ভারত মাতা কী জয়! অসামগী মীয়াম্না পাম্নরবা মুখ্য মন্ত্রী হিমন্তা বিস্ব শর্মাজী, কেন্দ্রগী মন্ত্রীমন্দলদা ঐহাক্কী মরুপশিং সরবানন্দা সোনোৱালজী, হরদীপ সিংহ পুরীজী, অসাম সরকারগী মন্ত্রীশিং, এম.পি.শিং অমসুং এম.এল.এ.শিং অমসুং মফম অসিদা তিল্লিবা মশিং য়াম্লবা ঐহাক্কী ইচিল-ইনাওশিং!
মোই হোমুহ, ওহোমবাসীক ওগোতীয়াকোই, হারোদীয়া দুর্গা পুজার, ওলোগ ওরু হুভেচ্ছা জোনাইশু। মহাপুরুশ শ্রীমোন্তো হনকরদেবোর, জন্মোত্সব, উপোলেখ্যো, গুরুজনার প্রোতি, শ্রদ্ধা নিবেদোন করিইশু।
মরুপশিং,
হৌখিবা নুমিৎ নিনি অসিদা ঐহাক অৱাং নোংপোক্তা লৈজখি। ঐহাক্না অৱাং নোংপোক লমদমদা লাকপা মতমদা, ঐহাক্না অমুক্তা ওইখিদ্রিবা মওংদা মীনুংশি অমসুং থৌজালশিং ফংজৈ। অখন্ননা অসামগী লমদম অসিদা ঐহাক্না ফংলিবা নুংশিবা অসি অঙকপা অমনি। ঐহাক্না ময়াম পুম্নমকপু থম্মোয়দগী নুংঙাইবা ফোংদোকচরি।
মরুপশিং,
ঙসি অসি চাউখৎলবা অসাম, চাউখৎলবা ভারতকী চাউথোকচনীংঙাই ওইবা খোঙচৎকী য়াম্না মরু ওইবা নুমিৎ অমনি। ঙসি অসামদা চাউরাক্না লুপা করোর লিশিং ১৮গী প্রোজেক্তশিং ফংলে। মতম খরগী মমাংদা ঐহাক দরাংদা লৈরম্মি। মফম অদুদা ঐহাক্না কন্নেক্তিবিতী অমসুং হকশেলগা মরী লৈনবা প্রোজেক্তশিংগী উরেপ-উয়ুং তম্বগী খুদোংচাবা ফংখি। হৌজিক মফম অসিদা ইনর্জী সিক্যুরিতীগা মরী লৈনবা প্রোজেক্তশিংগী উরেপ উয়ুং তমখ্রে অমসুং শঙ্গাখ্রে। মসিগী খোঙথাং অসিনা চাউখৎলবা অসামগী লম্বীদা হেন্না মপাঙ্গল কনখৎহল্লগনি।
মরুপশিং,
অসাম অসি ভারতকী ইনর্জী পোতেন্সিএল হেনগৎহল্লিবা লমদম অমনি। মফম অসিদা পুথোকপা পেত্রোলিয়ম প্রদক্তশিংনা লৈবাক অসিগী চাউখৎপা য়াহল্লি। বি.জে.পি. এন.দি.এ. সরকারনা অসামগী মপাঙ্গল অসি অনৌবা অৱাংবা থাক্তা পুখৎনবা হোৎনরি। মসিগী তাঙ্কক অসি য়ৌদ্রিঙৈ মমাংদা, ঐহাক্না মনাক নকপদা লৈবা অতোপ্পা প্রোগ্রাম অমদা শরুক য়াখি। মসিদা ৱাদগী বাইও-ইথানোল পুথোকপা মোদর্ন প্লান্ত অমা শঙ্গাখি। মসি অসামগীদমক্তা চাউথোকচনীংঙাই ওইবা ৱাফম অমনি। ইথানোল প্লান্ত শঙ্গাখিবগা লোয়ননা, পোলি-প্রোপিলিন প্লান্ত অমগী উরেপ উয়ুংসু ঙসি মফম অসিদা তমখ্রে। প্লান্ত অসিনা অসামগী ইন্দস্ত্রীশিং মপাঙ্গল কনখৎহল্লগনি। মসিনা অসামগী চাউখৎ-থৌরাংদা খোঙজেল য়াঙখৎহল্লগনি। মসিনা লৌমীশিং, নহারোলশিং, মীপুম খুদিংমক্কীদমক অনৌবা খুদোংচাবা কয়া লৈহল্লগনি। প্রোজেক্ত কয়া অসিগীদমক ঐনা ময়াম পুম্নমকপু থাগৎচরি।
