ফম্ফমলাংদা লেংশিল্লিবা গুজরাতকী গভর্নর শ্রী আচার্য় দেবব্রৎ জী, মুখ্য মন্ত্রী শ্রী বিজয় রুপানী জী, কেন্দ্রগী কাউন্দিল ওফ মিনিস্তর্সকী ঐহাক্কা থবক পুমিন্নরিবা শ্রী প্রহলাদ পতেল জী, লোক সভাদা ঐহাক্কা পুল্লিবা শ্রী সি.আর. পাতিল জী, অহামদাবাদকী নৌনা খল্লবা মেয়র শ্রীমান কিরীত সিংহ ভাই, সাবরমতী ত্রস্তকী ত্রস্তী শ্রী কার্তিকেয় সারাভাই জী অমসুং সাবরমতী আশ্রমগীদমক পুন্সি কত্থোক্লবা ইকাই খুম্নরবা অমৃত মোদী জী, লৈবাক পুম্বদগী ঐখোয়গা মরী লৈনবা অথৌবা মীওইশিং, নু্পী অমদি নুপা অমসুং ঐগী নহা ওইরিবা মরুপশিং!
ঙসি অয়ুক ঐহাক্না দিল্লী থাদোকপা মতমদা য়াম্না অঙকপা অমা ওইনা চান্নবা করিগুম্বা অমা থোকখি। অমৃত মহোৎসব হৌদ্রিঙৈ মমাংদা লৈবাক অসিগী কোনুংদা অমৃতকী নোং খিকখি অমসুং বরুন দেবকী থৌজাল ফংজখি। ভারতনা নীংখা তম্বগী ইতিহাসিক ওইরবা মতম উবা ফংজবা ঐখোয় পুম্নমক্কী লাইবক ফবনি। ঙসি দান্দী য়াত্রাগী নীংশিং কুমওন অসিদা ঐখোয়না বাপুগী কর্মস্থানদা পুৱারি ইবা উবসু ফংলি অমসুং মসি পুৱারিগী শরুক অমসু ওইরি। ঙসি অজাদী কা অমৃত মহোৎসবকী অহৌবা ওইদুনা অহানবা নুমিৎ ওইরি। ঙসি অমৃত মহোৎসব অসি ২০২২গী ওগস্ত ১৫গী চয়োল ৭৫ মাংঙোইননা পাঙথোকপা হৌখ্রে অমসুং মসি ২০২৩গী ওগস্ত ১৫ ফাওবা চত্থগনি। ঐখোয়না থাজৈ মদুদি অসিগুম্বা থৌরমনা লাকপা খুদিংদা তর্থাশিং অমত্তা ওইনা পুনশিল্লি। ঙসি জাতি অমা ওইনা ভারতকীদমক মসি শেংলবা থৌরম অমনি। ঙসি ঐখোয়গী নীংতম ইহৌগী শেংলবা খুবম কয়া লৈ, সাবরমতী আশ্রমগা লোইননা মরী লৈনবা শেংলবা মফম কয়া অমা লৈরে।
নীংতম ইহৌগী পন্দোম লোম্বগী খুদম ওইরিবা অন্দমানগী সেল্যুলর জেল, অরুনাচল প্রদেশকী ‘অঙ্গোল-ইন্দিয়া ৱার’গী শাখি ওইরিবা কেকর মোনিংগী লম, মুম্বাইগী ওগস্ত ক্রান্তি মৈদান, পঞ্জাবকী জাতিয়নৱালা বাঘ, উত্তর প্রদেশকী মীরুৎ, কাকোরী অমসুং ঝান্সী, অসিগুম্বা লৈবাক অসিগী মফম কয়াদা অমুক্তদা অমৃত মহোৎসব পাল্লন তৌরি। মসি ভারত পুম্বদা অমুক্তদা মশিং য়াম্লবা ইহৌ, মশিং য়াম্লবা কথোকপা অমসুং মশিং য়াম্লবা তমথিবা মওংশিং অমুক্তদা নৌহৌননা হিংগৎলপাগুম্না ফাওহল্লি। ঐহাক্না অসিগুম্বা শেংলবা নুমিৎ অসিদা বাপুগী খুয়াদা ইকাইখুম্নবা উৎচরি। ঐহাক্না লৈবাক অসিগী নীংতম ইহৌদা চোংথোকখিবা অফাওবা মীওইশিংদা, লৈবাক অসিগী নীংতম ইহৌদা মাংজিল থদুনা লৈবাক অসিবু লুংচিংখিবা লুচিংবশিংদা ইকোক নোন্দুনা ইকাই খুম্নবা উৎচরি। নীংখা তম্লবা মতুংদসু লৈবাক অসিগী ঙাক শেনবগী চৎনবী অসি অদুম হিংহনদুনা থমখিবা, লৈবাক অসি ঙাক্নবা চাউনা কত্থোকখিবা, অথৌবা ওইখিবা ঐখোয়গী থৌনা ফরবা লান্মী পুম্নমক্তসু ইকাই খুম্নবা উৎচরি। নীংখা তম্লবা ভারত শেমগৎপদা চেক অমমম থাদুনা লৈবাক অসিবু চহি ৭৫ অসিদা ফীভম অসি য়ৌহল্লখিবা লায়োইখ্রবা থৱায় পুম্নমক্কী খুয়াদা ইকাই খুম্নবা উৎচরি।
মরুপশিং,
