পুম্নমকপু থাগৎচরি।