মরুপশিং,
ঙসিদি ভারত অসি মালেমগী খ্বাইদগী য়াংনা চাউখৎলক্লিবা লৈবাক অমা ওইরে। ভারতনা চাউখৎলকপগা লোয়ননা, ইলেক্ত্রিসিতী, গ্যাস অমসুং ফ্যুলগী ঐখোয়গী মথৌ তাবশিংসু হেনগৎলক্লি। ঐখোয়না অসিগুম্বা পোৎলমশিং অসিগীদমক মপানগী লৈবাকশিংদা মখা পোল্লি। ঐখোয়না মপান লৈবাকশিংদগী থাও অমসুং গ্যাস মশিং য়াম্না পুশিল্লি মসিগীদমক ভারতনা চহি খুদিংগী অতোপ্পা লৈবাকশিংদা লুপা করোর মিলিয়ন কয়া পীবা তাই। ঐখোয়গী শেলনা মপান লমদা থবক পীরি অমসুং মফম অদুদা লৈবা মীওইশিংগী শেন্থোক হেনগৎহল্লি। অসিগুম্বা ফিভম অসি হোংদোকপা তঙাইফদে। মরম অদুনা ভারতনা মশাগী ইনর্জীগী মথৌ তাবশিংদা মশা-মরোমদোম লেপচবগী লম্বীদা চংশিল্লি।
মরুপশিং,
নাকল অমরোমদা, ঐখোয়না লৈবাক অসিদা ক্রুদ ওইল অমসুং গ্যাসকী অনৌবা রিজর্বশিং ফংলি, অদুগা নাকল অমরোমদা, ঐখোয়না গ্রীন ইনর্জীগী কেপাসিতীসু হেনগৎহল্লি। অদোম পুম্নমক্না ঐহাক্না লাল কিল্লাদগী সমুদ্র মন্থন পাংথোকপগী থৌরম পাংথোক্লে হায়বা খঙলমগনি। এক্সপর্তশিংনা হায়রি মদুদি ঐখোয়গী সমুদ্রশিংদসু ওইল অমসুং গ্যাসকী অচৌবা রিজর্বশিং লৈরম্বা য়াই। ঐখোয়না নেস্নেল দিপ ৱাতর এক্সপ্লোরেসন মিসন হৌরগনি। মসিনা মরম ওইরগা রিসোর্সশিং অসি লৈবাক অসিগীদমক কান্নবা ওইগনি অমসুং এক্সপ্লোরেসন তৌবা য়াগনি।
মরুপশিং,
গ্রীন ইনর্জীগী মতাংদসু, ভারতনা গ্রীন ইনর্জী পুথোকপদা খোঙজেল য়াংনা চংশিল্লি। চহি তরাগী মমাংদা, ভারত অসি সোলর পাৱরগী লমদা য়াম্না শোহনা লৈরম্মি। অদুবু ঙসিদি ভারতনা সোলর পাৱরগী লমদা মালেমগী খ্বাইদগী ফবা লৈবাক মঙাগী মনুংদা লৈরে।
মরুপশিং,
অসিগুম্বা অহোংবা মতম অসিদা, ভারতনা থাও অমসুং গ্যাসকী অলতর্নেতিব ওইবা ফ্যুলশিং হেন্না মথৌ তাই। অসিগুম্বা অতোপ্পা পাম্বৈ অমা হায়রগদি ইথানোলনি। ঙসি, মফম অসিদা ৱাদগী ইথানোল শেম্নবা প্লান্ত অমা শঙ্গাখ্রে। মসিনা অসামগী লৌমীশিং, ঐহাক্কী ত্রাইবেলগী ইচিল-ইনাওশিং অমসুং ইমুং-মনুংশিংদা চাউনা কান্নবা ফংহল্লগনি।
মরুপশিং,