ঐখোয়না মীনাই নাইথং ওইরিঙৈগী চহিচা অদু খল্লুবা মতমদা, মীওই করোর কয়ানা নীংখা তম্বা চহিচাগী অয়ুক অদুবু ঙাইজরকখি মদু ওইথোকপা হেনগৎলক্তুনা নীংখা তম্বগী চহি ৭৪ শুরকপা অসি কয়াদা ইতিহাসিক ওইরিবনো, কয়াদা নীংথিজরিবনো। থৌরম অসিদা হোংবা নাইদ্রবা ভারতকী চৎনবী অদু উৎলি, নীংতম ইহৌগী মমি তারি, অমসুং নীংখা তম্লবা ভারতকী চাউথোকচনিংঙাই ওইবা খুমাং চাউশিনবা অদু উবা ফংলি। মরম অসিনা হৌজিক অদোমগী মাংদা থম্লিবা প্রজেন্তেসন অসিদা অমৃত মহোৎসবকী য়ুম্বী মঙাদা অখন্নবা মীৎয়েং থম্লি। নীংতম ইহৌ, ৭৫গী ৱাখল্লোনশিং, ৭৫গী মাই পাকপশিং, ৭৫গী থবকশিং অমসুং ৭৫কী ফীরেপশিং হায়রিবা য়ুম্বী মঙা অসিনা নীংতম্বগী ইহৌদা ইথিল পীবগা লোইননা নীংতম্লবা ভারতকী মঙলান অমসুং থৌদাংশিং অদু লৈবাক্কী মাংদা থমদুনা মাংজিল থানা চঙশিন্নবা ঙমহনগনি। পাউজেলশিং অসিদা য়ুম্ফম ওইরগা ঙসি ‘অমৃত মহোৎসব’কী ৱেবসাইৎকা লোইননা চরখা অভিয়ান অমসুং আত্মনির্ভর ইনক্যুবেতর লোঞ্চ তৌখ্রে।
ইচিল-ইনাওশিং,
লৈবাক অমগী মশাগী ইকাই খুম্নবা অমসুং কত্থোকপা অদুবু মথংগী চারোন-শুরোনদা তাকপীবা, অমসুং মদুগী চৎনবী অদু পোকহল্লবতদা চাউথোকচবা পোকহনবা ঙম্মি হায়বা অসি পুৱারীনা শাখী ওইরি। লৈবাক অমনা মাগী হৌখিবশিংদগী খঙজিল-হৈজিলহৌবশিং অমসুং হেরিতেজ অদু চাউথোকপগা লোইননা মীকুপ অমগা মীকুপ অমগা শেমজিনরবতদা লৈবাক অদু মঙাল লৈগনি। মতম অদুদা ভারতনা চাউথোকচনবা মমল য়াম্লবা পুৱারি, ফজবা কলচরেল হেরিতেজকী লৈগনি। মরম অসিনা নীংখা তম্বগী চহি ৭৪শুবগী থৌরমগী খুদোংচাবা অসি অমৃত অমগুম্না হৌজিক্কী চারোন অসিদা খুৎশিন্নগনি। মীকুপ খুদিং লৈবাক্কীদমক হিংনবগী, লৈবাক্কীদমক করিগুম্বা খরা তৌনবগী ইথিল পীরিবা অমৃত অমা ওইগনি।
মরুপশিং,
ঐখোয়গী বেদশিংগী ৱাহৈপরেং অদুদি – মৃত্যো: মুক্ষিল মামর্তাত। আর্থদি, ঐখোয়না নুংঙাইতবা, অৱাবা, অচৌবা খুদোংথিবা অমসুং অমাং-অতাদগী অমৃতলোমদা চংশিনবা, ওমোর ওইনবা চংশিনবা হায়বনি। ফীরেপ অসিমক অজাদী কা অমৃত মহোৎসবকীসু ওইরি। অজাদী কা অমৃত মহোৎসব হায়বদি নীংতম্বগী পাঙ্গলগী অমৃত হায়বনি, অজাদী কা অমৃত মহোৎসব হায়বদি – নীংতম লান্মীশিংদগী ফংবা ইথিলগী অমৃত। অজাদী কা অমৃত মহোৎসব হায়বদি অনৌবা ৱাখল্লোনগী অমৃতনি। অনৌবা ফীরেপকী অমৃতনি। অজাদী কা অমৃত মহোৎসব হায়বদি ইরোমদোম লেপচবগী অমৃত অদুনি। মরম অসিনা মহোৎসব অসি জাতিবু মীকপ থোকহন্নবা মহোৎসব অমনি। মহোৎসব অসি সুরাজ্যগী মঙলান অদু মঙ ফাওনবা ঙমহন্নবা মহোৎসব অমনি। মহোৎসব অসি চাউখৎ-থৌরাংগী, মালেমদা শান্তি পুরক্নবা মহোৎসব অমনি।
মরুপশিং,
অমৃত মহোৎসব হৌদোকপা অসি দান্দী খোঙচৎকী নুমিৎ অসিদা ওইররে। ইতিহাসিক ওইরবা মীকুপ অদুবু অমুক হন্না হিংগৎহন্নবা খোঙচৎ অদুসু হৌরগনি। দান্দী খোঙচৎনা পীখিবা শাফু অমসুং পাউজেল অদুগা চপ মান্ননা ঙসি লৈবাক অসিনা অমৃত মহোৎসবকী খুত্থাংদা মাংদা চংশিল্লি অসি ফজনা চান্না থোক্লি। গান্ধীজীগী খোঙচৎ অমনা নীংতম ইহৌবু অনৌবা ইথিলগা লোইননা মীয়ামগা মরী লৈনহনখি। খোঙচৎ অসিনা ঐখোয়গী নীংতম্বগী মতাংদা ভারতকী ৱাখল্লোন অদু মালেম পুম্বদা য়ৌহনখি। মসি ইতিহাসিক ওই অমসুং মসিগী মরমদি বাপুগী দান্দীগী খোঙচৎ অসিদা নীংতম্বগী অপাম্বগা লোইননা ভারতকী ৱাখল্লোন অমসুং ভারতকী চৎনবীশিং অদুসু য়াওখি।
