বিহারগী রাজ্যপাল, শ্রী রাজেন্দ্রা আর্লেকরজী, রাজ্যসিগী মথৌ কনবা মুখ্য মন্ত্রী, শ্রী নিতিশ কুমারজী, ঐখোয়গী ফোরেন মন্ত্রী, শ্রী এস. জয়শঙ্করজী, ফোরেন এফিয়র্সকী রাজ্য মন্ত্রী, শ্রী পবিত্রজী, তোঙান-তোঙানবা লৈবাক কয়াগী এক্সলেন্সী অমসুং এম্বেসেদরশিং, নালন্দা য়ুনিভর্সিতীগী ভাইস চান্সেল্লর, প্রোফেসর অমসুং মহৈরোইশিং অমদি থৌরম অসিদা শরুক য়ারিবা মরুপ খুদিংমক!
ঐহাক্কী অহুমশুবা তর্মগী ৱাশক লৌবগী অহানবা নুমিৎ ১০গী মনুংদা ঐহাক্না নালন্দাদা চৎপগী খুদোংচাবা ফংজরে। মসিদি তসেংনা লাইবক ফবনি অমসুং ঐহাক্না মসিবু ভারতকী চাউখৎ থৌরাংগী খোঙচৎকী য়াইফরবা খুদম অমা ওইনা উজরি। নালন্দা অসি শুপ্নগী মিং অমখক নত্তে। মসিদি ইকায়খুম্নবগী শক্তাক অমনি। মসিদি ভেল্যু অমনি, মন্ত্র অমনি অমসুং চাউথোকচনীংঙাই অমনি, ৱারী অমনি। লাইরিক কয়া মৈনা তুম্না চাকখ্রবশু, লৌশিংগী মৈরীদি কৈদৌনুংদা মুত্থৎপা ঙম্লোই হায়বগী অচুম্বা ৱাফম অসিগী খুদম নালন্দানা ওইরি। নালন্দা থুগায়খিবনা ভারত্তা অমম্বা লম্বীদা থমখিবনি। হৌজিক্তি, মসিবু অমুক হন্না শেমগৎ শাগৎলবনিনা ভারতকী সনাগী য়ুগ অমুক্কা হন্না হৌরগনি।
মরুপশিং,
মাগী অরিবা অকাই-অতোইগী মনাক্তা নালন্দা অমুক হিংগৎহনবা অসিনা মালেমদা ভারতকী মতিক-ময়াইশিং উৎলগনি, মানা মালেমদা মপাঙ্গল কনবা হ্যুমেন ভেল্যুশিং লৈবা লৈবাকশিংনা পুৱারীবু হিংগৎহন্দুনা অফবা মালেম অমা শেম্বগা ঙম্মি তাক্লগনি। অদুগা মরুপশিং, নালন্দা অসি ভারতকী অরীবা মতম্বু অমুক্কা হন্না হিংৎহনবগী ৱাফমখক নত্তে। মসিগা মালেমগী লৈবাক কয়াগী, মরু ওইনা এসিয়াগী লৈবাকশিংগী হেরিতেজকা মরীশু লৈনরিবনি। য়ুনিভর্সিতী কেম্পস অমা শঙ্গাবদা লৈবাক মশিং য়াম্বনা শরুক য়ারিবা অসি মমাংদা অমুক্তা থোকখিদ্রি। ঐখোয়গী পার্ত্নর লৈবাকশিংনা নালন্দা য়ুনিভর্সিতী অমুক হন্না শাগৎলিবা অসিদা শরুক য়ারি। ঙসিগী থৌরম অসিদা ঐহাক্না অদোম খুদিং অমসুং ভারতকা অনকপা মরী লৈনবা লৈবাকশিংগী মফমদা থম্মোই শেংনা থাগৎচরি। ঐহাক্না বিহারগী মীয়াম্বুশু থাগৎচরি। বিহারনা মশাগী চাউথোকচবগী মতৌ অমুক হন্না হঞ্জিলহন্নবা চাউখৎ থৌরাংগী লম্বীদা খোঙদাবগী মওং অসিবু মসিগী নালন্দা কেম্পস অসিনা ইথিল পীদুনা ওইহল্লিবনি।
মরুপশিং,
