দ্বারকাধিস কি-জয় !
দ্বারকাধিস কি-জয় !
দ্বারকাধিস কি-জয় !
দাইজতা লেংশিল্লিবা গুজরাতকী চীফ মিনিস্তর শ্রী ভুপেন্দ্রভাই পতেল, সংসদতা ঐগী মরুপ অমসুং গুজরাত স্তেত ভারতীয় জনতা পার্তিগী প্রসিদেন্ত শ্রী সি.আর পতি, অতোপ্পা শক্নাইরবশিং অমসুং গুজরাতকী ঐগী ইনাওশিং অমসুং ইচলশিং।
অহানবদা, ঐ তরাম্না ওকখিবা ঐগী অহির ইচলশিং ঐনা ইকায়খুম্নবা অমসুং তৌবীমল খঙবা উৎচরি। নুমিৎ খরনিগী মমাঙদা, সোসিএল মেদিয়াদা ভিদিও অমা ভাইরেল চৎখি। অহির ইচল ৩৭,০০০ রোম দ্বারকাদা গর্বা পাংথোকখি অমসুং মীয়াম্না ঐঙোন্দা হায়খি, সার, দ্বারকাদা অহির ইচল ৩৭,০০০ লৈরে। ঐনা হায়খি ‘অদোম গর্বা উরে, অদুবু মসিদা তোপ-তোপ্পা অমা য়াওরি। অহির ইচল ৩৭,০০০ না গর্বা পাংথোকপা মতমদা, মখোয়গী মশাদা য়ামদ্রবদা সনা কিলোগ্রাম ২৫,০০০ শিরমগনি। গর্বা মনুংদা মখোয়গী হকচাংদা সনা কিলোগ্রাম ২৫,০০০ শিরমগনি হায়বা মীয়াম্না খঙবা মতমদা, মখোয় অঙকপা ফাওগনি। ইমাগুম্লবশিংনা ঐ তরাম্না ওকখিবা অমসুং ঐঙোন্দা বর পীখিবগীদমক ঐনা ঐগী কোক নোঞ্জরি অমসুং ঐগী অহির ইচলশিংদা ঐগী তৌবীমল খঙবা উৎচরি।
ভাগবান শ্রী কৃষ্ণগী লমদম দ্বারকা ধামদা ঐনা ইকায়খুম্নবা উৎচরি। ভাগবান শ্রী কৃষ্ণ দেবভুমি দ্বারকাদা দ্বারকাধিস ওইনা লৈখি। মফম অসিদা থোক্লিবা খুদিংমক দ্বারকাধিসকী অনিংবশিং মতুংইন্না পাংথোকপনি। অয়ুক্তা, ঐ লাইশঙদা চৎতুনা লাই খুরুমখ্রে। দ্বারকা অসি চার ধাম অমসুং সাপতা পুরিগী শরুক অমনি। আদি সঙ্করাচার্য়না মফম অসিদা পীথ মরিগী মনুংদা অমা ওইরিবা সরাদা পিথ লিংখৎখি। নাগেশ্বর জয়তিরলিং, রুকমনি দেবী মন্দির মফম অসিদা লৈরি। হন্দক, ঐগী ‘দেস কাজ’(লৈবাক্কী থৌদাংশিং) মরক্তা, ঐ লৈবাক অসিগী তোঙান-তোঙানবা লাইফমশিংদা ‘দেব কাজ’ পাংথোকপগী খুদোংচাবা অমা ফংখ্রে।
ঙসি, ঐ দ্বারকা ধামদা ঈশ্বরগী মঙাল ফংলে। হৌজিক অয়ুক, ঐগী পুন্সিদা লেংদনা লৈহৌরগদবা অতোপ্পা থৌদোক অমা থেংনরে। ইরোন্নুংদা লৈখ্রবা দ্বারকা সহরদা লাই খুরুম্নবা সমুদ্রগী ঈশিং মনুংদা কুমথবগী খুদোংচাব অমা ঐ ফংলে। আর্কিলোজিস্তশিংনা ইরোন্নুংদা লৈখ্রবা দ্বারকা সহরগী মরমদা ইখ্রে। ঐখোয়গী অরিবা লাইরিকশিংদা দ্বারকাগী মরমদা ইখি-
भविष्यति पुरी रम्या सुद्वारा प्रार्ग्य-तोरणा।
चयाट्टालक केयूरा पृथिव्याम् ककुदोपमा॥