বাইও-ইথানোল প্লান্ত অসি চলাইবদা মথৌ তাবা ৱাগীসু থৌরাং তৌরি। সরকারনা মফম অসিগী লৌমীশিংদা ৱা থাবদা মতেং পাংগনি অমসুং ৱাসু লৈগনি। মফম অসিদা বেম্বু চিপ্পিংগা মরী লৈনবা অপীকপা য়ুনিৎশিং লিংখৎকনি। চহি খুদিংগী লুপা করোর ২০০ রোম অসি লমদম অসিদা চাদিং তৌগনি। মফমসিদা লৈরিবা মীওই লিশিং কয়া অমা হায়রিবা পাম্বী অসিদগী কান্নবা ফংলগনি।
মরুপশিং,
ঙসি ঐখোয়না ৱাদগী ইথানোল পুথোক্কনি। অদুবু ময়াম্না মতমদুদা কংগ্রেস সরকারনা ৱা য়ানবা মীবু জেলদা থম্বগী থৌওং তৌরম্বা অদুদি কৈদৌঙৈদসু কাউরোইদবনি। ঐখোয়গী ত্রাইবেলশিংগী নুমিৎ খুদিংগী পুন্সিগী শরুক অমা ওইরিবা ৱা য়ানবদা অথিংবা থমখি। ঐখোয়গী সরকারনা ৱা য়ানবদা থম্বা অথিংবা লৌথোকখ্রে অমসুং ঙসি মসিগী ৱারেপ অসিনা অৱাং নোংপোক্কী মীয়ামদা কান্নবা ফংহল্লে।
মরুপশিং,
ময়াম পুম্নমক্না নুমিৎ খুদিংগী পুন্সিদা প্লাস্তিক্কী পোৎলম কয়া শীজিন্নৈ। ঐখোয়না নুমিৎ খুদিংগী প্লাস্তিক্কী বালতিনশিং, মগশিং, বোলশিং, চৌক্রিশিং, তেবলশিং, পেকেজিংগী পোৎলমশিংগুম্বা পোৎলম কয়া অমা মথৌ তাই। ময়ামনা খঙলি মদুদি পোৎলমশিং অসি পোলী-প্রোপিলিন্না শাবগী মথৌ তাই। ঙসিগী পুন্সি অসি পোলী-প্রোপিলিন য়াওদ্রবদি খল্লুবদা অরুবা ওই। কার্পেৎশিং, থৌরীপশিং, বেগশিং, ফাইবরশিং, মাস্কশিং, মেদিকেল কিৎশিং, তেক্সতাইলশিং, অমসুং অতোপ্পা পোৎলম কয়া অমা মসিদগী শেম্মি। মসি ভেহিকলশিংদা, মেদিকেল অমসুং লৌউ-শিংউগী খুৎলাইশিং শাবদা শীজিন্নৈ। ঙসি, অসামনা পোলি-প্রোপিলিন অসিদগী শেম্বা মোদর্ন প্লান্ত অমা খুদোল ওইনা ফংলগনি, ময়াম্না ফংলগনি। প্লান্ত অসিনা মেক ইন অসাম, মেক ইন ইন্দিয়াগী য়ুম্ফম অদু মপাঙ্গল কনখৎহল্লগনি। অতোপ্পা মেন্যুফেকচরিং ইন্দস্ত্রীশিংদসু মফম অসিদা পুক্নিং থৌগৎকনি।
মরুপশিং,
অসাম অসি গোমোশা, ইরি অমসুং মুগা সিল্ককীদমক্তা খঙনরিবা অদুগুম্না, পোলি-প্রোপিলিনদগী শাবা তেক্সতাইলসু অসামগী আইদেন্তিতীদা হাপচিল্লগনি।
মরুপশিং,
ঙসি ঐখোয়গী লৈবাক অসিনা আত্মনির্ভর ভারত কেম্পেনগীদমক কন্না হোৎনবগী মগুন উৎলি। অসাম অসি মসিগী কেম্পেন অসিগী মরুওইবা সেন্তরশিংগী মনুংদা অমনি। অসামগী ওইথোকপা য়াবা অদুদা ঐহাক্না থাজবা য়াম্না লৈ। মরম অসিনা ঐখোয়না য়াম্না চাউরবা কেম্পেন অমগীদমক অসামবু খনখি। অমসুং মসিগী কেম্পেন অসি সেমিকন্দক্তর মিসননি। অসামগী চা অসি মীখা