খুরুমজরি।
মধ্য প্রদেশকী নহাশিংগী মফমদা লৈঙাক্কী থবক পীননবা কেম্পেন খোঙজেল য়াঙনা চঙশিল্লি। তোঙান তোঙানবা দিস্ত্রিক্তশিংদা থবক্কী মেলাশিং পাঙথোক্তুনা তোঙান তোঙানবা ফমশিংদা নহা লিশিং কয়াবু থবক হাপ্লি। মখোয়গী মনুংদা নহা ২২,৪০০ হেনববু ওজাগী শিন্ফমদা থবক হাপ্লি। ঙসি নহা কয়ানা এপোইন্তমেন্ত লেত্তর ফংলি। ঐনা নহা পুম্নমক্কী মফমদা ওজা হায়রিবা মরুওইখ্রবা শিন্ফম অসিদা তিল্লরিবসিদা নুংঙাইবা ফোঙদোকচরি অমদা য়াইফ-পাউজেল পীজরি।
মরূপশিং,
কেন্দ্র লৈঙাক্না মতমগী অমদি চাওখৎপা ভারতকী মথৌ তাবশিং য়েলগা অনৌবা নেস্নেল এজুকেসন পোলিসী চৎনহল্লে। হায়রিবা পোলিসী অসিনা অঙাংশিংগী ৱাখল লৌশিং, হৈথোই শিংথোইবা, নাৎ অমদি ভারতকী ভেল্যুশিংবু য়োকখৎনবগীদমক মপুং ওইনা চাওখৎহন্নবা হীরমদা মীৎয়েঙ চঙলি। হায়রিবা পোলিসী অসি মতিং লৈনা চৎনহনবদা ওজাশিংগী থৌদাং য়াম্না মরুওই। মধ্য প্রদেশতা অচৌবা মওংদা ওজা লৌননবগী পায়খৎলিবা থৌরাং অসি মায়কৈ অসিদা থাংজিল্লিবা অচৌবা খোঙথাঙ অমনি। ঐঙোন্দা পাউদমবদা নৌনা খল্লিবা ওজাশিং অসিগী তঙ্খায়রোমদি ত্রাইবেলগী মফমশিংদা থবক পুগদৌরি। অসুম্না মশিং য়াম্না ওজা লৌবা অসিনা খ্বায়দগী হেন্না কান্নহনগদৌরিবা অসি খুঙ্গংগী লমদমগী অঙাংশিং, ঐখোয়গী শোত্থহৌরবা মীওই কাঙলুপশিংদনি। এম.পি. লৈঙাক্না চহি অসিদা লৈঙাক্কী থবক লাখ ১ হেন্না লৌনবা পান্দম থম্লিবসিদা ঐ নুংঙাইবা ফাওই। চহি অসি লোইশিল্লকপা ফাওবদা ওজা লিশিং ৬০ হেন্না লৌনবা পান্দম থম্লি। হায়রিবা থৌরাংশিং অসিগী মহৈনা নেস্নেল এচীবমেন্ত সর্ভেদা এম.পি.না মহৈ মশিংগী লমদা মফম চাউনা হাইগৎপা ঙম্লি। হায়রিবা রেঙ্কিং অসিদা এম.পি.না ১৭শুবা মফমদগী ৫ শুবা মফমদা হাইগৎলক্তুনা, হায়বদি মফম ১২ চোংখৎলক্লি। মদুসু ৱাজাও ঙাঙলুবা তৌদনা, এদভর্তিজমেন্ততা শেল তিংহন্দনা, তুমিন্না অসিগুম্বা থবক পায়খৎপসিদা পুক্নিং লুপ্পা, খোঙফম চেৎপা চঙই, মদু য়াওদনা মসি ওইথোকপা ঙম্লোই। মওং অমগী পুক্নিং চঙবা অমা চঙই, মহৈ মশিংগী লমদা পুক্নিং লুপ্পা চঙই। ঐনা মধ্য প্রদেশগী মহৈরোয়শিং, মধ্য প্রদেশকী ওজা পুম্নমক, এম.পি. লৈঙাক্কী মফমদা মহৈ মশিংগী মরুওইবা লমসিদা ফংবা ঙম্লিবা অসিগীদমক নুংঙাইবা ফোঙদোকচরি।
মরূপশিং,
নীংতম্বগী অমৃৎকাল অসিদা লৈবাকসিনা অচৌবা পান্দম অমদি ফিরেকপা লোয়ননা মাঙদা চঙশিল্লি। হায়রিবা পান্দমশিং অসি ফংনবগীদমক চাওখৎ থৌরাংগী থবক পায়খৎলিবশিং অসিনা ঙসিদি সেক্তর খুদিংদা থবক পীননবগী অনৌবা তাঞ্জা অমা শেম্লি। তোঙান তোঙানবা সেক্তরদা ঙসি খোঙজেল য়াঙনা ইনফ্রাস্ত্রকচর শেমগৎপদা খোঙজেল য়াঙ্খৎলক্লিবা অসিনসু থবক পীনবগী অনৌবা খুদোংচাবশিং শেমগৎলক্লি। নুমিৎ খরনিগী মমাঙদা ভোপালদগী দিল্লী ফাওবগী মরক্তা বন্দে ভারত ত্রেন হৌদোকখি। ত্রেন অসিদগী প্রোফেস্নেলশিং, করবারৱালাশিংদা