অতোপ্পা ৱাহৈশিংদা, সহর অসিদা ফজরবা হোরজংশিং অমসুং অৱাংবা বিল্দিংশিং লৈদুনা মালেমদা খ্বাইদগী ফজবা মফম অমগুম লৈরি। দ্বারকা অসি ভাগবান বিশ্বকর্মা মশামক্না শেমগৎখিবনি হায়না থাজরি। দ্বারকা সহর অসি সহর প্লান তৌবগী অচৌবা খুদম অমনি। ঈশিং মনুংদা লৈখ্রবা দ্বারকা সহরদা লাই খুরুম্নবা ঐনা লুপখিবদা অসি ঈশ্বরগী ওইবা অচৌবা শক্তি অমনা ঐ য়োমশিনবগুম ফাওখি। অধ্যাতিক অমসুং মুৎপা নাইদ্রবা ভক্তিগী অরিবা যুগ অমগা শম্নবগুম ফাওখি। ঐ লাই খুরুমখি অমসুং ঐনা পুরকপা ৱাহোং মতু ঐনা ভাগবান শ্রী কৃষ্ণ দ্বারকাধিসকী মফমদা কৎখি।
চহি কয়া, ঐনা আর্কিওলোজিস্তশিংদগী খঙলকপা মতমদা ঐনা অচৌবা খঙনিংবা অমা ফাওখি। চহি কয়া নিংজরকপা অদু থুংলে। ইরোন্নুংদা লুপখ্রবা দ্বারকা সহরগী মরমদা হেক খঙলকপদগী, ঐ মতম পুম্নমক্তা চৎনিংবা অমসুং খুরুমনিংবগী অপাম্বা লৈখি। চহি কয়া মঙ মঙজরক্লবা মতুংদা অরোইবদা ঐনা শেংলবা লমদম অদু শোকপা ফংবদা ঐ কয়া য়াম্না হরাওরমগনি হায়বদু খন্দুনা য়েংউ।
মরুপশিং,
মহাক্না ইরোন্নুংদা লুপখ্রবা দ্বারকা সহরদা লাই খুরুম্বা মতমদা ঐগী মাঙদা ২১শুবা চহিচাদা ভারতকী তৌবা ঙম্বশিং শক্তমশিং ওইনা চোংথোরকখি। ঐ ঈশিং মনুংদা মতম খর শাংনা লৈখিবদগী ঙসিগী থৌরম অসি থেংখিবনি। সমুদ্রদা লৈরিবা দ্বারকা উরুবদগী, মসিনা বিকসিত ভারত অমা শেমগৎনবা মহাক্কী ৱাশক অমুক্কা হেন্না চেৎশীনহল্লে।
মরুপশিং,
ঙসি, ঐ সুদর্সন সেতু শঙ্গাবগী খুদোংচাবা অমা ফংলে। চহি ৬গী মমাঙদা ঐনা থোং অসি শানবা উরেপ-উয়ুং তম্বগী খুদোংচাবা অমা ফংখি। ঐনা সুদর্সন সেতু ঙসি অয়ুক শঙ্গাখ্রে। থোং অসিনা ওখা মেনলেন্দ অমসুং বৈত দ্বারকা ইথৎ শম্নহনগনি অমসুং দ্বারকাধেস দর্সনগী চৎথোক-চৎশিন হেন্না নুংঙাইহল্লগনি। ঙসি শঙ্গারিবা অমসুং উরেপ-উয়ুং তম্লিবা প্রোজেকশিং অসি মোদীগী গরেন্তিনি। সুদর্সন সেতু অসিনা খুদোংচাহনবা খক নত্তনা, সুদর্সন সেতু অসি ইঞ্জিনিয়ারিংগী অঙকপা অমনি। ইঞ্জিনিয়ারশিংনা থোং অসিগী তেক্নিকেলগী ওইবা হিরমশিং নৈনগদবনি। থোং অসি ভারত্তা খ্বাইদগী শাংবা কেবলগী থোংনি। মসিগী অনৌবা অমসুং ফজরবা থোং অসিগীদমক ঐনা লৈবাক অসিগী মীয়াম থাগৎচরি।
ঙসি, অসিগুম্বা ফজরবা থবক অমা পাংথোক্লিঙৈদা, ৱাখলদা অরিবা নিংশিংবা অমা লাক্লে। রুসিয়াদা অস্ত্রাখান কৌবা লৈবাক অমা লৈরমখি অমসুং গুজরাতকা অস্ত্রাখানগা মরী অমা লৈনখি। ঐনা গুজরাতকী চীফ মিনিস্তর ওইরিঙৈদা, মখোয়না ঐ রুসিয়াগী অস্ত্রাখান্দা বার্ত্তন তৌরিকখি। ঐনা মফম অদুদা চৎপা মতমদা, খ্বাইদগী ফবা কৈথেল, খ্বাইদগী চাউবা মোল, ওখা হায়না মমিং থোল্লম্বদা ঐ অঙকপা ফাওখি। খুদিংমক ওখা হায়না মমিং থোনখি।