নালন্দা অসি মতম অমদা ভারতকী নাৎ অমসুং চৎনবীগী মতিক লৈবা ময়োল অমা ওইরমখি। নালন্দা হায়বা অসিগী ৱাহন্থোক্তি লৌশিং অমসুং এজুকেসনগী লেপ্তবা ইচেল হায়বনি। মসিনা এজুকেসনগী মাইকৈদা লৌখৎপা ভারতকী এপ্রোচ অমসুং ৱাখল্লোন ওইখি। এজুকেসনগী ঙমখৈ লৈতে। মসিনা মশক-মওং পীবগা লোয়ননা ভেল্যু অমসুং ৱাখল-লৌশিং লৈহল্লি। মহৈরোয়শিংনা মখোয়গী শক্তাক অমসুং নেস্নেলিতীশিংগী খেন্নবা থমদনা অরিবা নালন্দা য়ুনিভর্সিতীদা মিং চনখি। লৈবাক অমসুং থাক কয়াগী নহাশিং মফমসিদা মহৈ তম্বা লাক্নখি। মতমগা চুনবা মওংদা নৌনা শঙ্গাখিবা নালন্দা য়ুনিভর্সিতী কেম্পস অসিদা চপ মান্নবা অরিবা চৎনবীশিং মপাঙ্গল কনখৎহনবা মথৌ তাই। নালন্দা য়ুনিভর্সিতীদা হৌজিক লৈবাক 20 হেনবদগী মহৈরোয়শিংনা তম্মিবা অসিদা নুংঙাইবা ফাওই। মসিদি ‘বসুধৈব কুতুম্বকম’গী চপ চাবা খুদম ওইরি।
মরুপশিং,
নালন্দা য়ুনিভর্সিতীনা লাক্কদৌরিবা মতমশিংদা ঐখোয়গী কলচরেল এক্সচেঞ্জকী মরু ওইবা মফম অমা ওইরক্কনি হায়না ঐহাক্না থাজৈ। ভারত অমসুং খা নোংপোক এসিয়াগী লৈবাকশিংগী আর্তকী থবকশিং দোক্যুমেন্ত তৌবগী থবকশিং মফমসিদা পাংথোক্লি। মফমসিদা কম্মন আর্কাইভেল রিসোর্স সেন্তর অমশু শেমগৎলে। নালন্দা য়ুনিভর্সিতীনা এসিয়ন-ইন্দিয়া য়ুনিভর্সিতী নেতৱর্ক অমা শেম্নবা থবক পায়খৎলি। মালেমগী মকোক থোংবা ইন্সতিত্যুত কয়ানা তেল্লবা মতমসিদা মফমসিদা অমত্তা ওইনা পুল্লে। ২১শুবা চহি চাবু এসিয়াগী চহি চা হায়না কৌনরিবা মতমসিদা, মসিগুম্বা পুন্না পাংথোকমিন্নবা থৌওংশিংনা ঐখোয়গী অপুনবা চাউখৎপদা অনৌবা ইনোৎ হাপকনি।
মরুপশিং,
ভারত্তা এজুকেসনবু মীওইবগী য়াইফনবা পাম্বৈ ওইনা লৌবগী চৎনবী লৈ। মীওইবা খুন্নাইবু নুংঙাই য়াইফহন্নবা ঐখোয়না মহৈ তম্লিবনি। ঙসিদগী নুমিৎ নিনিগী মতুংদা জুন ২১দা মালেমগী য়োগ নুমিৎ পাংথোক্কনি। ঙসিদি, য়োগগী মওং চা কয়া ভারত্তা লৈরে। ঐখোয়গী মুনীশিংনা মসিগী মতাংদা য়াম্না কুপা থিজিল্লম্লবনি। অদুবু, কনা অমত্তনা য়োগগী মপুনি হায়না হায়খিবা লৈতে। ঙসিদি মালেম পুম্বনা য়োগবু য়াজরি, অমসুং য়োগ নুমিৎ অসি মালেমগী কুহ্মৈ অমস ওইরে। ঐখোয়না মালেমদা ঐখোয়গী অয়ুর্বেদ পীরে। অয়ুর্বেদ অসি ঙসিদি হকশেল ফনা হিংবা পুন্সি মহিং হায়না উনরি। সস্তেনেবল ওইবা পুন্সি মহিং অমসুং সস্তেনেবল দিভেলপমেন্তকী অতোপ্পা খুদম অমশু ঐখোয়গী মাঙদা লৈরে। ভারতনা চহি চা কয়াদগী সস্তেনেবিলিতী অসিবু পুন্সি মহিং অমা ওইনা হিংদুনা লাক্লি। ঐখোয়না অকোয়বগী ফিভমগা নুংশি চান্ননা চত্তুনা চাউখৎপগী লম্বীদা চত্তুনা লাক্লি। হায়রিবা থৌওংশিং অসিদা য়ুম্ফম ওইরগা ভারতনা মালেমদা মিশন লাইফকুম্বা মীওইবা খুন্নাইবু চাউখৎহনগদবা মিৎয়েং অমা উহল্লি। ইন্তর্নেস্নেল সোলর এল্লাইএন্সকুম্বা ফম্বাক্না তেক্ত কায়দবা তুংগী মতম অমা লৈহনগনি হায়বগী থাজবা পীরি। নালন্দা য়ুনিভর্সিতীগী কেম্পস অসিনা পান্দম অসিবুশু খুমাং চাউশিনহল্লি। মসিদি নেৎ জিরো ইনর্জী, নেৎ জিরো ইমিসন, নেৎ জিরো ৱাতর অমসুং নেৎ জিরোগী মোদেলদা চলায়বা লৈবাক্কী অহানবা কেম্পস ওইরি। “অপ্পো দীপো ভবা” (ইশানা ইশাগী মঙাল ওইবীয়ু)গী মন্ত্র ইন্দুনা, কেম্পস অসিনা মীওইবা খুন্নাইগী মফমদা অনৌবা লম্বী অমা উৎকনি।