কান্নবা ফংহনগনি, অদুগা লোয়ননা তুরিজমদসু চাউনা কান্নহনগনি। ৱন স্তেসন ৱন প্রদক্ত অমদি ৱন দিস্ত্রিক্ত ৱন প্রদক্তনচিংবা থৌরাংশিংনসু লমদমসিদা পুথোকপা পোৎলমশিং অরাপ্পা মফম মফমশিংদা য়ৌরি। হায়রিবা স্কীমশিং অসিনা থবক পীবা হেনগৎনবা অমদি শেন্থোক হেনগৎহনবদা মতেং পাংলি। মসিগা লোয়ননা মুদ্রা য়োজনাদগীসু শেলথুমগী ফীভম চাজদবা, অদুবু মশানা মশাবু থবক পীজবা পাম্বা মীওইশিংদসু চাউনা কান্নবা ফংলি। লৈঙাক্না পোলিসীগী থাক্তা অহোংবা পুরক্লিবা অসিনা ভারতকী স্তার্তঅপ ইকোসিস্তেমদসু থবক পীবগী য়াম্লবা খুদোংচাবশিং শেম্লি।
মরূপশিং,
থবক পীবা অমদি মশানা মশাবু থবক পীজববু য়োকখৎনবগীদমক লৈঙাক্না স্কিল দিভেলপমেন্ততা মরুওইবা মীৎয়েঙ থম্লি। প্রধান মন্ত্রী কৌসল বিকাস য়োজনাগী মখাদা নহাশিংবু ত্রেনিং পীননবগীদমক লৈবাক শিনবা থুংনা কৌসল বিকাস কেন্দ্র হাংদোক্লি। চহি অসিগী বজেত্তা স্কিল ইন্দিয়া ইন্তরনেস্নেল সেন্তর হাংদোক্নবগীদমক লাউথোকখি। মসিদা নহাশিংদা নিউ এজ তেক্নোলোজীগী খুত্থাঙদা ত্রেনিং পীগনি। হন্দক চহিগী বজেত্তা, পি.এম. বিস্বকর্ম য়োজনাগী মখাদা অপীকপা খুৎহৈবশিংদা ত্রেনিং পীননবা অমদি মখোয়বু এম.এস.এম.ই.শিংগা মরী শম্নহন্নবা থৌরাং পায়খৎলি।
মরূপশিং,
এম.পি.দা ওজা লিশিং কয়া লৌরিবশিং অসিদা ঐনা ৱাফম অমসু থম্নিংই। অদোমগী পুন্সিগী হৌখিবা চহি ১০-১৫গী মতমদু হঙ্গৎনা য়েংবিয়ু। অদোমগী পুন্সিদা খ্বায়দগী য়াম্না ইথিল পীখিবা মীওইশিংগী মরক্তা অদোমগী ইমা অমদি ওজাশিং শোয়দনা য়াওরমগনি। মতৌ অসুম্না মখোয়শিং অসি অদোমগী থম্মোয়নুংদা লৈবগুম অদোমসু অদোমগী মহৈরোয়শিংগী থম্মোয়নুংদা মফম অমা কনবা ঙম্নবা হোৎনবিয়ু। অদোম্না মতম পুম্নমক্তা খঙজিনবিগদবা ৱাফমদি অদোম্না পীরিবা মহৈ মশিং অসিনা লৈবাকসিগী হৌজিক হৌজিক্কী ফীভমখক নত্তনা তুংলমচৎসু শেমগদৌরিবনি হায়বসিনি। অদোম্না তাকপি তম্বিরিবা অদুনা মহৈরোয় অমখক নত্তনা খুন্নাই পুম্বদা অহোংবা পুরক্কদৌরিবনি। অদোম্না হায়রিবা ভেল্যুশিং অসি হেনগৎহন্নবগীদমক হোৎনরিবা অসিনা ঙসিগী মীরোলখক নত্তনা তুংগী মীরোল কয়াদসু ইথিল পীগদৌরিবনি। অঙাংশিং মহৈ মশিং তম্বিনবা অমদি মপুং ফানা চাওখৎহন্নবগীদমক মতম পুম্বদা অদোম্না খোঙফম চেৎনা লেপ্লক্কনি হায়না ঐনা চপ চানা থাজৈ। অদুগা ঐনা মতম পুম্বদা হায়গদবা ৱাফম অম হায়রগদি ঐখোয়গী পুক্নিংদা মহৈরোয় অমা ওইবগী ইহুল অসি কৈদৌনুংদসু শিথহনখিনু হায়বসিনি। অদোম ওজা ওইরবসু অদোমগী পুক্নিংদা মহৈরোয় অমা ওইবগী ইহুল অদুদি মতম পুম্বদা হিংহন্দুনা থম্বিয়ু, মতম পুম্বদা মীৎশিং নাশিংনা থম্বিয়ু। অদোমগী নুংদা লৈরিবা মহৈরোয় অদুনা অদোমগী পুন্সিদা অনৌবা পন্দোলশিং লোম্বা ঙমহনগদৌরিবনি। অমুক্কা হন্না ময়ামগী মফমদা নুংঙাইবা ফোঙদোকচরি অমদি য়াইফ-পাউজেল পীজরি।
থাগৎচরি।