থুম অসি ঐখোয়গী ওইগদবা মমলদা কৈদৌনুংদা লৈখিদে। থুম্না মফম অসিগীদি অশেংবা ওইখি। থুম্না মফম অসিগীদি – থাজবনি। ঐখোয়গীদি থুম্না – অরেপ্পনি। ঐখোয়না হৌজিকসু হায়রি মদুদি লৈবাক অসিগী থুম ঐখোয়না চারি। মসি থুম অসি য়াম্না মমল লৈবা পোৎ অমা ওইবখক্কী নত্তে। মসিগী মরমদি থুম্না পাঙ্গল অমসুং মান্নবগী খুদম ওইবগীনি। মতম অদুদা থুম অসি ভারতকী মরোমদোম লেপচনবগী খুদম ওইখি। ভারতকী মমলশিংগা লোইননা ব্রিতিশনা মরোমদোম লেপচবদা অকাইবা পীখি। ভারতকী মীয়ামদা ইংলেন্দদগী পুশিল্লকপা থুমগী মখা পোনখি। গান্ধীজীনা লৈবাক অসিনা মতম শাংনা খঙদুনা লাকখিবা অৱাবা অসি খঙখি, মীয়ামগী ইহুল খঙখি অমসুং মদুবু ইহৌ অমা ওন্থোকখি।
মরুপশিং,
মসিগা চান্নবা মওংদা তোঙান তোঙানবা ইহৌশিং, তোঙান তোঙানবা থৌদোকশিংগী মশাগী ওইনা নীংতম লানগী ইথিলশিং লৈজৈ, মশাগী ওইবা পাউজেলশিং লৈজৈ, মদু ঙসি ভারতনা পুশিন্নদুনা মাংলোমদা চংশিনবা য়ারগনি। ১৮৫৭তা নীংখা তম্নবগী লান হৌখিবা, মহাত্মা গান্ধীনা মীরৈবাক্তগী হল্লকখিবা, জাতিদা সত্যাগ্রহাগী শক্তি নীংশিংহনখিবা, লোকমান্যা তিলক্না মপুং ফানা নীংখা তম্নবা হৌৎনখিবা, নেতাজী সুভাশ চন্দ্র বসনা লুচিংবা অজাদ হিন্দ ফৌজকী দিল্লীগী মার্চ অমসুং দেল্লী চল্লোগী খোলাউ অসিগুম্বা কয়া অসি ঙসি ভারত মচাশিংনা কাউবা ঙমদে? ১৯৪২গী কাউঙমদ্রবা ইহৌ, ব্রিতিশনা ভারত থাদোক্নবা লাউথোকখিবা, অসিগুম্বা মশিং থিঙমদ্রবা থৌদোক কয়াদগী ঐখোয়না ইথিল, থৌনা-লিংজেল ফংখি। অসিগুম্বা অথৌবা লান্মীশিংবু লৈবাক অসিনা নুমিৎ খুদিংগী ইকাই খুম্নবা উৎলি।
১৯৫৭গী ইহৌগী মঙ্গল পান্দে, তাত্যা তোপেগুম্বা অথৌবশিং ওইরবসু, ব্রিতিশ লান্মীগী মমাংদা অকিবা লৈখিদবা রানী লক্ষ্মীভাই ওইরবসু, কিত্তুরগী রানী চেন্নমা ওইরবসু, রানী গাইদিঙ্গলু ওইরবসু, চন্দ্রশেখর অজাদ, রাম্রসাদ বিস্মিল, বগত সিংহ, সুখদেব, রাজগুরু, অশফাকুল্লা খান্দ, গুরু রাম সিংহ, তিতুস জী, পাউল রামাসামীগুম্বা অথৌবশিং ওইরবসু, নত্ত্রগা পন্দিৎ নেহরু, সরদার পতেল, বাবা সাহেব আম্বেৎকর, সুভাশ চন্দ্র বোস, মৌলানা আজাদ, খান অবদুল গফ্ফার খান্দ, ভীর সাভরকরগুম্বা মশিং থিঙমদ্রবা মীওই কয়া লৈ! মমিং লৈরবা মীওই পুম্নমক অসি নীংতম ইহৌগী লুচিংবশিংনি। ঙসি মখোয়না নীংজরম্বা ভারতব অদু ওইহন্নবা ঐখোয়না মঙলানগী ভারত ওইহন্নবা মখোয়গী ফীরেপশিং অদু পুনশিন্নদুনা ঐখোয়না মখোয়দগী ইথিল লৌরি।
মরুপশিং,
