কেন্দ্রগী ঐহাক্কী মরুপশিং, রাম মোহন নাইদু জী, মুরালিধর মোহোল জী, IATAগী বোর্দ ওফ গবর্নরসকী চেয়রমেন, পীতর অল্বর্সজী, IATAগী দাইরেক্তর জেনরেল, ৱিল্লি ৱালশজী, ইন্দিগোগী মেনেজিং দাইরেক্তর, রাহুল ভাতিয়াজী, অতৈ মকোক থোংবশিং, নুপীমচাশিং অমসুং নুপাশিং!
IATAগী 81শুবা এন্যুএল জেনরেল মীতিং অমসুং ৱার্ল্দ এয়র ত্রান্সপোর্ত সম্মিৎতা ভারত্তা লাক্লিবা অদোম পুম্নমকপু ঐনা তরাম্না ওকচরি। মসিগী থৌরম অসি ভারত্তা চহি তরাগী খুজিং মরিগী মতুংদা পাংথোক্লি। হায়রিবা চহি তরাগী খুজিং মরি অসিদা ভারত্তা অহোংবা কয়া লাক্লি। ঙসিগী ভারত অসি মমাংদগী হেন্না থাজবা লৈ। ঐখোয়না গ্লোবেল এভিএসন ইকো-সিস্তেমদা অচৌবা কৈথেল অমা ওইবতা নত্তনা পোলিসী লিদরশিপ, ইন্নোবেসন অমসুং ইনক্লুসিব দিবেলপমেন্তকী খুদম অমসু ওইরি। ঙসি ভারত অসি মালেমগী স্পেস-এভিএসন কনভর্জেন্সকী লমদা হৌগৎলক্লিবা লুচিংবা অমা ওইরে। হৌখিবা চহি তরা অসিদা ভারতনা সিভিল এভিএসন সেক্তরদা পুৱারী ওইরবা ফ্লাইৎ অমা পাংথোকখিবা অদুগী মতাংদা অদোম পুম্নমক্না ফজনা খঙনরবনি।
মরুপশিং,
সম্মিৎ অসি, দাইলোগ অসি, এভিএসনগা লোয়ননা মালেমগী ওইবা মতেং পীনবা, ক্লাইমেৎকী অচেৎপা ৱাফমশিং, অমসুং চপ মান্নবা চাউখৎপগী অপুনবা এজেন্দা অসি মাংলোমদা পুখৎনবগী মেদিয়ম অমনি। মীফম অসিদা অদোম্না খন্ন-নৈনরিবা অসি মালেমগী এভিএসনদা অনৌবা মায়োল অমা পীগনি। ঐহাক্না থাজবা থম্লি মদুদি ঐখোয়না সেক্তর অসিগী মশিং য়াম্লবা ওইথোকপা য়াবশিং অদু ফংলগনি অমসুং মখোয়শিং অদু হেন্না ফবা মওংদা শিজিন্নবা ঙম্লগনি।
মরুপশিং,
ঙসিদি ঐখোয়না কিলোমীতর চাম্মগী অরাপ্পা, কন্তিনেন্তেলগী মরক্তা চৎথোক চৎশিন তৌবা, শুপ্নগী পুং খরগী মনুংদা চৎলি। অদুবু, 21শুবা চহি চাগী মালেমগী মংলানশিং, ঐখোয়গী মপুং ফাবা ৱাখল্লোনশিং অসি লেপখিদ্রে। ঙসিদি ইন্নোবেসন অমসুং তেক্নোলোজী অপগ্রেদেসনগী খোঙজেল অসি মমাংদা ওইখিদ্রিঙৈদগী হেন্না খোঙজেল য়াংখৎলে। ঐখোয়গী খোঙজেল য়াঙখৎলকপগা লোয়ননা, ঐখোয়না পাম্লিবা মফমশিং অদুদগী হেন্না লাপ্না চৎলগনি। ঙসিদি ঐখোয়না মালেমগী শহরশিং খক্তদা চৎপগী থৌরাং তৌদবগী তাঙ্কক অদুদা লেপ্লি। ঙসিদি মীওইবনা সিভিল এভিএসনগীদমক মসি