ঐনা হংখি ‘ করিগী ওখা হায়না মমিং থোল্লিবনো ?” চহি চা কয়াগী মমাঙদা, মফম অসিদগী মীওই খর ললোন-ইতিক্কী চৎখি অমসুং মফম অসিদগী পুখিবা পোৎ-চৈ খুদিংমক মফম অদুদা খ্বাইদগী ফবনি হায়না খন্নখি। মরম অদুনা, চহি চা কয়াগী মতুংদা ফাওবা, দুকানশিং অমসুং মোলশিং ওখাগী মমিং থোনখি, মফম অসিদগী খ্বাইদগী ফবা পোৎ-চৈ ফংগনি হায়না মীয়াম্না থাজনখি। চহি কয়াগী মমাংদা লৈখিবা ওখা ইকায়খুম্নবা অদু সুদর্সন সেতু শারবা মতুংদা মালেমগী মেপ্তা অমুক হন্না ঙান্থোইরগনি অমসুং ওখাগী মমিং মখা তানা খঙনরগনি।
মরুপশিং,
ঙসি, ঐনা সুদর্সন সেতু উবদা, অরিবা থৌদোক কয়া নিংশিংহল্লে। মমাঙদা, দ্বারকা অমসুং বৈত দ্বারকাগী মীয়াম ফেরি হিশিংগী মপান তাংলমখি। মখোয় য়াম্না লাপ্না অহানবদা সমুদ্রদা অমসুং মথংদা লম্বীদা চৎখি। সমুদ্রগী ইথক য়াম্না ৱাংবা মতমদা ফেরি সর্বিস লেপ্পদগী দ্বারকা অমসুং বৈত দ্বারকাগী মীয়াম্না খুদোংচাদবা কয়া থেংনখি। মসিনা ভক্তশিংদা খুদোংচাদবা কয়া থোকহনখি। ঐনা গুজরাতকী চীফ মিনিস্তর ওইরিঙৈদা থোং অমা শানবা মীয়াম্না হায়জখি। মসিগী থবক অসি ঐনা পাংথোক্কদবনি হায়বগী ৱাখল অমা ঐখোয়গী সিব-সিব, ঐখোয়গী বাবুবাদা লৈখি। ঙসি বাবুবা য়াম্না হরাওবা ঐ উরে।
মরুপশিং,
মতম অদুগী কংগ্রেসনা লুচিংবা কেন্দ্র সরকারদা থোং অসি শানবা ঐনা কয়ারক হায়জখি। অদুবু মখোয়না পুক্নিং চঙনা তাখিদে। ঈশ্বরগী য়াথং ইন্দুনা ঐনা মসিগী থবক অসি পাংথোকপা ঙম্বগীদমক ঐ হরাওই। থোং অসি শাবদগী হৌজিক লৈবাক্কী মফম কয়াদগী লাকপা ভক্তশিং নুংঙাইরগনি। থোং অসিগী অতোপ্পা অখন্নবা শক্তম অমনা, থোং অসিদা পাল্লিবা সোলার পেনেলশিংদগী থোং অসি মৈ থান্নবা ইলেক্ত্রিসিতি শীজিন্নবা অসিনি। পাক্লবা সমুদ্র য়েংনবা থোং অসিদা তুরিস্ত গেল্লরি ১২ য়াওরে। ঙসি ঐনা হায়রিবা গেল্লরিশিং অদু য়েংলে অমসুং মসি তশেংনা সুদর্সানিয়ানি। মীয়াম্না গেল্লরিশিং অসিদগী মপান নাইদ্রবা হিগোক মচুগী সমুদ্র উবা ফংলগনি।
মরুপশিং,
ঙসিগী শেংলবা থৌরম অসিদা, ঐনা দ্বারকাগী মীয়াম থাগৎপা পাম্মী। মখোয়না মফম অসিদা পাংথোক্লিবা লু-নানবগী থবকশিংগী ভিদিওশিং মীওই খরনা ঐঙোন্দা থারকখি। অদোম হরাওবরা? হৌজিক অসুক য়াম্না লু-নানবগী থবকশিং পাংথোকপা অসিদা অদোম অপেনবা ফাওবরা? হৌজিক অদোমগী করি থৌদাং লৈরি? অমুক হেন্না লম শেংনবা ঐ লাক্কদরা? অদোম্না মসি লু-নান্না থমগদরা? অদোমগী খুৎশিং থাংগৎলগা হায়বীয়ু- হৌজিক ঐখোয়না দ্বারকা অমুক হন্না মোৎহল্লরোই। মফম অসিদা মপান লৈবাকশিংগী মীওইশিং লাক্লগনি। ভক্ত কয়া মফম অসিদা লাক্লগনি। মখোয়না লু-নানবা উবদা, মখোয়গী থম্মোয়শিংগী তঙ্খায় অমা অদোম্না জয় তৌরবনি।