ঐখোয়গী নীংতম ইহৌদা অসিগুম্বা ইহৌ কয়া লৈখ্রে, লৈবাক অসিগী মাংদা ওইফম থোকপা মওংদা হৌখিদবা ইহৌ কয়া লৈবগে। মসিগী ইহৌ অমমম অসি, ইহৌ মশামক্তা ভারতকী মায়োক্তা অরানবশিং তৌবগী মায়োক্তা অচুম্বা পুরক্নবা লাউথোকখি, ইহৌ খুদিংমক অসি ভারতকী নীংতম্বগী মওংশিং অদুগী খুদম ওইরি, ইহৌশিং অসিনা রামগী মতমদা, মহাভারতকী কুরুক্ষেত্রাদা, হলদিঘাতিগী লনফমদা, শিবাজীগী লান্দা ভারতকী মায়োক্তা চত্থখিবা অরানবা, ওৎপী-নৈবীবা অমসুং হিংসাগী খুদম অমসু ওইরি, ভারতকী লমদম খুদিংদা, থাক খুদিংদা অমসুং খুন্নাই খুদিংদা চপ মান্নবা লোইনাইদ্রবা ৱাখল্লোন, চপ মান্নবা নমথবা ঙমদ্রবা থৌনা-লিংজেল অসিগী মখোয়না নীংতম লান শোক্নবা মতমদা মৈরি অসি চুখৎতুনা থমখি। জননি জন্মাভুমিশ্চ, স্বগোদপি গরীয়সী, ঙসিসু মন্ত্র অসিনা ঐখোয়বু ইথিল পীরি।
ঐখোয়গী ইতিহাস অসি য়েংঙু, কোল খোঙজং নত্ত্রগা ‘হো সঙ্গর্শ’ ওইরবসু, খাসি খোঙজং নত্ত্রগা সন্থল ইহৌ ওইরবসু, কছোহা কচার নাগা ইহৌ নত্ত্রগা কুকা খোঙজং ওইরবসু, ভিল খোঙজং ওইরবসু মুন্দা ইহৌ ওইরবসু, সন্যাসী খোঙজং নত্ত্রগা রমোসী ইহৌ ওইরবসু, কিত্তুর খোঙজং, ত্রাবনকোর ইহৌ, বারদোলী সত্যাগ্রহ, চম্পারন সত্যাগ্রহ, সমভলপুর ইহৌ, চুআর ইহী, বুন্দেল ইহৌ, অসিগুম্বা ইহৌ অমসুং খোঙজং কয়াগী মৈরি লৈবাক অসিগী শরুক খুদিংদা চুংখৎখি, তাঙ্কক খুদিংদা নীংতম্বগী মৈরি চুখৎখি। মতম অসিদা ঐখোয়গী সিখ গুরুনা ঐখোয়দা অনৌবা ইথিল পীখি, কত্থোকপগী অমসুং লৈবাক অসিগী কলচর ঙাক্নবা কত্থোকপা, মাগী চৎনবীগী লম্বী তাকখি। ঐখোয়না হঞ্জিন-হঞ্জিন নীংশিংগদবা মসিগী মরু ওইবা হীরম অমসু লৈরি।
মরুপশিং,
নীংতম ইহৌগী মৈরি অসি চুখৎনবা নোংপোক-নোংচুপ-অৱাং-খা, মাইকৈ খুদিংদা, লমদম খুদিংদা ঐখোয়গী লৌশিং লৈবশিং, অথৌবশিং, আচার্য়শিংনা লেপ্তনা হোৎনখি। অমরোমদা ভক্তি ইহৌনা লৈবাক শিনবা থুংবদা নীংতম ইহৌগী ফম্পাক অমা শেমখি। হৌখিবা মতমদা, হায়বদি চৈতন্যা মহাপ্রভু, রাম কৃষ্ণ অমসুং শ্রীমন্ত সাঙ্কর দেবনা সমাজ অসিদা লম্বী উৎখি অমসুং মখোয়গী পন্থুংদা মিয়েং থমখি। নোংচুপ্লোমদা মীরাবাই, এক্নাথ, তুকারাম, রামদাস অমসুং নার্সি মেহতা, অৱাংদা সান্ত রমানন্দ, কাবিরদাস, গোস্বামী তুলসীদাস, সুরদাস, গুরু নানক দেব, সন্ত রৈদাস, খাদা মধবাচার্য়া, নিম্বার্কাচার্য়া, বল্লাভাচার্য়া অমসুং রামানুজাচার্য়ানা লৈখি, ভক্তিগী মতমদা শক্নাইরবা মলিক মোহম্মদ জায়সী, রসখান, সুরদাস, কেশাবদাস অমসুং বিদ্যাপতিনা সমাজ অসিদা লৈরিবা অশোইবশিং শেমদোক্নবা হোৎনখি।
অসিগুম্বা মশক নাইরবা মীওই কয়া অসিনা মরম ওইরগা ইহৌ অসি লমদম অদুগী ঙমখৈ ৱাংবা লানখিদুনা ভারত পুম্বগী মীয়াম য়াওশিনহনখি। মশিং থিঙমদ্রবা নীংতম ইহৌ অসিদা লান্মী, লৌশিং লৈবা কয়া য়াওখি অমসুং অসিগুম্বা থৌনা ফনা কত্থোকখিব অসিনা ইতিহাসতা সনাগী পন্দুপ অমা ওইখি! ঐখোয়না অসিগুম্বা অথৌবশিং, মশক নাইবশিং, মখোয়গী পুন্সিগী ইতিহাস অসিসু লৈবাক অসিগী মাংদা থম্বা মথৌ তাই। মীওইশিং অসিগী পুন্সি ৱারীশিং, মখোয়গী পুন্সিশিংদা থেংনবা অৱাবা, ঐখোয়গী নীংতম ইহৌগী অৱা নুংঙাই, করিগুম্বা মতমদা মাই পাকপা, করিগুম্বা মতমদা মাইথিবা পুম্নমক অসিনা ঐখোয়গী ঙসিগী চারোনদা পুন্সিগী পরা খুদিংমক তাকপী-তম্বীগনি। অপুনবা হায়বা অসি করিনো, পান্দম ফংনবা অকাং কনবা অসি করি-করিনো, পুন্সিগী মচু খুদিং মখোয়না হেন্না ফবা মওংদা খঙবা ঙমগনি।
ইচিল-ইনাওশিং,