পোল্লিঙৈ মতমদদি য়াম্না মমিং চৎখিদে, অদুবু অতেনবা মতমগী মনুংদা অসামগী লৈহাও অমসুং অসামগী মীয়াম্না অসামগী চা অসি মালেমগী মিংথোল অমা ওইহনখি। হৌজিক অনৌবা য়ুগ অমা লাক্লে, ভারতনা মশা-মরোমদোম লেপচবা ঙম্নবগীদমক্তা পোৎলম অনি মথৌ তাই, অমনা ইনর্জী অদুগা অতোপ্পা অমনা সেমিকন্দক্তর অমসুং মসিদা অসামনা অচৌবা থৌদাং অমা লৌরি।
মরুপশিং,
ঙসিদি, বেঙ্ক কার্দশিংদগী হৌরগা মোবাইল ফোন, কার, এয়রপ্লান অমসুং স্পেস মিসন ফাওবা, ইলেক্ত্রোনিক্কী খুৎলাই খুদিংমক্কী থৱায় অসি অপিকপা ইলেক্ত্রোনিক চিপ অমদা য়াওরি। করিগুম্বা ঐখোয়না হায়রিবা পোৎলমশিং অসি ভারত্তা পুথোকপা তারবদি, চিপ অসি ঐখোয়গী ওইগদবনি। মসিনা মরম ওইদুনা ভারতনা সেমিকন্দক্তর মিসন হৌদোকখ্রে অমসুং অসামবু মসিগী খ্বাইদগী চাউবা য়ুম্ফম ওইহনখ্রে। মোরিগাওদা সেমিকন্দক্তর ফেক্তরী অমা শাবগী থবক য়াম্না থুনা চত্থরি। মসিগীদমক লুপা করোর লিশিং ২৭ চাদিং তৌরি। মসি অসামগীদমক চাউথোকচনীংঙাই ওইবা ৱাফম অমনি।
মরুপশিং,
কংগ্রেসনা লৈবাক অসিবু মতম কুইনা লৈঙাক্লম্মি। অসামদসু, কংগ্রেসনা চহি তরাগী খুজিং কয়া লৈঙাক পায়দুনা লাক্লি। অদুবু কংগ্রেস সরকারনা লৈঙাক পায়রিঙৈ মতম ফাওবদা, মফম অসিদা চাউখৎপগী খোঙজেল তপথখি অমসুং হেরিতেজ অসিসু অৱাবা কয়া মায়োক্নখি। বিজেপিগী দবল ইঞ্জিন সরকারনা অসামগী অরিবা শক্তম অদু মপাঙ্গল কনখৎহল্লি অমসুং অসামবু মোদর্ন শক্তমগা শম্নহল্লি। কংগ্রেসনা অসাম অমসুং অৱাং-নোংপোক লমদমদা তোঙান-তোঙানবা, হিংসা অমসুং য়ানদবা কয়া অমা পুরকখি। বি.জে.পি.না অসামবু চাউখৎপা অমসুং হেরিতেজগী লমদা মপাঙ্গল লৈরবা রাজ্য অমা ওইহল্লি। ঐখোয়গী সরকার অসিনা অসামীজ লোলবু ক্লাসিকেল লোলগী থাক পীখি। অসামগী বি.জে.পি. সরকারনা অনৌবা নেস্নেল এজুকেসন পোলিসী অসি য়াম্না থুনা থবক ওইনা পাংথোক্লিবা অসিদা ঐহাক নুংঙাইবা ফাওই। মফমসিদা লমদমসিগী লোলশিংদা তাকপী তম্বীবা পুক্নিং থৌগৎলি।
মরুপশিং,