মরুপশিং,
এজুকেসন চাউখৎহনবনা ইকনোমী অমসুং কলচরগী হৌরকফম চেৎশিনহল্লি। মসি গ্লোবেল এক্সপরিয়েন্স অমসুং চাউখৎপা লৈবাকশিংগী এক্সপরিয়েন্সতগী লাকখি। 2047 ফাওবদা চাউখৎপা লৈবাক অমা ওইনবা মাগী পান্দম থুংহন্নবা হোৎনরিবা ভারতনা মাগী এজুকেসন সিস্তেমদা অওনবা পুরক্লি। ঐগী পান্দমদি ভারতনা মালেমগী এজুকেসন অমসুং লৌশিংগী সেন্তর ওইরকপনি। ঐগী পান্দমদি ভারতপু অমুক হন্না মালেমগী মশক নাইবা লৌশিংগী সেন্তর অমা ওইনা শকখঙবনি।
অঙাং করোর অমা হেনবদা মতেং পাংলিবা অতল তিঙ্করিং লেবশিং, চন্দ্রয়ান অমসুং গগনয়াননা সাইন্সতা পুক্নিং চীংশিনবা অমসুং স্তার্তঅপ ইন্দিয়ানা চহি অমগী মমাংদা শুপ্নগী লিশিং ১০রোমতা লৈরম্বা অদু হৌজিক ভারত্তা স্তার্তঅপ লাখ ১.৩০ হেন্না লৈহল্লি। পেতেন্তশিং অমসুং রিসর্চ পেপর রেকোর্দ ওইনা ফাইল ওইরি অমসুং রিসর্চ ফন্দ করোর লাখ ১ হেনখ্রে।
মরুপশিং,
খ্বাইদগী এদভান্স ওইবা রিসর্চ-ওরিয়েন্তেদ হায়র এজুকেসন সিস্তেমগা লোয়ননা ভারত্তা মালেমগী ওইনা খ্বাইদগী কম্প্রিহেন্সিব ওইবা অমসুং মপুং ফাবা স্কিলিং সিস্তেম থম্নবা সরকারনা খোঙথাং কয়া পায়খৎলি। গ্লোবেল রেঙ্কিংশিংদা ভারতকী য়ুনিভর্সিতীশিংগী পরফোর্মেন্স হেনগৎলক্লি। হৌখিবা চহি 10দা এজুকেসন অমসুং স্কিল দিবেলপমেন্তগী লমদা হন্দক্তা মায় পাকপা কয়া ফংখ্রে। QS রেঙ্কিংদা 9দগী 46দা হাইগৎলকখি অমসুং তাইমস হায়র এজুকেসন ইম্পেক্ত রেঙ্কিংদা 13দগী 100দা ভারতকী এজুকেস্নেল ইন্সতিত্যুসনশিংগী মশিং হেনগৎলকখি। হৌখিবা চহি 10দা ভারত্তা চয়োল খুদিংগী য়ুনিভর্সিতী অমা লিংখৎলি, নুমিৎ খুদিংগী অনৌবা ITI অমা লিংখৎলি, হুমনি শুবা নুমিৎ খুদিং অতল তিঙ্করিং লেব অমা হাংদোক্লি অমসুং নুমিৎ খুদিংগী অনৌবা কোলেজ অনি হাংদোকখি। ভারত অসি ঙসিদা IIT 23 লৈরে, IIMশিংগী মশিং অসি 13দগী 21দা হেনগৎলে অমসুং AIIMSকী মশিং অসি শরুক অহুম হেনগৎতুনা 22 শুরে। হৌখিবা চহি 10দা মেদিকেল কোলেজ মশিং অসি শরুক অনিরোম হেনগৎখি। এজুকেস্নেল সেক্তরদা রিফোর্মশিং পুরকপগী মতাংদা, অনৌবা এজুকেস্নেল পোলিসী হৌদোকখি অমসুং হায়খি মসিনা ভারতকী নহারোলশিংগী মঙলানশিংদা অনৌবা মায়োল অমা পীরি। ইন্দিয়ন