অদোমনা নীংশিংলগনি লমদম অসিগী অথৌবা মচানুপা স্যামজী কৃষ্ণ ৱর্মানা ব্রিতিশকী লমদা লৈদুনা মখোয়গী মীৎয়েং মখাদা পুন্সিগী অরোইবা মীকুপ ফাওবা নীংতম্বগী লান শোক্নখি। অদুবু মহাক্কী শরু পোলংনা ভারত ইমাগী তম্পাক য়ৌবা ফংজগদগে হায়না দিকেৎ তরেৎ ঙাইদুনা লৈখি। অরোইবদা ২০০৩দা মীরৈবাক্তী স্যাম জী কৃষ্ণ ৱর্মাগী উৎ অদু ঐহাক্কী লেংজুমদা পুদুনা লাকখি। অসিগুম্বা লান্মী কয়া লৈ, লৈবাক অসিগীদমক লৈজবা পুম্নমক কত্থোকখিবা মীওই কয়া লৈ। লৈবাক অসি শিনবা থুংবদগী দালিৎ, অদিবাসী, নুপী অমসুং নহারোল কয়ানা চাউনা কত্থোকখি। তামিল নাদুদগী চহি ৩২ শুরবা কোদি কথা কুমরন অসি ব্রিতিশনা মকোক্তা নোংমৈনা কাপ্লবা মতুং মহাক্কী শীরমদাই মীকুপ অদু ফাওবা লৈবাক অসিগী ফীরাল লৈবাক্তা তাহন্দনবা হোৎনখিবা অদু নীংশিংঙু। কোদী কাথ হায়বা ৱাহৈ অসি মহাক্কী তামিল নাদুগী মমিংগা মরী লৈনৈ মসিগী অর্থদি ফীরাল কনবা মীওই হায়বনি! তামিল নাদুগী ভেলু নচিয়র অসি ব্রিতিশ লৈঙাক্কী মায়োক্তা লান শোক্নখিবা অহানবা মহারানী ওইখি।
মসিগা মান্না ঐখোয়গী লৈবাক অসিগী ত্রাইবেলগী খুন্নাইনা মীরৈবাক মচাশিংনা লৈঙাকপা অসি নমথনবা মথৌনা মরিংজেল লৈনা লেপ্তনা হোৎনখি। ঝার্খন্দদ বির্সা মুন্দানা ব্রিতিশবু শীংনখি অমসুং মুর্মু মচিল-মনৌশিংনা সন্থল ইহৌ লমজিংগী। ওরিশাদা চাক্রা বিসোইনা ব্রিতিশকী মায়োক্তা লান হৌখি অমসুং লক্ষমন নায়ক্না গান্ধিয়নগী পাম্বৈশিংগী খুত্থাংদা ৱাখল্লোন শন্দোকখি। অন্ধ্র প্রদেশককী মন্যম ভিরুদু হায়বদি উমংগী হিরো, অল্লুরি সিরারম রাজুনা রম্পা খোঙজং লমজিংখি। মিজোরামগী চীংশিংদা পসল্থা খুঙচেরানা ব্রিতিশকী মায়োক্তা লান শোক্নখি। মসিগা মান্না অসাম অমসুং অৱাং নোংপোক্কী গোমধর কোনৱার, লসিৎ বোর্ফুকন অমসুং সীরৎ সিংগুম্বা অতোপ্পা নীংতম লান্মীশিংনা লৈবাক অসিগী নীংখা তম্নবা হোৎনবদা শরুক য়াখি। লৈবাক অসিনা গুজরাতকী বদোদরাগী মনাক্তা জম্বুঘোদাগী লম্বীদা নায়ক ত্রাইবেলশিংদা কত্থোকখিবা অমসুং গোবিন্দ গুরুগী লুচিং মখাদা মানগধতা ত্রাইবেল কয়া তমথীনা পুন্না হাৎখিবা অদু করম্না কাউগনি। মখোয়না কত্থোকখিবা অদু লৈবাক অসিনা নীংশিংদুনা লৈহৌরগনি।
মরুপশিং,
ভারত ইমাগী থৌনা লৈবা মচা নুপাশিং লৈবাক অসিগী কাচিন কোয়া খুদিংদা, খুঙ্গং খুদিংদা লৈ। লৈবাক অসিনা পৱারী য়োকখৎনবা হৌখিবা চহি তরুক অসিদা লেপ্তনা হোৎনদুনা লাক্লি। লৈবাক অসিনা রাজ্য খুদিংদা অমসুং লমদম খুদিংদা মাইকৈ অসিদা হোৎনদুনা লাক্লি। চহি অনিগী মমাংদা দান্দী খোঙচৎকা মরী লৈনবা মফম শেমগৎপা মপুং ফানা লোইখ্রে। থৌরম অসিদা ইশামক্না দান্দীদা চৎপা ফংজবা অসি লাইবক ফবনি। লৈবাক অসিগী অহানবা নীংতম্লবা লৈঙাক্কী মচু অহুমগী ফীরাল অন্দমান্দা নেতাজী সুভাশনা চিংখৎপা মতমদা লৈবাক অসিনা তাবুনুংদা লৈরুরবা পুৱারী অমগী মশক অমা ময়েক শেংনা শেমখি। অন্দমান অমসুং নিকোবারগী ইথৎ অসি নীংতম লান্দগী মমিং লৌদুনা থোনখিবনি। অজাদ হিন্দ সরকারগী চহি ৭৫ মপুং ফাবা অসিদা লাল কিলাদসু