কংগ্রেসনা অৱাং-নোংপোক অমসুং অসামগী অফাওবা মচাশিংবু ইকায় খুম্নবা উৎখিদে। লমদম অসিদা বীর লাসিত বোরফুকানগুম্বা থৌনা ফরবা লান্মীশিং লৈরম্মি, অদুবু কংগ্রেসনা মখোয়দা মখোয়না ফংফম থোকপা ইকায় খুম্নবা অদু পীখিদে। ঐখোয়গী সরকারনা লাসিত বোর্ফুকানগী লিগেসিবু ইকাই খুম্নখি। ঐখোয়না মহাক্কী ৪০০শুবা মপোক কুমওন লৈবাক শীনবা থুংনা পাংথোকখি। ঐখোয়না মহাক্কী পুন্সি ৱারী অসি লোন ২৩দা ফোঙখ্রে। জোরহাৎতা মফম অসিদা ঐহাক্না মহাক্কী অচৌবা মীতম অমা শঙ্গাবগী খুদোংচাবা ফংখি। কংগ্রেসনা নাথৈদুনা থমখিবা ৱাফমশিং ঐখোয়না মাংজিল থানা পুখৎলি।
মরুপশিং,
শিবসাগরগী পুৱারী ওইরবা রংঘর অসি মফম অসিদা কায়থরদুনা লৈরম্মি, ঐখোয়গী সরকারনা মসিবু নৌনা শেমজিনখি। ঐখোয়গী সরকারনা শ্রীমন্ত শঙ্করদেবকী পোক্নফম বতদ্রবাবু মালেমগী থাক্কী তুরিস্ত সেন্তর অমা ওইহন্নবা থবক পায়খৎলি। কাশী বিশ্বনাথ ধাম কমপ্লেক্স অসি বরানসীদা শাগৎখিবগুম, মহাকল মহলোক অসি উজ্জৈনদা শাগৎখিবগুম, ঐখোয়গী সরকারনা অসামদা মা কামাখ্যা কোরিদোরসু শাগৎলি।
মরুপশিং,
অসামগী চৎনবী অমসুং পুৱারীগা মরী লৈনবা খুদম কয়া অমা লৈরি, অসিগুম্বা মফম কয়া অমা বি.জে.পি. সরকারনা অনৌবা মীরোলগীদমক্তা ঙাক-শেন্দুনা থম্লি। মসিনা অসামগী হেরিতেজদা কান্নবা ফংহনবতা নত্তনা অসামদা তুরিজমগী লমদসু হেনগৎলক্লি। অসামদা তুরিজম হেনগৎলক্লিবমখৈ, ঐখোয়গী নহারোলশিংনা থবক হেন্না ফংলগনি।
মরুপশিং,
চাউখৎ-থৌরাংগী থবকশিং অসিগী মরক্তা, অসাম অসি হেনগৎলক্লিবা শিংনবশিং মায়োক্নরি। মসিগী খুদোংচাদবা অসি ইনফিলত্রেসনগী খুদোংচাদবনি। মফম অসিদা কংগ্রেস সরকারনা লৈঙাক পায়রিঙৈদা, মসিনা মীতোপশিংদা লম পীখি অমসুং ইলিগেল ওক্যুপেসনবু ঙাকখি। কংগ্রেসনা ভোৎ বেঙ্ককী লান্না অসামগী দেমোগ্রাফিক বেলেন্স অদু থুগাইখি। হৌজিক বি.জে.পি. সরকারনা অসামগী মীয়ামগা লোয়ননা শিংনবশিং অসি লান্থেংনরি। ঐখোয়না অদোমগী লমশিং অসি ইনফিলত্রেতরশিংদগী নীংতম্বা ফংহল্লে। ঐখোয়গী সরকারনা লম লৈতবা অমসুং মথৌ তাবা ত্রাইবেল ইমুংশিংদা লমগী লিজ পীরি। ঐহাক্না মিসন বসুন্ধরাগীদমক অসাম সরকারবুসু থাগৎপা ফোংদোকচরি। মসিগী মখাদা ইমুং লাখ কয়াদা লমগী লিজ পীখ্রে। অহোম, কোচ রাজবংশী অমসুং গোর্খা কম্ম্যুনিতীশিংগী লমগী হকশিং অসি ত্রাইবেলগী মফম খরদা শকখঙখ্রে অমসুং মখোয়বু প্রোতেক্তেদ ক্লাসকী লিস্ততা য়াওহনখ্রে। বি.জে.পি.না ত্রাইবেল খুন্নাইদা লিশাংশিৎনা চত্থরকখিবা ফত্তবশিং অসি চুমথোক্নবা মপুং ফানা লেপ্লি।
মরুপশিং,