অমসুং ফোরেন য়ুনিভর্সিতীশিং চুংশিন্নবা অমসুং দেকিন অমসুং ৱোল্লোংগোংগুম্বা ইন্তর্নেস্নেল য়ুনিভর্সিতীশিংগী অনৌবা কেম্পসশিং হাংদোকপগী থৌওং পাংথোক্লে। খোঙথাং পুম্নমক অসিগা লোয়ননা ভারতকী মহৈরোয়শিংনা ভারত্তা হায়র এজুকেসনগীদমক অফবা এজুকেস্নেল ইন্সতিত্যুসনশিং ফংলি। মসিনা ঐখোয়গী মিদ্দল ক্লাসকীদমক শেলসু তুংশিনবা ঙমহল্লি।
মরুপশিং,
ঙসিদি, ঐখোয়গী মমিং লৈবা ইন্সতিত্যুতশিংনা মীরমদা মশাগী কেম্পস হাংদোক্লে। হন্দক্কী চহিসিদা IIT দিল্লীনা অবু ধাবীদা কেম্পস হাংদোকখ্রে। IIT মদ্রাসশু মশাগী কেম্পন অমা তাঞ্জানিয়াদা হাংদোকখ্রে। মসিদি ভারতকী ইন্সতিত্যুসনশিংনা মালেমদা শন্দোকপগী থৌওংগী অহৌবনি। নালন্দাগুম্বা য়ুনিভর্সিতীশু মালেমগী মফম খুদিংদা য়ৌবগী মথৌ তারি।
মরুপশিং,
মালেমগী মীৎয়েং অসি ভারতকী নহারোলদা থম্মি। ভারত অসি ভগৱান বুদ্ধগী লমদমনি অমসুং মালেমনা দেমোক্রেসীগী মমাগা খুৎশম্ননা চৎপা পাম্মি। ভারতনা ‘ৱান আর্থ, ৱান ফেমিলী, অমসুং ৱান ফ্যুচর’ হায়বা মতমদা মালেমনা মাগীদমক লেপখি। ভারতনা ‘ৱান সন, ৱান ৱর্ল্দ, ৱান গ্রীদ’ হায়বা মতমদা মসি মালেমগী তুংলমচৎকী লম্বী ওইনা লৌখি। ভারতনা ৱান আর্থ, ৱান হেল্থ হায়বা মতমদা মালেমনা মসিবু ইকাই খুম্নখি অমসুং মাগী ৱাখল্লোন অদু তরাম্না ওকখি। নালন্দগী লমদম অসিনা য়ুনিভর্সেল ব্রদরহুদকী ৱাখল্লোনদা অনৌবা মায়োল অমা পীরি। মরম অসিনা নালন্দগী মহৈরোয়শিংগী থৌদাং অসি য়াম্না চাউই। নালন্দগী মহৈরোয়শিং অমসুং স্কোলরশিংবু ভারতকী তুংলমচৎনি, অমৃত কালগী মথংগী চহি 25 অসি য়াম্না মরু ওইবনি। মখোয়গা লোয়ননা ‘নালন্দগী মওং-মতৌ’ অমসুং নালন্দগী ভেল্যু অদু পুদুনা চৎনবা হোৎনসি। মখোয়দা খঙনীংবা পোক্নবা, থৌনা লৈনবা অমসুং পুম্নমক অসিগী মথকতা মখোয়গী লোগোগী পরিং মখাদা পুকচেল চাউসি। মখোয়দা খুন্নাইদা অফবা অহোংবা অমা পুরক্নবা থবক তৌসি। নালন্দগী লৌশিংনা মীওইবা খুন্নাইদা মাইকৈ তাক্কনি অমসুং নহারোলনা লাক্কদৌরিবা মতমশিংদা মালেম পুম্ববু লমজিংগনি হায়বগী থাজবা লৈ। ঐহাক্না থাজৈ নালন্দনা মালেমগী য়াইফনবা তৌনবা মরু ওইবা সেন্তর অমা ওইরগনি।
থাজবা অসিগা লোয়ননা, ঐহাক্না পুম্নমক্কী মফমদা থম্মোই শেংনা নোলুকচরি। নিতিশজীনা সরকারগী মায়কৈদগী অঙম্বা মতেং পাংনবা থম্লিবা ৱাফম অসিবু ঐহাক্না য়ারি। মসিগুম্বা ৱাখল্লোনগী খোঙচৎ অসিদা পাংবা য়াবা মতেং খুদিংমক ভারত সরকারনা মতম পুম্বদা পাংগনি। ইথিল অসিগা লোয়ননা, ঐহাক্না পুম্নমক্কী মফমদা য়াইফ পাউজেল পীজরি। পুম্নমকপু থাগৎচরি।