থৌরম পাঙথোকখি মচু অহুমগী ফীরাল চিংখৎখি অমসুং নেতাজঈ সুভাশ বাবুদা ইকাই খুম্নবা উৎখি। গুজরাতকী মালেমগী খ্বাইদগী ৱাংবা মীদম ওইরিবা সরদার পতেলনা মহাক্কী ওমোর ওইরবা মগুন অদুবু মালেম পুম্বদা য়ৌহল্লি। জলিয়নৱালা বাঘকী নীংশিং খুবম নত্ত্রগা পাইকা ইহৌগী নীংশিং খুবম ওইরবসু পুম্নমক্কী থবক লোইখ্রে। চহি কয়া অকাউ পরৈ চল্লুরবা বাবা সাহেবকা মরী লঐনবা মফমশিং লৈবাক অসিদা পঞ্চতির্থগী মওংদা শেমগৎখ্রে। মসি পুম্নমক অসিগা লোইননা লৈবাক অসিনা ঐখোয়গী ত্রাইবেলশিংগী ইহৌশিংগী ৱারীশিং অদু তুংগী চারোনশিংদা খঙহন্নবা ত্রাইবেলগী নীংতম লান্মীশিংগী ইতিহাস অদু তাক্নবা ম্যুজিয়মশিং শান্নবা হোৎনখ্রে।
মরুপশিং,
নীংতম্বা ফংলবা মতুংগী চহি ৭৫কী খোঙচৎ অসি নীংতম ইহৌগী ইতিহাসকুম্না হোৎনবা কনবা, অনৌবা ৱাখল্লোন, মীচম প্রজাগী ওন্তোপ্রিনোর্শিপকী মমিং অমনি। ভারত মচা ঐখোয়না লৈবাক অসিদা নত্ত্রগা মীরৈবাক্তা লৈরবসু ঐখোয়গী হোৎনবা কনবা অসিনা ইশাবু মশক তাকখি। ঐখোয়গী সম্বিধানগীদমক ঐখোয়না চাউথোকচৈ। মীপুম খুদিংদা মান্নবা মীৎয়েং য়েংবগী চৎনবীশিং অসিগীদমক ঐখোয়না চাউথোকচৈ। দেমোক্রেসীগী মমা ওইরিবা ভারতনা দেমোক্রেসীগী মপাঙ্গল কনখৎহন্দুনা মাংলোমদা চংশিল্লি। মহাক্না হায় ভারতকী মাই পাকপশিং অসিনা মীওইবা খুন্নাইদা আশা পীরি। মহাক্না মখা তারদুনা হায় ভারতকী চাউখৎ খোঙচৎ অসি আত্মনির্ভারত্তানা থনখি অমসুং মালেম পুম্বগী চাউখৎ খোঙচৎতা শাফু পীরি। লৌশিংনা থল্লবা ভারতনা ঙসি মার্সতগী হৌরগা থা ফাওবা কাবা ঙম্লে। ঙসি ভারতকী লান্মীগী মপাঙ্গল কল্লে অমদি শেল-থুমগী ফীভমদসু খোঙজেল য়াংনা মাংলোমদা চংশিল্লি। ঙসি ভারতকী স্তার্তঅপ ইকোসিস্তেম অসি মালেমনা মীৎয়েং চংনরক্লিবা মফম অমা ওইরক্লে, মসি খন্ন-নৈনবগী হীরম অমা ওইরক্লে। ঙসি মালেমগী ফম্পাক খুদিংদা ভারতকী তৌবা ঙম্বা অমসুং ভারতকী হৈশিংবগী খোন্থাংনা নিল্লে। ঙসি ভারতনা অৱাৎপনা থল্লবা অমম্বা ইরোল নুংদগী থোরক্তুনা করোর ১৩০ হেনবগী অনীংবা-অপাম্বশিং থুংহন্নবা চংশিল্লি।
মরুপশিং,
ভারতনা নীংতমখিবগী চহি ৭৫ শুবা অমদি নেতাজী সুভাশ চন্দ্র বোসকী ১২৫শুবা মপোক কুমওন পুন্না পাঙথোকপা ফংবা অসিসু লাইবক ফবনি। সঙ্গম অসি শুপ্নগী তাং অমা খক্তা নত্তে মসি ভারতকী হৌখ্রবা অমসুং তুংলমচৎকী মঙলানগী অপুনবা অমনি। নেতাজী সুভাশ চন্দ্র বোসনা হায় ভারতনা নীংতম্নবা শোক্নখিবা লান অসি ব্রিতিশ লোইলম লৈঙাক্কী মায়োক্তা খক্তা নত্তনা মালেমগী লৈরিবা লোইলম লৈঙাক পুম্নমক্কী মায়োক্তনি। নেতাজীনা হায় ভারতকী নীংতম্বা অসি মালেমগী মীওইবা খুন্নাইগীদমক মথৌ তাই। মতমগা লোইননা নেতাজীনা হায়রম্বা ৱাফম অদু অচুম্বা ওইরকখি। ভারতনা নীংতম্বা ফংলবা মতুংদা মালেমগী অতোপ্পা লৈবাকশিংদা নীংতম্বগী খোলাউ লাউনরকখি অমসুং অতেনবা মতমগী মনুংদা লোইলম লৈঙাক হন্থরকখি। অমসুং মরুপশিং ঙসিমকসু ভারতনা মাই পাকখিবশিং অসি ঐখোয়গী খক্তা নত্তে মসি মালেম পুম্বদা মঙাল পীগনি , মীওইবা খুন্নাইদা আশাগী মঙাল পীগনি। ভারতকী মরোমদোম চেপচবা ঙম্বনা থল্লবা ঐখোয়গী চাউখৎ থৌরাংগী খোঙচৎ অসিনা মালেম পুম্বগী চাউখৎ থৌরাংগী খোঙচৎতা শাফু পীগনি।