বি.জে.পি. সরকারগী চাউখৎপগী মন্ত্র অমখক্তনি, মন্ত্র অদুদি- নাগরিক দেবো ভাভা: নাগরিক দেবো ভাভা: । মসিনা তাকপদি লৈবাক অসিগী নাগরিকশিংনা খুদোংচাদবা অমত্তা মায়োক্নহল্লোইদবনি, মখোয়না অপীকপা মথৌ তাবশিংগীদমক মফম অমদগী অমদা চৎথোক চৎশিন তৌরোইদবনি। মতম শাংনা কংগ্রেসকী লৈঙাক্কী মতমদা, লায়রবশিং অসি অৱা-অনা কয়া মায়োক্নখি। মরমদি কংগ্রেসকী থবক অসি সেক্সন অমবু পুক্নিং চিংশিন্দুনা পাংথোকই। মখোয়না পাৱর ফংনবগীদমক শিজিন্নরম্মি। অদুবু বি.জে.পি.না এপীজমেন্তগী মহুৎ সেতিসফেক্সনদা মীৎয়েং থমখি। লায়রবা অমত্তা, লমদম অমত্তবু শোত্থনা লৈহনদনবা ৱাখল্লোনগা লোয়ননা ঐখোয়না থবক তৌরি। ঙসি অসামদা, লায়রবশিংগীদমক পক্কাগী য়ুম শাবগী থবকসু খোঙজেল য়াংনা চংশিল্লি। হৌজিক ফাওবদা অসামদা লায়রবশিংদা পক্কাগী য়ুম লাখ ২০ হেন্না পীথখ্রে। অসামদা য়ুমথোং খুদিংদা থক্নবা ঈশিং ফংহন্নবা থবকসু খোঙজেল য়াংনা চত্থরি।
মরুপশিং,
মফম অসিদা লৈরিবা ঐগী ইচিল-ইনাওশিংনসু বি.জে.পি. সরকারগী লায়রবশিংগী য়াইফনবা থৌরাংশিংগী কান্নবা ফংলি। চাগী শিন্মীশিংগী য়াইফ-থৌরাং অসি ঐখোয়গী প্রাইওরিতিনি। সরকারনা চাগী বাগানশিংদা থবক তৌরিবা নুপী অমসুং অঙাংশিংদা মতেং পাংলি। নুপীশিংগী হকশেল অমসুং অঙাংশিংগী মহৈ-মশিং তম্বদা ঐখোয়না অহেনবা মীৎয়েং চংলি। সরকারনা মমা অমসুং অঙাংগী শিবগী চাং হন্থহন্নবা স্কিমশিংসু পায়খৎলি। কংগ্রেস সরকারগী মতমদা, চাগী বাগানগী শিন্মীশিং অসি চাগী কম্পনীশিংগী মেনেজমেন্তকী মখুৎতা লংশিনখি। অদুবু বি.জে.পি. সরকারনা মখোয়গী য়ুমশিং, মখোয়গী য়ুমশিংদা ইলেক্ত্রিসিতী কন্নেক্সন, মখোয়গী য়ুমশিংদা ঈশিং অমসুং মখোয়গী হকশেলগীদমক য়েংশিনবীরি। স্কিমশিং অসিদা লুপা করোর কয়া চাদিং তৌরি।
মরুপশিং,
অসামগী চাউখৎ-থৌরাংগী অনৌবা তাঙ্কক অমা হৌখ্রে। অসাম অসি ললোন-ইতিক অমসুং তুরিজমগী মরু ওইবা মফম অমা ওইরক্লগনি। ঐখোয় পুন্না চাউখৎলবা অসাম, চাউখৎলবা ভারত অমা শেম্লগনি। অমুক্কা হন্না, ঐহাক্না ময়াম পুম্নমকপু চাউখৎ থৌরাংগী প্রোজেক্তশিংগীদমক নুংঙাইবা ফোংদোকচরি। ঐগা লোয়ননা হায়বিয়ু, ভারত মাতা কী জয়! ময়ামগী খুৎ অদু থাংগৎতুনা অমসুং হৌনা ঐগা লোয়ননা হায়বিয়ু, ভারত মাতা কী জয়! ভারত মাতা কী জয়! ভারত মাতা কী জয়! হন্না-হন্না থাগৎচরি!