চাউখৎলবা ভারত অমা শেমগৎনবা ঐনা মীয়ামদা থাজবা পীবা মতমদা, ওপোজিসনগী মেম্বরশিংগী নুমিৎ খুদিংগী ঐঙোন্দা নোক্নখি। ঙসি মীয়াম্না মখোয়গী মীৎমাংদা অনৌবা ভারত অমা থোরকপা মীয়াম্না উরে। লৈবাক অসিদা মতম শাংনা পানখিবশিং মখোয়গী রাজনিতিগী ৱিল লৈখিদে অমসুং লায়রবশিং মতেং পাংনিংদবদগী মসিগী মাইপাকপশিং অসি হান্না উরমদে। কংগ্রেস দলগী পান্দমদি ইমুং অমা খক য়োকখৎপনি, ইমুং অমা খক্তগী থবক তৌরিবদি, কমদৌনা লৈবাক অমা শেমগৎনবা ৱাখল খনগনি।
কমদৌনা সরকার চহি ৫ চৎহনগনি অমসুং কমদৌনা স্কামশিং নমথগনি হায়বদা মখোয়গী অপুনবা শক্তি শীজিন্নখি। মরম অদুনা ২০১৪গী মমাঙদা, ভারত মালেমদা ১১শুবা খ্বাইদগী চাউবা ইকোনোমি ওইরমখি। ইকোনোমি পীকচরবসু, অসিগুম্বা অচৌবা লৈবাক অমদা অচৌবা মঙলানশিং মঙফাওন্নবা থৌনা লৈরমদে। ইনফ্রাস্ত্রকচরগী বজেত খজিক্তং থমখি অমসুং মখোয়না শেঞ্জা-থুমজা চৎথখি। লৈবাক অসিদা তেলিকোমগী ইনফ্রাস্ত্রকচর শেমগৎলকপা মতমদা, কংগ্রেসনা ২-জি স্কাম চৎথখি। লৈবাক অসিদা শান্নবগী মচাক-মথুমশিং শেমগৎলকপা মতমদা, কংগ্রেসনা কম্মনৱেল্থ স্কাম চৎথখি। কংগ্রেসনা হেলিকোপ্তর অমসুং সবমেরিন স্কামশিং চৎথখি। লৈবাক অসিগী দরকার ওইরকপা খুদিংমক, কংগ্রেস খক্তনা থাজবা মাঙহনখি।
মরুপশিং,
২০১৪ দা অদোমগী থৌজালগা লোয়ননা ঐ দিল্লিদা থারকপা মতমদা, লৈবাক অসি শগুন তৌহল্লোই হায়না ঐনা ৱাশকখি। মমাঙগী সরকারশিংদা লুপা করোর লিশিং কয়াগী স্কামশিং থোকখিবা অদু হৌজিক থিংলে। চহি ১০ অসিদা লৈবাক অসি মালেমদা খ্বাইদগী চাউবা ৫শুবা ইকোনোমি ওইরে। মসিগী ফল ওইনা লাইনিংগী মফমশিং অমসুং লাইফমশিং অমুক হন্না শেমগৎলকপা উরে অমসুং অমরোমদা মেগা প্রোজেকশিংগী খুৎথাংদা অনৌবা ভারত চাউখৎলকপা উরে।
ঙসি,ভারতকী খ্বাইদগী শাংবা কেবলগী থোং গুজরাত্তা লৈরে, লৈবাক অসিগী খ্বাইদগী শাংবা সমুদ্রগী থোং মুম্বাইদা লৈরে, জম্মু অমসুং কাস্মিরদা চেনাবতা নিংথিরবা থোং শারে, ভারতকী অহানবা ভর্তিকেল লিফ ব্রিজ ওইরিবা অনৌবা পামবান থোং তামিল নাদুদা শাগৎলি অমসুং ভারতকী খ্বাইদগী শাংবা থোং অসামদা লৈরে। অসিগুম্বা অনৌবা মতমগী লম্বী-থোং অসিনা নুংঙাই-য়াইফবা অমসুং মপাঙ্গল কনবা লৈবাক অমা শেমগৎকনি।
মরুপশিং,