কোরোনাগী মতমদা মসি ঐখোয়গী মাংদা উৎলি। ঙসি মালেম পুম্বনা ভারতনা বেক্সিনশিং শাবদা মরোমদোম লেপচদুনা কান্নবা পীদুনা লাইচৎকী অৱাবা অসিদগী মীওইবা খুন্নাইদা কান্নবা পীরি। ঙসি ভারতনা বেক্সিন কাপ্পা ঙম্লে অসুম্না বসুধৈবা কুতুম্বকমগী মতেংনা ঐখোয়না অৱাবা পুম্নমক ঙাকথোক্নবা হোৎনরি। ঐখোয়না কনাদসু অৱাবা পীদে অদুবু অতোপ্পগী অৱাবা হন্থহন্নবা ঐখোয় ইশানা হোৎনরি। মসি ভারতকী ৱাখল্লোন্নি, মসি ভারতকী লোইবা নাইদ্রবা ফিলোসোফীনি, মসি আত্মনির্ভর ভারতকী ফিলোসোফীনি। ঙসি মালেমগী লৈবাকশিংনা ভারতপু থাগৎনরি, ভারত্তা থাজবা থম্লি। মসি অনৌবা ভারতলৌ নোংঙাল্লকপগী অহানবা মীকুপনি, মসি মঙাল লৈরবা তুংলমচৎকী অহানবা মগুন্নি।
মরুপশিং,
গীতাদা ব্রভু শ্রী কৃষ্ণনা হায় – সম-দুক-সুখম ধিরম স: অমৃতত্বায় কল্পতে’। মসিগী অর্থদি অৱা-নুংঙাই, নুংঙাইবা অমসুং শীংনবশিংগী মরক্তসু পুক্নিং ফাথদুনা অখাং কন্দুনা লৈরবদি মহাক্না শীদহিদাক ফংগনি ওমোর ওইগনি। অমৃত মহোৎসবকা লোইননা ভারতকী মঙাল লৈবা তুংলমচৎতা অমৃত ফংনবা লম্বেলদা মন্ত্র অসিনা ঐখোয়গী ইথিল ওইগনি। লাকও, ঐখোয় পুন্না অচেৎপা ফীরেপকা লোইননা রাস্ত্র য়গদা ঐখোয়গী থৌদাং লৌরসি।
অজাদী কা অমৃত মহোৎসব মনুংদা ইরৈবাকশিংগী সজেসনশিংদগী মখোয়গী অশেংবা আইদিয়াশিংদগী মশিং থীঙমদ্রবা আইদিয়াশিং থোরক্কনি।ঐহাক্না লাকপা মতমদা ঐহাক্কী ৱাখল্লদা করিগুম্বা খরা খল্লি। লৈবাক মীয়াম শরুক য়াদুনা , মীয়ামগা মরী থমদুনা হন্দক্কী অমৃত মহোৎসবলৌ শরুক য়াহৌদবা লৈবাক অসিগী প্রজা অমত্তা লৈহল্লোইদবনি। হৌজিক অপীকপা খুদম অমা পীগে মসি য়েংবীয়ু – হৌজিক স্কুল, কোলেজ পুম্নমক নীংতম্বগী মরী লৈনবা থৌরম ৭৫ পুনশিনগনি, স্কুল খুদিংমক্না মখোয়না নীংতম্বগী থৌর ৭৫ শেমনবা ৱারেপ লৌগনি, কাংলুপ ৭৫ খাইদোক্কনি, থৌরমশিং অসিদা মহৈরোই ৭৫না কাংলুপ ৭৫ শেমগনি অসুম্না স্কুল অমনা মহৈরোই চনিপান, লিশিং, লিশিং অনি পুথোকপা ঙমগনি। ঐখোয়গী স্কুলশিংদা অপীক-অপীকপা অঙাংশিং লৈ, নীংতম ইহৌগা মরী লৈনবা অথৌবা মীওই ৭৫কী লিস্ত অমা শেম্বীয়ু, মখোয়গুম্বা শেৎ চাদুনা মখোয়না হায়রম্বা ৱাহৈ পরেংশিং হায়হন্দুনা কম্পিতিসন তৌহনবা, স্কুলশিংদা ভারতকী মেপ য়েক্তুনা নীংতম ইহৌগা মী লৈনবা মফম ৭৫ মশক খঙদোক্নবা হায়দুনা অঙাংশিংদা ভাই বারদোলী কদাইদা লৈ? চম্পারন কদাইদা লৈ? হায়না হঙগদবনি। লো কোলেজশিংগী মহৈরোইশিংদা অসিগুম্বা থৌদোক ৭৫ খঙদোক্নবা অমসুং নীংতম লানগী মতমদা আইনগী ওইবা লান শোক্নখিবা থৌদোক ৭৫ খঙদোকউ হায়না ঐহাক্না কোলেজ খুদিংদা হায়জগনি, ঐহাক্না লো স্কুল খুদিংদা হায়জগনি। আইনগী ওইনা লান করম্না চত্থখি? আইনগী ওইবা লান শোক্নখিবা মীওইশিং অদু কনা-কনানো? নীংতম লানগী অথৌবশিং কন্নবা কয়াম য়াম্না হোৎনখি? ব্রিতিশ লৈঙাক্কী জুদিসিয়রীনা করম্না তৌখি? ঐখোয়না পুম্নমক অসি