হাংদোক্তুনা স্পেস ফ্লাইৎশিং অমসুং ইন্তর-প্লানেতরী মরক্তা চৎথোক-চৎশিন তৌবা কম্মর্সিএল ওইহন্নবগী মঙলান শাগৎলি। মসিগীদমক মতম লৈরি হায়বসি অচুম্বনি। অদুম ওইনমক, মসিনা এভিএসন সেক্তরনা লাক্কদৌরিবা মতমশিংদা কয়া য়াম্না অহোংবা অমসুং অনৌবা থৌওংশিং লাক্কদৌরিবগে হায়বদু উৎলি। ভারত অসি ওইথোকপা য়াবা পুম্নমক্কীদমক শেম-শারি। ঐহাক্না মসিগী য়ুম্ফম অসি ভারত্তা লৈরিবা মপাঙ্গল কনবা য়ুম্বী অহুম অসিনি হায়জরি। অহানবদা - ভারতনা কৈথেল অমা লৈরি। কৈথেল অসি কঞ্জুমর কাংলুপ অমখক্তমক নত্তে, মসি ভারতকী এস্পিরেস্নেল সোসাইতীগী মমি তাই। অনিশুবদা, ঐখোয়গী দেমোগ্রাফী অমসুং তেক্নোলোজী অমসুং ইন্নোবেসনগী তেলেন্ত লৈ। ঐখোয়গী নহাশিং অসি আর্তিফিসিএল ইন্তেলিজেন্স, রোবোতিক্স অমসুং ক্লিন ইনর্জীগুম্বা লমশিংদা খুমাং চাউশিনবা পুরক্লিবা অনৌবা জেনরেসনগী ইন্নোবেতরশিংনি। অহুমশুবদা, ঐখোয়না ইন্দস্ত্রী অসিগীদমক ওপন অমসুং সপ্পোর্তিব পোলিসী ইকোসিস্তেম অমা লৈরি। মপাঙ্গল অহুম অসিগী মতুং ইন্না ঐখোয়না পুন্না ভারতকী এভিএসন সেক্তরবু অনৌবা অৱাংবা থাক্তা পুখৎকদবনি।
মরুপশিং,
চহি কয়া অসিদা, ভারতনা সিভিল এভিএসনগী লমদা মমাংদা অমুক্তা ওইখিদ্রিবা অহোংবা অমা উবা ফংলে। ঙসিদি ভারত অসি মালেমগী খ্বাইদগী চাউবা দোমেস্তিক এভিএসন মার্কেৎশিংগী মনুংদা অহুমশুবনি। ঐখোয়গী উদান য়োজনাগী মাইপাকপা অসি ভারতকী সিভিল এভিএসনগী গোল্দন চেপ্তর অমনি। মসিগী স্কিম অসিগী মখাদা, পেসেঞ্জর মিলিয়ন 15 হেনবনা মমল হোংবা এয়র ত্রেভেলগী খুদোংচাবা ফংখ্রে। নাগরিক কয়া অমনা অহানবা ওইনা এয়র ত্রেভেলগী খুদোংচাবা ফংখ্রে। ঐখোয়গী এয়রলাইন্সশিংসু চাং নাইনা দিজিৎ অনিগী গ্রোথ ফংলি। চহি খুদিংগী, ভারত অমসুং মপানগী এয়রলাইনশিং য়াওনা, পেসেঞ্জর মিলিয়ন 240 রোম্না ভারত্তা ফ্লাইৎ তোংলি। মসিনা মালেমগী লৈবাক অয়াম্বগী অপুনবা মীশিংদগী হেন্না চাওই। অমসুং 2030 ফাওবদা, হায়রিবা মশিং অসি করোর 50, মিলিয়ন 500 ফাওবা য়ৌরগনি হায়না পানরি। ঙসিদি ভারত্তা এয়র কার্গোগী খুত্থাংদা পোৎলম মেত্রিক তন মিলিয়ন 3.5 পুথোক পুশিন তৌরি। দিকেদ অসিগী লোইশিল্লকপদা মসিসু মেত্রিক তন মিলিয়ন 10দা হেনগৎলগনি।