লম্বী-থোং ফগৎলকপদগী গুজরাত তুরিজমগী মফম অমা ওইরক্লে। হৌজিক গুজরাত্তা সেঙ্কচুরি ২২ অমসুং নেসনেল পার্ক ৪ লৈরি। চহি লিশিং কয়া শুরবা হিথাংফমগী সহর লোথালগী মরমদা মালেম শীনবা থুংনা ৱারিনরে। ঙসি অহমেদবাদ সহর, রানি কি ৱাব, চাম্পানর অমসুং ধোলাবিরা ৱার্ল্দ হেরিতেচ সাইত ওইরে। দ্বারকদা সিবপুরি অসি ব্লু ফ্লেগ বিচ অমনি। গিরনারদা এসিয়াদা খ্বাইদগী শাংবা রোপৱে লৈরে। গির উমং অসি এসিয়াতিক নোংশাগী অমতা ঙাইরবা লৈফমনি। এক্তা নাগরদা মালেমদা খ্বাইদগী ৱাংবা মীতম, সাদার সাহেবকী স্তেচু ওফ য়ুনিতি লৈরে। হৌজিক মালেম শীনবা থুংবগী লমকোয়বা মীওইশিংগী মেলা অমা রনোতসবতা পাংথোক্লি। মালেমদা খ্বাইদগী ফবা তুরিস্ত ভিলেজগী মনুংদা কুছকী ধোরদো খুঙ্গং য়াওরে। নাদেবেত অসি মরৈবাক নুংশিবা অমসুং তুরিজমগী মরুওইবা মফম অমা ওইরে।
‘বিকাস ভি বিরাসত ভি’ লাইৱাগী মতুংইন্না, লাইনিংগী মফমশিং শেমগৎলে। দ্বারকা, সোমনাথ, পবাগাধ, মোধেরা অমসুং অম্বাজি য়াওনা মরুওইবা লাইনিংগী মফমশিংদা খুদোংচাবশিং শেমগৎলে। ভারত্তা লমকোয়বা লাকপা মীওইশিংগী মনুংদা মীওই ৫ দি গুজরাত্তা লাকই। হৌখিবা চহিদা গুজরাত্তা লমকোয়বা মীওই লাখ ১৫.৫ লাকখি। ই-ভিসাগী খুদোংচাবশিংনা গুজরাত্তা লমকোয়বা মীওইশিং য়াম্না লাকহল্লে।
মরুপশিং,
সৌরাস্ত্রাগী লমদম অসি ৱাশক ঙাক্তুনা থবক পাংথোকখিবগী অচৌবা খুদম অমনি। লমদম অসিদা লাকপা খোঙচৎ খুদিংদা অনৌবা থৌনা হাপখি। মতম অমদা সৌরাস্ত্রাগী মীয়াম ঈশিং মরিক অমা ফাওবা ফংনবা হোৎনবদা অৱাবা কয়া মায়োক্নখি অমসুং নমদুনা য়ুম হোংহনখি। সাউনি য়োজনাগী মখাদা সৌরাস্ত্রাগী খুঙ্গং লিশিং কয়াদা লৌউ-শিংউগী অমসুং থক্নবা ঈশিং পীনবা কিমি ১৩০০ শাংবা পাইপলাইনশিং ফুমদুনা থবক হৌবদগী অনৌবা মঙাল ফংলে। লাক্লিবা চহিশিংদা গুজরাতকা লোয়ননা সৌরাস্ত্রা লমদম শীনবা থুংনা চাউখৎপগী অনৌবা থাকশিং য়ৌরগনি। ঐখোয় খুদিংমক্তা দ্বারকাধিসকী থৌজাল ফংলে। অপুনবা ওইনা ঐখোয়না বিকসিত সৌরাস্ত্রা অমসুং বিকসিত গুজরাত শেমগৎকনি।
ঐনা অমুক হন্না ময়াম পুম্নমক মসিগী ফজরবা থোং অসিগীদমক নুংঙাইবা ফোঙদোকচরি। মালেম শীনবা থুংবগী লমকোয়বা মীওইশিং মশিং হেন্না পুক্নিং চিংশিন্নবা ঐনা দ্বারকাগী মীয়ামদা হায়জরি। ঐনা অদোমগী ৱাখল্লোনশিং ইকায়খুম্নবা উৎচরি। ঐগা লোয়ননা হায়মিন্নসি-
দ্বারকাধিস কি-জয় !
দ্বারকাধিস কি-জয় !
দ্বারকাধিস কি-জয় !
ভারত মাতা কি- জয় !
ভারত মাতা কি- জয় !
ভারত মাতা কি- জয় !
অদোম থাগৎচরি !