ইথোকপা য়াগনি। দ্রামা পাম্বা মীওইশিংনা দ্রামা ইবা য়াগনি। ফাইন আর্তসকী মহৈরোইশিংনা মখোয়বু ঈশৈ শকহন্নিংবা, শৈরাং ইহন্নিংবগী ইথিল পীরিবা লাইশিং য়েকপা য়াগনি। অহৌবদা পুম্নমক অসি খুৎনা ইহনগদবনি। মুংদা মসি দিজিতেল ফোর্ম অমদা পীগনি অমসুং স্কুল-কোলেজ খুদিংমক্না হোৎনরিবা অসি স্কুল-কোলেজ অদুগী লনগী পুকৈ ওইহৌগদবনি। অমসুং থবক অসি ওগস্ত ১৫গী মমাংদা পাঙথোক্কদবনি। য়েংঙু মদুদা মপুং ফবা ৱাখল্লোন অমা শেমগৎপা ঙমগনি। মতুংদা মসি জিলা-জিলাগী, রাজ্য-রাজ্যগী, অমদি লৈবাক শিনবা থুংবগী থৌরমশিং ওইনসু পাঙথোকপা য়াগনি।
ঐখোয়গী নহারোল, ঐখোয়গী স্কোলরশিংনা ঐখোয়গী নীংতম লান্মীশিংগী ইতিহাস ইনবা লৈবাক অসিনা হোৎনরিবশিং থুংহন্নবা মখোয়না থৌদাং লৌগদবনি। নীংতম ইহৌদা অমসুং মদুগী মতুংদসু ঐখোয়গী খুন্নাইগী লৈরিবা মাই পাকপশিং অদু মালেমগী মমাংদা হেন্না অকনবা মওংদা পুথোক্নবা ঐখোয়না হোৎনগনি। ঐহাক্না কলা-সহিত্য, থিএতরগী লম, ফিল্ম ইন্দস্ত্রী অমসুং দিজিতেল এন্তর্তেনমেন্তগা মরী লৈনবা মীওইশিংদা ঐখোয়গী পুৱারীদা চাইথোক্তুনা লৈরিবা তোপ-তোপ্পা ৱারী কয়া অসি মখোয়না থীদোক্তুনা, অমুক হন্না পুরক্নবা, তুংগী চারোনশিংগীদমক শেম শানবা হায়জরি। হৌখিবদগী তমশিলহৌদুনা তুংলমচৎ শেমগৎপদা ঐখোয়গী নহারোকশিংনা থৌদাং লৌফম থোকই। মদু সাইন্স ওইরসু, তেক্নোলোজী, মেদিকেল, পোলিতিক্স, আর্ত নত্ত্রগা কলচর ওইরবসু নখোয়না লৈরিবা লম অমা হেক্তা ওইরবসু অদোমনা লৈরিবা লম অদুগী তুংদা লাক্কদবা মতম অদু করম্না হেন্না ফহনবগী থৌদাং লৌগদবনি।
ঐহাক্না থাজৈ মদুদি ইরৈবাকচা করোর ১৩০না অজাদী কা অমৃত মহোৎসব শরুক য়াবা মতমদা, নীংতম লান্মী মিলিয়ন কয়াদগী ইথিল লৌদুনা, ভারতনা মাগী অচৌবা পান্দমশিং থুংহনবা ঙমগনি। করিগুম্বা ঐখোয়না লৈবাক অসিগীদমক, খুন্নাই অসিগীদমক, ভারত মচা খুদিংমক্কীদমক খোঙথাং অমমম থাংবা তারবদি লৈবাক অসিনা খোঙথাং করোর ১৩০ মাংদা থাংগনি। ভারত অমুক হন্না মরোমদোম লেপচগনি, মালেমদা অনৌবা মাইকৈ তাক্কনি। য়াইফ-পাউজেলশিং অসিগা লোইননা ঙসি দান্দী খোঙচৎকীদমক চৎলিবশিংনা অচৌবা তান্থা য়াওদনা অপীকপা মওংদা চৎপা হৌরি। অদুবু মাংদা চৎনা-চৎনা নুমিৎ হৌখিদুনা ঐখোয়না ওগস্ত ১৫ নকশিল্লক্কনি অমরোমদা মসিনা ভারত পুম্বা কোনশিনগনি। মসিনা অচৌবা থৌরম অমা ওইগনি হায়না ঐহাক্না থাজৈ। প্রজা খুদিংমক্কী অচেৎপা ফীরেপ অমা লৌগনি, সংস্থান খুদিংমক্না অচেৎপা ফীরেপ অমা লৌগনি, সংস্থান খুদিংমক্না লৈবাক অসি মাংদা পুখৎনবা অচেৎপা ফীরেপ অমা লৌগনি। মসি নীংতম্বা পামজরম্বা মীওইশিংদা ইকাই খুম্নবা উৎপগী মওং ওইগনি।
য়াইফ-পাউজেলশিং অসিগা লোইননা ঐহাক্না অমুক হন্না ময়াম পুম্নমকপু য়াম্না য়াম্না থাগৎচরি! ঐহাক্কা লোইননা হায়বীয়ু
ভারত ইমানা..... য়াইফরে! ভারত ইমানা.... য়াইফরে! ভারত ইমানা.... য়াইফরে!
বন্দে... মাতরম! বন্দে... মাতরম! বন্দে... মাতরম!
জয় হিন্দ..... জয় হিন্দ! জয় হিন্দ..... জয় হিন্দ! জয় হিন্দ..... জয় হিন্দ!