মরুপশিং,
মসি মশীং খক্তা নত্তে, মসি অনৌবা ভারতকী ওইথোকপা য়াবশিংগী খরা খংজিনবনি, অমসুং ওইথোকপা য়াবশিং অসিবু মপুং ফাহন্নবগীদমক ভারতনা ফিউচরস্তিক রোদমেপ অমা শেমগৎলি। ঐখোয়না মালেমগী থাক্কী এয়রপোর্ত ইনফ্রাস্ত্রকচরদা শেল থাদরি। নাইদু জীনা পনখিবগুম্না, 2014 ফাওবদা, ভারতনা ওপরেস্নেল এয়রপোর্ত 74 লৈখি। ঙসিদি, মশিং অসি 162দা হেনগৎখ্রে। ভারতকী কেরিয়রশিংনা অনৌবা এয়রক্রাফত 2000 হেন্না ওর্দর তৌখ্রে। অমসুং মসিদি অহৌবা খক্তনি। ভারতকী এভিএসন সেক্তর অসি খ্বাইদগী শাংবা অমসুং খ্বাইদগী ৱাংবা ফ্লাইৎ লৌবা য়াবা মফমদগী হৌরকপা মফম অমদা লেপ্লি। অমসুং মসিগী ফ্লাইত অসিনা জিওগ্রাফিকেলগী ঙমখৈ খক্তমক লান্থোক্লোই, অদুবু মসিনা মালেম অসিবু সস্তেনেবিলিতী, গ্রীন মোবিলিতী, অমসুং ইক্বেৎ এক্সেসকী মাইকৈদা পুরক্কনি।
মরুপশিং,
ঙসিদি ঐখোয়গী এয়রপোর্তশিংগী হেন্দলিং কেপাসিতী অসি চহি খুদিংগী পেসেঞ্জর মিলিয়ন মঙা য়ৌরে। তেক্নোলোজীগী খুত্থাংদা য়ুজর এক্সপরিয়েন্সকী অনৌবা স্তেন্দর্দশিং শেম্লিবা মালেমগী লৈবাক খরগী মনুংদা ভারতসু অমনি। ঐখোয়না সেফতী, ইফিসিএন্সী অমসুং সস্তেনেবিলিতীদসু চপ মান্ননা মীৎয়েং থম্লি। ঐখোয়না তুংকোইনা চৎনগদবা এভিএসন ফ্যুএলগী মায়কৈদা চংশিল্লি, গ্রীন তেক্নোলোজীশিংদা শেল থাদরি, কার্বোন ফুতপ্রিন্ত হন্থহল্লি, ঐখোয়না গ্রহ অসিগী চাউখৎপা অমসুং সেফতী অনিমক লৈহল্লি।
মরুপশিং,
মফম অসিদা লৈরিবা ঐখোয়গী মপান লৈবাক্কী অতিথীশিংদা দিজি য়াত্রা এপকী মরমদা খঙনবা ঐনা হায়জরি। দিজি য়াত্রা এপ অসি দিজিতেল এভিএসনগী খুদম অমনি। মসি ফেসিএল ভেরিফিকেসন তেক্নোলোজীগী খুত্থাংদা এয়রপোর্তকী এন্ত্রিদগী বোর্দিং গেৎ ফাওবদা অপনবা লৈতনা চৎথোক-চৎশিন তৌনবগী মপুং ফাবা সোলুসন অমনি। মফম অমত্তদা পেপরগী দোক্যুমেন্ত নত্ত্রগা আই.দি. উৎপগী মথৌ তাদে। ঐহাক্না থাজৈ মদুদি ভারতকী অনৌবা খোঙথাংশিং অসি অসিগুম্বা মীশিং য়াম্লবা মীয়ামদা হেন্না ফবা সর্বিসশিং ফংহনবগী এক্সপরিয়েন্স লৈবা লৈবাক কয়াদা কান্নবা পীবা ঙমগনি। মসি গ্লোবেল সাউথকীদমক্তসু ইথিল পীবা ঙম্বা সেক্যুর অমসুং স্মার্ত সোলুসনশিংগী মোদেল অমনি।
মরুপশিং,
ভারতকী এভিএসন সেক্তর অসি য়াম্না থুনা চাউখৎলকপগী অতোপ্পা অচৌবা মরমদি কনসিস্তেন্ত রিফোর্মশিংনি! ভারতপু মালেমগী মেনুফেকচরিং হব অমা ওইহন্নবা ঐখোয়না লৌখৎপা য়াবা খোঙথাং খুদিংমক লৌখৎলি। চহি অসিগী বজেত্তা, ঐখোয়না মিসন মেনুফেকচরিং লাউথোক্লে। চহি অসিদা, শ্রী নাইদুনা ঙরাং হায়খি, ঐখোয়না ভারতকী পার্লিয়ামেন্ততা এয়রক্রাফ ওবজেক্তশিংগী প্রোতেক্সন ওফ ইন্তরেস্ত বিল পাস তৌখ্রে। মসিনা কেপ তাউন কনভেন্সনবু ভারত্তা আইনগী ওইবা শক্তি পীরি। হৌজিক ভারত্তা মালেমগী কম্পনীশিংনা প্লেন লীজ তৌনবগী অনৌবা খুদোংচাবা অমা ফংলে। অদোম পুম্নমক্না গিফৎ সিতীদা পীরিবা দিস্কাউন্তশিংগী মরমদসু খঙনরক্কনি। গিফত সিতীগী ইন্সেন্তিবশিংনা ভারতপু এয়রক্রাফত লিজিংগীদমক পাম্নবা মফম অমা ওইহল্লে।
মরুপশিং,
অনৌবা ইন্দিয়ন এয়রক্রাফ এক্ত অসিনা ঐখোয়গী এভিএসন লোশিং অসি গ্লোবেল বেস্ত প্রাক্তিসশিংগী মতুং ইন্না শেমগৎলি। হায়বদি, ভারত্তা এভিএসন সেক্তরগী আইনশিং অসি লাইবা, রেগুলেসনশিং অসি লাইবা, অমসুং তেক্স স্ত্রকচর অসি লাইবা ওইরে। মরম অদুনা, মালেমগী অচৌবা এভিএসন কম্পনীশিংগীদমক ভারত্তা শেল থাদনবগী অচৌবা খুদোংচাবা অমা ওইরি।
মরুপশিং,
এভিএসন সেক্তরদা চাউখৎলকপা হায়বসিনা অনৌবা ফ্লাইৎশিং, অনৌবা থবকশিং অমসুং অনৌবা ওইথোকপা য়াবশিং লাক্লে তাকই। এভিএসন সেক্তরদা পাইলোৎশিং, ক্রিয়ুশিং, ইঞ্জিনীয়রশিং অমসুং গ্রাউন্দ পর্সনেলশিংগীদমক অনৌবা খুদোংচাবশিং শেম্লে। অতোপ্পা অনৌবা সানরাইজ সেক্তর অমা থোক্লক্লি, হায়বদি MRO মেনতেন্সন, রিপিয়র অমসুং ওভর-হোল ঐখোয়গী অনৌবা MRO পোলিসীশিংনা ভারতপু এয়রক্রাফতগী শেন্নবগী মালেমগী হব অমা ওইহন্নবা খোঙজেল য়াঙখৎহল্লে। 2014দা ভারত্তা MRO ফেসিলিতী 96 লৈরম্মি, ঙসিদি মখোয়গী মশিং অসি 154দা হেনগৎখ্রে। ওতোমেতিক রুতকী মখাদা 100% FDI, GST হন্থহনবা, তেক্স রেস্নেলাইজেসন, অসিগুম্বা খোঙথাংশিংনা MRO সেক্তরদা অনৌবা ইনর্জী পীরি। হৌজিক ঐখোয়গী পান্দমদি 2030 ফাওবদা ভারতপু MROগী হাব ওইনা দোল্লর বিল্লিয়ন মরি ওইহনবা হায়বসিনি।
মরুপশিং,
ঐখোয়না মালেমনা ভারতপু এভিয়েসনগী কৈথেল অমা ওইনা খক্তা নত্তনা ভেল্যু চেনগী লুচিংবা অমা ওইনা উবা পাম্মি। দিজাইনদগী দেলিভরী ফাওবদা, ভারত অসি গ্লোবেল এভিএসন সপ্লাই চেনগী অপুনবা শরুক অমা ওইরক্লি। ঐখোয়গী মাইকৈ চুম্লে, ঐখোয়গী খোঙজেল চুম্লে, মরম অদুনা ঐখোয়না থাজবা থম্লি মদুদি ঐখোয়না খোঙজেল য়াংনা মাংলোমদা চংশিল্লগনি। ঐহাক্না এভিএসন কম্পনী পুম্নমকপু মেক ইন ইন্দিয়াগা লোয়ননা দিজাইন ইন ইন্দিয়াগীদমক পুক্নিং থৌগৎলি।
মরুপশিং,
ভারতকী এভিএসন সেক্তরগী অতোপ্পা মপাঙ্গল ওইরিবা ৱাফম অমদি মসিগী ইনক্লুসিব মোদেলনি। ঙসিদি, ভারতকী পাইলোৎশিংগী 15%দগী হেন্না নুপীশিং ওইরি, মসি মালেমগী চাংচৎতগী শরুক অহুম হেন্না ওইরি। মালেম শিনবা থুংনা কেবিন ক্রিয়ুদা নুপীগী চাংচত্তা শরুক য়াবগী চাং অসি চাদা 70 রোমনি, অদুগা ঐখোয়গীদি চাদা 86রোমনি। ভারতকী MRO সেক্তরদা নুপী ইঞ্জিনীয়রশিংগী মশিং অসি মালেমগী চাংচৎতগী হেন্না হেনগৎলক্লি।
মরুপশিং,
ঙসিদি, এভিএসন সেক্তরগী অতোপ্পা মরু ওইবা কম্পোনেন্ত অমাদি দ্রোন তেক্নোলোজীনি। ভারতনা তেক্নোলোজিকেল এদভান্সমেন্তকীদমক দ্রোন তেক্নোলোজী শীজিন্নরি, অমসুং ঐখোয়না মসিবু শেল-থুম অমসুং খুন্নাইগী ওইবা ইনক্লুজনগী খুৎলাই অমা ওইহল্লে। দ্রোনশিংগী খুত্থাংদা ঐখোয়না নুপীশিংগী সেল্ফ হেল্প গ্রুপশিংবু শক্তি পীরি। মসিনা লৌউ-শিংউ, দেলিভরী অমসুং সর্ভিসশিংদা নুপীশিংগী শরুক য়াবা হেনগৎহনখি।
মরুপশিং,
ঐখোয়না মতম পুম্নমক্তা এভিএসনগী সেফতীদা খ্বাইদগী মরুওইবা পীরি। ভারতনা মসিগী রেগুলেসনশিং অসি I-CAOগী মালেমগী স্তেন্দর্দশিংগা মান্নহনখ্রে। ইকুই কুইদ্রিঙৈদা, I-CAOগী সেফতী ওদিৎনা ঐখোয়গী হোৎনবশিংবু থাগৎপা ফোংদোকখি। এসিয়া-পেসিফিক মিনিস্তরেল কনফরেন্সতা দিল্লী দিক্লারেসন এদোপ্ত তৌবা অসি ভারতকী অচেৎপা থাজবগী খুদম অমনি। ভারতনা মতম পুম্নমক্তা ওপন স্কাইস অমসুং গ্লোবেল কনেক্তিবিতীদা মতেং পাংদুনা লাক্লি। ঐখোয়না চিকাগো কনভেন্সনগী প্রিন্সিপলশিংবু শৌগৎলি। পুম্নমক্কী ওইনা এয়র ত্রাভেল অসি ফংহনগদবা, শেল চংদবা অমসুং সেক্যুর ওইগদবা তুংলমচৎ অমা ঐখোয় পুন্না শেমগৎলসি। ঐহাক্না থাজবা থম্লি মদুদি অদোম পুম্নমক্না এভিএসন সেক্তরবু অনৌবা অৱাংবা থাক্তা পুখৎনবা অনৌবা পাম্বৈশিং পুথোক্কনি। ঐহাক্না অদোমদা য়াইফ-মঙ্গোল পীজরি।
হন্না-হন্না থাগৎচরি।
